ວັນທີ26ເມສານີ້ແມ່ນວັນສິດຊັບສິນທາງປັນຍາຂອງໂລກເທື່ອທີ10,ຫົວຂໍ້ຂອງປີນີ້ແມ່ນ: "ການປະດິດສ້າງເຮັດໃຫ້ທົ່ວໂລກຕິດຕໍ່ກັນ".ຜູ່ຮັບຜິດຊອບທີ່ກ່ຽວຂ້ອງຂອງກົມສິດຊັບສິນ ທາງປັນຍາແຫ່ງຊາດຈີນກ່າວຢູ່ທີ່ປັກກິ່ງວ່າ,ເມື່ອໄດ້ທຳຄວາມພະຍາຍາມມາເປັນເວລາ 30ກວ່າປີແລ້ວ,ຂອບກົດໝາຍດ້ານການປົກປ້ອງສິດຊັບສິນທາງປັນຍາຂອງຈີນໄດ້ສ້າງຂຶ້ນໃນຂັ້ນພື້ນຖານແລ້ວ,ສິ່ງແວດລ້ອມຂອງການປົກປ້ອງສິດຊັບສິນທາງປັນຍາໄດ້ດີຂຶ້ນຢ່າງຈະແຈ້ງ. ກົມສິດຊັບສິນທາງປັນຍາແຫ່ງຊາດຈະສະໜອງການບໍລິການດ້ານການປົກປ້ອງສິດຊັບ ສິນທາງປັນຍາຫຼາຍກວ່າເກົ່າເພື່ອຊ່ວຍເຫຼືອການປະດິດສ້າງຂອງວິສາຫະກິດ.
ເດືອນຕຸລາປີ2000,ອົງການສິດຊັບສິນທາງປັນຍາຂອງໂລກຕົກລົງວ່າ,ເລີ່ມແຕ່ປີ2001 ເປັນຕົ້ນໄປ,ຖືເອົາວັນທີ26ເມສາຂອງທຸກປີເປັນ"ວັນສິດຊັບສິນທາງປັນຍາຂອງໂລກ",ໂດຍມີຈຸດປະສົງເພື່ອປູກຈິດສຳນຶກທີ່ເຄົາລົບນັບຖືຄວາມຮູ້,ຍົກສູງວິທະຍາສາດແລະປົກປ້ອງສິດຊັບສິນທາງປັນຍາ,ກໍ່ສ້າງສິ່ງແວດລ້ອມດ້ານກົດໝາຍທີ່ສົ່ງເສີມການປະດິດສ້າງຄວາມຮູ້ແລະປົກປ້ອງສິດຊັບສິນທາງປັນຍາ.
ມາຮອດປັດຈຸບັນ, ຈີນໄດ້ສ້າງບ່ອນທົດລອງຫັນຫມາກຜົນສິດທິບັດລະດັບຊາດໃຫ້ເປັນອຸດສາຫະກຳຢ່າງແທ້ຈິງ 15 ບ່ອນແລະສູນຄ້າຂາຍແລະວາງສະແດງເຕັກນິກລິຂະສິດລະດັບຊາດ 42 ບ່ອນ.ນອກນີ້, ກົມສິດຊັບສິນທາງປັນຍາແຫ່ງຊາດຈີນຍັງໄດ້ສ້າງບ່ອນແລກປ່ຽນວຽກງານດ້ານລິຂະສິດ 75 ບ່ອນໃນທົ່ວປະເທດເພື່ອໃຫ້ການບໍລິການດ້ານນີ້ຢ່າງທັນການແລະບັງເກີດຜົນແກ່ວິສາຫະກິດ.ປີກາຍນີ້,ໃນສະພາບທີ່ຖືກວິກິດການການເງິນສາກົນກະທົບກະເທືອນ,ຈຳນວນຜູ່ຮ້ອງຂໍຈົດລິຂະສິດທີ່ພາກສ່ວນທີ່ກ່ຽວຂ້ອງຮັບເອົານັ້ນຍັງເພີ່ມຂຶ້ນຫລາຍກວ່າໄລຍະດຽວກັນຂອງປີ 2008ເກືອບ 18%, ເກືອບມີ 9 ແສນ 8 ຫມື່ນກວ່າສະບັບ.
ທ່ານທຽນລີ້ພູ,ຫົວຫນ້າກົມສິດຊັບສິນທາງປັນຍາແຫ່ງຊາດຈີນກ່າວວ່າ:
ປີນີ້, ພວກເຮົາຈະຫມູນອ້ອມໂຄງການສຳຄັນດ້ານວິທະຍາສາດເຕັກນິກລະດັບຊາດທີ່ສຳຄັນແລະຂະແຫນງການອຸດສາຫະກຳທີ່ຈະເລີນໃຫມ່ທີ່ມີລັກສະນະຍຸດທະສາດ,ເພີ່ມງົບປະມານສະຫນັບສະຫນູນໃຫ້ຫລາຍກວ່າເກົ່າ,ສືບຕໍ່ເພີ່ມການລົງໂທດຕໍ່ຜູ່ລ່ວງລະເມີດສິດຊັບສິນທາງປັນຍາ;ພະຍາຍາມເປີດກວ້າງການແລກປ່ຽນແລະຮ່ວມມືກັບຕ່າງປະເທດ,ຕັ້ງຫນ້າເຂົ້າຮ່ວມການວາງກົດລະບຽບສາກົນ, ເພີ່ມທະວີການປົກປັກຮັກສາສິດທິບັດແລະການບໍລິການສິດຊັບສິນທາງປັນຍາຢູ່ຕ່າງປະເທດ,ນຳພາວິສາຫະກິດຕັ້ງຫນ້າເຂົ້າຮ່ວມການແຂ່ງຂັນແລະຮ່ວມມືກັບສາກົນໃນດ້ານສິດຊັບສິນທາງປັນຍາ, ລັດຖະບານຈີນຈະເພີ່ມທະວີການປົກປັກຮັກສາຢ່າງຫມັ້ນຫນຽວບໍ່ລົດລະ, ເຮັດໃຫ້ສະພາບແວດລ້ອມປົກປ້ອງສິດຊັບສິນທາງປັນຍາຢູ່ຈີນນັບມື້ນັບດີຂຶ້ນ.
ງານວາງສະແດງໂລກຊຽງໄຮທີ່ຈະໄຂຂຶ້ນແມ່ນເວທີແຫ່ງໜຶ່ງທີ່ເຕົ້າໂຮມສະຕິປັນຍາຂອງທົ່ວໂລກ, ເຮັດແນວໃດຈິ່ງຈະຮັບປະກັນສິດຊັບສິນທາງປັນຍາຂອງໝາກຜົນເຫຼົ່ານີ້ບໍ່ຖືກລ່ວງລະເມີດແມ່ນບັນຫາສຳຄັນທີ່ຝ່າຍຕ່າງໆສົນໃຈນຳ. ຕໍ່ເລື່ອງນີ້, ທ່ານຫຼີກົວສຽງ, ຫົວໜ້າພະແນກສິດຊັບສິນທາງປັນຍາຂອງນະຄອນຊຽງໄຮກ່າວວ່າ:
"ພວກເຮົາໄດ້ຕັ້ງສູນບໍລິການສິດຊັບສິນທາງປັນຍາຂອງຜູ້ເຂົ້າຮ່ວມງານວາງສະແດງຢູ່ເຂດວາງສະແດງ, ແລ້ວໃຫ້ຄຳປຶກສາກ່ຽວກັບສິດຊັບສິນທາງປັນຍາຂອງຝ່າຍຕ່າງໆທີ່ເຂົ້າຮ່ວມງານວາງສະແດງ, ແລະໄດ້ເປີດສາຍດ່ວນຮັບການລາຍງານການລະເມີດສິດຊັບສິນທາງປັນຍາຂອງງານວາງສະແດງໂລກຊຽງໄຮ, ຊຳລະແກ້ໄຂການລາຍງານກ່ຽວກັບສິດຊັບສິນທາງປັນຍາຢ່າງວ່ອງໄວ, ແລະຕັ້ງອົງການສະເພາະຂຶ້ນ, ເພື່ອພິຈາລະນາຄະດີທີ່ລະເມີດສິດຊັບສິນທາງປັນຍາຂອງງານວາງສະແດງ. ໂດຍຜ່ານການປະສານງານລະຫວ່າງພາກສ່ວນແລະເຂດແຄວ້ນ, ສືບສວນລົງໂທດການກະທຳທີ່ລະເມີດສິດຊັບສິນທາງປັນາຂອງຜູ້ເຂົ້າຮ່ວມງານວາງສະແດງ."
ໃນໄລຍະອາທິດໂຄສະນາປີນີ້, ໜ່ວຍອາສາສະໝັກທີ່ມີເປົ້າໝາຍບໍລິການຮັກສາສິດຊັບສິນທາງປັນຍາໜ່ວຍທຳອິດຂອງປັກກິ່ງໄດ້ປະກາດສ້າງຕັ້ງຂຶ້ນແລ້ວ. ອາສາສະໝັກເກືອບ 200 ຄົນທີ່ອາຍຸແຕ່ 18 ປີຫາ 60 ປີຈະປະສານງານກັບອົງການຈັດຕັ້ງແລະພາກສ່ວນທີ່ກ່ຽວຂ້ອງໂຄສະນາຄວາມຮູ້ແລະລະບຽບກົດໝາຍກ່ຽວກັບການປົກປ້ອງສິດຊັບສິນທາງປັນຍາຢູ່ເຂດຊຸມຊົນ.
