ງານວາງສະແດງໂລກຊຽງໄຮ2010ຂອງຈີນໄຂຂຶ້ນ
(GMT+08:00) 2010-05-01 11:36:13 cri
ຕອນຄ່ຳວັນທີ30ເມສາແລ້ວນີ້, ງານວາງສະແດງໂລກຊຽງໄຮ2010ຂອງຈີນໄດ້ໄຂຂຶ້ນຢູ່ແຄມນ້ຳຮວງພູ, ໃນ184ວັນຂ້າງໜ້ານີ້, 246ປະເທດແລະອົງການຈັດຕັ້ງສາກົນຂອງໂລກຈະທຳຄວາມພະຍາຍາມເພື່ອເປົ້າໝາຍຮ່ວມ, ຫາລືຫົວຂໍ້ທີ່ວ່າ"ຕົວເມືອງທີ່ດີກວ່າ, ຊີວິດທີ່ດີກວ່າ". ນີ້ແມ່ນງານວາງສະແດງໂລກທີ່ມີຜູ້ເຂົ້າຮ່ວມການວາງສະແດງຫຼາຍທີ່ສຸດໃນ159ປີມານີ້, ກໍ່ແມ່ນຈັດຂຶ້ນຢູ່ປະເທດທີ່ພວມພັດທະນາເປັນຄັ້ງທຳອິດ.
ຕອນຄ່ຳວັນທີ30ເມສາແລ້ວນີ້, ທ່ານຫູຈິນທ່າວ, ປະທານປະເທດຈີນແລະຜູ້ນຳຈີນທ່ານອື່ນໆ, ພ້ອມດ້ວຍປະມຸກລັດແລະຫົວໜ້າລັດຖະບານ20ປະເທດໄດ້ເຂົ້າຮ່ວມພິທີໄຂງານທີ່ຈັດຂຶ້ນຢູ່ສູນວັດທະນະທຳຂອງງານວາງສະແດງໂລກ. ໃນພິທີທີ່ດຳເນີນປະມານ2ຊົ່ວໂມງ, ນັກສິລະປິນຈາກແຫ່ງຕ່າງໆຂອງໂລກໄດ້ສະແດງລາຍການ, ສົ່ງສັນຍານສັນຕິພາບແລະມິດຕະພາບຕໍ່ທົ່ວໂລກ. ໃນພິທີໄຂງານ, ທ່ານວາງຊີສ່ານ, ຮອງນາຍົກລັດຖະມົນຕີຈີນ, ທັງເປັນຫົວໜ້າຄະນະກຳມະການຈັດຕັ້ງງານວາງສະແດງໂລກຊຽງໄຮກ່າວວ່າ, ງານວາງສະແດງໂລກຊຽງໄຮຈະເປີດປະຕູຂອງອະນາຄົດ, ຈີນກໍ່ຈະສະໜອງການບໍລິການທີ່ດີໃຫ້ແຂກຕ່າງປະເທດ.
ນັບແຕ່ຈີນຮ້ອງຂໍຈັດງານວາງສະແດງໂລກຢ່າງສຳເລັດຜົນໃນປີ2002ມານີ້, ຝ່າຍຕ່າງໆໄດ້ທຳຄວາມພະຍາຍາມຢ່າງລຳບາກ. ປະເທດແລະອົງການຈັດຕັ້ງຕ່າງໆທີ່ເຂົ້າຮ່ວມການວາງສະແດງໄດ້ຜ່ານຜ່າສິ່ງທ້າທາຍຫຼາຍຢ່າງຍ້ອນວິກິດການເສດຖະກິດ, ໄດ້ສຳເລັດການກໍ່ສ້າງແລະຈັດສັນການປະດັບຫໍວາງສະແດງຕາມກຳນົດ, ພະຍາຍາມສຸດຂີດເພື່ອສ້າງຫໍວາງສະແດງທີ່ມີຈຸດພິເສດຕໍ່ໂລກ. ນະຄອນຊຽງໄຮໄດ້ວາງງົບປະມານປັບປຸງຄົມມະນາຄົມແລະພື້ນຖານໂຄງລ່າງຕ່າງໆ, ເພື່ອປະສານສົມທົບກັບງານວາງສະແດງໂລກ, ເຮັດໃຫ້ຜູ້ຊົມຈະໄດ້ຊົມໃຊ້ການບໍລິການທີ່ສະດວກແລະວ່ອງໄວ. ອາສາສະໝັກ1ແສນກວ່າຄົນຈະສະໜອງການບໍລິການຕ່າງໆ, ເຊັ່ນໃຫ້ຄຳປຶກສາ, ນຳທາງ, ແປພາສາແລະອື່ນໆຢູ່ໃນເຂດງານວາງ ສະແດງບ່ອນບໍລິການອາສາສະໝັກໃນເມືອງ. ປະຊາຊົນຊຽງໄຮກໍ່ໄດ້ເຂົ້າຮ່ວມກິດຈະກຳ"ຄອບຄົວງານວາງສະແດງໂລກ"ຢ່າງຕັ້ງໜ້າ, ຕ້ອນຮັບແຂກຕ່າງປະເທດໄປຢູ່ໃນເຮືອນເພື່ອໃຫ້ແຂກຕ່າງປະເທດເຂົ້າໃຈຄອບຄົວ, ຊີວິດການເປັນຢູ່ແລະຕົວເມືອງຂອງຊຽງໄຮຫຼາຍກວ່າເກົ່າ.
ງານວາງສະແດງໂລກຄັ້ງນີ້ໄດ້ສະໜອງເວທີ, ເຮັດໃຫ້ປະຊາຊົນເອົາໃຈໃສ່ນຳການພັດທະນາໃນອະນາຄົດຫຼາຍກວ່າເກົ່າ, ຮັບມືກັບສິ່ງທ້າທາຍໂດຍກົງ, ແລະອອກແຮງແກ້ໄຂວິກິດການເຫຼົ່ານີ້. ໃນພິທີໄຂງານ, ທ່ານລາເຟີງ, ປະທານກົມວາງສະແດງສາກົນໄດ້ສະແດງຄວາມປາຖະໜາແລະຄວາມອວຍພອນຕໍ່ງານວາງສະແດງເທື່ອນີ້, ເຖິງວ່າທ່ານເວົ້າພາສາຈີນບໍ່ຫຼ່ຽນໄຫຼກໍ່ຕາມ, ແຕ່ໄດ້ສະແດງຄວາມປາຖະໜາຢ່າງຈິງໃຈ, ແລະໄດ້ຮັບສຽງຕົບມືອັນຟົດຟື້ນ, ຮອຍຍິ້ມແລະຄຳຍ້ອງຍໍຈາກຄົນທັງຫຼາຍຢູ່ທີ່ງານ. ທ່ານກ່າວວ່າ,
ໃນຫຼາຍສິບປີຕໍ່ໜ້ານີ້, ປະຊາຊົນໃນຕົວເມືອງຈະເພີ່ມຂຶ້ນເກືອບ3ຕື້ຄົນ, ງານວາງສະແດງໂລກຄັ້ງນີ້ຈະເຮັດໃຫ້ປະຊາຊົນມີຄວາມຮັບຮູ້ຫຼາຍກວ່າເກົ່າ, ພະຍາຍາມສ້າງຕົວເມືອງທີ່ພັດທະນາແບບຍືນຍົງ, ມີຄວາມຍຸດຕິທຳ, ມີຄວາມປອດໄພແລະຄວາມກົມກຽວກັນຫຼາຍກວ່າເກົ່າ. ພວກຂ້າພະເຈົ້າຂໍອວຍພອນໃຫ້ງານວາງສະແດງໂລກຊຽງໄຮ2010ຈົ່ງໄດ້ຮັບຜົນສຳເລັດຢ່າງຈົບງາມ.
ຫຼັງຈາກນັ້ນ, ທ່ານປະທານຫູຈິນທ່າວໄດ້ປະກາດໄຂງານວາງສະແດງໂລກຊຽງໄຮ. (ສຽງ3)
ຂ້າພະເຈົ້າຂໍປະກາດ, ງານວາງສະແດງໂລກຊຽງໄຮປີ2010ຂອງຈີນໄຂຂຶ້ນ.
ໃນເຄິ່ງປີຕໍ່ໜ້ານີ້, ຄາດວ່າຈະມີນັກທ່ອງທ່ຽວ70ລ້ານຄົນຂອງຈີນແລະຕ່າງປະເທດຈະມາຊົມງານວາງສະແດງ, ເຂົາເຈົ້າຈະໄດ້ຊົມຫໍວາງສະແດງທີ່ເປັນຕົວແທນແກ່ວັດທະນະທຳຫຼາກຫຼາຍຂອງໂລກແລະເອກະລັກຂອງປະເທດຕ່າງໆ, ຍັງຈະໄດ້ຊົມ800ກວ່າລາຍການສິລະປະແລະການສະແດງປະມານ2ໝື່ນຮອບຂອງຫ້າທະວີບ. ຫໍຕົວຢ່າງຕົວເມືອງທີ່ດີເດັ່ນທີ່ສຸດແລະຫໍແສງຕາເວັນຊີວິດທີ່ສ້າງເປັນເທື່ອທຳອິດໃນງານວາງສະແດງໂລກເທື່ອນີ້, ກໍ່ຈະເຮັດໃຫ້ນັກທ່ອງທ່ຽວສຳຜັດກັບຄວາມພະຍາຍາມຂອງມະນຸດໃນການແກ້ໄຂບັນຫາຫຍຸ້ງຍາກທີ່ປະສົບໃນການພັດທະນາຕົວເມືອງ.
