ນາຍົກໄທກ່າວວ່າ, ລັດຖະບານໄທບໍ່ແມ່ນຜູ້ກໍ່ເຫດການນອງເລືອດຂອງ"ກຸ່ມເສື້ອແດງ"
(GMT+08:00) 2010-03-16 16:40:14 cri
ຕາມຂ່າວCRI：ວັນທີ 16 ມີນານີ້, ໂດຍແນໃສ່ຕອບໂຕ້ການກະທຳຂອງຜູ້ປະທ້ວງຂອງ"ກຸ່ມເສື້ອແດງ"ພາກັນໃຊ້ສະແລັງດູດເອົາເລືອດຢ່າງຫຼວງຫຼາຍເພື່ອໃຊ້ກົດດັນຕໍ່ລັດຖະບານ, ທ່ານອະພິສິດ ເວດຊາຊີວະ, ນາຍົກລັດຖະມົນຕີໄທກ່າວວ່າ, ລັດຖະບານບໍ່ແມ່ນຜູ້ກໍ່ເຫດການ"ນອງເລືອດ"ອັນນີ້.
ໃນເວລາໃຫ້ສຳພາດຢູ່ຄ້າຍທະຫານບົກທີ 11 ທີ່ບາງກອກໃນຕອນເຊົ້າວັນທີ 16, ທ່ານອະພິສິດກ່າວວ່າ, ການໂຮມຊຸມນຸມໃນສອງມື້ມານີ້ໄດ້ຢືນຢັນຢ່າງເຕັມສ່ວນວ່າ, ລັດຖະບານບໍ່ໄດ້ໃຊ້ຄວາມຮຸນແຮງຕໍ່ຜູ້ປະທ້ວງທີ່ເຂົ້າຮ່ວມການໂຮມຊຸມນຸມຂອງກຸ່ມເສື້ອແດງ. ໂດຍແນໃສ່ການ"ດູດເອົາເລືອດ"ທີ່ຜູ້ປະທ້ວງຂອງກຸ່ມເສື້ອແດງກະທຳໃນຕອນເຊົ້າວັນນີ້, ທ່ານກ່າວວ່າ, ນີ້ຢືນຢັນຢ່າງເຕັມສ່ວນວ່າ, ເຫດການ"ນອງເລືອດ"ແມ່ນຜູ້ປະທ້ວງກໍ່ຂຶ້ນເອງແຕ່ບໍ່ແມ່ນຍ້ອນລັດຖະບານ.
ວັນດຽວກັນ, ທ່ານອະພິສິດໄດ້ກ່າວເນັ້ນຫຼັກໝັ້ນຂອງຕົນອີກເທື່ອໜຶ່ງຄືຈະບໍ່ຍຸບສະພາຜູ້ແທນລາຊະດອນ, ກ່າວຢໍ້າວ່າການຍຸບສະພາບໍ່ແມ່ນວິທີດີທີ່ສຸດທີ່ແກ້ໄຂວິກິດການການເມືອງ, ລັດຖະບານຍິນດີຮັບຟັງສຽງແລະຄວາມເຫັນຂອງຝ່າຍຕ່າງໆ, ແຕ່ຈະບໍ່ອ່ອນຍອມຕໍ່ການຂົ່ມຂູ່ຕ່າງໆ.
