ເລຂາທິການໃຫຍ່ອາຊຽນກ່າວວ່າ ເພີ່ມທະວີການຮ່ວມມືລະຫວ່າງອາຊຽນກັບຈີນມີຄວາມໝາຍຫຼາຍ
(GMT+08:00) 2010-03-22 19:01:52 cri
ຕາມຂ່າວສານຊີນຮວາ: ວັນທີ22ມີນານີ້,ໃນເວລາກ່າວປາຖະກະຖາຢູ່ສະຖາບັນການຕ່າງປະເທດຈີນ,ທ່ານສຸລິນ ພິດສຸວັນ,ເລຂາທິການໃຫຍ່ອາຊຽນກ່າວວ່າ,ປະຈຸບັນ,ທົ່ວໂລກນັບມື້ນັບເອົາໃຈໃສ່ພາກຕາເວັນອອກ,ການຮ່ວມມືລະຫວ່າງອາຊຽນກັບຈີນມີຄວາມໝາຍຫຼາຍ.
ໃນການກ່າວປາຖະກະຖາທີ່ມີຫົວຂໍ້ວ່າ"ການພັດທະນາຂອງອາຊຽນແລະການພົວພັນລະຫວ່າງອາຊຽນກັບຈີນ"ເທື່ອນີ້,ທ່ານສຸລິນ ພິດສຸວັນຊີ້ອອກວ່າ,ຈີນ,ອິນເດຍທີ່ຕັ້ງຢູ່ພາກຕາເວັນອອກຂອງໂລກແລະປະເທດຕ່າງໆຂອງອາຊີອາຄະເນໄດ້ບັນລຸການເຕີບໂຕຢ່າງຫຼວງຫຼາຍໃນວິກິດການການເງິນສາກົນ,ກາຍເປັນຈຸດສຳຄັນທີ່ຊຸກຍູ້ການພັດທະນາຂອງເສດຖະກິດໂລກ.ອາຊຽນກັບຈີນມີການພົວພັນມູນເຊື້ອອັນດີງາມ,ຊຸມປີມານີ້,ການຮ່ວມມືລະຫວ່າງສອງຝ່າຍນັບມື້ນັບເພີ່ມຂຶ້ນ,ການປະສານງານດ້ານການເມືອງໄດ້ຮັບການເປີດກ້ວາງຢ່າງບໍ່ຢຸດຢັ້ງ.ເຂດການຄ້າເສລີຈີນອາຊຽນທີ່ຫາກໍ່ສ້າງສຳເລັດຢ່າງຮອບດ້ານໃນວັນທີ1ມັງກອນປີນີ້ກໍ່ໄດ້ສະໜອງໂອກາດແລະຄວາມສາມາດບົ່ມຊ້ອນຢ່າງຫຼວງຫຼາຍໃຫ້ແກ່ການຮ່ວມມືລະຫວ່າງສອງຝ່າຍ,ສອງຝ່າຍຍັງຈະຕ້ອນຮັບການສ້າງການພົວພັນເຈລະຈາຄົບຮອບ20ປີໃນປີໜ້າ.
