ລັດຖະບານໄທວາງງົບປະມານ1ຕື້300ໂດລາຊ່ອຍຊາວກະສິກອນໃຊ້ໜີ້
(GMT+08:00) 2010-04-02 17:02:34 cri
ຕາມຂ່າວCRI, ຫວ່າງມໍ່ໆມານີ້, ລັດຖະບານໄທໄດ້ປະກາດແຜນການຊ່ອຍເຫຼືອຊາວກະສິກອນສະບັບໜຶ່ງ. ອີງຕາມແຜນການດັ່ງກ່າວ, ລັດຖະບານໄທຈະໃຊ້ງົບປະມານຊ່ອຍເຫຼືອ1ຕື້300ໂດລາໃຫ້ຊາວກະສິກອນຂອງໄທໃຊ້ໜີ້ຄືນ. ແຜນການດັ່ງກ່າວຈະສະເໜີໃຫ້ຄະນະລັດຖະບານອະນຸມັດໃນອາທິດໜ້າ.
ອີງຕາມແຜນການ, ໜີ້ສິນຂອງຊາວກະສິກອນຈະຫຼຸດເຄິ່ງໜຶ່ງ, ແລະຈະໃຊ້ເວລາ15ປີເພື່ອໃຊ້ໜີ້ອື່ນໆ. ນັກວິຊາການຂອງມະຫາວິທະຍາໄລທຳມະສາດແຫ່ງຊາດໄທກ່າວວ່າ, ໃນເວລາກຳອຳນາດ, ທ່ານທັກສິນ ຊິນນະວັດ, ອະດີດນາຍົກລັດຖະມົນຕີໄທທີ່ກຸ່ມເສື້ອແດງສະໜັບສະໜູນນັ້ນ, ກໍ່ເຄີຍສະເໜີມາດຕະການແນວນີ້ເພື່ອຊ່ອຍເຫຼືອຊາວກະສິກອນຜູ້ທຸກຍາກ, ສະນັ້ນທ່ານທັກສິນໄດ້ຮັບຄວາມຊົມເຊີຍຫຼາຍ, ທ່ານອະພິສິດ ເວດຊະຊີວະ, ນາຍົກລັດຖະມົນຕີໄທກໍ່ຢາກໃຊ້ມາດຕະການດັ່ງກ່າວເພື່ອຍາດແຍ່ງການສະໜັບສະໜູນຂອງຊາວກະສິກອນ.
ແຕ່ວ່າ, ບາງຄົນຕິຕຽນວ່າແຜນການດັ່ງກ່າວແມ່ນເງິນອຸດໜູນອີກຮູບແບບໜຶງ, ອາດຈະເຮັດໃຫ້ໄທປະສົບຜົນຮ້າຍອັນໜັກໜ່ວງ, ໂດຍສະເພາະຈະເຮັດໃຫ້ຊາວກະສິກອນບໍ່ໄດ້ຮັບປະໂຫຍດຢ່າງແທ້ຈິງ.
