ລັດຖະບານໄທກ່າວວ່າສາມາດຄວບຄຸມສະຖານະການໃນເວລາກຸ່ມເສື້ອແດງໂຮມຊຸມນຸມປະທ້ວງໃຫຍ່ໄດ້
(GMT+08:00) 2010-03-10 16:29:52 cri
ຕາມຂ່າວCRI: ວັນທີ 9 ມີນານີ້, ທ່ານກະສິດ ພິລົມ, ລັດຖະມົນຕີວ່າການກະຊວງການຕ່າງປະເທດໄທກ່າວວ່າ, ຕໍ່ກຸ່ມແນວໂຮມປະຊາທິປະໄຕຕໍ່ຕ້ານຜະເດັດການແຫ່ງຊາດໄທຫຼືກຸ່ມເສື້ອແດງມີແຜນຈະຈັດການໂຮມຊຸມນຸມປະທ້ວງຕໍ່ຕ້ານລັດຖະບານຂະໜາດໃຫຍ່ຢູ່ທີ່ບາງກອກໃນທ້າຍອາທິດນີ້, ລັດຖະບານໄທສາມາດຄວບຄຸມສະຖານະການໄດ້.
ວັນດຽວກັນ, ທ່ານກະສິດໄດ້ລາຍງານສະຖານະການພາຍໃນປະເທດໄທໃຫ້ທູຕານຸທູດ, ອົງການຈັດຕັ້ງສາກົນແລະຜູ້ຕາງໜ້າຂອງສະພາການຄ້າຕ່າງປະເທດປະຈຳຢູ່ໄທ. ທ່ານກະສິດກ່າວວ່າ, ລັດຖະບານໄທຈະຖອດຖອນບົດຮຽນສາກົນເພື່ອຮັບມືກັບການໂຮມຊຸມນຸມຂອງກຸ່ມເສື້ອແດງທີ່ຢູ່ໃຕ້ຂອບກົດໝາຍ. ຂະນະດຽວກັນ, ທ່ານກະສິດຍັງກ່າວວ່າ, ຫວັງວ່າຜູ້ເຂົ້າຮ່ວມການຊຸມນຸມຈະຊຸມນຸມແບບສັນຕິ, ຢ່າກໍ່ຄວາມຮຸນແຮງທີ່ຝ່າຝືນຫຼັກການປະຊາທິປະໄຕ.
