"ກຸ່ມເສື້ອແດງ"ຂອງໄທປະກາດວ່າ, ແກ່ຍາວເວລາ"ຄຳຂາດສຸດທ້າຍ"ໄປຮອດວັນທີ 16 ມີນານີ້
(GMT+08:00) 2010-03-15 18:28:01 cri
ຕາມຂ່າວCRI：ວັນທີ 15 ມີນານີ້, ຢູ່ທີ່ບາງກອກ, ທ່ານນັດທະວຸດ ສາຍຂວາ, ໜຶ່ງໃນຜູ້ນຳ"ກຸ່ມເສື້ອແດງ"ຂອງໄທກ່າວວ່າ, ຈະແກ່ຍາວເວລາ"ຄຳຂາດສຸດທ້າຍ"ໄປຮອດວັນທີ 16 ມີນານີ້.
ຕອນເຊົ້າວັນທີ 15ມີນານີ້, ຢູ່ຄ້າຍທະຫານບົກທີ 11 ທີ່ຕັ້ງຢູ່ພາກເໜືອບາງກອກ, ທ່ານອະພິສິດ ເວດຊາຊີວະ, ນາຍົກລັດຖະມົນຕີໄທໄດ້ປະຕິເສດ ຢ່າງຈະແຈ້ງຕໍ່ຄຳຮຽກຮ້ອງຂອງ"ກຸ່ມເສື້ອແດງ"ກ່ຽວກັບການຍຸບສະພາຜູ້ແທນລາຊະດອນ. ຫຼັງຈາກນັ້ນ, ທ່ານນັດທະວຸດ ສາຍຂວາ, ຜູ້ນຳຜູ້ໜຶ່ງຂອງ"ກຸ່ມເສື້ອແດງ"ໄດ້ໃຫ້ສຳພາດວ່າ, ຈະແກ່ຍາວເວລາຂອງ"ຄຳຂາດສຸດທ້າຍ"ໄປຮອດຕອນເຊົ້າ 8 ໂມງຂອງວັນທີ 16 ມີນານີ້. ເມື່ອຮອດເວລານັ້ນ, ຖ້າລັດຖະບານຍັງບໍ່ປະກາດວ່າຍຸບສະພາຜູ້ແທນລາຊະດອນ, "ກຸ່ມເສື້ອແດງ"ຈະຍົກລະດັບການປະທ້ວງຂຶ້ນຮອດລະດັບສູງສຸດ. "ກຸ່ມເສື້ອແດງ"ຈະສູບເອົາເລືອດ 10 ມີລີລິດຈາກຜູ້ປະທ້ວງ 1 ແສນຄົນ, ແລະຈະສາດເລືອດເຫຼົ່ານີ້ໃສ່ສຳນັກງານນາຍົກ, ຕຶກຫ້ອງການຂອງພັກປະຊາທິປັດ, ແລະໜ້າບ້ານຂອງທ່ານອາພິສິດ.
"ກຸ່ມເສື້ອແດງ"ໄດ້ປະກາດວ່າຍົກເລີກການປິດລ້ອມຄ້າຍທະຫານບົກທີ 11, ແລ້ວກັບຄືນສູ່ຂົວຜ່ານຟ້າລີລາດທີ່ເປັນບ່ອນຕົ້ນຕໍຂອງການໂຮມຊຸມນຸມເທື່ອນີ້.
