ເຮັດວຽກທຸກຢ່າງເພື່ອຄວາມສຸກແລະກຽດສັກສີຂອງປະຊາຊົນ
(GMT+08:00) 2010-03-14 18:31:56 cri
ທ່ານຜູ່ຟັງ,ກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນເຊິ່ງເປັນອົງການອຳນາດແຫ່ງຊາດສູງສຸດຂອງຈີນໄດ້ອັດລົງແລ້ວຢູ່ທີ່ປັກກິ່ງໃນວັນທີ14ມີນານີ້.ໃນເວລາດຳເນີນກອງປະຊຸມເປັນ9ມື້ເຄິ່ງ,ຜູ່ແທນທີ່ມາຈາກແຫ່ງຕ່າງໆຂອງທົ່ວປະເທດຈີນເກືອບ3000ຄົນໄດ້ປະກອບຄຳຄິດຄຳເຫັນແລະຂໍ້ສະເໜີເພື່ອສ້າງແຜນການສຳລັບການພັດທະນາໃນອະນາຄົດຂອງຈີນ,ສ່ວນເປົ້າໝາຍໃນທີ່ສຸດຂອງແຜນການອັນຍິ່ງໃຫຍ່ນີ້ກໍ່ແມ່ນເຮັດໃຫ້ຊີວິດການເປັນຢູ່ຂອງປະຊາຊົນມີຄວາມສຸກກວ່າເກົ່າແລະມີກຽດສັກສີກວ່າເກົ່າ.
"ທຸກສິ່ງທຸກຢ່າງທີ່ພວກເຮົາເຮັດມານັ້ນລ້ວນແຕ່ແມ່ນເພື່ອໃຫ້ຊີວິດການເປັນຢູ່ຂອງປະຊາຊົນມີຄວາມສຸກຫຼາຍກວ່າເກົ່າແລະມີກຽດສັກສີກວ່າເກົ່າ,ເພື່ອໃຫ້ສັງຄົມມີຄວາມຍຸດຕິທຳແລະກົມກຽວກັນກວ່າເກົ່າ."
ໃນພິທີໄຂກອງປະຊຸມປະຈຳປີ2010ຂອງສະພາປະຊາຊົນແຫ່ງຊາດຈີນໃນວັນທີ5ມີນານີ້,ໃນເວລາທ່ານເວິ່ນເຈ່ຍປາວ ນາຍົກລັດຖະມົນຕີຈີນກ່າວຄວາມດັ່ງກ່າວ,ຢູ່ສະຖານທີ່ປະຊຸມມີສຽງຕົບມືຢ່າງຟົດຟື້ນ.ຄຳເວົ້ານີ້ໄດ້ບັນລະຍາຍສຽງໃນໃຈຂອງປະຊາຊົນຈີນທຸກຖ້ວນໜ້າ,ທັງໄດ້ສ່ອງແສງໃຫ້ເຫັນຄວາມສົມບູນແລະຄວາມໝັ້ນໃຈຕົນເອງຂອງລັດຖະບານຈີນ.
ການສະແຫວງຫາຄວາມສຸກແລະກຽດສັກສີໃຫ້ແກ່ປະຊາຊົນແມ່ນເປົ້າໝາຍຂອງລັດຖະບານຈີນທີ່ທຳຄວາມພະຍາຍາມຢ່າງບໍ່ລົດລະເພື່ອໃຫ້ປະກົດຜົນເປັນຈິງ..ເມື່ອໄດ້ດຳເນີນການປະຕິຮູບແລະໄຂປະຕູຕໍ່ພາຍນອກເປັນເວລາ30ກວ່າປີ,ເສດຖະກິດຈີນພັດທະນາຢ່າງວ່ອງໄວ,ປະຊາຊົນມີຄວາມຮູ້ສຶກທີ່ມີຄວາມສຸກແລະກຽດສັກສີເພີ່ມຂຶ້ນຢ່າງຫຼວງຫຼາຍ.ແຕ່ຍັງມີຫຼາຍບັນຫາຕ້ອງຄອຍຖ້າການແກ້ໄຂ.ຕົວຢ່າງເຊັ່ນຊ່ອງຫວ່າງລະຫວ່າງຄົນທຸກກັບຄົນຮັ່ງເປີດກວ້າງອອກ,ໃນດ້ານເຮືອນຢູ່,ການປິ່ນປົວພະຍາດ,ການປະກອບອາຊີບ,ການສຶກສາ,ຕຸລາການຍັງມີສະພາບການທີ່ບໍ່ຍຸດຕິທຳແລະບໍ່ສົມເຫດສົມຜົນ,ອັນໄດ້ກະທົບເຖິງການຮັບຮູ້ຂອງມວນຊົນທີ່ມີຕໍ່ຄຳວ່າ"ມີຄວາມສຸກແລະກຽດສັກສີ".
ການເຮັດໃຫ້ປະຊາຊົນມີຊີວິດການເປັນຢູ່ທີ່ມີຄວາມສຸກແລະມີກຽດສັກສີຫຼາຍກວ່າເກົ່າ,ພື້ນຖານສຳຄັນທີ່ສຸດແມ່ນຢູ່ນຳເສດຖະກິດ.ປີນີ້,ຈີນສະເໜີອອກມາວ່າຈະເລັ່ງລັດຫັນປ່ຽນຮູບການພັດທະນາເສດຖະກິດ,ປັບປຸງອົງປະກອບຂອງເສດຖະກິດ,ກ່ຽວກັບເລື່ອງນີ້,ທ່ານຊິນສ້ຽວຢິງ ນັກວິຊາການທີ່ມີຊື່ສຽງຂອງຈີນຊີ້ອອກວ່າ:
"ການຫັນປ່ຽນຮູບການພັດທະນາເສດຖະກິດ,ກ່ອນອື່ນມັນຈະສ້າງຜົນປະໂຫຍດໃຫ້ແກ່ປະຊາຊົນໂດຍທົ່ວໄປ.ມີພຽງແຕ່ກຸ່ມຄົນທີ່ມີລາຍໄດ້ຕ່ຳແລະເຂດແຄວ້ນທີ່ດ້ອຍພັດທະນານັ້ນເສດຖະກິດດີຂຶ້ນ,ຊີວິດການເປັນຢູ່ຂອງປະຊາຊົນມີລະດັບຮັ່ງມີຂຶ້ນສົມຄວນແລ້ວ,ຄວາມຮູ້ສຶກມີຄວາມສຸກແລະມີກຽດສັກສີຂອງປະຊາຊົນຈິ່ງເພີ່ມຂຶ້ນຢ່າງຫຼວງຫຼາຍ."
ການເຮັດໃຫ້ປະຊາຊົນມີຊີວິດການເປັນຢູ່ທີ່ມີຄວາມສຸກແລະມີກຽດສັກສີຫຼາຍກວ່າເກົ່າ,ຄວນສຸມໃສ່ບັນຫາຊີວິດການເປັນຢູ່ຂອງປະຊາຊົນ.ໃນກອງປະຊຸມຂ່າວຂອງກອງປະຊຸມປະຈຳປີ2010ຂອງສະພາປະຊາຊົນແຫ່ງຊາດຈີນ,ເຈົ້າໜ້າທີ່ກະຊວງເຮືອນຢູ່ແລະການກໍ່ສ້າງຕົວເມືອງແລະຊົນນະບົດ,ກະຊວງສາທາລະນະສຸກແລະພາກສ່ວນຕ່າງໆຂອງຈີນໄດ້ທະຍອຍກັນໃຫ້ທັດສະນະກ່ຽວກັບບັນຫາລາຄາເຮືອນ,ການປະຕິຮູບການປິ່ນປົວແລະຮັກສາສຸຂະພາບ,ການປະກອບອາຊີບແລະການສຶກສາ,ໃຫ້ຄຳໝັ້ນສັນຍາວ່າຈະພະຍາຍາມລົງເລິກປະຕິບັດມາດຕະການຕ່າງໆເພື່ອປັບປຸງຊີວີດການເປັນຢູ່ຂອງປະຊາຊົນໃຫ້ດີຂຶ້ນ,ບັນຫາຈຸດສຸມທີ່ປະຊາຊົນໃຫ້ຄວາມສົນໃຈນຳເຊັ່ນການປະຕິຮູບລະບຽບການແບ່ງປັນລາຍໄດ້,ເປີດກວ້າງການປະກອບອາຊີບ,ບູລະນະລະບົບປະກັນສັງຄົມໃຫ້ສົມບູນຂຶ້ນ,ເລັ່ງລັດຊຸກຍູ້ການປະຕິຮູບການປິ່ນປົວແລະຮັກສາສຸຂະພາບ,ອອກແຮງພັດທະນາວຽກງານການສຶກສາແລະອື່ນໆລ້ວນແຕ່ຖືກຈັດເປັນບັນຫາທີ່ລັດໃຫ້ບູລະມະສິດເພື່ອສຸມກຳລັງແກ້ໄຂ.
ປີນີ້,ຮ່າງຍັດຕິດັດແກ້ກົດໝາຍວ່າດ້ວຍການເລືອກຕັ້ງທີ່ໄດ້ຮັບການສຳຫຼວດພິຈາລະນາແລະຮັບຮອງໃນກອງປະຊຸມປະຈຳປີຂອງສະພາປະຊາຊົນແຫ່ງຊາດຈີນໄດ້ກຳນົດໄວ້ຢ່າງຈະແຈ້ງວ່າ,ຈະເລືອກຕັ້ງຜູ່ແທນສະພາປະຊາຊົນຂອງຕົວເມືອງແລະຊົນນະບົດໃນອັດຕາສ່ວນເທົ່າກັນ.ນີ້ໝາຍຄວາມວ່າ,ໃນດ້ານສິດເລືອກຕັ້ງຢ່າງສະເໝີພາບຂອງປະຊາຊົນ,ໄດ້ກຳຈັດຄວາມແຕກຕ່າງກັນລະຫວ່າງຕົວເມືອງກັບຊົນນະບົດ,ບັນລຸການມີສິດສະເໝີພາບຢ່າງແທ້ຈິງ.
ການເຮັດໃຫ້ປະຊາຊົນມີຊີວິດການເປັນຢູ່ທີ່ມີຄວາມສຸກແລະມີກຽດສັກສີຫຼາຍກວ່າເກົ່າ,ແມ່ນຄຳໝັ້ນສັນຍາຢ່າງເຄັ່ງຂຶມຂອງລັດຖະບານຈີນ,ຍິ່ງແມ່ນຄວາມປາຖະໜາແລະຄວາມສະແຫວງຫາຂອງປະຊາຊົນຈີນທຸກຖ້ວນໜ້າ.ອັນໄດ້ສ່ອງແສງໃຫ້ເຫັນທ່າອ່ຽງໃໝ່ແຫ່ງການພັດທະນາຂອງຈີນໃນອະນາຄົດ,ຂໍແຕ່ເຕົ້າໂຮມສະຕິປັນຍາແລະກຳລັງວັງຊາຂອງປະຊາຊົນທົ່ວປະເທດ,ປະຊາຊົນຈີນຍ່ອມຈະດຳລົງຊີວິດຢ່າງມີຄວາມສຸກແລະມີກຽດສັກສີຫຼາຍກວ່າເກົ່າ.
