ຮອງນາຍົກຈີນເຈລະຈາກັບນາຍົກລາວ
(GMT+08:00) 2010-03-20 16:43:51 cri
ຕາມຂ່າວສານຊີນຮວາ: ວັນທີ 20 ມີນານີ້, ທ່ານຮຸຍລຽງຢູ້, ຮອງນາຍົກລັດຖະມົນຕີຈີນໄດ້ພົບປະເຈລະຈາກັບທ່ານບົວສອນ ບຸກຜາວັນ, ກຳມະການກົມການເມືອງສູນກາງພັກປະຊາຊົນປະຕິວັດລາວ, ນາຍົກລັດຖະມົນຕີລາວຢູ່ນະຄອນຫຼວງວຽງຈັນ.
ທ່ານຮຸຍລຽງຢູ້ກ່າວວ່າ, ຈີນລາວແມ່ນເພື່ອນບ້ານທີ່ດີ, ເພື່ອນມິດທີ່ດີ, ສະຫາຍທີ່ດີແລະໝູ່ຄູ່ທີ່ດີຢ່າງຈິງຈັງ. ພາຍໃຕ້ການຊີ້ນຳຂອງທິດທາງທີ່ວ່າ"ສະຖຽນລະພາບຍາວນານ, ເປັນເພື່ອນບ້ານໃກ້ຄຽງທີ່ດີ, ໄວ້ເນື້ອເຊື່ອໃຈກັນ, ແລະຮ່ວມມືຢ່າງຮອບດ້ານ", ການພົວພັນຈີນລາວໄດ້ຂຶ້ນສູ່ລະດັບໃໝ່ເລື້ອຍໆ. ທ່ານຮຸຍລຽງຢູ້ຍັງໄດ້ຊົມເຊີຍຜົນສຳເລັດທີ່ລາວໄດ້ຮັບໃນການພັດທະນາເສດຖະກິດສັງຄົມ.
ທ່ານບົວສອນ ບຸກຜາວັນເຫັນດີເຫັນພ້ອມກັບການຕີລາຄາຂອງທ່ານຮຸຍລຽງຢູ້ຢ່າງຕັ້ງໜ້າຕໍ່ກການພົວພັນລະຫວ່າງສອງປະເທດ. ທ່ານກ່າວວ່າ, ຜົນງານທີ່ລາວໄດ້ຮັບປາສະຈາກຄວາມຊ່ວຍເຫຼືອຂອງເພື່ອນມິດຈີນບໍ່ໄດ້, ຝ່າຍລາວຂອບອົກຂອບໃຈນຳລັດຖະບານແລະປະຊາຊົນຈີນທີ່ໃຫ້ຄວາມສະໜັບສະໜູນອັນລ້ຳຄ່າໃນເວລາດົນນານມານີ້.
ສອງຝ່າຍເປັນເອກະສັນກັນເຫັນວ່າ, ສອງປະເທດຈີນລາວລ້ວນແຕ່ແມ່ນປະເທດທີ່ພວມພັດທະນາ, ລ້ວນແຕ່ປະເຊີນກັບໜ້າທີ່ໜັກໜາເພື່ອສ້າງປະເທດໃຫ້ເຂັ້ມແຂງແລະປະຊາຊົນຮັ່ງມີ. ສອງຝ່າຍມີຜົນປະໂຫຍດຮ່ວມຢ່າງຫຼວງຫຼາຍແລະພື້ນຖານຮ່ວມມືທີ່ໜາແໜ້ນໃນຂົງເຂດຕ່າງໆ. ປີໜ້າ, ຈີນລາວຈະຕ້ອນຮັບວັນສ້າງສາຍພົວພັນທາງການທູດຄົບຮອບ 50 ປີ, ສອງຝ່າຍຍິນດີຮ່ວມກັນພະຍາຍາມບັນລຸການຕ່າງຝ່າຍຕ່າງໄດ້ຮັບຜົນປະໂຫຍດ, ແລະປະສານງານຢ່າງໃກ້ຊິດໃນກົນໄກຮ່ວມມືສາກົນແລະພາກພື້ນຕ່າງໆເຊັ່ນສະຫະປະຊາຊຊາດ, ອາຊຽນບວກຈີນ, ແລະອາຊຽນບວກຈີນ,ສ.ເກົາຫລີແລະຍີ່ປຸ່ນ, ຊຸກຍູ້ໃຫ້ການພົວພັນຄູ່ຮ່ວມມືຍຸດທະສາດຮອບດ້ານຂອງສອງປະເທດພັດທະນາລົງສູ່ລວງເລິກ.
ກ່ອນນີ້, ທ່ານຮຸຍລຽງຢູ້ແລະທ່ານສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີຜູ້ປະຈຳການລັດຖະບານລາວຍັງຮ່ວມກັນເຂົ້າຮ່ວມພິທີລົງນາມໃນສັນຍາຮ່ວມມືເສດຖະກິດເຕັກນິກແລະກະສິກຳຂອງສອງປະເທດ.
