ເລຂາທິການໃຫຍ່ອາຊຽນກ່າວວ່າ, ເຂດການຄ້າເສລີຈີນອາຊຽນມີຊີວິດຊີວາຫຼາຍ
(GMT+08:00) 2010-03-17 17:53:06 cri
ຕາມຂ່າວສານຊີນຮວາ: ວັນທີ 16 ມີນານີ້, ຢູ່ນະຄອນອູຮ້ານຂອງຈີນ, ທ່ານສຸລິນ ພິດສຸວັນ, ເລຂາທິການໃຫຍ່ອາຊຽນກ່າວວ່າ, ນັບແຕ່ເລີ່ມປະຕິບັດເຂດການຄ້າເສລີຈີນອາຊຽນເປັນຕົ້ນມາໄດ້ສະແດງໃຫ້ເຫັນຄວາມມີຊີວິດຊີວາອັນແຂງແຮງ, ພ້ອມກັນນັ້ນ, ການສ້າງເຂດການຄ້າເສລີຈີນອາຊຽນໄດ້ສະໜອງເວທີທີ່ສຳຄັນທີ່ສຸດແລະຂາດບໍ່ໄດ້ໃຫ້ແກ່ການພັດທະນາຂອງປະເທດອາຊຽນກັບຈີນ, ປະເທດຕ່າງໆຄວນເພີ່ມທະວີການແລກປ່ຽນແລະການຮ່ວມມືເຊິ່ງກັນແລະກັນໃນຂົງເຂດຕ່າງໆ.
ທ່ານສຸລິນ ພິດສຸວັນແມ່ນກ່າວຄວາມນີ້ໃນເວລາເຂົ້າພົບທ່ານຢວນເສີງຟາ, ເຈົ້າຄອງນະຄອນອູຮ້ານ. ຄາດວ່າຮອດປີ 2013, ຈີນຈະສ້າງຕາໜ່າງລົດໄຟຄວາມໄວສູງທີ່ໃຫຍ່ກວ່າໝູ່ໃນໂລກໃຫ້ສຳເລັດ, ເມື່ອຮອດເວລານັ້ນ, ຂີ່ລົດໄຟຄວາມໄວສູງຈາກນະຄອນອູຮ້ານຈະສາມາດໄປຮອດນະຄອນຫຼວງປັກກິ່ງ, ນະຄອນຊຽງໄຮ້, ນະຄອນເສີງຕູແລະນະຄອນກວາງໂຈວພາຍໃນ 4 ຊົ່ວໂມງ, ຍຸກລົດໄຟຄວາມໄວສູງຈະເຮັດໃຫ້ນະຄອນອູຮ້ານກາຍເປັນໃຈກາງຂອງວົງເສດຖະກິດ 4 ຊົ່ວໂມງຂອງຈີນ. ຕໍ່ເລື່ອງນີ້, ທ່ານສຸລິນກ່າວວ່າ, ອູຮ້ານຕັ້ງຢູ່ໃຈກາງແຜ່ນດິນຈີນ, ການຄົມມະນາຄົມສະດວກ, ເລື່ອງນີ້ສ້າງຄວາມປະທັບໃຈຫຼາຍຕໍ່ປະເທດອາຊີອາຄະເນ. ພ້ອມກັນນັ້ນ, ໃນດ້ານການສຶກສາ, ການຄົ້ນຄວ້າວິທະຍາສາດເຕັກນິກ, ວັດທະນະທຳ, ກະສິກຳແລະດ້ານອື່ນໆ, ກຳລັງແຮງຕົວຈິງຂອງນະຄອນອູຮ້ານກໍ່ຈະມີບົດບາດສຳຄັນຕໍ່ການຮ່ວມມືແລະການແລກປ່ຽນລະຫວ່າງອາຊຽນກັບແຂວງພາກກາງຂອງຈີນ.
ວັນດຽວກັນ, ທ່ານສຸລິນຍັງໄປຢ້ຽມຢາມບໍລິສັດລົດຍົນຕົ່ງເຟີງ, ໂຮງງານປະກອບລົດຍົນເສີນລົງ, ຫໍພິພິດທະພັນແຂວງຫູໄປທີ່ຕັ້ງຢູ່ນະຄອນອູຮ້ານ.
