ວັນທີ 22 ເມສານີ້, ກະຊວງອຸດສາຫະກຳແລະເຕັກໂນໂລຊີຂໍ້ມູນຂ່າວສານຂອງຈີນໄດ້ຈັດກອງປະຊຸມຂ່າວກ່ຽວກັບສະພາບການພັດທະນາເສດຖະກິດອຸດສາຫະກຳຈີນໃນໄຕມາດທີຫນຶ່ງປີນີ້ຢູ່ທີ່ນະຄອນຫລວງປັກກິ່ງ.ທ່ານຈູ່ຫົງເຢີ້ນ,ໂຄສົກກະຊວງການອຸດສາຫະກຳແລະເຕັກໂນໂລຊີຂໍ້ມູນຂ່າວສານພ້ອມກັບເຈົ້າ ຫນ້າທີ່ທ່ານອື່ນໆກ່າວວ່າ, ປີນີ້, ເສດຖະກິດອຸດສາຫະກຳຈີນມີການເລີ່ມຕົ້ນທີ່ດີ,ແຕ່ພື້ນຖານຂອງການຟື້ນຕົວຍັງຄວນສ້າງໃຫ້ຫມັ້ນຄົງກວ່າເກົ່າ.ຕໍ່ໄປ ເຊີນຟັງບົດແຈ້ງຂ່າວລະອຽດ.
ຕົວເລກສະແດງໃຫ້ເຫັນວ່າ, ໃນໄຕມາດທີຫນຶ່ງປີນີ້, ມູນຄ່າເພີ່ມດ້ານອຸດສາຫະກຳຈີນທີ່ມີລາຍໄດ້ 5 ລ້ານຢວນຂຶ້ນໄປຕໍ່ປີຂອງຈີນໄດ້ເພີ່ມຂຶ້ນຫລາຍກວ່າໄລຍະດຽວກັນຂອງປີກາຍ 19,6%,ຄວາມໄວໃນການເຕີບໂຕສູງກວ່າໄລຍະດຽວກັນຂອງປີກາຍເກືອບ 15%.ອັດຕານຳໃຊ້ຄວາມສາມາດການຜະລິດຂອງວິສາຫະກິດອຸດສາຫະກຳຂະຫນາດໃຫຍ່ແລະຂະຫນາດກາງຫລາຍກວ່າ 80%.ຄຽງຄູ່ກັບສະພາບຕະຫລາດດີຄືນ, ສອງເດືອນທຳອິດຂອງປີນີ້,ຜົນກຳໄລຂອງວິສາຫະກິດອຸດສາຫະກຳຂະຫນາດໃຫຍ່ເພີ່ມຂຶ້ນຫລາຍກວ່າໄລຍະດຽວກັນຂອງປີກາຍນີ້ ຫນຶ່ງເທົ່າ.ທ່ານຈູ່ຫົງເຢີ້ນ,ໂຄສົກກະຊວງອຸດສາຫະກຳແລະເຕັກໂນໂລຊີຂໍ້ມູນຂ່າວສານຈີນຊີ້ອອກວ່າ,ຜົນກຳໄລຂອງຂະແຫນງການອຸດສາຫະກຳເພີ່ມຂຶ້ນຢ່າງຫລວງຫລາຍ,ແມ່ນຜົນຍ້ອນນະໂຍບາຍຂອງລັດກະຕຸ້ນເສດຖະກິດໃຫ້ດີຂຶ້ນ,ແຕ່ກໍ່ມີຍ້ອນວ່າຕົວເລກພື້ນຖານໃນໄລຍະດຽວກັນຂອງປີກາຍອ່າວຕ່ຳ,ລາຄາສິນຄ້າສູງຂຶ້ນແລະອື່ນໆ.
ນອກນີ້, ເສດຖະກິດອຸດສາຫະກຳໄຕມາດທີຫນຶ່ງເຕີບໂຕແມ່ນໄດ້ຮັບບົດບາດຊຸກຍູ້ຈາກການລົງທຶນຢ່າງຈະແຈ້ງ,ສະນັ້ນບໍ່ຄວນປະຫມາດການສະຫນັບສະຫນູນຂອງນະໂຍບາຍນີ້. ສະນັ້ນ, ທ່ານຈູ່ຫົງເຢີ້ນກ່າວເນັ້ນວ່າ, ໃຕ້ສະພາບທີ່ສະຖານະການການຄ້າກັບຕ່າງປະເທດຍັງສົບສົນຢູ່ແລະແຮງກົດດັນຂອງລາຄາວັດຖຸດິບທີ່ສູງຂຶ້ນ, ຍັງຄວນສ້າງພື້ນຖານທີ່ເຮັດໃຫ້ເສດຖະກິດອຸດສາຫະກຳຟື້ນຕົວຄືນໃຫ້ຫມັ້ນຄົງຕື່ມອີກ.
"ການສົ່ງອອກສິນຄ້າຂອງຈີນໃນໄຕມາດທີໜຶ່ງໄດ້ເພີ່ມຂຶ້ນ 28,7%, ພຽງແຕ່ຫຼາຍກວ່າໄລຍະດຽວກັນຂອງປີກາຍ 3,4%. ຂະບວນການທີ່ເສດຖະກິດໂລກຟື້ນຕົວຄືນໃໝ່ຍັງຫຍຸ້ງຍາກຫຼາຍ. ລັດທິປົກປ້ອງການຄ້າຂອງປະເທດຕ່າງໆມີເພີ່ມຂຶ້ນຢ່າງຈະແຈ້ງ, ໄດ້ສ້າງຜົນສະທ້ອນທີ່ບໍ່ດີຕໍ່ສະຖານະການການຄ້າກັບຕ່າງປະເທດຂອງຈີນ. ໃນໄຕມາດທີໜຶ່, ລາຄາວັດຖຸດິບອຸດສາຫະກຳ, ວັດຖຸເຊື້ອໄຟແລະພະລັງງານແພງກວ່າໄລຍະດຽວກັນຂອງປີກາຍນີ້ 9,9%, ລາຄາຜະລິດຕະພັນສົ່ງອອກຈາກໂຮງງານພຽງແພງຂຶ້ນ 5,2% ຫຼາຍກວ່າໄລຍະດຽວກັນປີກາຍນີ້, ຄາດວ່າລາຄາຜະລິດຕະພັນເບື້ອງຕົ້ນໃນຕະຫຼາດສາກົນຍັງຈະແພງຂຶ້ນຕໍ່ໄປ, ຈະມີຜົນກະທົບແຮງສົມຄວນຕໍ່ການຜະລິດຂອງຂະແໜງການທີ່ກ່ຽວຂ້ອງ."
ທ່ານຈູ່ຫົງເຢີນກ່າວວ່າ, ເພື່ອສືບຕໍ່ຮັບມືກັບວິກິດການການເງິນສາກົນ, ຮັກສາໃຫ້ອຸດສາຫະກຳແລະເສດຖະກິດພັດທະນາຢ່າງໝັ້ນທ່ຽງແລະໄວສົມຄວນ, ຈີນຈະເລັ່ງລັດຊຸກຍູ້ປັບປຸງຂະແໜງການສຳຄັນໃຫ້ຈະເລີນຂຶ້ນ, ເລັ່ງລັດກໍ່ສ້າງອຸດສາຫະກຳຈະເລີນໃຫມ່ທີ່ມີລັກສະນະຍຸດທະສາດ, ຊຸກຍູ້ວິສາຫະກິດຂະໜາດກາງແລະນ້ອຍໃຫ້ພັດທະນາຕື່ມອີກ. ທ່ານຍັງໄດ້ເຕືອນເປັນພິເສດວ່າ, ໃນເວລາທີ່ຖືໂອກາດວາງແຜນພັດທະນາຂົງເຂດລະດັບຊາດເພື່ອດຳເນີນການລົງທຶນທີ່ກ່ຽວຂ້ອງນັ້ນ, ແຫ່ງຕ່າງໆຄວນລະວັງຫຼົບຫຼີກບໍ່ໃຫ້ຄວາມສາມາດການຜະລິດເຫຼືອເຟືອອີກ.
ການລົງທຶນຢູ່ແຫ່ງຕ່າງໆຕ້ອງຫຼີກເວັ້ນບໍ່ໃຫ້ເກີດມີສະພາບທີ່ກໍ່ສ້າງຊ້ຳຊ້ອນກັນອີກ,ຈະພາໃຫ້ຄວາມສາມາດຜະລິດເຫຼືອເຟືອຮອບໃຫມ່,ໂດຍສະເພາະແມ່ນຕ້ອງ ປ້ອງກັນບໍ່ເກີດຄວາມສ່ຽງທີ່ການກໍ່ສ້າງແບບຊ້ຳຊ້ອນກັນເທື່ອໃຫມ່ ຍ້ອນການລົງທຶນເພີ່ມຂຶ້ນຫຼາຍ, ແລະປ້ອງກັນບໍ່ໃຫ້ເກີດມີຄວາມສ່ຽງດ້ານຫນີ້ສິນທີ່ເພີ່ມຂຶ້ນຢ່າງບໍ່ຢຸດຢັ້ງ.
ໃນເດືອນກຸມພາປີນີ້, ຈີນໄດ້ຮຽກຮ້ອງໃຫ້ແຫ່ງຕ່າງໆຍົກເລີກຂະແຫນງການຈຳນວນຫນຶ່ງທີ່ມີຄວາມສາມາດຜະລິດຫຼ້າຫຼັງນັ້ນຕື່ມອີກ ດ້ວຍຮູບການດ້ານ ເອກະສານຂອງລັດຖະບານ, ຂະແຫນງການເຫຼົ່ານີ້ກ່ຽວພັນເຖິງ ພະລັງງານໄຟຟ້າ, ຖ່ານຫີນ,ຂາງແລະເຫຼັກກ້າ,ຊີມັງ,ໂລຫະມີສີ,ຖ່ານໄຟແດ, ຜະລິດເຈ້ຍ,ນວດຫນັງ ,ການພິມແລະຍ້ອມສີແລະອື່ນໆ, ພ້ອມທັງຮຽກຮ້ອງໃຫ້ແຫ່ງຕ່າງໆອີງຕາມສະພາບຕົວຈິງ,ວາງຫນ້າທີ່ເປົ້າຫມາຍົກເລີກຂະແຫນງການຈຳນວນຫນຶ່ງທີ່ມີຄວາມສາມາດຜະລິດຫຼ້າຫຼັງທີ່ຂອບເຂດກວ້າງກວ່າເກົ່າແລະມາດຕະຖານສູງກວ່າເກົ່າ. ໃນການຖະແຫຼງຂ່າວທີ່ຈັດຂຶ້ນໃນວັນທີ 22 ເມສານີ້, ທ່ານເຈີ້ງລີ້ຊິ່ນ, ຮອງຫົວຫນ້າກົມນະໂຍບາຍອຸດສາຫະກຳຂອງກະຊວງອຸດສາຫະກຳແລະເຕັກໂນໂລຊີຂໍ້ມູນຂ່າວສານກ່າວວ່າ,ຈີນຈະຕົກລົງເປົ້າຫມາຍການປ່ຽນແປງດ້ານປະລິມານການຜະລິດແລະແບ່ງແຍກທາດຂອງບາງຂະແຫນງການຢ່າງຈະແຈ້ງ,ເພື່ອປັບປຸງນະໂຍບາຍ ອະນຸຍາດຜະລິດຕະພັນອຸດສາຫະກຳເຂົ້າຕະຫຼາດໃຫ້ສົມບູນຂຶ້ນ,ພ້ອມດ້ວຍ ມາດຕະການຕ່າງໆ ເຊັ່ນວ່າ:ການສ້າງຕັ້ງກົນໄກປະສານງານລະຫວ່າງພະແນກ ຕ່າງໆແລະອື່ນໆ,ເພື່ອຈັດຕັ້ງປະຕິບັດແລະຊຸກຍູ້ວຽກງານຍົກເລີກຂະແຫນງການຈຳ ນວນຫນຶ່ງທີ່ມີຄວາມສາມາດຜະລິດຫຼ້າຫຼັງ.
