ທີ່ນີ້,ວິທະຍຸສາກົນແຫ່ງປະເທດຈີນ,ສະບາຍດີ,ທ່ານຜູ່ຟັງທີ່ໂຄລົບ, ໃນໂອກາດທີ່ອາເມລິກາຈະຈັດການເລືອກຕັ້ງໄລຍະກາງໃນໄວໆນີ້,ຫວ່າງມໍ່ໆມານີ້,ສະມາຊິກວຸດທິສະພາອາເມລິກາຈຳນວນຫນຶ່ງໄດ້ຍົກບັນຫາອັດຕາແລກປ່ຽນເງິນຢວນຈີນຂຶ້ນມາ ເລື້ອຍໆ,ເຈດຕະນາເຮັດໃຫ້ລັດຖະບານອາເມລິກາຈຳເປັນຕ້ອງກຳນົດໃຫ້ຈີນ "ປະເທດຄອບງຳອັດຕາແລກປ່ຽນ". ທ່ານຢາວຈ່ຽນ, ໂຄສົກກະຊວງການຄ້າຈີນຊີ້ອອກວ່າ, ມີແຕ່ຄິດເຖິງການເປີດກວ້າງການສົ່ງອອກຂອງຕົນເອງ,ແລະຮຽກຮ້ອງໃຫ້ເງິນຕາຂອງປະເທດອື່ນຂຶ້ນລາຄາ,ນີ້ແມ່ນການກະທຳທີ່ເຫັນແກ່ຕົວ.
ນັກວິເຄາະເຫັນວ່າ,ສະມາຊິກວຸດທິສະພາອາເມລິກາຍົກບັນຫາເງິນຢວນ ຈີນຂຶ້ນມາເລື່ອຍໆ, ຈຸດປະສົງຂອງເຂົາເຈົ້າແມ່ນມີເຈດຕະນາຫັນບັນຫານີ້ໃຫ້ເປັນບັນຫາທາງການເມືອງ,ແລະປູທາງໃຫ້ແກ່ການເອົາຊະນະໃນການເລືອກຕັ້ງ.ເວົ້າສຳລັບ ລັດຖະບານໂອບາມາແລ້ວ,ການເພີ່ມການສົ່ງອອກແມ່ນວິທີທີ່ບັງເກີດຜົນໃນປະຈຸບັນສຳລັບການ ເພີ່ມໂອກາດປະກອບອາຊີບແລະຄວບຄຸມອັດຕາໄພຫວ່າງງານພາຍໃນປະເທດ,ສະນັ້ນ, ລັດຖະບານໂອບາມາຈຶ່ງໃຊ້ບັນຫາເງິນຢວນຈີນກົດດັນຈີນຢ່າງບໍ່ຢຸດຢັ້ງ.ທ່ານຫຼີຕາວຄຸຍ,ຫົວໜ້າສູນຄົ້ນຄ້ວາເສດຖະກິດຂອງໂລກແລະຈີນຂອງມະຫາວິທະຍາໄລຊິ່ງຮວາກ່າວວ່າ:(ປ່ອຍອັດສຽງ)
"ເຂົາເຈົ້າຮູ້ສຶກວ່າຄວາມໄວຂອງການພັດທະນາເສດຖະກິດຈີນດີຫຼາຍ, ແຕ່ບໍ່ໄດ້ສ້າງຜົນປະໂຫຍດໂດຍກົງໃຫ້ແກ່ເຂົາເຈົ້າ. ນອກນີ້ສິ່ງທີ່ສຳຄັນກວ່ານັ້ນຄື, ການປະຕິຮູບປະເພດຕ່າງໆຂອງສັງຄົມອາເມລິກາໄດ້ປະເຊີນກັບອຸປະສັກຫຼາຍ, ເຂົາເຈົ້າຕ້ອງການກຳລັງພາຍນອກແບບໜຶ່ງ, ໃຊ້"ສັດຕູຮ່ວມ"ມາເຕົ້າໂຮມຄວາມສາມັກຄີຂອງຊາດ, ເຮັດໃຫ້ພັກສາ ທາລະນະລັດແລະພັກປະຊາທິປະໄຕປອງດອງກັນ."
ເລີ່ມແຕ່ເງິນຢວນຈີນເລີ່ມປະຕິບັດກົນໄກອັດຕາແລກປ່ຽນໃນເດືອນກໍລະກົດປີ 2005 ມານີ້, ຮອດຕົ້ນເດືອນມີນານີ້ໄດ້ຂຶ້ນລາຄາຮອດ 1 ໂດລາປ່ຽນ 6,82 ຢວນແລ້ວ, ລວມໄດ້ຂຶ້ນລາຄາ 15,83%. ຈີນອາເມລິກາແມ່ນຄູ່ການຄ້າໃຫຍ່ທີສອງຂອງກັນແລະກັນ, ແຕ່ຂໍ້ຂັດແຍ່ງດ້ານການຄ້າລະຫວ່າງສອງຝ່າຍໄດ້ຫຼາຍຂຶ້ນໃນຫຼາຍປີມານີ້. ສິ່ງທີ່ໜ້າສົນໃຈນັ້ນຄື, ໃນເດືອນກຸມພາປີກາຍນີ້ການສົ່ງອອກຂອງຈີນຫຼຸດລົງ 27%, ບໍ່ມີໃຜຕິຕຽນບັນຫາອັດຕາແລກປ່ຽນຂອງເງິນຢວນຈີນ. ແຕ່ປະຈຸບັນຈີນຫາກໍຟື້ນຟູການສົ່ງອອກເພີ່ມຂຶ້ນໃນແດນບວກ 4 ເດືອນລຽນຕິດ, ສະມາຊິກວຸດທິສະພາຂອງອາເມລິກາກໍ່ນຳໃຊ້ບັນຫາອັດຕາແລກປ່ຽນເງິນຢວນຈີນອີກເທື່ອໜຶ່ງ, ແລະຮຽກຮ້ອງໃຫ້ກະຊວງການຄ້າອາເມລິກາລົງໂທດຕໍ່ສິນຄ້າຈີນເພື່ອຕ້ານການອຸດໜູນ.
ຕໍ່ເລື່ອງນີ້, ທ່ານຢາວຈ່ຽນ, ໂຄສົກກະຊວງການຄ້າຈີນກ່າວວ່າ, ບັນຫາໄດ້ປຽບດ້ານການຄ້າບໍ່ແມ່ນສາເຫດທີ່ເຮັດໃຫ້ເງິນຢວນແຂງຄ່າຫຼືບໍ່. ທ່ານກ່າວວ່າ:
"ບັນຫາໄດ້ປຽບແມ່ນຜົນທີ່ທົ່ວໂລກເຊື່ອມໂຍງເຂົ້າກັນ. ພວກເຮົາຫວັງວ່າອາເມລິກາໃນເວລາຜ່ານຜ່າຜົນສະທ້ອນຂອງວິກິດການການເງິນແລະຟື້ນຟູເສດຖະກິດ, ຄວນເປັນຜູ້ລິເລີ່ມສ້າງການຄ້າເສລີຫາກບໍ່ແມ່ນຜູ້ສະກັດກັ້ນ, ບໍ່ແມ່ນຈະມີແຕ່ຄິດເຖິງຜົນປະໂຫຍດຂອງຕົນທໍ່ນັ້ນ, ແລ້ວຮຽກຮ້ອງໃຫ້ເງິນຕາຂອງປະເທດອື່ນຂຶ້ນລາຄາເພື່ອເພີ່ມການສົ່ງອອກຂອງຕົນ."
ເຈົ້າຫນ້າທີ່ອັງກິດແລະສະຫະພາບເອີລົບລ້ວນແຕ່ກ່າວວ່າ,ບໍ່ເຫັນດີນຳອາເມລິກາທີ່ເພີ່ມແຮງກົດດັນໃຫ້ເງິນຢວນຈີນແຂງຄ່າຂຶ້ນ.ສະພາການຄ້າແລະການພັດທະນາຂອງສະຫະປະຊາຊາດໄດ້ເຜີຍແຜ່ແຈ້ງການດ້ານນະໂຍບາຍສະບັບຫນຶ່ງໂດຍກ່າວວ່າ, ອັດຕາແລກປ່ຽນເງິນແບບເສລີບໍ່ມີຜົນດີຕໍ່ການປັບປຸງການຂາດຄວາມດຸນດ່ຽງຂອງເສດຖະກິດທົ່ວໂລກ, ບັນຫານີ້ຕ້ອງແກ້ໄຂດ້ວຍການເຄື່ອນໄຫວຢ່າງຮອບດ້ານແລະຈາກຫລາຍຝ່າຍ.ທ່ານຈິມ ໂອເນວ,ຫົວຫນ້ານັກເສດຖະສາດຂອງບໍລິສັດໂກນແມນຊາຈ໊ສ໊ກໍ່ກ່າວຢູ່ນະຄອນຫລວງລອນດອນຂອງອັງກິດໃນວັນທີ 17 ມີນານີ້ວ່າ, ອາເມລິກາກົດດັນໃຫ້ເງິນຢວນຈີນແຂງຄ່າຂຶ້ນແມ່ນຜິດພາດ,ແມ່ນເອົາບັນຫາເສດຖະກິດຫັນເປັນບັນຫາການເມືອງ.ຫວ່າງມໍ່ໆມານີ້,ທ່ານເວີນເຈ່ຍປາວ, ນາຍົກລັດຖະມົນຕີຈີນໄດ້ກ່າວຢ່າງຈະແຈ້ງວ່າ, ຈີນຄັດຄ້ານການບັງຄັບໃຫ້ອັດຕາແລກປ່ຽນເງິນຕາຂອງປະເທດໃດຫນຶ່ງແຂງຄ່າຂຶ້ນ,ຄວນແກ້ໄຂບັນຫາອັດຕາແລກປ່ຽນເງິນຕາດ້ວຍການປຶກສາຫາລືຢ່າງສະເຫມີພາບກັນ. ຈີນມີທັດສະນະໃຫ້ການຄ້າເສລີ, ຄັດຄ້ານປະເທດຕ່າງໆຕິຕຽນກັນ.ທີ່ຈິງແລ້ວ, ພາກສ່ວນທີ່ກ່ຽວຂ້ອງຂອງຈີນໄດ້ສະເຫນີອອກມາຫລາຍເທື່ອແລ້ວວ່າໃຫ້ເປີດກວ້າງການຄ້າຂາເຂົ້າເພື່ອຊຸກຍູ້ການຄ້າຈີນອາເມລິກາດຸນດ່ຽງກັນ.ທ່ານຢາວຈ່ຽນ, ໂຄສົກກະຊວງການຄ້າຈີນກໍ່ກ່າວວ່າ:ພວກເຮົາຈະເປີດກວ້າງການນຳເຂົ້າຈາກປະເທດຕ່າງໆ.ຖ້າວ່າເອົາບັນຫາອັດຕາແລກປ່ຽນເງິນຕາໃຫ້ກາຍເປັນບັນຫາການເມືອງແລ້ວ, ຈະບໍ່ມີຜົນດີຕໍ່ຝ່າຍຕ່າງໆປະສານງານກັນຜ່ານຜ່າຄວາມຫຍຸ້ງຍາກໃນວິກິດການການເງິນທົ່ວໂລກ.
