ຜູ້ກູ້ໄພສືບຕໍ່ອອກແຮງສຸດຂີດຊອກຫາຜູ້ຫາຍສາບສູນໃນແຜ່ນດິນໄຫວຢູ້ຊູ້ ຈັດວາງປະຊາຊົນທີ່ປະສົບໄພ
(GMT+08:00) 2010-04-17 18:49:06 cri
ມາຮອດ 7 ໂມງ 49 ນາທີໃນວັນທີ 17 ເມສານີ້, ແຜ່ນດິນໄຫວ 7,1 ລິກເທີ ທີ່ເກີດຂຶ້ນຢູ່ເມືອງຢູ້ຊູ້ຂອງກິ່ງແຂວງຢູ້ຊູ້ເຜົ່າຕິເບດປົກຄອງຕົນເອງຂອງແຂວງຊິ່ງໄຫຕາເວັນຕົກຈີນໄດ້ຜ່ານໄປ 3 ມື້ແລ້ວ, ແຕ່ຝ່າຍທີ່ກ່ຽວຂ້ອງຍັງພວມອອກແຮງສຸດຂີດເພື່ອຊອກຫາຜູ້ຖືກຝັງຢູ່ໃຕ້ຊາກອາຄານ, ປິ່ນປົວແລະຂົນຍ້າຍຜູ້ບາດເຈັບ, ວຽກງານຈັດວາງປະຊາຊົນທີ່ປະສົບໄພກໍ່ພວມດຳເນີນໄປຢ່າງມີລະບຽບ.
ແຜ່ນດິນໄຫວຢູ້ຊູ້ແຂວງຊິ່ງຫາຍໄດ້ເຮັດໃຫ້ 1144 ຄົນເສຍຊີວິດ, ໝື່ນກວ່າຄົນບາດເຈັບ. ນັບມາຮອດນັກຂ່າວລາຍງານຂ່າວ, ມີທະຫານຂອງກອງທັບປົດປ່ອຍປະຊາຊົນຈີນແລະກອງທັບຕຳຫຼວດຈີນທັງໝົດ 12000 ກວ່າຄົນໄດ້ເຂົ້າຮ່ວມການກູ້ໄພ. ວັນທີ 16 ເມສານີ້, ກະຊວງປ້ອງກັນຄວາມສະຫງົບຈີນໄດ້ອອກຄຳສັ່ງຊອກກູ້ຊີວິດ, ຮຽກຮ້ອງໃຫ້ຕຳຫຼວດປະຊາຊົນທີ່ເຂົ້າຮ່ວມການກູ້ໄພ, ຊອກກູ້ຊີວິດໃນທັນທີ, ອອກແຮງສຸດຂີດເພື່ອກອບກູ້ຄົນ, ທະແນມແຕ່ມີຄວາມຫວັງ, ກໍ່ບໍ່ປະຖິ້ມຢ່າງເດັດຂາດ.
ໃນເວລາດຽວກັນ, ວຽກງານປິ່ນປົວຜູ້ບາດເຈັບກໍ່ພວມຂຸ້ນຂ້ຽວດຳເນີນຢູ່. ຍ້ອນເງື່ອນໄຂປິ່ນປົວຂອງທ້ອງຖິ່ນມີຄວາມຈຳກັດ, ພາກສ່ວນຕ່າງໆ, ເຊັ່ນ, ການຂົນສົ່ງທາງຫຼວງ, ລົດໄຟແລະການບິນຈີນເປັນຕົ້ນໄດ້ຂົນສົ່ງຜູ້ບາດເຈັບໜັກໄປປິ່ນປົວຢູ່ເຂດອ້ອມແອ້ມດ້ວຍລົດພະຍາບານ, ລົດໄຟແລະຍົນຢ່າງທັນການ. ສະໜາມບິນຢູ້ຊູ້ທີ່ຮັບຜິດຊອບໜ້າທີ່ຂົນສົ່ງຜູ້ບາດເຈັບ, ໃນຍາມທຳມະດາ, ສອງມື້ຈຶ່ງມີຍົນລຳໜຶ່ງ. ຫຼັງຈາກແຜ່ນດິນໄຫວເກີດຂຶ້ນແລ້ວ, ພຽງວັນທີ 16 ເມສານີ້ມື້ດຽວກໍ່ມີຍົນ 46 ລຳບິນຂຶ້ນແລະລົງຈອດ.
ໃນການຂົນສົ່ງທາງບົກ, ທາງຫຼວງສຳຄັນຫຼາຍເສັ້ນຂອງເຂດປະສົບໄພສາມາດຮັບປະກັນໃຫ້ລົດແລ່ນໄດ້ຢ່າງສະດວກ. ທ່ານກາວຫົງເຟິ່ງ ລັດຖະມົນຕີຊ່ວຍວ່າການກະຊວງຄົມມະນາຄົມຂົນສົ່ງຈີນກ່າວວ່າ:
ກິ່ງແຂວງອີ້ຊູ້ແມ່ນເຂດທີ່ສູງຈາກໜ້ານ້ຳທະເລຫຼາຍ, ເຊິ່ງສູງຈາກໜ້ານ້ຳທະເລເກືອບ4ພັນແມັດ, ເງື່ອນໄຂທຳມະຊາດຂີ້ຮ້າຍຫຼາຍ. ການພະຍາກອນອາກາດກ່າວວ່າໃນຫຼາຍມື້ຕໍ່ໜ້າຈະມີຝົນແລະຫິມະຕົກ, ນີ້ໄດ້ນຳເອົາຄວາມຫຍຸ້ງຍາກຫຼາຍມາໃຫ້ວຽກງານຮັບປະກັນການຄົມມະນາຄົມແລະຂົນສົ່ງຂອງພວກຂ້າພະເຈົ້າ. ແຕ່ພາກສ່ວນທາງຫຼວງຂອງພວກຂ້າພະເຈົ້າໄດ້ເຮັດວຽກຢູ່ໃຕ້ເງື່ອນໄຂເຫຼົ່ານີ້ເລື້ອຍໆ, ແລະກໍມີບົດຮຽນແລະຄວາມສາມາດຮັບມືກັບສະພາບການດັ່ງກ່າວ.
ວຽກງານຈັດວາງປະຊາຊົນຜູ້ປະສົບໄພກໍພວມດຳເນີນໄປຢ່າງໜັກແໜ້ນ. ທ້າວເກີຊິວຢວນ ນັກຂ່າວCRIທີ່ໄປເອົາຂ່າວຢູ່ເຂດປະສົບໄພຕັ້ງແຕ່ມື້ເກີດໄພກ່າວວ່າ:
ວັນທີ16ເມສານີ້, ໃນເວລາຂ້າພະເຈົ້າໄປເອົາຂ່າວກ່ຽວກັບການແຈກຢາຍເຄື່ອງຂອງຢູ່ບ່ອນຈັດວາງຜູ້ປະສົບໄພທີ່ສະໜາມແຂ່ງມ້າຂອງເມືອງອີ້ຊູ້, ຕອນຄ່ຳມື້ນັ້ນ, ປະຊາຊົນຜູ້ປະສົບໄພລ້ວນແຕ່ໄດ້ກິນອາຫານຮ້ອນ. ນອກນີ້, ປະຊາຊົນສ່ວນຫຼາຍກໍໄດ້ນອນຢູ່ໃນຕູບຜ້າເຕັ້ນທີ່ອົບອຸ່ນແລ້ວ.
ປະຈຸບັນ, ປະຊາຊົນຜູ້ປະສົບໄພແຕ່ລະຄົນໄດ້ຮັບເງິນອຸດໜູນ15ຢວນແລະເຂົ້າສານເຄິ່ງກິໂລຕໍ່ມື້. ນອກນີ້, ຍັງມີເຄື່ອງຊ່ວຍເຫຼືອຕ່າງໆ ເຊັ່ນ ຕູບຜ້າເຕັ້ນ, ອາຫານແລະອື່ນໆພວມຂົນສົ່ງໄປເຂດປະສົບໄພຢ່າງບໍ່ຂາດສາຍ.
