ເຫດການແຜ່ນດິນໄຫວອີ້ຊູ້ແຂວງຊິນໄຮທີ່ເກີດໃນວັນທີ14ເມສານີ້ໄດ້ເຮັດໃຫ້2ພັນກວ່າຄົນເສຍຊີວິດ,1ໝື່ນ2ພັນກວ່າຄົນບາດເຈັບ.ວັນທີ21ເມສານີ້,ພາຍຫລັງເກີດແຜ່ນດິນໄຫວ1ອາທິດ,ເພື່ອສະແດງຄວາມເສົ້າສະຫຼົດໃຈຂອງປະຊາຊົນບັນດາເຜົ່າທົ່ວປະເທດຈີນໄດ້ຈັດການໄວ້ອາໄລໃນທົ່ວປະເທດ.ແຫ່ງຕ່າງໆທົ່ວປະເທດແລະສະຖານທູດ,ສະຖານກົງສູນຈີນປະຈໍາຕ່າງປະເທດກໍຊັກທຸງຊາດລົງເຄິ່ງເສົາ,ແລະຢຸດເຊົາການບັນເທີງມ່ວນຊື່ນຕ່າງໆ.ນີ້ແມ່ນການຈັດການໄວ້ອາໄລໃນທົ່ວປະເທດຕໍ່ຜູ້ເສຍຊີວິດໃນໄພທໍາມະຊາດເປັນເທື່ອທີ2ຫລັງຈາກເກີດໄພແຜ່ນດິນໄຫວເວີ້ນຊວນໃນປີ2008ແລ້ວ.
ຕອນຂ້ອນແຈ້ງວັນທີ21,ຢູ່ສະໜາມຫລວງທ່ຽນອ່ານເມີນ,ທຸງແດງ5ດາວໄດ້ຄ່ອຍໆຊັກຂຶ້ນສູ່ຍອດເສົາຕິດຕາມດ້ວຍການບັນເລງເພງຊາດຈີນ,ແລ້ວຢຸດຢູ່ເທິງຍອດເສົາເປັນເວລາສັ້ນໆແລ້ວກໍ່ຄ່ອຍໆຊັກລົງສູ່ເຄິ່ງເສົາ.ນີ້ແມ່ນຈີນຊັກທຸງຊາດລົງເຄິ່ງເສົາເພື່ອໄວ້ອາໄລຜູ້ເສຍຊີວິດໃນໄພແຜ່ນດິນໄຫວຄັ້ງນີ້.
ເວລາ10ໂມງ,ຢູ່ແຫ່ງຕ່າງໆແຂວງຊິງໄຮກໍ່ບີບແກລົດ,ເປີດໂຫວດລົດໄຟ,ເປີດສຽງຫວໍເຕືອນໄພທາງອາກາດ,ຜູ້ນໍາຈີນເຊັ່ນທ່ານຫູຈີນທ່າວ,ທ່ານຈ່ຽງເຈີໝີນ,ທ່ານອູ່ປ່າງກໍ,ທ່ານເວີນເຈ່ຍປ່າວແລະທ່ານອື່ນໆຮ່ວມກັນກັບປະຊາຊົນຈີນທົ່ວປະເທດໄດ້ກົ້ມຫົວໄວ້ອາໄລເຖິງຜູ້ເສຍຊີວິດ,ທ່ານຫູຈີນທ່າວ,ປະທານປະເທດຈີນກ່າວວ່າ,
ເພື່ອສະແດງຄວາມເສົ້າສະທຼົດໃຈຕໍ່ຜູ້ເສຍຊີວິດໃນໄພແຜ່ນດິນໄຫວອີ້ຊູ້ແຂວງຊິງໄຮ,ເຊີນຢືນຂຶ້ນ,ກົ້ມຫົວໄວ້ອາໄລເຖິງຜູ້ເສຍຊີວິດໃນໄພແຜ່ນດິນໄຫວຄັ້ງນີ້.
ມື້ດຽວກັນ,ຢູ່ຕາແສງເຈຍກູເມືອງອີ້ຊູ້ທີ່ປະສົບໄພໜັກທີ່ສຸດໃນແຜ່ນດິນໄຫວຄັ້ງນີ້,ປະຊາຊົນເຜົ່າຕິເບດແລະເຜົ່າຮັ້ນຫຼາຍພັນຄົນຟ້າວໄປສະຖານທີ່ໄວ້ອາໄລ,ເພື່ອຮ່ວມກັບເຈົ້າໜ້າທີ່ກູ້ໄພ,ສະແດງຄວາມເສົ້າສະຫຼົດໃຈຢ່າງສຸດຊຶ້ງຕໍ່ຜູ່ເສຍຊີວິດ. ແມ່ເຖົ້າປຸຈູນ ໂຈມາ ອາຍຸ60ກວ່າປີຢືນຢູ່ໜ້າແຖວຜູ່ໄວອາໄລ.ເພິ່ນບອກນັກຂ່າວຢ່າງໂສກເສົ້າວ່າ:
"ຜູ່ເສຍຊີວິດຫຼາຍໂພດ,ເພື່ອນບ້ານໃກ້ຊິດຂອງແມ່ເຖົ້າກໍ່ເສຍຊີວິດໝົດ,ແມ່ເຖົ້າຮູ້ສຶກເສົ້າສະຫຼົດໃຈຫຼາຍ,ມາໄວ້ອາໄລແລະລຳລຶກເຂົາເຈົ້າຢູ່ທີ່ນີ້."
ທ້າວອາງເຊ ໄຊຢີງ ທີ່ມີຍາດພີ່ນ້ອງ13ຄົນເສຍຊີວິດໃນແຜ່ນດິນໄຫວຄັ້ງນີ້ບອກນັກຂ່າວວ່າ,ລາວຈະຫັນຄວາມເສົ້າສະຫຼົດໃຈເປັນກຳລັງແຮງ,ເພື່ອສ້າງສາຊີວິດໃໝ່.
"ປະຈຸບັນສຳຄັນທີ່ສຸດແມ່ນຫັນຄວາມເສົ້າສະຫຼົດໃຈເປັນກຳລັງແຮງ,ຜູ້ຕາຍກໍ່ຍາຍໄປແລ້ວ,ຜູ້ຢູ່ກໍ່ຕ້ອງດຳເນີນຊີວິດຕໍ່ໄປ.ຂໍຂອບໃຈລັດຖະບານ,ໃນມື້ທີສອງທີ່ເກີດແຜ່ນດິນໄຫວ,ກໍ່ຂົນສົ່ງຕູບຜ້າເຕັ້ນ,ເຄື່ອງຢູ່ຂອງກິນມາຮອດນີ້ໂລດ."
ມື້ດຽວກັນ,ຢູ່ໂຮງຮຽນ,ສະໜາມຫຼວງ,ຄຸ້ມຊຸມຊົນຂອງແຫ່ງຕ່າງໆຂອງຈີນ, ປະຊາຊົນຂອງເຜົ່າຕ່າງໆແລະທຸກເພດໄວພາກັນເຂົ້າຮ່ວມການໄວ້ອາໄລດ້ວຍຮູບການຕ່າງໆເຊັ່ນວາງພວງມາລາ,ອຸທິດສ່ວນກຸສົນແລະບໍລິຈາກເງິນເປັນຕົ້ນ.
ມື້ນີ້ ງານວາງສະແດງໂລກຊຽງໄຮທີ່ທົດລອງດຳເນີນນັ້ນກໍ່ຍົກເລີກການສະແດງສິນລະປະຕ່າງໆ.ໃນຖານະເປັນຫໍລະດັບແຂວງທີ່ເຂົ້າຮ່ວມວາງສະແດງ,ຫໍແຂວງຊິງໄຮໄດ້ຈັດພິທີວາງພວງມາລາເຖິງຜູ່ເສຍຊີວິດຢູ່ອີ້ຊູ້.
ວັນທີ21ເມສາ(ຄືມື້ນີ້) ອົງການປົກຄອງຂອງເຂດບໍລິຫານພິເສດຮົງກົງແລະມາກາວໄດ້ຊັກທຸງຊາດລົງເຄິ່ງເສົາ.ເວລາ9ໂມງ30ນາທີ,ທ່ານເຈີນອີນສວນ ຜູ່ວ່າການບໍລິຫານງານເຂດພິເສດຮົງກົງນຳພາສະມາຊິກການນຳຢືນກົ້ມຫົວໄວ້ອາໄລ1ນາທີ.ຫ້ອງການຕິດຕໍ່ພົວພັນຂອງລັດຖະບານປະຊາຊົນສູນກາງຈີນປະຈຳຮົງກົງກໍ່ໄວ້ອາໄລເຊັ່ນກັນ.
ສະຖານທູດແລະສະຖານກົງສຸນຈີນປະຈຳຕ່າງປະເທດກໍ່ພາກັນຈັດການໄວ້ອາໄລເຖິງພີ່ນ້ອງຮ່ວມຊາດທີ່ເສຍຊີວິດ,ຊາວຈີນຢູ່ຕ່າງປະເທດແລະເພື່ອນມິດຕ່າງປະເທດກໍ່ທະຍອຍກັນໄປໄວ້ອາໄລເພື່ອສະແດງຄວາມເສົ້າສະຫຼົດໃຈ.
