ຕາມຂ່າວ cri:ວັນທີ 5 ເມສານີ້, ກອງປະຊຸມສຸດຍອດຂອງຄະນະກຳມະການແມ່ນ້ຳຂອງຄັ້ງປະຖົມມະເລີກໄດ້ຈັດຂຶ້ນຢູ່ຫົວຫີນຂອງໄທ.ປະເທດຕ່າງໆທີ່ຮ່ວມປະຊຸມກ່າວວ່າ, ຈະຮ່ວມກັນຕ້ານກັບໄພແຫ້ງແລ້ງຢູ່ທົ່ວເຂດລຸ່ມແມ່ນ້ຳຂອງໃນປັດຈຸບັນ, ແລະເພີ່ມທະວີການຄຸ້ມຄອງຊັບພະ ຍາກອນນ້ຳຂ້າມຊາດຂອງແມ່ນ້ຳຂອງ.ກອງປະຊຸມສຸດຍອດຄັ້ງປະຖົມມະເລີກຂອງຄະນະກຳມະການແມ່ນ້ຳຂອງນັບແຕ່ສ້າງຕັ້ງຂຶ້ນເປັນຕົ້ນມາໄດ້ຈັດຂຶ້ນຢູ່ເມືອງຫົວຫີນ,ເມືອງແຄມທະເລຂອງໄທໃນວັນທີ 5 ເມສານີ້, ນາຍົກລັດຖະມົນຕີຂອງໄທ,ກຳປູເຈຍ, ລາວແລະຫວຽດນາມທີ່ເປັນສີ່ປະເທດສະມາຊິກຂອງຄະນະກຳມະການດັ່ງກ່າວໄດ້ເຂົ້າຮ່ວມກອງປະຊຸມ, ທ່ານຊົ້ງຖ່າວ,ລັດຖະມົນຕີຊ່ວຍວ່າການກະຊວງການຕ່າງປະເທດຈີນແລະທ່ານອູນຽນວິນ,ລັດຖະມົນຕີວ່າການກະຊວງການຕ່າງປະເທດມຽນມາໄດ້ເຂົ້າຮ່ວມກອງປະຊຸມໃນຖານະທີ່ເປັນປະເທດຜູ່ສັງເກດການຂອງຄະນະກຳມະການແມ່ນ້ຳຂອງ.
ໃນກອງປະຊຸມ, ທ່ານອະພິເສດ ເວດຊະຊີວະ,ນາຍົກລັດຖະມົນຕີໄທກ່າວວ່າ, ແມ່ນ້ຳຂອງແມ່ນຫນຶ່ງໃນບັນດາສາຍນ້ຳໃຫຍ່ຂອງໂລກ, ແຕ່ໃດມາກໍ່ແມ່ນສາຍເລືອດຂອງປະຊາຊົນ 60 ລ້ານກວ່າຄົນທີ່ດຳລົງຊີວິດຢູ່ສອງແຄມຝັ່ງ.ຖ້າວ່າບໍ່ຄຸ້ມຄອງສາຍນ້ຳແຫ່ງນີ້ແລະຊັບພະຍາກອນທຳມະຊາດຢູ່ແຄມຝັ່ງສາຍນ້ຳນີ້ໃຫ້ດີແລ້ວ, ແມ່ນ້ຳສາຍໃຫຍ່ແຫ່ງນີ້ຈະມີຊີວິດຕໍ່ໄປບໍ່ໄດ້.ສ່ວນປະຊາຊົນຢູ່ສອງຝັ່ງແລະສັດສາວາສິ່ງໃນແມ່ນ້ຳສາຍນີ້ກໍ່ບໍ່ສາມາດຊົງຕົວຢູ່ໄດ້.ທ່ານກ່າວວ່າ:ກອງປະຊຸມເທື່ອນີ້ໄດ້ສົ່ງສັນຍານທີ່ແຂງແຮງອັນຫນຶ່ງອອກມາຄື:ຫມົດທຸກປະເທດຢູ່ເຂດລ້ອງແມ່ນ້ຳຂອງເຊິ່ງລວມທັງປະເທດທີ່ຢູ່ຍ່ານເຫນືອແລະຍ່ານໃຕ້ລ້ວນແຕ່ແມ່ນຝ່າຍທີ່ມີຜົນປະໂຫຍດຕິດພັນກັນ.ການພັດທະນາແມ່ນ້ຳຂອງໃນປັດຈຸບັນກໍ່ແມ່ນການເຮັດໃຫ້ທຸກເຊັ່ນຄົນໃນອະນາຄົດພັດທະນາຢ່າງຕໍ່ເນື່ອງແມ່ນພັນທະທີ່ພວກເຮົາຕ້ອງຮັບຜິດຊອບຮ່ວມກັນ.ກອງປະຊຸມສຸດຍອດທີ່ຈັດຂຶ້ນໃນວັນທີ 5 ເມສານີ້ໄດ້ຈັດພິທີລະສະຫລອງຄະນະກຳມະການແມ່ນ້ຳຂອງສ້າງຕັ້ງຂຶ້ນຄົບຮອບ 15 ປີ.ທ່ານບົວສອນ ບຸບຜາວັນ, ນາຍົກລັດຖະມົນຕີລາວໄດ້ຕີລາຄາສູງຕໍ່ວຽກງານໃນ 15 ປີມານີ້ຂອງຄະນະກຳມະການແລະຄວາມຫມາຍສຳຄັນຂອງກອງປະຊຸມສຸດຍອດເທື່ອນີ້.ທ່ານກ່າວວ່າ:
"ດ້ວຍເຫດນີ້, ໃນກອງປະຊຸມຄັ້ງນີ້ນອກຈາກຈະສະເຫຼີມສະຫຼອງ 15 ປີຂອງການຮ່ວມມືໄດ້ຂອບສັນຍາຂອງແມ່ນ້ຳຂອງແລ້ວ, ພວກເຮົາຈະໄດ້ທົບທວນໝາກຜົນການຮ່ວມມືໃຈຂົງເຂດຕ່າງໆ, ລວມທັງການປົກປັກຮັກສາສິ່ງແວດລ້ອມ, ການເສີມຂະຫຍາຍດ້ານດີແລະແກ້ໄຂດ້ານຫຂໍ້ທໍ້, ນັບທັງການກະກຽມຮັບມືກັບສິ່ງທ້າທາຍຕ່າງໆ, ເຊິ່ງອາດຈະນຳໄປສູ່ການເຊື່ອມໂຊມຂອງສະພາບແວດລ້ອມແລະອ່າງແມ່ນ້ຳຂອງ, ນອກຈາກການຮ່ວມມືລະຫວ່າງປະເທດພາຄີດ້ວຍກັນແລ້ວ, ຄະນະກຳມະທິການແມ່ນ້ຳຂອງສາກົນຂອງພວກເຮົາຍັງໄດ້ຂະຫຍາຍການຮ່ວມມືກັບປະເທດຄູ່ເຈລະຈາແລະຄູ່ຮ່ວມພັດທະນາອື່ນໆ, ແນ່ໃສ່ຄຸ້ມຄອງແລະນຳໃຊ້ຊັບພະຍາກອນນ້ຳແລະອ່າງແມ່ນ້ຳຂອງໃຫ້ມີປະສິດທິຜົນສູງແລະມີຄວາມຍືນຍົງ."
ກອງປະຊຸມສຸດຍອດຄະນະກຳມະການແມ່ນ້ຳຂອງເທື່ອນີ້ໄດ້ຈັດຂຶ້ນພາຍໃຕ້ສະພາບທີ່ທົ່ວເຂດລຸ່ມແມ່ນ້ຳຂອງ ພວມປະສົບກັບໄພແຫ້ງແລ້ງຢ່າງຮຸນແຮງ. ການຜະລິດແລະຊີວິດການເປັນຢູ່ຂອງປະຊາຊົນຫຼາຍສິບລ້ານຄົນເຊິ່ງລວມທັງປະຊາຊົນເຂດພາກຕາເວັນຕົກສຽງໃຕ້ຂອງຈີນທີ່ຕັ້ງຢູ່ຍ່ານເຫນືອແມ່ນ້ຳຂອງ ລ້ວນແຕ່ພົບຄວາມຫຍຸ້ງຍາກດ້ານນ້ຳກິນ. ໃນຖານະທີ່ເປັນປະເທດຜູ່ສັງເກດການຂອງຄະນະກຳມະການແມ່ນ້ຳຂອງ, ຈີນໄດ້ສົ່ງຄະນະຜູ່ແທນທີ່ນຳໂດຍທ່ານຊົ້ງທ່າວ,ລັດຖະມົນຕີຊ່ອຍວ່າການກະຊວງການຕ່າງປະເທດ ມາເຂົ້າຮ່ວມກອງປະຊຸມສຸດຍອດເທື່ອນີ້. ໃນກອງປະຊຸມສຸດຍອດເທື່ອນີ້,ທ່ານຊົ້ງທາວໄດ້ກ່າວຄຳປາໄສທີ່ມີຫົວຂໍ້ວ່າ: "ຮ່ວມແຮງຮ່ວມໃຈກັນຮ່ວມສະແຫວງຫາວິທີພັດທະນາ." ທ່ານກ່າວວ່າ, ການອະນຸລັກສິ່ງແວດລ້ອມທຳມະຊາດຂອງເຂດລຸ່ມແມ່ນ້ຳລ້ານລ້າງ-ແມ່ນ້ຳຂອງເປັນຢ່າງດີນັ້ນ ບໍ່ພຽງແຕ່ແມ່ນຄວາມມຸ້ງມາດປາຖະຫນາຮ່ວມກັນຂອງປະເທດຕ່າງໆ ຢູ່ເຂດລຸ່ມແມ່ນ້ຳຂອງ ເທົ່ານັ້ນ, ຍັງແມ່ນຜົນປະໂຫຍດອັນເປັນພື້ນຖານຂອງປະເທດຈີນເອງຄືກັນ.ທ່ານກ່າວວ່າ
"ໃນບັນຫາພັດທະນາແລະນຳໃຊ້ຊັບພະຍາກອນນ້ຳຂອງແມ່ນ້ຳລ້ານຊ້າງ, ໃນເວລາທີ່ຍຶດໝັ້ນຫຼັກການທີ່ສົມເຫດສົມຜົນ, ມີລະບຽບການແລະແບບຍືນຍົງ, ລັດຖະບານຈີນຍັງໄດ້ພິຈາລະນາເຖິງຜົນປະໂຫຍດຂອງປະເທດຢູ່ຍ່ານໃຕ້ຢ່າງຈິງຈັງ. ທີ່ຈິງແລ້ວ, ໃນຂະບວນການພັດທະນາຊັບພະຍາກອນພະລັງງານນ້ຳຂອງແມ່ນ້ຳລ້ານຊ້າງນັ້ນ, ລັດຖະບານຈີນໄດ້ວາງແຜນພັດທະນາຢ່າງວິທະຍາສາດແລະຮອບຄອບ, ປະຕິບັດຂໍ້ລະບຽບການອະນຸລັກສິ່ງແວດລ້ອມທົ່ວໄປຂອງສາກົນຢ່າງເຄັ່ງຄັດ, ໂດຍແນ່ໃສ່ແກ້ໄຂຄວາມເປັນຫ່ວງຂອງບາງປະເທດຢູ່ຍ່ານໃຕ້, ຈີນເປັນເຈົ້າການໄດ້ປະຕິບັດມາດຕະການອະນຸລັກສິ່ງແວດລ້ອມຫຼາຍຢ່າງເປັນພິເສດ, ແລະຍັງໄດ້ເສຍສະຫຼະຜົນປະໂຫຍດຈຳນວນໜຶ່ງຂອງການພັດທະນາໄຟຟ້ານ້ຳຕົກ."
ທ່ານຊົ້ງທ່າວກ່າວຢ້ຳວ່າ, ຕົວເລກທີ່ກ່ຽວຂ້ອງສະແດງໃຫ້ເຫັນວ່າ, ໄພແຫ້ງແລ້ງໃນໝົດເຂດລ້ອງແມ່ນ້ຳຂອງເທື່ອນີ້ແມ່ນຍ້ອນອາກາດແຫ້ງແລ້ງໜັກ, ລະດັບນ້ຳຂອງຫຼຸດຕ່ຳລົງບໍ່ກ່ຽວກັບຈີນສ້າງເຂື່ອນໄຟຟ້າຢູ່ແມ່ນ້ຳລ້ານຊ້າງ. ຈີນກໍແມ່ນຜູ້ປະສົບໄພແຫ້ງແລ້ງເທື່ອນີ້ຄືກັນ. ທ່ານກ່າວວ່າ, ຈີນຍິນດີສືບຕໍ່ຢືນຢູ່ໃນຫຼັກການ"ປຶກສາຫາລືຢ່າງສະເໝີພາບ, ເພີ່ມທະວີການຮ່ວມມື, ຕ່າງຝ່າຍຕ່າງາມີຜົນປະໂຫຍດແລະພັດທະນາຮ່ວມກັນ"ເພີ່ມທະວີການສົນທະນາແລະການຮ່ວມມືກັບຄະນະກຳມະການແມ່ນ້ຳຂອງ, ຮ່ວມກັນຊຸກຍູ້ພັດທະນາເສດຖະກິດສັງຄົມຂອງພາກພື້ນນີ້.
ຜູ້ນຳຂອງ4ປະເທດທີ່ເຂົ້າຮ່ວມກອງປະຊຸມສຸດຍອດຄະນະກຳມະການແມ່ນ້ຳຂອງຄັ້ງທຳອິດໄດ້ອອກ"ຖະແຫຼງການຫົວຫີນ"ໃນວັນທີ5ເມສານີ້, ໂດຍໄດ້ໃຫ້ຄຳໝັ້ນສັນຍາວ່າປະເທດຕ່າງໆຈະເພີ່ມທະວີການຮ່ວມມືກັນຕື່ມອີກ, ສຸມກຳລັງເພື່ອແກ້ໄຂການທ້າທາຍຫຼາຍຢ່າງຂອງເຂດລຸ່ມແມ່ນ້ຳຂອງ.
