ຕາມຂ່າວສານຊິນຮວາ: ໃນວັນທີ15ມີນານີ້, ຜູ້ຕາງຫນ້າກົມລິກຂະສິດແຫ່ງຊາດຈີນ ແລະ ຜູ້ຕາງຫນ້າກົມວັດທະນະທຳຍີ່ປຸ່ນໄດ້ເຊັນບົດບັນທຶກຄວາມເຂົ້າໃຈກ່ຽວກັບການຮ່ວມມືຍຸດທະສາດດ້ານລິກຂະສິດການປະພັນ ແລະ ລິກຂະສິດອ້ອມຂ້າງການປະພັນຢູ່ທີ່ໂຕກຽວ. ນີ້ເປັນຂີດຫມາຍອັນສຳຄັນທີ່ທັງສອງປະເທດໄດ້ກ້າວເຂົ້າສູ່ໄລຍະໃຫມ່ຂອງການຮ່ວມມືດ້ານການປົກປ້ອງລິກຂະສິດ.
ທ່ານ ຫວາງຈື້ສຽງ ,ຫົວຫນ້າພະແນກການຄຸ້ມຄອງລິກຂະສິດຂອງກົມລິກຂະສິດແຫ່ງຊາດຈີນ ແລະ ທ່ານທາມາອີ ຮິເດໂອ, ຫົວຫນ້າກົມວັດທະນະທຳຍີ່ປຸ່ນໄດ້ເຂົ້າຮ່ວມພິທີລົງລາຍເຊັນ ແລະ ແລກປ່ຽນບົດບັນທຶກຄວາມເຂົ້າໃຈໃນວັນດັ່ງກ່າວ.
ອີງຕາມເນື້ອໃນຂອງບົດບັນທຶກຄວາມເຂົ້າໃຈ, ຝ່າຍຈີນ ແລະ ຝ່າຍຍີ່ປຸ່ນຈະສ້າງຂອບການຮ່ວມມືກ່ຽວກັບການປົກປ້ອງ ແລະ ນຳໃຊ້ລິກຂະສິດໂດຍຜ່ານການແລກປ່ຽນຂໍ້ມູນຂ່າວສານ ແລະບົດຮຽນ ,ຈະຈັດກອງປະຊຸມສອງຝ່າຍດ້ານລິກຂະສິດ1ຄັ້ງໃນແຕ່ລະປີ ແລະຈັດເວທີປາໄສທີ່ກ່ຽວຂ້ອງກັບບັນຫາລິກຂະສິດທີ່ທັງສອງຝ່າຍມີຄວາມສົນໃຈ. ນອກນີ້ ,ສອງຝ່າຍຍັງຈະເພີ່ມທະວີກິດຈະກຳແລກປ່ຽນ ແລະ ອົມຮົມບຸກຂະລາກອນ.
