ຕາມຂ່າວ cri:ຕອນເຊົ້າວັນທີ 15 ມີນານີ້, ກຸ່ມແນວໂຮມປະຊາທິປະໄຕຕໍ່ຕ້ານຜະເດັດການແຫ່ງຊາດໄທຫລືກຸ່ມເສື້ອແດງທີ່ສະຫນັບສະຫນູນທ່ານທັກສິນຊິນນະວັດ,ອະດີດນາຍົກລັດຖະມົນຕີໄທໄດ້ຍ້າຍບ່ອນຊຸມນຸມຈາກໃຈກາງນະຄອນຫລວງບາງກອກໄປສູ່ຄ້າຍທະຫານທີ 11 ຂອງກອງທະຫານບົກທີ່ຢູ່ພາກເຫນືອ, ສືບຕໍ່ເພີ່ມແຮງກົດດັນໃຫ້ແກ່ລັດຖະບານ,ແລະຮຽກຮ້ອງໃຫ້ຍຸບສະພາຜູ່ແທນລາດຊະດອນ.ແຕ່ມື້ດຽວກັນ, ທ່ານອະພິສິດ ເວດຊາຊີວະ,ນາຍົກລັດຖະມົນຕີໄທໄດ້ປະຕິເສດຢ່າງເປີດເຜີຍຕໍ່ຄວາມຮຽກຮ້ອງຂອງກຸ່ມແນວໂຮມປະຊາທິປະໄຕຕໍ່ຕ້ານຜະເດັດການແຫ່ງຊາດໄທແລະຜູ່ສະຫນັບສະຫນູນຂອງເຂົາຢ່າງເປັນທາງການ.ຜູ່ວິເຄາະເຫັນວ່າ, ການຕໍ່ສູ້ລະຫວ່າງກຳລັງການເມືອງຝ່າຍຕ່າງໆຂອງໄທຈະດຸເດືອດຂຶ້ນຕື່ມອກີ.
ການຊຸມນຸມປະທ້ວງຕ້ານລັດຖະບານທີ່ກຸ່ມແນວໂຮມປະຊາທິປະໄຕຕໍ່ຕ້ານຜະເດັດການແຫ່ງຊາດໄທແລະກຸ່ມເສື້ອແດງແມ່ນເລີ່ມແຕ່ວັນທີ 12 ມີນານີ້ມາ, ໃນວັນທີ 14 ໄດ້ຮຸນແຮງຂຶ້ນ.ໃນມື້ວັນທີ 14,ກຸ່ມເສື້ອແດງປະມານ 1 ແສນຄົນໄດ້ຊຸມນຸມປະທ້ວງຢູ່ຂົວຜ່ານຟ້າລີລາດ,ຮຽກຮ້ອງໃຫ້ລັດຖະບານຍຸບສະພາ.ຕອນເຊົ້າວັນທີ 14, ກຸ່ມແນວໂຮມດັ່ງກ່າວໄດ້ຍື່ນຄຳຂາດ 24 ຊົ່ວໂມງໃຫ້ແກ່ທຳນຽບລັດຖະບານ,ຮຽກ ຮ້ອງໃຫ້ລັດຖະບານຍຸບສະພາພາຍໃນ 24 ຊົ່ວໂມງ. ຕອນແລງ 5 ໂມງປາຍໃນມື້ດຽວກັນ, ຜູ່ນຳຂອງກຸ່ມແນວໂຮມດັ່ງກ່າວໄດ້ຈັດກອງປະຊຸມຂ່າວຢູ່ສະຖານທີ່ຊຸມນຸມ,ໄດ້ອະທິບາຍສາເຫດທີ່ຮຽກຮ້ອງໃຫ້ຍຸບສະພາຄືດັ່ງນີ້:ລັດຖະບານຊຸດປະຈຸບັນບໍ່ໄດ້ມາຈາກການເລືອກຕັ້ງຢ່າງປະຊາທິປະໄຕ, ຂາດປະສົບການແລະຄວາມສາມາດໃນການຄຸ້ມຄອງບໍລິຫານປະເທດ;ສະພາກໍ່ບໍ່ໄດ້ປະຕິບັດຫນ້າທີ່ທີ່ຄວນຈະເຮັດ, ປະຫມາດເນື້ອໃນຫລາຍບ່ອນທີ່ບໍ່ສົມເຫດສົມຜົນທີ່ລະບຸໄວ້ໃນລັດຖະທຳມະນູນສະບັບໃຫມ່.ແລະສາເຫດອື່ນໆ.ຕອນເຊົ້າວັນທີ 15 ມີນານີ້, ພາຍໃຕ້ການຮຽກຮ້ອງຂອງຜູ່ນຳກຸ່ມແນວໂຮມປະຊາທິປະໄຕຕໍ່ຕ້ານຜະເດັດການແຫ່ງຊາດໄທ,ສະມາຊິກຂອງກຸ່ມເສື້ອແດງໄດ້ຂີ່ລົດຈັກແລະລົດກະບະສິນຄ້າເດີນທາງໄປສູ່ຄ້າຍທະຫານທີ 11 ຂອງກອງທະຫານບົກຂອງໄທທີ່ຕັ້ງຢູ່ພາກເຫນືອຂອງບາງກອກ, ເພື່ອໂຮມຊຸມນຸມປະທ້ວງຕໍ່ໄປ.
ຄ້າຍກົມທະຫານລາບທີ 11 ຮັກສາພະງໄທຫ່າງຈາກຂົວຜ່ານຟ້າລີລາດເຊິ່ງເປັນສູນໂຮມຊຸມນຸມຂອງກຸ່ມເສື້ອແດງປະມານ 20 ກິໂລແມັດ, ແມ່ນສຳນັກງານໃຫຍ່ຂອງ"ສູນຂະບວນການຮັກສາສັນຕິພາບ". ນີ້ແມ່ນລັດຖະບານໄທຕັ້ງຂຶ້ນເພື່ອຮັບມືກັບການໂຮມຊຸມນຸມ. ຕາມສື່ມວນຊົນໄທລາຍງານວ່າ, ໃນໄລຍະກຸ່ມເສື້ອແດງໂຮມຊຸມນຸມ, ທ່ານອະພິສິດ ເວດຊາຊີວະ, ນາຍົກລັດຖະມົນຕີໄທ, ທ່ານສຸເທບ ເທືອກສຸບັນ, ຮອງນາຍົກລັດຖະມົນຕີໄທທີ່ຮັບຜິດຊອບວຽກງານຄວາມປອດໄພແລະພົນເອກອະນຸພົງ ເຜົ່າຈິນດາ, ຜູ້ບັນຊາການ ທະຫານບົກເປັນຕົ້ນລ້ວນແຕ່ຈະພັກຢູ່ອົງການດັ່ງກ່າວຊົ່ວຄາວ.
ໂດຍປະເຊີນກັບແຮງກົດດັນທີ່ບໍ່ຂາດສາຍຂອງກຸ່ມເສື້ອແດງຕໍ່ລັດຖະບານ, ຕອນເຊົ້າວັນທີ 15 ມີນານີ້, ທ່ານອະພິສິດ, ນາຍົກລັດຖະມົນຕີໄທໄດ້ຈັດກອງປະຊຸມຂ່າວຢູ່ຄ້າຍກົມທະຫານລາບທີ 11 ຮັກສາພະອົງ , ປະກາດຢ່າງເປັນທາງການວ່າລັດຖະບານຈະບໍ່ຍຸບສະພາລາດຊະດອນຕາມຄວາມຮຽກຮ້ອງຂອງກຸ່ມເສື້ອແດງ. ນີ້ແມ່ນລັດຖະບານອະພິສິດຕອບຄືນຕໍ່ຄຳຂາດສຸດທ້າຍ 24 ຊົ່ວໂມງຂອງກຸ່ມເສື້ອແດງເປັນຄັ້ງທຳອິດ. ທ່ານອະພິສິດກ່າວວ່າ, ການເລືອກຕັ້ງທົ່ວໄປບໍ່ສາມາດແກ້ໄຂວິກິດການການເມືອງໃນປະຈຸບັນໄດ້, ລັດຖະບານຍັງຕ້ອງຮັບຟັງຄຳເຫັນຂອງອົງການສັງຄົມອື່ນໆ, ບໍ່ສາມາດຕອບສະໜອງຄວາມຕ້ອງການທີ່ຍຸບສະພາຜູ້ແທນລາດຊະດອນ. ພ້ອມກັນນັ້ນທ່ານອະພິສິດຍັງຮຽກຮ້ອງໃຫ້ທະຫານແລະຕຳຫຼວດທີ່ຮັບມືກັບການໂຮມຊຸມນຸມຂອງກຸ່ມເສື້ອແດງຈົ່ງຮັກສາຄວາມອົດກັ້ນໄວ້, ຫຼີກເວັ້ນບໍ່ໃຫ້ເກີດການປະທະກັນດ້ວຍຄວາມຮຸນແຮງ. ທ່ານຍັງຮຽກຮ້ອງໃຫ້ປະຊາຊົນຄວນເຊື່ອໝັ້ນລັດຖະບານ, ລັດຖະບານຈະພະຍາຍາມແກ້ໄຂບັນຫາຕ່າງໆທີ່ມີໃນປະຈຸບັນ.
ເຖິງວ່າກ່ອນໜ້ານີ້,ຝ່າຍຕ່າງໆເຄີຍຮຽກຮ້ອງກຸ່ມເສື້ອແດງຢ່າໃຫ້ການປະທ້ວງກະທົບກະ ເທືອນຕໍ່ວຽກງານແລະຊີວິດການເປັນຢູ່ຂອງປະຊາຊົນບາງກອກ,ແຕ່ວ່າການໂຮມຊຸມນຸມເທື່ອນີ້ຍັງມີຜົນກະທົບໜ້ອຍໜຶ່ງຕໍ່ວຽກງານແລະຊີວິດການເປັນຢູ່ຂອງປະຊາຊົນບາງ ກອກ,ແລະໄດ້ກະທົບກະເທືອນເຖິງຂະແໜງການທ່ອງທ່ຽວທີ່ເປັນເສົາຄ້ຳເສດຖະກິດຂອງໄທຢ່າງໜັກໜ່ວງ.ຕາມຂໍ້ມູນ,ປະຈຸບັນນີ້ໄດ້ມີ30ກວ່າປະເທດແລະເຂດແຄ້ວນເຕືອນໃຫ້ນັກທ່ອງທ່ຽວຂອງປະເທດຕົນຢ່າໄປບ່ອນໂຮມຊຸມນຸມປະທ້ວງຂອງໄທ.ການທ່ອງທ່ຽວແຫ່ງຊາດໄທກໍ່ເຕືອນໃຫ້ນັກທ່ອງທ່ຽວທັງຫຼາຍຫຼີກເວັ້ນບໍ່ໄປທ່ຽວແຫ່ຼງທ່ອງທ່ຽວທີ່ຢູ່ໃກ້ກັບບ່ອນໂຮມຊຸມນຸມ.
