ປະຊາຄົມໂລກຕັ້ງໜ້າຕີລາຄາງານວາງສະແດງໂລກຊຽງໄຮ
(GMT+08:00) 2010-05-02 18:42:48 cri
ວັນທີ1ພຶດສະພານີ້,ງານວາງສະແດງໂລກຊຽງໄຮເປີດປະຕູຢ່າງເປັນທາງການເພື່ອຕ້ອນຮັບແຂກຈີນແລະຕ່າງປະເທດ,ໄດ້ຮັບຄວາມເອົາໃຈໃສ່ແລະການຕີລາຄາສູງຈາກປະເທດຕ່າງໆໃນໂລກ.
ທ່ານວີເລມ ລາຊີ ສວີງ ຜູ້ອຳນວຍການໃຫຍ່ອົງການຍົກຍ້າຍປະຊາຊົນສາກົນຍ້ອງຍໍຫຼາຍຕໍ່ຄຳຂວັນຂອງງານວາງສະແດງໂລກຊຽງໄຮ.
"ແຕ່ລະປີ ລະຫວ່າງປະເທດຕ່າງໆໃນໂລກມີປະຊາຊົນຍົກຍ້າຍ 21 ລ້ານ4ແສນຄົນ,ໃນນັ້ນສ່ວນຫຼາຍໄປຫາວຽກເຮັດງານທຳໃນຕົວເມືອງ.ສະນັ້ນ, "ຕົວເມືອງທີ່ດີກວ່າເກົ່າ,ຊີວິດທີ່ດີກວ່າເກົ່າ"ແມ່ນຄຳຂວັນທີ່ດີຫຼາຍ,ອົງການຍົກຍ້າຍປະຊາຊົນສາກົນດີໃຈຫຼາຍທີ່ສາມາດໄປເຂົ້າຮ່ວມງານວາງສະແດງໂລກຊຽງໄຮ."
ປະເທດຕ່າງໆເປີດຫໍວາງສະແດງໄດ້ຮັບຄວາມເອົາໃຈໃສ່ໃນລະດັບສູງຈາກບຸກຄົນສຳຄັນທາງການເມືອງຂອງປະເທດຕ່າງໆ.ໃນວັນເປີດຫໍອາເມລິກາ,ນາງຮີລາຣິ ຄຼິນຕັນ ລັດຖະມົນຕີວ່າການກະຊວງການຕ່າງປະເທດອາເມລິກາໄດ້ກ່າວໃນງານຕ້ອນຮັບທີ່ຈັດໂດຍກະຊວງການຕ່າງປະເທດວ່າ,ຈະໄປຊົມຫໍວາງສະແດງຂອງງານວາງສະແດງໂລກໃນໄລຍະເຂົ້າຮ່ວມການສົນທະນາທາງຍຸດທະສາດແລະເສດຖະກິດຈີນອາເມລິກາຄັ້ງທີ2ຢູ່ຈີນ.ນາງຫວັງວ່າກະແສລົມລະດູບານໃໝ່ຂອງງານວາງສະແດງໂລກຊຽງໄຮຈະຊຸກຍູ້ການພົວພັນລະຫວ່າງຈີນອາເມລິກາຂະຫຍາຍຕົວອອກ.
ໃນພິທີເປີດຫໍວາງສະແດງເຟນຊິກ-ສະຫະພາບເອີລົບ,ບຸກຄົນສຳຄັນທາງການເມືອງຂອງປະເທດເອີລົບຫຼາຍທ່ານເຊັ່ນທ່ານຈົສ ເມນົວ ດູຣາວ ບາໂຣໂຊ ປະທານຄະນະກຳມາທິການສະຫະພາບເອີລົບໄດ້ຕັດແຖບຜ້າໃນພິທີເປີດຫໍວາງສະແດງ.ຖັດມາ ທ່ານບາໂຣໂຊກ່າວຄຳປາໄສວ່າ, ນີ້ແມ່ນສະຫະພາບເອີລົບເຂົ້າຮ່ວມງານວາງສະແດງໂລກທີ່ຈັດຂຶ້ນຢູ່ນອກສະຫະພາບເອີລົບເປັນເທື່ອທຳອິດ.ສະຫະພາບເອີລົບຫວັງຖືງານວາງສະແດງໂລກຊຽງໄຮຄັ້ງນີ້ເປັນໂອກາດ,ເພີ່ມຄວາມເຂົ້າໃຈແລະຄວາມໄວ້ເນື້ອເຊື່ອໃຈກັນກັບຈີນໃຫ້ດີກວ່າເກົ່າ.
ທ່ານອິດສະຫຼະ ສົມໄຊ ລັດຖະມົນຕີວ່າການກະຊວງພັດທະນາສັງຄົມແລະຄວາມໝັ້ນຄົງຂອງມະນຸດຂອງໄທໄດ້ຍ້ອງຍໍແລະອວຍພອນຕໍ່ງານວາງສະແດງໂລກຊຽງໄຮ. ທ່ານກ່າວວ່າ:
"ຂ້າພະເຈົ້າເຫັນວ່າ,ວຽກງານກະກຽມຂອງງານວາງສະແດງໂລກຊຽງໄຮດີທີ່ສຸດ,ບໍ່ພຽງແຕ່ການກໍ່ສ້າງໄວຂະໜາດ,ເສັ້ນທາງແລະສິ່ງກໍ່ສ້າງຕ່າງໆກໍ່ໄດ້ກໍ່ສ້າງຢ່າງທັນການ.ຈີນມີກຳລັງຕົວຈິງທີ່ແຂງແຮງໃນການຈັດງານວາງສະແດງສາກົນຂະໜາດໃຫຍ່ປານນີ້,ເປັນໜ້າສັນລະເສີນທີ່ສຸດ.ເລີ່ມຈາກງານໂອລິມປິກ2008 ຮອດງານວາງສະແດງໂລກຊຽງໄຮ ແລະງານເອຊຽນເກມທີ່ຈະຈັດໄວໆນີ້,ລ້ວນແຕ່ໄດ້ສະແດງກຳລັງບົ່ມຊ້ອນຂອງຈີນໃນການຈັດກິດຈະກຳສາກົນຂະໜາດໃຫຍ່.ຂ້າພະເຈົ້າອວຍພອນງານວາງສະແດງໂລກຊຽງໄຮ2010 ຈະໄດ້ຮັບຜົນສຳເລັດອັນເຕັມເມັດເຕັມໜ່ວຍ."
ໃນຫຼາຍມື້ຜ່ານມານີ້,ສື່ມວນຊົນຕ່າງປະເທດກໍ່ພາກັນແຈ້ງຂ່າວງານວາງສະແດງໂລກຊຽງໄຮຢ່າງຫຼວງຫຼາຍ. ວັນທີ1ພຶດສະພານີ້,ເວັບໄຊຂອງໜັງສືພິມຈົງອາງລາຍວັນຂອງສ.ເກົາຫຼີພິມບົດຄວາມກ່າວວ່າ,ງານວາງສະແດງໂລກຊຽງໄຮຈີນຖືຕົວເມືອງເປັນຫົວຂໍ້ຫຼັກເປັນເທື່ອທຳອິດ,ທົ່ວໂລກຈະໄດ້ເຫັນສະພາບການພັດທະນາຂອງຕົວເມືອງໃນອະນາຄົດໂດຍຜ່ານງານວາງສະແດງໂລກ.
ໜັງສືພິມອາຊາຮີ ຊິມບູນຂອງຍິ່ປຸ່ນພິມບົດນຳກ່າວວ່າ,ອະນາຄົດຂອງໂລກກ່ຽວພັນກັບອະນາຄົດຂອງຄົນຈີນຢ່າງສະໜິດແໜ້ນ. ງານວາງສະແດງໂລກຊຽງໄຮຄວນກາຍເປັນເວທີໃຫ້ປະເທດຕ່າງໆຮ່ຳຮຽນເຊິ່ງກັນແລະກັນແລະເພື່ອຄວາມເຂົ້າໃຈກັນຕື່ມອີກ,ນີ້ຈຶ່ງແມ່ນຄວາມໝາຍຂອງຈີນທີ່ຈັດງານວາງສະແດງໂລກ.ໜັງສືພິມNCRຂອງໂຮນຣັງພິມບົດວິຈານທີ່ມີຫົວຂໍ້ "ໂລກໃໝ່ທີ່ນະຄອນຊຽງໄຮສະແດງໃຫ້ເຫັນ"ໂດຍຂຽນວ່າ,ຖ້າວ່າງານວາງສະແດງໂລກລອນດອນ1851ໄດ້ເປີດ"ຍຸກອັງກິດ"ແລ້ວ,ງານວາງສະແດງໂລກຊຽງໄຮ2010ກໍ່ໄດ້ສະແດງຄວາມຊີວິດຊີວາຂອງຈີນແລະຄວາມໝັ້ນໃຈອັນໝັ້ນໜຽວຂອງປະຊາຊົນຈີນທີ່ສະແຫວງຫາການພັດທະນາ.ບົດວິຈານຍັງຂຽນວ່າ,ສະຕະວັດທີ19ແມ່ນສະຕະວັດຂອງອັງກິດ,ສະຕະວັດທີ20ແມ່ນສະຕະວັດຂອງອາເມລິກາ,ສ່ວນສະຕະວັດທີ21ຈະແມ່ນສະຕະວັດຂອງອາຊີ.
