ວັນທີ 24 ມີນານີ້, ຄະນະກຳມະການລະດົມທຶນຂອງສະພາຕ່ຳອາເມລິກາໄດ້ຈັດງານຟັງຄຳໃຫ້ການກ່ຽວກັບບັນຫາອັດຕາແລກປ່ຽນເງິນຢວນຈີນ,ຜູ່ມີຊື່ສຽງທີ່ສຳຄັນຈຳນວນຫນຶ່ງໃນວົງການເສດຖະສາດອາເມລິກາໄດ້ໃຫ້ຄຳຢືນຢັນໃນງານດັ່ງກ່າວ.ໃນມື້ດຽວກັນ, ທ່ານຈົ່ງຊ່ານ, ລັດຖະມົນຕີຊ່ວຍວ່າການກະຊວງການຄ້າຈີນທີ່ພວມຢ້ຽມຢາມອາເມລິກາໄດ້ກ່າວຄຳປາໄສຢູ່ວໍຊິງຕັນ,ຮຽກຮ້ອງໃຫ້ບຸກຄົນສຳຄັນໃນວົງການອຸດສາຫະກຳການຄ້າອາເມລິກາເບິ່ງບັນຫາທີ່ເກີດຂຶ້ນໃນການພົວພັນດ້ານເສດຖະກິດການຄ້າລະຫວ່າງຈີນກັບອາເມລິກາຢ່າງຖືກຕ້ອງ, ແລະໃຫ້ຂໍ້ສະເຫນີກ່ຽວກັບການເຮັດໃຫ້ການຮ່ວມມືດ້ານເສດຖະກິດການຄ້າລະຫລ່າງສອງຝ່າຍກ້າວສູ່ລວງເລິກ.ຄັນຊັ້ນ, ງານຟັງຄຳໃຫ້ການຂອງສະພາຕ່ຳອາເມລິກາໄດ້ສະແດງໃຫ້ເຫັນເຖິງທ່າທີແນວໃດຂອງພາຍໃນປະເທດອາເມລິກາໃນບັນຫາອັດຕາແລກປ່ຽນເງິນຢວນຈີນ?ວຸດທິສະພາອາເມລິກາຈະຈັດໃຫ້ຈີນເປັນອັນທີ່ວ່າປະເທດທີ່ຄອບງຳອັດຕາແລກປ່ຽນເງິນຕາຫລືບໍ່?ຈີນອາເມລິກາຈະເຮັດແນວໃດຕໍ່ຄວາມຂັດແຍ່ງກັນດ້ານອັດຕາແລກປ່ຽນແລະການຄ້າລະຫວ່າງສອງຝ່າຍ?ກ່ຽວກັບບັນຫາເຫລົ່ານີ້, ນັກຂ່າວ cri ໄດ້ສຳພາດທ່ານຈ່ຽງແຍ້ຊຸນ,ຫົວຫນ້າສູນຄົ້ນຄວ້າເສດຖະກິດການຕ່າງປະເທດກັບຄວາມຫມັ້ນຄົງຂອງສະຖາບັນຄົ້ນຄວ້າບັນຫາສາກົນຈີນ.
ງານຟັງຄຳໃຫ້ການທີ່ຄະນະກຳມະການລະດົມທຶນຂອງສະພາຕ່ຳອາເມລິກາຂຶ້ນເທື່ອນີ້ກິນເວລາສອງຊົ່ວໂມງປາຍ,ບຸກຄົນສຳຄັນໃນວົງການເສດຖະສາດອາເມລິກາເຊັ່ນ:ທ່ານແຟຼດ ເບີກສ໊ເທັນ,ຜູ່ຊ່ຽວຊານສູນຄົ້ນຄວ້າເສດຖະກິດສາກົນພີເຕີຊັນອາເມລິກາທີ່ເປັນຜູ່ທຳອິດທີ່ສະເຫນີທັດສະນະ G2 ແລະທ່ານອື່ນໆໄດ້ໃຫ້ຄຳໃຫ້ການໃນງານດັ່ງກ່າວ. ຜູ່ຊ່ຽວຊານຕ່າງໆທີ່ໃຫ້ການເຫັນໂດຍທົ່ວໄປວ່າ, ມູນຄ່າເງິນຢວນຈີນຖືກຕີລາຄາຕ່ຳເກີນໄປ,ເຫັນວ່າການໃຫ້ເງິນຢວນຈີນແຂງຄ່າຈະມີຜົນດີຕໍ່ທັງສອງຝ່າຍ.ຕໍ່ເລື່ອງນີ້, ທ່ານຈ່ຽງແຍ້ຊຸນເຫັນວ່າ, ງານຟັງຄຳໃຫ້ການທີ່ສະພາຕ່ຳອາເມລິກາຈັດຂຶ້ນນັ້ນສະແດງໃຫ້ເຫັນວ່າພາຍໃນປະເທດອາເມລິກາມີກຳລັງອັນແຂງແຮງ ທີ່ຮຽກຮ້ອງໃຫ້ເງິນຢວນຈີນແຂງຄ່າຂຶ້ນ.ທ່ານກ່າວວ່າ:
ດຽວນີ້ແມ່ນເປັນໄປແນວນັ້ນແທ້, ອາເມລິກາຮູ້ສຶກມີແຮງກົດດັນຫລາຍຕໍ່ສະພາບຟື້ນຕົວຂອງເສດຖະກິດຂອງຕົນ,ມີຄວາມເຫັນຫລາຍຕໍ່ສະພາບບໍ່ດຸນດ່ຽງກັນດ້ານການຄາລະຫວ່າງຈີນກັບອາເມລິກາ, ວົງການການເງິນແລະວົງການການເມືອງຂອງອາເມລິກາຍັງຖືວ່າສາເຫດຕົ້ນຕໍທີ່ພາໃຫ້ການຄ້າຈີນອາເມລິກາບໍ່ດຸນດ່ຽງນັ້ນແມ່ນຍ້ອນອັດຕາແລກປ່ຽນເງິນຢວນຈີນ.
ຫາງສຽງທົ່ວໄປໄດ້ເຫັນວ່າ, ໃນງານຟັງຄຳໃຫ້ການຂອງສະພາຕ່ຳອາເມລິກາ, ເຖິງວ່າຜູ້ຊ່ຽວຊານອາເມລິກາສ່ວນຫຼາຍມີຄວາມເຫັນເປັນເອກະສັນກັນໃນບັນຫາຮຽກຮ້ອງໃຫ້ເງິນຢວນຈີນແຂງຄ່າ, ແຕ່ວ່າຈະຕົກລົງເອີ້ນຈີນເປັນ"ປະເທດຄວບງຳອັດຕາແລກປ່ຽນ"ຫຼືບໍ່ເຂົາເຈົ້າຍັງມີທ່າທີລະມັດລະວັງ. ຕໍ່ເລື່ອງນີ້, ທ່ານຈ່ຽງຢ້າວຊຸນເຫັນວ່າ, ນັກວິຊາການອາເມລິກາຈຳນວນໜຶ່ງເບິ່ງຈາກສະພາບຕົວຈິງຂອງການພົວພັນເສດຖະກິດການຄ້າລະຫວ່າງຈີນກັບອາເມລິກາ, ເຫັນວ່າບໍ່ຄວນໃຊ້ວິທີບັງຄັບໃຫ້ເງິນຢວນຈີນແຂງຄ່າ, ແຕ່ລັດຖະບານອາເມລິກາເບິ່ງຈາກຍຸດທະສາດເສດຖະກິດການເມືອງແລະໃນທີ່ສຸດກໍ່ຕົກລົງເອີ້ນຈີນເປັນ"ປະເທດຄວບງຳອັດຕາແລກປ່ຽນ"ນັ້ນມີຄວາມອາດເປັນໄປໄດ້ຢ່າງສູງ.
ວັນທີ 24 ມີນານີ້, ທ່ານຈົ່ງຊ່ານ, ລັດຖະມົນຕີຊ່ວຍວ່າການກະຊວງການຄ້າຈີນທີ່ພວມຢ້ຽມຢາມອາເມລິກາໄດ້ກ່າວປາຖະກະຖາໃນງານລ້ຽງອາຫານເຊົ້າທີ່ວົງການອຸດສາຫະກຳການຄ້າອາເມລິກາຈັດຂຶ້ນນັ້ນ, ຮຽກຮ້ອງໃຫ້ບຸກຄົນສຳຄັນໃນວົງການອຸດສາຫະກຳການຄ້າອາເມລິກາຖືທ່າທີອັນຖືກຕ້ອງຕໍ່ບັນຫາທີ່ເກີດຂຶ້ນໃນການພົວພັນເສດຖະກິດການຄ້າລະຫວ່າງຈີນກັບອາເມລິກາ, ແລະໄດ້ມີຂໍ້ສະເໜີທີ່ລົງເລິກການຮ່ວມມືເສດຖະກິດການຄ້າສອງຝ່າຍ. ທ່ານກ່າວວ່າ, ໃນບັນຫາອັດຕາແລກປ່ຽນເງິນຢວນຈີນ, ຈີນອາເມລິກາຄວນຮ່ວມມືກັນ, ບັງຄັບໃຫ້ເງິນຢວນຈີນແຂງຄ່າມີແຕ່ຈະເປັນຜົນທາງລົບ. ທ່ານຈ່ຽງແຍ້ຊຸນເຫັນວ່າ, ອາເມລິກາຄວນຮັບຮູ້ວ່າ, ພາຍໃຕ້ສະພາບທີ່ເສດຖະກິດໂລກໂລກາພິວັດ, ຈີນອາເມລິກາຕ້ອງໃຊ້ວິທີປຶກສາຫາລືກັນເພື່ອແກ້ໄຂຂໍ້ຂັດແຍ່ງອັດຕາແລກປ່ຽນແລະການຄ້າ, ຖ້າບໍ່ດັ່ງນັ້ນຈະມີຜົນຮ້າຍຕໍ່ສອງຝ່າຍ. ທ່ານກ່າວວ່າ:
"ໂດຍສະເພາະແມ່ນວິກິດການການເງິນທົ່ວໂລກເທື່ອນີ້, ຈຸດພິເສດໃຫຍ່ອັນໜຶ່ງກໍຄືຈີນອາເມລິກາຮ່ວມກັນຮັບມືກັບວິກິດການການເງິນ, ທີ່ຈິງແລ້ວໄດ້ມີໝາກຜົນທີ່ດີສົມຄວນ. ສະນັ້ນໃນບັນຫາອັດຕາແລກປ່ຽນ, ຈີນອາເມລິກາມີແຕ່ໃຊ້ວິທີຮ່ວມມືກັນ, ປຶກສາຫາລືແລະສົນທະນາກັນຈິ່ງມີຜົນດີຕໍ່ສອງຝ່າຍຢ່າງແທ້ຈິງ. ຖ້າວ່າໃຊ້ການກະທຳທີ່ແຂງກະດ້າງ, ພາຍໃຕ້ສະພາບການທີ່ທົ່ວໂລກເຊື່ອມໂຍງເຂົ້າກັນ, ບໍ່ພິຈາລະນາເຖິງພາບອະນາຄົດຂອງການຮ່ວມມືລະຫວ່າງສອງຝ່າຍ, ແລ້ວໃຊ້ການກະທຳທີ່ຮຸນແຮງ, ມັນຈະບໍ່ມີຜົນດີຕໍ່ສອງຝ່າຍ. ຂ້າພະເຈົ້າຮູ້ສຶກວ່າບໍ່ພຽງແຕ່ແມ່ນປະຊາຊົນຈີນເຂົ້າໃຈດີ, ປະຊາຊົນອາເມລິກາກໍຄວນເຂົ້າໃຈດີຄືກັນ."
