ຍັງອີກ 30 ວັນກໍ່ຈະຮອດມື້ໄຂງານວາງສະແດງໂລກຊຽງໄຮແລ້ວ
(GMT+08:00) 2010-04-01 17:33:40 cri
ທີ່ນີ້,ວິທະຍຸສາກົນແຫ່ງປະເທດຈີນ,ສະບາຍດີ,ທ່ານຜູ່ຟັງທີ່ໂຄລົບ, ມື້ນີ້ແມ່ນວັນທີ 1 ເມສາ ແມ່ນການນັບ ຖອຍຫຼັງ30 ວັນສູ່ມື້ໄຂງານວາງສະແດງໂລກຊຽງໄຮແລ້ວ , ງານວາງສະແດງໂລກທີ່ມີປະຫວັດມາເປັນເວລາ 159 ປີ ຈະຈັດຂຶ້ນຢູ່ປະເທດທີ່ພວມພັດທະນາເທື່ອທຳອິດ. ເພື່ອສະແດງໃຫ້ຄົນທົ່ວໂລກເຫັນງານວາງສະແດງໂລກທີ່ສຳເລັດຜົນດີເລີດ ຈົນເຮັດໃຫ້ຄົນລືມບໍ່ລົງ, ຄະນະຈັດຕັ້ງ,ພະນັກງານແລະປະຊາຊົນຊຽງໄຮທີ່ມີຄວາມຫ້າວຫັນພວມກຽມພ້ອມຢ່າງລະອຽດຮອບຄອບໃນໄລຍະສຸດທ້າຍ.ຕໍ່ໄປເຊີນທ່ານຟັງລາຍລະອຽດກ່ຽວກັບເລື່ອງນີ້: (ປ່ອຍສຽງ 1) ວັນທີ 1 ເມສານີ້,ໃນທ່າມກາງສາຍຝົນທີ່ຕົກຍິບໆ, ພະນັກງານທີ່ເຂົ້າຮ່ວມງານວາງສະແດງໂລກຊຽງໄຮ ໄດ້ສາບານຕົວຢູ່ສະຫນາມຫຼວງຕໍ່ຫນ້າຫໍວາງສະແດງຈີນໃນເຂດງານວາງະແດງໂລກ, ເຂົາເຈົ້າໄດ້ທຳການກະກຽມ ຢ່າງຮອບຄອບ, ເພື່ອຕ້ອນຮັບແຂກທີ່ຈະມາຈາກແຫ່ງຕ່າງໆດ້ວຍການບໍລິການຢ່າງມືອາຊີບ. ງານວາງສະແດງໂລກຊຽງໄຮເທື່ອນີ້ໄດ້ດືງດູດເອົາ
242 ປະເທດແລະອົງການຈັດຕັ້ງສາກົນ ມາເຂົ້າຮ່ວມການວາງສະແດງເທື່ອນີ້. ປັດຈຸບັນ, ຫໍວາງສະແດງຈີນ, ຫໍວາງສະແດງຫຼັກ, ສູນງານວາງສະແດງໂລກ,ສູນວັດທະນະທຳງານວາງສະແດງໂລກ,ສິ່ງກໍ່ສ້າງຢູ່ເສັ້ນຜ່າກາງຂອງເຂດງານວາງະແດງໂລກແລະສິ່ງກໍ່ສ້າງຖາວອນອື່ນໆໄດ້ສ້າງສຳເລັດແລ້ວ, ຫໍວາງສະແດງສ່ວນຫຼາຍທີ່ສ້າງເອງ,ຫໍວາງສະແດງວິສາຫະກິດແລະເຂດແບບຢ່າງຂອງຕົວເມືອງທີ່ດີທີ່ສຸດພວມຕົບແຕ່ງພາຍໃນ.
ຢູ່ນອກເຂດງານວາງສະແດງໂລກ, ພື້ນຖານໂຄງລ່າງສຳຄັນຈຳນວນໜຶ່ງກໍໄດ້ສ້າງສຳເລັດຢ່າງຕໍ່ເນື່ອງໃນມໍ່ໆມານີ້ເລີ່ມເປີດບໍລິການ. ຊຸມທາງຫົງສຽນເຊິ່ງເປັນກິດຈະການຄົມມະນາຄົມລະດັບໂລກໄດ້ເລີ່ມເປີດບໍລິການຢ່າງເປັນທາງການແລ້ວ; ໂຄງການປັບປຸງວ້າຍຖ່ານຂະໜາດໃຫຍ່ກໍ່ໄດ້ເປີດຕົວດ້ວຍຮູບໂສມອ່ຽມຢ່າງຊ້າ, ຮອດກາງເດືອນເມສານີ້, ອຸໂມງຖະໜົນຫຼົງຢ້ຽວຊຽງໄຮເຊິ່ງເປັນສິ່ງກໍ່ສ້າງຄົມມະນາຄົມປະກອບເປັນຊຸດຂອງງານວາງສະແດງໂລກຈະສ້າງສຳເລັດແລະເລີ່ມແລ່ນລົດແລ້ວ.
ທ່ານຫົງຮ້າວ, ຫົວໜ້າພະແນກງານວາງສະແດງໂລກຊຽງໄຮກ່າວວ່າ, ງານວາງສະແດງໂລກຊຽງໄຮຈະເລີ່ມລອງເປັນບໍລິການໃນວັນທີ 20 ເມສານີ້, ເຂົາເຈົ້າຈະທຳການກະກຽມເປັນຢ່າງດີ, ຮັບປະກັນຄວາມປອດໄພໃນເຂດວາງສະແດງໃຫ້ໝູນເດີນດ້ວຍ, ປະສິດທິພາບສູງແລະຢ່າງສະດວກຄ່ອງແຄ້ວ, ແລະຮັບໃຊ້ແຂກທີ່ມາຊົມງາມດ້ວຍຄຸນນະພາບດີ.
"ພວກເຮົາຈະທົດລອງຢ່າງຮອບດ້ານຕໍ່ພື້ນຖານໂຄງລ່າງປະເພດຕ່າງໆ, ເຄື່ອງໃຊ້ຕ່າງໆໃນຫໍວາງສະແດງແລະສິ່ງກໍ່ສ້າງບໍລິການປະເພດຕ່າງໆ, ຮັບປະກັນໃຫ້ສິ່ງເຫຼົ່ານີ້ໝູນເດີນຢ່າງປອດໄພແລະໝັ້ນທ່ຽງ, ຮັບຕ້ອນແຂກຜູ້ມີກຽດ, ບໍລິການສື່ມວນຊົນ, ຈັດຕັ້ງກິດຈະກຳຕ່າງໆ, ການເຊື່ອມຕໍ່ດ້ານຄົມມະນາຄົມແລະການຄຸ້ມຄອງການເດີນທາງຂອງນັກທ່ອງທ່ຽວເປັນຕົ້ນ, ຮັບປະກັນໃຫ້ຈັດວາງຢ່າງຮອບຄອບດີ; ວາງແຜນການຮັກສາຄວາມປອດໄພໃນເຂດວາງສະແດງໂລກໃຫ້ລະອຽດຕື່ມອີກ, ຮັບປະກັນແຜນການສຸກເສີນໃຫ້ດີ, ຢ່າງບໍ່ມີບ່ອນຜິດພາດ, ກວດກາຄວາມປອດໄພຢ່າງຮອບຄອບ."ທ່ານອີເຈິ້ງເຊິງ,ເລຂາຄະນະພັກນະຄອນຊຽງໄຮກ່າວວ່າ, ຄາດ ວ່າ, ພາຍໃນ 184 ວັນທີ່ຈັດງານວາງະສແດງໂລກຈະປະສົບກັບຄວາມຫຍຸ້ງຍາກແລະສິ່ງທ້າທາຍຕ່າງໆນາໆ,ແຕ່ເມື່ອທຸກຝ່າຍພະຍາຍາມຮ່ວມກັນ ແລ້ວ,ກໍ່ຈະບັນລຸເປົ້າຫມາຍທີ່ຈັດງານວາງສະແດງໂລກທີ່ສຳເລັດຜົນສູງທີ່ເຮັດໃຫ້ຄົນລືມບໍ່ລົງຢ່າງແນ່ນອນ.
ທ່ານກ່າວວ່າ:ການຈັດງານວາງສະແດງໂລກຢູ່ຈີນແມ່ນຄວາມຄອງຄອຍຂອງປະຊາຊາດຈີນໃນຮ້ອຍປີມານີ້,ແລະກໍ່ແມ່ນປະເທດທີ່ພວມພັດທະນາເປັນເຈົ້າພາບຈັດຂຶ້ນເທື່ອທຳອິດ, 184 ວັນຂອງການວາງສະແດງໂລກຈະເຕັມໄປດ້ວຍຄວາມຫຍຸ້ງຍາກລຳບາກຕ່າງໆ,ພວກເຮົາອາດຈະປະສົບກັບສິ່ງທີ່ຄາດຄຶດບໍ່ເຖິງຫລາຍຢ່າງ, ອາດຈະປະສົບກັບບັນຫາທີ່ບໍ່ເຄີຍພົບຫລາຍຢ່າງ, ແຕ່ຂ້າພະເຈົ້າເຊື່ອວ່າ, ແນວໃດພວກເຮົາກໍ່ຈະສາມາດສຳເລັດເປົ້າຫມາຍຕາມທີ່ຄາດໄວ້ຢ່າງແນ່ນອນ.ມາຮອດປັດຈຸບັນ,ຜູ່ຈັດຕັ້ງງານວາງສະແດງໂລກໄດ້ຈັດກິດຈະກຳສັບປະດາໂຄສະນາເຜີຍແຜ່ຢູ່ 20 ກວ່າປະເທດແລ້ວ, ປີ້ເຂົ້າຊົມງານກໍ່ຂາຍໄປແລ້ວ 22 ລ້ານໃບ,ເຊິ່ງກວມ 93% ຂອງເປົ້າຫມາຍທີ່ຈະຂາຍປີ້ 24 ລ້ານໃບ.
