ການກູ້ໄພແຜ່ນດິນໄຫວສະແດງໃຫ້ເຫັນກົນໄກຮັບມືກັບເຫດການສຸກເສີນຂອງຈີນນັບມື້ນັບສົມບູນ
(GMT+08:00) 2010-04-20 16:35:05 cri
ເວລາ 7 ໂມງ 49 ນາທີຂອງວັນທີ 14 ເມສານີ້, ເມືອງຢູ້ຊູ້ກິ່ງແຂວງເຜົ່າຕິເບດປົກຄອງຕົນເອງຢູ້ຊູ້ແຂວງຊິ່ງຫາຍຈີນໄດ້ເກີດເຫດແຜ່ນດິນໄຫວແຮງ 7,1 ລິກເຕີ,ພາຍໃນ 72 ຊົ່ວໂມງຫລັງເກີດແຜ່ນດິນໄຫວ, ຈີນໄດ້ສົ່ງເຈົ້າຫນ້າທີ່ກູ້ໄພທຸກປະເພດ 1 ຫມື່ນ 5 ພັນກວ່າຄົນໄປບ່ອນເກີດເຫດ,ໄດ້ຊ່ວຍເຫລືອປະຊາຊົນ 1 ຫມື່ນ 7 ພັນກວ່າຄົນທີ່ຖືກຖົມຢູ່ໃນເຮືອນທີ່ເພພັງ;ປະຊາຊົນປະສົບໄພໄດ້ເຂົ້າອາໃສຢູ່ຕູບຜ້າເຕັ້ນ,ອາຫານແລະນ້ຳດື່ມມີການຮັບປະກັນ, ແລະກໍ່ໄດ້ຮັບການປິ່ນປົວຢ່າງທັນການ.ປັດຈຸບັນ, ວຽກງານທຸກດ້ານຢູ່ເຂດປະສົບໄພພວມດຳເນີນໄປຢ່າງເປັນລະບຽບວ່ອງໄວ. ການກູ້ໄພໄດ້ຮັບຄວາມຄືບຫນ້າດີແນວນີ້,ໄດ້ສະແດງໃຫ້ເຫັນວ່າກົນໄກຮັບມືກັບກໍລະນີສຸກເສີນຂອງຈີນພວມນັບມື້ນັບດີຂຶ້ນ.
ເມື່ອເກີດແຜ່ນດິນໄຫວຮຸນແຮງຢູ່ເມືອງເວີ້ນຊວນແຂວງເສສວນໃນສອງປີກ່ອນ, ຈີນກໍ່ໄດ້ຮັບການຢືນຢັນຈາກວົງການທົ່ວໄປວ່າມີການຮັບມືໄດ້ຢ່າງວ່ອງໄວທັນການ.ເທື່ອນີ້ທົ່ວໂລກກໍ່ໄດ້ເຫັນວ່າຈີນມີປະຕິກິຍາໄວກວ່າເກົ່າອີກ,ຄື:ຫລັງຈາກເກີດແຜ່ນດິນໄຫວຢູ່ເມືອງຢູ້ຊູ້ພຽງ 20 ນາທີ, ກົມແຜ່ນດິນໄຫວແຫ່ງຊາດຈີນກໍ່ໄດ້ລາຍງານສະພາບຕໍ່ຄະນະລັດຖະບານ, ຄະນະລັດຖະບານກໍ່ຈັດຕັ້ງກອງບັນຊາການກູ້ໄພຂຶ້ນຢ່າງວ່ອງໄວ, ຕອນທ່ຽງມື້ດຽວກັນກໍ່ໄປຊີ້ນຳວຽກງານຢູ່ເຂດປະສົບໄພແລ້ວ.ໃນຂະນະດຽວກັນ,ກະຊວງປະຊາສົງເຄາະ,ກະຊວງສາທາລະນະສຸກ,ກະຊວງຄົມມະນາຄົມຂົນສົ່ງ,ກະຊວງທາງລົດໄຟແລະພາກສ່ວນອື່ນໆພາກັນນຳໃຊ້ກົນໄກຮັບມືກັບກໍລະນີສຸກເສີນ,ຈັດວາງວຽກງານຕ່າງໆຢ່າງທັນກັນ.ການມີປະຕິກິລິຍາຕອບຕໍ່ເຫດການຢ່າງວ່ອງໄວຄືແນວນີ້ໄດ້ຍາດເອົາເວລາທີ່ລ້ຳຄ່າໃນການກູ້ໄພ;ພາຍຫລັງເກີດແຜ່ນດິນໄຫວ 24 ຊົ່ວໂມງ, ຄົມມະນາຄົມແລະການສືສານຢູ່ແຫ່ງນັ້ນໄດ້ຟື້ນຟູມາເປັນປົກກະຕິໂດຍພື້ນຖານແລ້ວ, ພາຍໃນ 48 ຊົ່ວໂມງ,ບັນຫາໄຟຟ້າກໍ່ໄດ້ຮັບການແກ້ໄຂ,ປະຊາຊົນຜູ່ຖືກກະທົບຈາກແຜ່ນດິນໄຫວກໍ່ໄດ້ເຂົ້າອາໃສຢູ່ຕູບຜ້າເຕັ້ນແລ້ວ;ພາຍໃນ 72 ຊົ່ວໂມງ, ຜູ່ບາດເຈັບຫນັກຖືກສົ່ງໄປປິ່ນປົວຢູ່ບ່ອນອື່ນຕ່າງໆ.
ເທື່ອນີ້, ໂລກໄດ້ເຫັນປະເທດຈີນທີ່ຮັບມືກັບເຫດການສຸກເສີນຢ່າງມີປະສິດທິພາບສູງ. ເມື່ອປະເຊີນກັບໄພພິບັດ, ປະເທດຈີນເປັນຈິດໜຶ່ງໃຈດຽວກັນ, ມີການຈັດວາງຮອບຄອບກວ່າເກົ່າແລະການປະສານງານຢ່າງເປັນລະບຽບດີກວ່າເກົ່າ. ພາຍຫຼັງເກີດແຜ່ນດິນໄຫວແລ້ວ, ທ່ານຫູຈີນທ່າວ, ປະທານປະເທດຈີນໄດ້ສິ້ນສຸດການຢ້ຽມຢາມຕ່າງປະເທດກ່ອນເວລາກຳນົດແລະກັບຄືນປະເທດ, ເພາະວ່າ"ໃນຂະນະທີ່ປະສົບຄວາມຫຍຸ້ງຍາກ, ຂ້າພະເຈົ້າຕ້ອງຢູ່ຄຽງຂ້າງປະຊາຊົນຈີນ"; ທ່ານເວີນເຈ່ຍປາວ, ນາຍົກລັດຖະມົນຕີຈີນກໍໄດ້ເລື່ອນເວລາໄປຢ້ຽມຢາມຕ່າງປະເທດແລ້ວເດີນທາງໄປເຂດປະສົບໄພໂດຍດ່ວນ, ເພາະວ່າ"ຕ້ອງແຂ່ງຂັນກັບເວລາ, ສົ່ງຄວາມໝັ້ນໃຈແລະຈິດໃຈກ້າຫານແກ່ປະຊາຊົນປະສົບໄພໂດຍໄວ". ພ້ອກກັນນັ້ນ, ແຫ່ງຕ່າງໆ, ພາກສ່ວນຕ່າງໆແລະວົງການຕ່າງໆຂອງສັງຄົມໄດ້ເສີມຂະຫຍາຍບົດບາດຂອງຕົນ, ອອກແຮງຢ່າງສຸດຂີດເພື່ອເຮັດໃຫ້ວຽກງານກູ້ໄພເປັນລະບຽບຮຽບຮ້ອຍ.
ເທື່ອນີ້, ໂລກຍັງໄດ້ເຫັນປະເທດຈີນທີ່ທຸ່ນທ່ຽງກວ່າເກົ່າຢູ່ຕໍ່ໜ້າໄພພິບັດ. ພາຍຫຼັງເກີດແຜ່ນດິນໄຫວແລ້ວ, ພະແນກແຜ່ນດິນໄຫວແຂວງຊິງໄຮ, ໜ່ວຍກູ້ໄພດ່ວຍແຂວງຊິງໄຮ, ພະແນກສະຫວັດດີການສັງຄົມແຂວງຊິງໄຮ, ຕຳຫຼວດປະກອບອາວຸດຊິງໄຮໄດ້ຂ້ຽວເລັ່ງໄປຫາເມືອງອີ້ຊູ້ຈາກິດດຕ່າງໆ, ອົງການປົກຄອງກິ່ງແຂວງອີ້ຊູ້ກໍ່ຈັດຕັ້ງກອງທະຫານ, ໂຮງໝໍແລະພະນັກງານຂອງອົງການປົກຄອງດຳເນີນວຽກງານກູ້ໄພດ້ວຍຕົນເອງແລະຊ່ອຍເຫຼືອເຊິ່ງກັນແລະກັນ. ການເຄື່ອນໄຫວກູ້ໄພດ້ວຍຕົນເອງເຫຼົ່ານີ້ເຮັດໃຫ້ວຽກງານກູ້ໄພມີປະສິດທິພາບສູງຂຶ້ນ.
ກໍ່ຄືຄຳເວົ້າຂອງທ່ານເຟຼດິກ ອັງແກນເຄີຍກ່າວໄດ້ວ່າ, "ປະຊາຊາດທີ່ສະຫຼາດຈະ ຮຽນຄວາມຮູ້ໄດ້ຫຼາຍກວ່າຍາມປົກກະຕິໃນເວລາປະສົບໄພພິບັດ. ນັບຕັ້ງແຕ່ພະຍາດອັກເສບປອດຮຸນແຮງຫຼືຊາດສ໌ທີ່ເກີດຂຶ້ນໃນປີ 2003 ມາຮອດແຜ່ນດິນໄຫວຮຸນແຮງທີ່ເກີດຂຶ້ນຢູ່ເມືອງເວີ້ນຊ່ວນຂອງແຂວງເສສວນໃນປີ 2008 ,ແລະມາຮອດແຜ່ນດິນໄຫວ ທີ່ເກີດຂຶ້ນຢູ່ເມືອງຢູ້ຊູ້ແຂວງຊິ່ງໄຮເທື່ອນີ້, ຈີນໄດ້ມີປະຕິກິລາຍາຮັບມືຢ່າງວ່ອງໄວ ຈັດວາງວຽກງານຢ່າງລະອຽດຮອບຄອບແລະກອບກູ້ຊ່ອຍເຫຼືອຕົນເອງໄດ້ຢ່າງຢ່າງດີ ໃນເວລາປະເຊີນກັບໄພພິບັດ, ນີ້ສະແດງໃຫ້ເຫັນວ່າກົນໄກຮັບມືກັບເຫດການສຸກເສີນຂອງປະເທດຫນຶ່ງພວມນັບມື້ນັບສົມບູນຂຶ້ນ. ຄວາມສົມບູນ ດັ່ງກ່າວ ທັງແມ່ນຍ້ອນຈີນໄດ້ຮ່ຳຮຽນຈາກໄພທຳມະຊາດທີ່ເກີດຂຶ້ນແລະຮຽນຈາກບົດຮຽນທາງລົບ, ຍິ່ງແມ່ນຜົນທີ່ຕ້ອງເປັນໄປ ເມື່ອສັງຄົມເສດຖະກິດຈີນຂະຫຍາຍໄປຮອດໄລຍະອັນແນ່ນອນ, ແລະມີພື້ນຖານດ້ານກົດຫມາຍ ການຄ້ຳປະກັນທາງ ລະບອບ,ເງື່ອນໄຂຂອງສັງຄົມແລະນ້ຳໃຈຂອງປະຊາຊົນທີ່ກວ້າງເລິກ. ກົນໄກຮັບມືກັບເຫດ ການສຸກເສີນທີ່ສົມບູນຂຶ້ນໄດ້ເຮັດໃຫ້ຈີນສາມາດຮັກສາຄວາມທຸ່ນທ່ຽງ,ໃຈເຢັນບໍ່ກະວົນກະວາຍ,ອັນໄດ້ສ້າງພື້ນຖານອັນແຫມັ້ນແກ່ນໃຫ້ແກ່ຈີນໃນເວລາຍາດຊີງເອົາໄຊຊະນະໃນການກູ້ໄພແລະສ້າງສາບ້ານເມືອງທີ່ສວຍງານຄືນໃຫມ່.
