ໃນຂະນະທີ່ມື້ໄຂງານວາງສະແດງໂລກຊຽງໄຮນັບມື້ນັບຫຍັບມໍ່ເຂົ້າມາ, ໃນກອງປະຊຸມສອງສະພາປີນີ້, ງານວາງສະແດງໂລກກາຍເປັນຫົວຂໍ້ທີ່ຜູ່ນຳລະດັບສູງແລະສະມາຊິກສອງສະພາຂອງຈີນໃຫ້ຄວາມເອົາໃຈໃສ່.ທ່ານເວີນເຈ່ຍປາວ, ນາຍົກລັດຖະມົນຕີຈີນໄດ້ກ່າວໃນເວລາຜ່ານບົດລາຍງານວຽກງານຂອງລັດຖະບານວ່າ, ຈະຈັດງານວາງສະແດງໂລກຊຽງໄຮໃຫ້ເປັນງານມະຫະກຳທີ່ສຳເລັດຜົນຢ່າງດີເລີດແລະລືມບໍ່ລົງ, ຈັດເປັນງານມະຫະກຳທີ່ຊຸກຍູ້ການແລກປ່ຽນແລະຮ່ວມມືກັນລະຫວ່າງຈີນກັບປະເທດຕ່າງໆໃນໂລກແລະຮ່ວມກັນພັດທະນາ.ສະມາຊິກສະພາຜູ່ແທນປະຊາຊົນຈຳນວນຫນຶ່ງສະເຫນີວ່າ, ຈີນຄວນສວຍໂອກາດຈັດງານວາງສະແດງໂລກຖອດຖອນບົດຮຽນອັນກ້າວຫນ້າຂອງຕ່າງປະເທດ,ພ້ອມທັງຊຸກຍູ້ການແລກປ່ຽນດ້ານວັດທະນະທຳລະຫວ່າງຈີນກັບຕ່າງປະເທດ.
ນາງຈູ່ກົວຜິງ, ສະມາຊິກສະພາຜູ່ແທນປະຊາຊົນແຫ່ງຊາດຈີນແມ່ນຫົວຫນ້າຄະນະກຳມະການຄຸ້ມຄອງຊຸມຊົນຫົງຊູເຂດຊາງນິງຂອງນະຄອນຊຽງໄຮ,ເຂດທີ່ນາງເຮັດວຽກນັ້ນມີຫລາຍໆຄອບຄົວກຳລັງສະເຫນີຂໍໃຫ້ໄດ້ຄຸນວຸທິເປັນຄອບຄົວຂອງງານວາງສະແດງໂລກ.ເມື່ອຫລາຍປີກ່ອນ,ຂະເຈົ້າກໍ່ເລີ່ມຮຽນພາສາອັງກິດແລະຄວາມຮູ້ກ່ຽວກັບງານວາງສະແດງໂລກ, ແລະຫວັງຢາກໃຫ້ເພື່ອນມິດຕ່າງປະເທດທີ່ໄປຊົມງານວາງສະແດງໂລກນັ້ນເຂົ້າໄປຊົມເຮືອນຂອງເຂົາເຈົ້ານຳ.ນາງເວົ້າວ່າ: "ຊາວເມືອງຊຽງໄຮ້ເຫັນວ່າການກາຍເປັນຄອບຄົວຂອງງານວາງສະແດງໂລກຈະໄດ້ພົບຫນ້າພໍ້ຕາເພື່ອນມິດຢ່າງຫລວງຫລາຍ,ທັງດີໃຈຫລາຍ,ທັງຮູ້ສຶກພາກພຸມໃຈຫລາຍ,ການກາຍເປັນຄອບຄົວທີ່ຕ້ອນຮັບແຂກຕ່າງປະເທດກໍ່ແມ່ນການໄດ້ຮັບລາງວັນໃຫຍ່.
ຫມົດທຸກຄົນຫວັງຢາກເປັນແນວນັ້ນເພາະມັນມີກຽດທີ່ສຸດ."ແນ່ນອນ,ການຍ່າງເຂົ້າຄອບຄົວຂອງປະຊາຊົນສາມັນ,ຮູ້ຈັກວິຖີດຳລົງຊີວິດແລະຮີດຄອງປະເພນີຂອງນະຄອນຊຽງໄຮ້ພຽງແຕ່ແມ່ນຄວາມຮູ້ສຶກສ່ວນໜຶ່ງທີ່ນັກທ່ອງທ່ຽວຕ່າງປະເທດຈະໄດ້ຈາກງານວາງສະແດງໂລກຊຽງໄຮ້.ທ່ານຮົງຮ້າວ,ຜູ່ແທນສະພາປະຊາຊົນແຫ່ງຊາດ,ຫົວໜ້າຄະນະກຳມະການຈັດງານບອກໃຫ້ຮູ້ວ່າ,ງານວາງສະແດງໂລກຊຽງໄຮ້ຈະຈັດ"ເຂດສຳຜັດກັບຕົວເມືອງທີ່ດີທີ່ສຸດ"ເປັນເທື່ອທຳອິດໃນປະຫວັດສາດຂອງງານ ວາງສະແດງໂລກ,ຈະວາງສະແດງແນວຄວາມຄິດທີ່ກ້າວໜ້າແລະແບບຢ່າງອັນດີເລີດດ້ານການພັດທະນາຂອງ50ກວ່າຕົວເມືອງໃນໂລກ;ນອກນີ້,ງານວາງສະແດງໂລກຊຽງໄຮ້ຈະກາຍເປັນເວທີວາງສະແດງໝາກຜົນຂອງການນຳໃຊ້ເຕັກນິກສູງ,ປະເທດຕ່າງໆໃນໂລກຈະສາມາດໃຊ້ເປັນໂອກາດດຳເນີນການແລກປ່ຽນແລະຮ່ວມມືດ້ານວິທະຍາສາດເຕັກນິກ.
ປະຈຸບັນນີ້,ໃນທົ່ວໂລກໄດ້ມີ240ກວ່າປະເທດແລະອົງການຈັດຕັ້ງສາກົນໄດ້ຕົກລົງວ່າຈະເຂົ້າຮ່ວມງານວາງສະແດງ,ຄາດວ່າຈະມີ70ລ້ານເທື່ອເຂົ້າທ່ຽວຊົມ,ໃນນັ້ນມີ3ລ້ານ5ແສນຄົນມາຈາກຕ່າງປະເທດ.ປະຊາຊົນປະເທດຕ່າງໆໃນໂລກເຕົ້າໂຮມກັນຢູ່ນະ ຄອນຊຽງໄຮ້,ແລກປ່ຽນພູມປັນຍາຂອງມະນຸດ,ສຳຜັດກັບວັດທະນະທຳທີ່ມີຫຼາຍສີຫຼາຍສັນ,ພ້ອມກັນຄົ້ນຄວ້າວ່າຈະເຮັດແນວໃດເພື່ອໃຫ້ຊີວິດການເປັນຢູ່ຂອງປະຊາຊົນດີຂຶ້ນໄປຄຽງຄູ່ກັບການພັດທະນາຂອງຕົວເມືອງ.ທູດຕ່າງປະເທດຈຳນວນໜຶ່ງກ່າວວ່າ ຢາກໃຊ້ງານນີ້ເພື່ອເປີດປະຕູ,ໂຄສະນາຄວາມກ້າວໜ້າທາງເຕັກນິກວິທະຍາສາດ,ວັດທະນະທຳແລະແຫຼ່ງທ່ອງທ່ຽວຂອງປະເທດຕົນ.ທ່ານໂຈນ ມີດ ຮັນສ໌ແມນ,ເອອັກຄະລັດຖະທູດອາເມລິກາປະຈຳຈີນກ່າວວ່າ:
ທ່ານກ່າວວ່າ:(Lປ່ອຍສຽງ3 )
"ພວກເຮົາມີຫໍວາງສະແດງທີ່ສວຍງາມທີ່ສຸດ, ພວກເຮົາຈະສ້າງຫໍນີ້ໃຫ້ດີ, ແລະຈັດວາງຢ່າງລະອຽດຮອບຄອບ, ເພື່ອໃຫ້ຫໍວາງສະແດງຂອງອາເມລິກາ ດຶງດູດໃຫ້ປະຊາຊົນຈີນຈຳນວນຫຼວງຫຼາຍ ເຂົ້າມາຊົມ,ເພື່ອຮູ້ຈັກປະເທດແລະວັດທະນະທຳຂອງອາເມລິກາ. "
ທ່ານອົສ໌ມານ ອີໂຣນ,ນັກຂ່າວສຳນັກຂ່າວສານໂລກຂອງຕວກກີ ເຄີຍໄປເອົາຂ່າວໃນງານກິລາໂອລິມປິກປັກກິ່ງປີ 2008, ປີນີ້,ທ່ານຈະມາເອົາຂ່າວໃນງານ ວາງສະແດງໂລກຊຽງໄຮ, ເພື່ອແຈ້ງສະພາບການວາງສະແດງຂອງຕວກກີ ແລະຄວາມຍິ່ງໃຫຍ່ຂອງງານວາງສະແດງໂລກຊຽງໄຮໃຫ້ປະຊາຊົນຕວກກີຊາບ. ທ່ານກ່າວວ່າ: (Lປ່ອຍສຽງ 4)
ຂ້າພະເຈົ້າຈະລາຍງານຂ່າວກ່ຽວກັບສະພາບຂອງງານວາງສະແດງໂລກຊຽງໄຮ, ງານວາງສະແດງໂລກ ແມ່ນງານທີ່ໃຫຍ່ໂຕມະໂຫລານ, ສ່ວນງານວາງສະແດງໂລກຊຽງໄຮ ຈະແມ່ນງານວາງສະແດງໂລກເທື່ອຫນຶ່ງທີ່ມີຂະຫນາດໃຫຍ່ທີ່ສຸດ, ເຊິ່ງ ຈະປະກອບສ່ວນອັນສຳຄັນຕໍ່ນະຄອນຊຽງໄຮແລະຈີນ, ເທື່ອນີ້ແມ່ນງານໃຫຍ່ໂຕມະໂຫລານອີກເທື່ອຫນຶ່ງຂອງຈີນຫຼັງຈາກງານກິລາໂອລິມປິກປັກກິ່ງ.
ນັບຈາກມື້ນີ້ໄປອີກບໍ່ຮອດ 2 ເດືອນ, ງານວາງສະແດງໂລກຊຽງໄຮກໍ່ຈະໄຂຂຶ້ນແລ້ວ ,ເມື່ອຮອດເວລານັ້ນ, ງານວາງສະແດງໂລກຊຽງໄຮ ທີ່ຈະດຳເນີນໄປເປັນເວລາເຄິ່ງປີ ຈະຍິນດີຕ້ອນຮັບເພື່ອນມິດທີ່ມາຈາກປະເທດຕ່າງໆໃນທົ່ວໂລກ.
