ກອງປະຊຸມສຸດຍອດກ່ຽວກັບຄວາມປອດໄພດ້ານນິວເຄຼຍຄັ້ງປະຖົມມະເລີກທີ່ດຳເນີນເປັນເວລາສອງວັນຢູ່ນະຄອນຫລວງວໍຊິງຕັນຂອງອາເມລິການັ້ນໄດ້ອັດລົງແລ້ວ.ກອງປະຊຸມໄດ້ເຜີຍແຜ່ປະກາດແຈ້ງການແລະແຜນການດຳເນີນງານ,ກ່າວເນັ້ນເຖິງການເພີ່ມທະວີການຮ່ວມມືໃນສາກົນ, ປັບປຸງລະບົບຄວາມປອດໄພດ້ານນິວເຄຼຍຂອງໂລກໃຫ້ສົມບູນຂຶ້ນ, ຮ່ວມກັນຕໍ່ຕ້ານກັບລັດທິກໍ່ການຮ້າຍດ້ວຍນິວເຄຼຍ,ເພື່ອສ້າງອະນາຄົດທີ່ປອດໄພກວ່າເກົ່າໃຫ້ແກ່ມວນມະນຸດ.
ກອງປະຊຸມເທື່ອນີ້ແມ່ນກອງປະຊຸມສຸດຍອດທີ່ຖືຄວາມປອດໄພດ້ານນິວເຄຼຍເປັນຫົວຂໍ້ທີ່ປະຊາຄົມໂລກຈັດຂຶ້ນເທື່ອທຳອິດ.ໃນກອງປະຊຸມຂ່າວທີ່ຈັດຂຶ້ນຫລັງກອງປະຊຸມສຸດຍອດ,ທ່ານບາຣັກໂອບາມາ, ປະທານາທິບໍດີອາເມລິກາກ່າວວ່າ, ກອງປະຊຸມໄດ້ສຳເລັດຫມາກຜົນຢ່າງໃຫຍ່ຫລວງ, ຜູ່ນຳທີ່ຮ່ວມປະຊຸມບໍ່ພຽງແຕ່ໄດ້ຫາລືບັນຫາຄວາມປອດໄພດ້ານນິວເຄຼຍເທົ່ານັ້ນ, ຍັງໄດ້ຢ່ວງບາດກ້າວທີ່ມີລັກສະນະທາດແທ້,ແລະທຳຄວາມພະຍາຍາມເພື່ອອະນາຄົດທີ່ປອດໄພກວ່າເກົ່າຂອງໂລກ.ທ່ານກ່າວວ່າ, ຜູ່ນຳທີ່ຮ່ວມປະຊຸມເປັນເອກະສັນກັນເຫັນວ່າປັດຈຸບັນ,ທົ່ວໂລກພວມປະເຊີນກັບການຂົ່ມຂູ່ທາງນິວເຄຼຍທີ່ນັບມື້ນັບຮີບດ່ວນແລະຫນັກຫນ່ວງ. ປະເທດຕ່າງໆໄດ້ຖືຄວາມປອດໄພດ້ານນິວເຄຼຍເປັນເປົ້າຫມາຍສຳຄັນໃນການທຳຄວາມພະຍາຍາມຮ່ວມກັນ,ແລະກໍ່ໄດ້ສ້າງເປົ້າຫມາຍຮ່ວມທີ່ກ້າຫານແລະຕິດແທດຕົວຈິງ, ຫວັງຢາກເພີ່ມທະວີການຄວບຄຸມວັດຖຸດິບນິວເຄຼຍທີ່ມັກເກີດບັນຫານັ້ນພາຍໃນ 4 ປີຂ້າງຫນ້ານີ້;ພ້ອມກັນນັ້ນ,ຜູ່ນຳທີ່ຮ່ວມປະຊຸມກໍ່ພາກັນກ່າວເນັ້ນວ່າ ຄວນເພີ່ມທະວີຂອບກົດຫມາຍສາກົນກ່ຽວກັບຄວາມປອດໄພດ້ານນິວເຄຼຍ.ທ່ານໂອບາມາຍັງກ່າວວ່າ, ຄວາມປອດໄພດ້ານນິວເຄຼຍພຽງແຕ່ແມ່ນບາດກ້າວຫນຶ່ງໃນເປົ້າຫມາຍໃຫຍ່, ທ່ານຫວັງຢາກໃຫ້ບັນລຸເປົ້າຫມາຍສ້າງໂລກທີ່ປອດນິວເຄຼຍໃນທີ່ສຸດ,ເຊິ່ງແມ່ນຄຳເວົ້າທີ່ທ່ານສະເຫນີອອກໃນເວລາກ່າວຄຳປາໄສຢູ່ນະຄອນຫລວງປຼາກຂອງສາທາລະນະລັດເຊັກໃນປີກາຍນີ້.
ໃນກອງປະຊຸມຄົບຄະນະທີ່ຈັດຂຶ້ນໃນມື້ດຽວກັນ,ຜູ່ນຳທີ່ເຂົ້າຮ່ວມກອງ ປະຊຸມ ໄດ້ດຳເນີນການແລກປ່ຽນກ່ຽວກັບນະໂຍບາຍແລະຈຸດຢືນຂອງປະເທດຕ່າງໆໃນການຄ້ຳປະກັນຄວາມປອດໄພດ້ານນິວເຄຼຍ, ແລະຍັງໄດ້ປຶກ ສາຫາລືກັນກ່ຽວກັບປະເທດຕ່າງໆຈະເຮັດໃຫ້ການເຄື່ອນໄຫວປະສານສົມ ທົບກັນແນວໃດເພື່ອຮັບມືກັບບັນຫາຄວາມປອດໄພດ້ານນິວເຄຼຍ ພາຍໃຕ້ສະ ຖານະການຄວາມຫມັ້ນຄົງສາກົນໃນປະຈຸບັນ. ໃນກອງປະຊຸມສຸດຍອດເທື່ອນີ້,ທ່ານຫູຈິນທາວ, ປະທານປະເທດຈີນ ກໍ່ໄດ້ກ່າວຄຳປາໄສທີ່ສຳຄັນໂດຍໄດ້ເພື່ອບັນລະຍາຍຫຼັກຫມັ້ນຂອງຈີນໃນບັນຫາຄວາມປອດໄພດ້ານນິວເຄຼຍ. ຫຼັງຈາກອັດປະຊຸມແລ້ວ, ຜູ່ນຳທີ່ເຂົ້າຮ່ວມກອງປະຊຸມ ໄດ້ເຜີຍແຜ່ປະກາດແຈ້ງການແລະແຜນການດຳເນີນງານ,ເຊິ່ງໄດ້ກ່າວເຖິງການບັນລະຍາຍເພີ່ມທະວີການຮ່ວມມືກັນໃນບັນຫາຄວາມປອດໄພດ້ານນິວເຄຼຍ,ແລະໄດ້ຈັດ ວາງວຽກງານລະອຽດ ຈຳນວນຫນຶ່ງ.
ປະກາດແຈ້ງການຂອງກອງປະຊຸມສຸດຍອດຂຽນວ່າ, ລັດທິກໍ່ການຮ້າຍດ້ວຍນິວເຄຼຍແມ່ນຫນຶ່ງໃນການຂົ່ມຂູ່ທີ່ມີລັກສະນະທ້າທາຍຫຼາຍທີ່ສຸດຕໍ່ຄວາມປອດໄພສາກົນ, ມາດຕະການປ້ອງກັນຄວາມປອດໄພດ້ານນິວເຄຼຍທີ່ແຂງແຮງ ແມ່ນຊ່ອງທາງທີ່ບັງເກີດຜົນທີ່ສຸດເພື່ອປ້ອງກັນບໍ່ໃຫ້ພວກກໍ່ການຮ້າຍ,ພວກກະທຳຜິດພ້ອມດ້ວຍຜູ່ທີ່ບໍ່ໄດ້ຮັບສິດອື່ນໆຮັບເອົາວັດຖຸນິວເຄຼຍ. ປະກາດແຈ້ງການເນັ້ນຫນັກໃຫ້ປະເທດຕ່າງໆພະຍາຍາມຮ່ວມມືກັນຢ່າງຕໍ່ເນື່ອງ, ແລະໃຊ້ການເຄື່ອນໄຫວຢ່າງສະຫມັກໃຈ. ຖ້າວ່າປະກາດແຈ້ງການໄດ້ສະແດງໃຫ້ເຫັນຄວາມປາຖະຫນາທາງການເມືອງຂອງຜູ່ນຳປະເທດຕ່າງໆທີ່ຮ່ວມກັນທຳຄວາມພະຍາຍາມ, ສ່ວນ"ແຜນການດຳເນີງານ"ທີ່ກອງປະຊຸມເຜີຍແຜ່ ກໍ່ແມ່ນແຜນການສະບັບຫນຶ່ງເພື່ອເພີ່ມທະວີການຮ່ວມມືຄວາມປອດໄພດ້ານນິວເຄຼຍ.
ແຕ່ວ່າ, ກໍມີບຸກຄົນວິເຄາະກ່າວວ່າ, ຈັດກອງປະຊຸມສຸດຍອດຄວາມປອດໄພດ້ານນີວເຄຼຍກໍບໍ່ໝາຍຄວາມວ່າບັນຫາດັ່ງກ່າວຈະໄດ້ຮັບການແກ້ໄຂໃຫ້ຕົກໄປ. ບັນຫາຄວາມປອດໄພນີວເຄຼຍຕ້ອງການຄວາມພະຍາຍາມຢ່າງບໍ່ລົດລະອັນຍາວນານ, ແຮ່ງຕ້ອງການການຮ່ວມມືຂອງປະເທດຕ່າງໆຢ່າງຕິດແທດຕົວຈິງ. ກ່ອນອື່ນໝົດ, ຄວາມຮັບຮູ້ຕໍ່ບັນຫາຄວາມປອດດ້ານໄພນີວເຄຼຍຂອງປະເທດຕ່າງໆສາມາດເປັນເອກະສັນກັນຢູ່ລະດັບດຽວກັນຫຼືບໍ່, ປະຈຸບັນຍັງບໍ່ຈະແຈ້ງ. ການຂົ່ມຂູ່ດ້ານຄວາມປອດໄພທີ່ປະເທດຕ່າງໆປະເຊີນໜ້າແມ່ນຕ່າງກັນ, ສະນັ້ນໃນບັນຫາຮັບປະກັນຄວາມປອດໄພນີວເຄຼຍ, ບໍ່ສາມາດຖືຄວາມເວົ້າຂອງປະເທດໃດໜຶ່ງເປັນມາດຕະຖານເອກະພາບ, ຫາກແມ່ນຄວນດຳເນີນການປຶກສາຫາລືຕື່ມອີກພາຍໃຕ້ຂອບຫຼາຍຝ່າຍ, ພ້ອມທັງເສີມສ້າງຂອບກົດໝາຍສາກົນດ້ານຄວາມປອດໄພນີວເຄຼຍ, ແຕ່ເລື່ອງນີ້ຕ້ອງການເວລາຍາວນານ. ອັນທີສອງ, ປະຊາຄົມໂລກເພີ່ມທະວີການຮ່ວມມືໃນດ້ານຄວາມປອດໄພນີວເຄຼຍຄວນກວ້າງຂວາງກວ່າເກົ່າ, ພຽງແຕ່ສຸມສາຍຕາຢູ່ບັນຫາຄວບຄຸມງວັດຖຸນີວເຄຼຍນັ້ນແມ່ນບໍ່ພຽງພໍ. ອັນສຸດທ້າຍ, ປະເທດຕ່າງໆມີຄວາມຫຼຸດໂດນກັນໃນການລົງທຶນແລະວິທີຮັກສາຄວາມປອດໄພໃນຂົງເຂດຄວາມປອດໄພນີວເຄຼຍ, ໂດຍສະເພາະແມ່ນປະເທດພວມພັດທະນາ, ໃນດ້ານການຄຸ້ມຄອງວັດຖຸນີວເຄຼຍຍັງຕ້ອງການລົງທຶນແລະການຊ່ອຍເຫຼືອດ້ານເຕັກນິກຫຼາຍກວ່າເກົ່າ, ຖ້າວ່າເຮັດວຽກງານດ້ານນີ້ບໍ່ພຽງພໍ, ອາດຈະສ້າງຜົນສະທ້ອນບໍ່ດີຕໍ່ການຮ່ວມມືສາກົນດ້ານການເພີ່ມທະວີຄວາມປອດໄພນີວເຄຼຍ. ສະນັ້ນສາມາດເຫັນໄດ້ວ່າ, ປະຊາຄົມໂລກຍັງມີໜ້າທີ່ໜັກໜ່ວງບົນເສັ້ນທາງຮັກສາຄວາມປອດໄພນີວເຄຼຍ.
