ໃນບົດລາຍງານວຽກງານຂອງລັດຖະບານທີ່ທ່ານນາຍົກລັດຖະມົນຕີເວີນເຈ່ຍປາວຜ່ານໃນປີນີ້,ການອອກແຮງບົ່ມເພາະອຸດສາຫະກຳຈະເລີນໃຫມ່ທີ່ມີລັກສະນະຍຸດທະສາດນັ້ນແມ່ນເນື້ອໃນສຳຄັນອັນຫນຶ່ງ.ໃນເວລາໃຫ້ສຳພາດຕໍ່ນັກຂ່າວ cri, ນັກວິຊາການທີ່ກ່ຽວຂ້ອງກ່າວວ່າ, ອຸດສາຫະກຳຈະເລີນໃຫ່ທີ່ມີລັກສະນະຍຸດທະສາດຈະແມ່ນການບຸກທະລຸທີ່ສຳຄັນໃນການປັບປຸງໂຄງປະກອບເສດຖະກິດຈີນ. ແຕ່ວ່າ, ຍ້ອນມີຄວາມຮຽກຮ້ອງຕ້ອງການຢ່າງສູງໃນດ້ານງົບປະມານແລະເງື່ອນໄຂດ້ານວິທະຍາສາດເຕັກນິກ,ລັດຖະບານຈີນຄວນຕັ້ງຫນ້າດຳເນີນການທົດລອງຢູ່ເຂດທີ່ມີເງື່ອນໄຂສ່ວນຫນຶ່ງ, ບົ່ມເພາະສະພາບແວດລ້ອມດ້ານຕະຫລາດທີ່ດີງາມແລ້ວຈິ່ງເຜີຍແຜ່ໄປສູ່ທົ່ວປະເທດ.
ໃນເວລາຜ່ານບົດລາຍງານວຽກງານລັດຖະບານ, ທ່ານນາຍົກເວີນເຈ່ຍປາວຊີ້ອອກວ່າ, ການພັດທະນາອຸດສາຫະກຳຈະເລີນໃຫມ່ທີ່ມີລັກສະນະຍຸດທະສາດ,ຍຶດເອົາຈຸດສູງທາງດ້ານວິທະຍາສາດເຕັກນິກເສດຖະກິດ,ແລະຕັດສິນອະນາຄົດຂອງປະເທດ,ກໍ່ຄວນກຳແຫນ້ນໂອກາດ,ກຳນົດຈຸດຫນັກຢ່າງຈະແຈ້ງ, ແລະມີການກະທຳຕົວຈິງ.ທ່ານເຟີງກ້ວນຜິງ, ຫົວຫນ້າສະຖາບັນຄົ້ວຄວ້າມະຫາວິທະຍາໄລຊິງຮວາເຊີນເຈິ້ນເຫັນວ່າ, ອຸດສາຫະກຳຈະເລີນໃຫມ່ທີ່ມີລັກສະນະຍຸດທະສາດແມ່ນບຸກທະລຸທີ່ສຳຄັນອັນທຳອິດໃນການປັບປຸງໂຄງປະກອບເສດຖະກິດຈີນ, ຄຽງຄູ່ກັບກຳລັງແຂ່ງຂັນແກນກາງໃນດ້ານວິທະຍາສາດເຕັກນິກນັບມື້ນັບຍົກສູງຂຶ້ນ, ກໍ່ຍ່ອມຈະນຳພາໃຫ້ອຸດສາຫະກຳຈະເລີນໃຫມ່ພັດທະນາຢ່າງຂະຫນາດໃຫຍ່.ທ່ານເວົ້າວ່າ:
ຂໍກະແຈຂອງອຸດສາຫະກຳຈະເລີນໃຫມ່ທີ່ມີລັກສະນະຍຸດທະສາດແມ່ນຢູ່ໃນດ້ານລັກສະນະຍຸດທະສາດ,ຕ້ອງມີສາຍຕາທີ່ເຫັນກວ້າງມອງໄກ,ຄືຕ້ອງຢືນຢູ່ຈຸດສູງດ້ານເສດຖະກິດ,ແລະວິທະຍາສາດເຕັກນິກ.ອຸດສາຫະກຳຈະ ເລີນໃຫມ່ທີ່ມີລັກສະນະຍຸດທະສາດມີຈຸດພິເສດສອງຢ່າງຄືອັນທີຫນຶ່ງແມ່ນມັນມີສ່ວນວິທະຍາສາດເຕັກນິກສູງສົມຄວນ, ອັນທີສອງມັນສາມາດຊຸກຍູ້ເສດຖະກິດຂອງຈີນໃຫ້ພັດທະນາຢ່າງຂະຫນາດໃຫຍ່.
ກ່ຽວກັບ ອຸດສາຫະກຳຈະເລີນໃຫມ່ທີ່ມີລັກສະນະຍຸດທະສາດ 6 ຢ່າງ, ທ່ານເວີນເຈ່ຍປາວໄດ້ກ່າວເຖິງຂະແຫນງການພະລັງງານໃຫມ່, ວັດຖຸໃຫມ່, ການປະຢັດພະລັງງານແລະອະນຸລັກສິ່ງແວດລ້ອມ, ຢາຊີວະຊາດ,ຕາຫນ່າງຂໍ້ມູນຂ່າວສານແລະການປຸງແຕ່ງລະດັບສູງ.ຂ່າວແຈ້ງວ່າ, ປັດຈຸບັນ,ຄະນະກຳມະການ ພັດທະນາແລະປະຕິຮູບແຫ່ງລັດຈີນ, ກະຊວງອຸດສາຫະກຳແລະຂໍ້ມູນຂ່າວສານ,ພ້ອມກັບກະຊວງການເງິນແລະພາກສ່ວນຕ່າງໆຂອງຈີນພວມຮ່ວມກັນວາງເອກະສານທີ່ກ່ຽວຂ້ອງກັບການເລັ່ງລັດອົບຮົມສ້າງອຸດສາຫະກຳຈະເລີນໃຫມ່ທີ່ມີລັກສະນະຍຸດທະສາດ,ສ່ວນແຜນການຫ້າປີຄັ້ງທີ 12 ກ່ຽວກັບການພັດທະນາອຸດສາຫະກຳຈະເລີນໃຫມ່ທີ່ມີລັກສະນະຍຸດທະສາດນັ້ນກໍ່ພວມວາງຢູ່.
ໃນຂະນະທີ່ເຫັນວ່າ, ປະຈຸບັນອຸດສາຫະກຳຈະເລີນໃໝ່ຂອງຈີນມີກຳລັງບົ່ມຊ້ອນອັນໃຫຍ່ຫຼວງ, ຜູ້ຊ່ຽວຊານທີ່ກ່ຽວຂ້ອງກໍຊີ້ອອກວ່າ, ປະຈຸບັນ, ຄວາມສາມາດຫັນປ່ຽນວິທະຍາສາດເຕັກນິກເປັນກຳລັງການຜະລິດນັ້ນບໍ່ແຂງແຮງປານໃດ, ບັນຫາທີ່ການຜະລິດຕົວຈິງແລະການຄົ້ນຄວ້າບໍ່ເຊື່ອມຕໍ່ກັນຍັງລົບກວນຂະແໜງການທີ່ກ່ຽວຂ້ອງ. ທ່ານເຝີງກ້ວນຜີງກ່າວວ່າ, ລັດຄວນເພີ່ມງົບປະມານໃນດ້ານຄົ້ນຄວ້າວິທະຍາສາດຂອງອຸດສາຫະກຳຈະເລີນໃໝ່, ເພີ່ມບຸກຄົນທີ່ມີຄວາມຮູ້ຄວາມສາມາດ, ເຮັດໃຫ້ການພັດທະນາອຸດສາຫະກຳໄປຕາມຄວາມຕ້ອງການຂອງຕະຫຼາດ.
ທ່ານເຝີງກ້ວນຜີງຮຽກຮ້ອງວ່າ, ລັດຖະບານຄວນອອກແຮງດຳເນີນວຽກງານທົດລອງໂຄງການອຸດສາຫະກຳຢູ່ເຂດທີ່ມີເງື່ອນໄຂ. ຖ້າເຮັດແບບນີ້, ບໍ່ພຽງແຕ່ເຮັດໃຫ້ໜ່ວຍງານຄົ້ນຄວ້າຂອງວົງການເຕັກນິກວິທະຍາສາດແລະວົງການເສດຖະກິດສາມາດເສີມຂະຫຍາຍບົດບາດຂອງຕົນທໍ່ນັ້ນ, ຄວາມຕ້ອງການຕະຫຼາດຂອງຜະລິດຕະພັນຂອງວິສາຫະກິດກໍຈະເພີ່ມຂຶ້ນຢ່າງໜັກແໜ້ນແລະຂະຫຍາຍກວ້າງອອກເລື້ອຍໆ. ທ່ານກ່າວວ່າ:
"ຂ້າພະເຈົ້າເຫັນວ່າ, ສິ່ງທີ່ສຳຄັນກວ່ານັ້ນແມ່ນລັດຖະບານຄວນສ້າງໂຄງການແບບຢ່າງຈຳນວນໜຶ່ງ, ເມື່ອການທົດລອງສຳເລັດຜົນແລ້ວ, ກໍສາມາດເຜີຍແຜ່ໄປປະຕິບັດຢູ່ແຂວງອື່ນແລະນະຄອນອື່ນ, ເມື່ອເປັນດັ່ງນັ້ນອຸດສາຫະກຳຈະເລີນໃໝ່ທີ່ມີລັກສະນະຍຸດທະສາດຂອງຈີນກໍຈະມີສະພາບແວດລ້ອມຕະຫຼາດທີ່ດີສົມຄວນແລະມີຜົນດີຕໍ່ການເຜີຍແຜ່ອຸດສາຫະກຳທີ່ຈະເລີນໃໝ່ໄປສູ່ທົ່ວໂລກ."
ພາຍໃຕ້ແຮງກົດດັນສອງຢ່າງທີ່ເສດຖະກິດທົ່ວໂລກຍັງບໍ່ຟື້ນຟູຄືນໝົດເທື່ອແລະ ຄວາມສາມາດຜະລິດຂອງອຸດສາຫະກຳສ່ວນໜຶ່ງພາຍໃນປະເທດຈີນຫຼາຍລົ້ນຕະຫຼາດ, ອຸດສາຫະກຳຈະເລີນໃໝ່ທີ່ມີລັກສະນະຍຸດທະສາດຈິ່ງໄດ້ມີພັນທະພິເສດ. ຕາມຂ່າວແຈ້ງວ່າ, ກະຊວງການເງິນຈີນຈະເພີ່ມງົບປະມານເພື່ອສະໜັບສະໜູນການພັດທະນາຂະແໜງການປະຢັດພະລັງງານແລະອະນຸລັກສິ່ງແວດລ້ອມ, ພັດທະນາອຸດສາຫະກຳລົດຍົນທີ່ໃຊ້ພະລັງງານໃໝ່ແລະບຸກເບີກພະລັງງານໃໝ່. ປີ 2010 ສູນກາງຈີນໄດ້ຈັດວາງງົບປະມານສະເພາະ 50 ຕື້ຢວນເພື່ອປະຢັດພະລັງງານແລະຫຼຸດການລະບາຍອາຍພິດເຮືອນແກ້ວ, ຫຼາຍກວ່າປີກາຍນີ້ 20 ຕື້ຢວນ. ມີຜູ້ຊ່ຽວຊານຄາດຄະເນວ່າພຽງພະລັງງານໃໝ່ລາຍດຽວກໍສາມາດດຶງດູດເອົາການລົງທຶນຫຼາຍພັນຕື້ຢວນ.
