ຜົນການເລືອກຕັ້ງສະແດງໃຫ້ເຫັນວ່າຝ່າຍອາຢັດ ອາລາວິໄດ້ຮັບທີ່ນັ່ງຫຼາຍກວ່າໝູ່
(GMT+08:00) 2010-03-27 17:54:57 cri
ຕາມຂ່າວCRI: ວັນທີ26ມີນານີ້, ຄະນະກຳມະການເລືອກຕັ້ງສູງສຸດຂອງອີຣັກໄດ້ປະກາດຜົນສຸດທ້າຍຂອງການເລືອກຕັ້ງສະພາອີຣັກ, ອົງການລາຍຊື່ອີຣັກທີ່ນຳພາໂດຍທ່ານອາຢັດອາລາວິ, ອະດີດນາຍົກລັດຖະມົນຕີໄດ້ຮັບທີ່ນັ່ງຫຼາຍກວ່າໝູ່.
ໃນຕອນຄ່ຳວັນທີ26ມີນານີ້, ທ່ານນູຣີ ອານມາລິຄີ, ນະຍົກລັດຖະມົນຕີອີຣັກຜູ້ປະຈຸບັນກ່າວວ່າ, ຝ່າຍທີ່ທ່ານນຳພານັ້ນບໍ່ຍອມຮັບເອົາຜົນດັ່ງກ່າວ, ແລະເຫັນວ່າ, ນີ້ຈະບໍ່ແມ່ນຜົນສຸດທ້າຍ. ທ່ານມາລິຄີຢືນຢັນວ່າ, ທ່ານພວມລໍຖ້າອົງການຕຸລາການຂອງອີຣັກທຳການຕັດສິນຕໍ່ການສໍ້ໂກງໃນການເລືອກຕັ້ງ. ທ່ານກ່າວວ່າ, ບໍ່ວ່າອົງການຕຸລາການຈະຕັດສິນແນວໃດ, ຜົນການຕັດສິນຈະຖືກຮັບເອົາ, ນີ້ຈະກາຍເປັນພື້ນຖານການມອບຮັບອຳນາດໂດຍສັນຕິແລະໂປ່ງໃສ.
