ງານວາງສະແດງໂລກຊຽງໄຮ້ເປີດບໍລິການ3ມື້ປະຕິບັດການຢ່າງເປັນປົກະຕິແລະມີລະບຽບຮຽບຮ້ອຍ
(GMT+08:00) 2010-05-03 19:09:37 cri
ນັບຕັ້ງແຕ່ງານວາງສະແດງໂລກຊຽງໄຮ້ເປີດບໍລິການຢ່າງເປັນທາງການໃນວັນທີ1ພຶດສະພາເປັນຕົ້ນມາ,ຮອດເວລາ12ໂມງຂອງວັນທີ3ພຶດສະພານີ້ຕາມເວລາວຽງຈັນ,ໄດ້ຕ້ອນຮັບນັກທ່ອງທ່ຽວ5ແສນ5ໝື່ນເທື່ອຄົນ.ປັດຈຸບັນ,ວຽກງານດ້ານຕ່າງໆໃນເຂດງານວາງສະແດງດຳເນີນໄປຢ່າງປົກກະຕິແລະມີລະບຽບຮຽບຮ້ອຍ.ຕໍ່ໄປເຊີນຟັງບົດແຈ້ງຂ່າວລະອຽດ.
ຄະນະກຳມະການຈັດຕັ້ງງານວາງສະແດງໂລກຊຽງໄຮ້ໄດ້ດຳເນີນການທົດລອງດຳເນີນວຽກງານບໍລິການ6ເທື່ອໃນທ້າຍເດືອນເມສາແລ້ວນີ້,ໄດ້ປັບປຸງແກ້ໄຂບັນຫາຄົມມະນາຄົມຂົນສົ່ງ,ການປ້ອງກັນຄວາມປອດໄພແລະການລຽນແຖວລໍຖ້າເຂົ້າຊົມໃຫ້ສົມບູນຂຶ້ນ.ພາຍຫຼັງເຂດງານວາງສະແດງເປີດໃຫ້ເຂົ້າຊົມແລ້ວ,ນັກທ່ອງທ່ຽວສ່ວນຫຼາຍຮູ້ສຶກເພິງພໍໃຈນຳການບໍລິການໃນເຂດງານວາງສະແດງ.ນາງຢາວ ນັກທ່ອງທ່ຽວທີ່ມາຈາກແຂວງຈ່ຽງຊູ່ ບອກວ່າ:
"ຮູ້ສຶກວ່າດີຢູ່,ເພາະ ສື່ມວນຊົນລາຍງານວ່າ,ຫໍວາງສະແດງແຕ່ລະແຫ່ງຕ້ອງລໍຖ້າປະມານ2ຊົ່ວໂມງຈິ່ງເຂົ້າຊົມໄດ້,ມື້ນີ້,ພວກເຮົາໄດ້ຊົມຫໍອົສຕຼາລີ,ລຽນແຖວລໍຖ້າປະມານເຄິ່ງຊົ່ວໂມງທໍ່ນັ້ນ,ນອກນີ້,ຝ່າຍຈັດຕັ້ງກໍພິຈາລະນາລະອຽດຮອບຄອບຫຼາຍ,ຍັງພິຈາລະນາເຖິງ ອາກາດຮ້ອນອົບເອົ້າອີກ."
ປັດຈຸບັນ,ຫໍວາງສະແດງທີ່ໄດ້ຮັບຄວາມນິຍົມຫຼາຍທີ່ສຸດແມ່ນຫໍວາງສະແດງແຫ່ງຊາດຈີນ,ຫໍເຂດແຂວງຕ່າງໆຂອງຈີນ,ຫໍອັງກິດ,ຫໍຍີ່ປຸ່ນ,ຫໍແອັສປາຍ,ຫໍຝະຣັ່ງເປັນຕົ້ນ.ເວລາລຽນແຖວລໍຖ້າເຂົ້າຊົມຫໍວາງສະແດງເຫຼົ່ານີ້ດົນທີ່ສຸດໄດ້ຫຼາຍກວ່າ3ຊົ່ວໂມງ.ວັນທີ3,ນາງລີອັນໂດນ ຊາຊີສ ຫົວໜ້າຜູ່ຕາງໜ້າຫໍອົສຕຼາລີທີ່ເປັນຫໍວາງສະແດງທີ່ຄົນເຂົ້າຊົມຫຼາຍໃຫ້ສຳພາດຕໍ່ນັກຂ່າວCRIວ່າ
"ສະພາບ ຂອງຫໍພວກເຮົາໃນ3ມື້ທີ່ຜ່ານມາແມ່ນໜ້າຕື່ນເຕັ້ນຫຼາຍ,ຈຳນວນຄົນເຂົ້າຊົມແຕ່ລະມື້ລ້ວນແຕ່ແມ່ນ3ໝື່ນ5000ຄົນ,ໃນເວລາລຽນແຖວລໍ້ຖ້າເຂົ້າຊົມ,ຜູ່ຊົມທັງຫຼາຍເຕັ້ມໄປດ້ວຍຄວາມກະຕືລືລົ້ນແລະຄວາມຄ່ອງຄອຍ,ໃນຖານເປັນຜູ່ເຂົ້າຮ່ວມການວາງສະແດງ,ພວກເຮົາກໍ່ຮູ້ສຶກດີໃຈຫຼາຍ.ຕາມການອອກແບບຂອງຫໍວາງສະແດງພວກເຮົາ,ແຕ່ລະມື້ຕ້ອນຮັບນັກທ່ອງທ່ຽວ4ໝື່ນຄົນ,ພວກເຮົາກໍ່ໄດ້ໃຊ້ມາດຕະການເພື່ອຮັບປະກັນໃຫ້ນັກທ່ອງທ່ຽວຮູ້ສຶກສະບາຍໃຈແລະສະດວກສະບາຍໃນເວລາທ່ຽວຊົມ."
2,3ມື້ຜ່ານມານີ້,ອຸນຫະພູມຊຽງໄຮ້ຄ່ອຍໆສູງຂຶ້ນ,ວັນທີ3ມີເກືອບ30ອົງສາ.ທ່ານຫົງຮ້າວ ຫົວໜ້າພະແນກປະສານງານວຽກງານຂອງງານວາງສະແດງໂລກຊຽງໄຮ້ແນະນຳວ່າ,ສິ່ງກໍ່ສ້າງກັນຄວາມຮ້ອນຕ່າງໆໃນເຂດງານວາງສະແດງໄດ້ເລີ່ມເຮັດວຽກແລ້ວ.ທ່ານບອກວ່າ
"ຕົວຢ່າງວ່າຢູ່ຂົວຂ້າມທາງແລະເຂດພັກຜ່ອນຂອງນັກທ່ອງທ່ຽວ,ເຄື່ອງພົ່ນອາຍນ້ຳເລີ່ມເຮັດວຽກແລ້ວ,ໃນຫຼາຍມື້ຂ້າງໜ້ານີ້ຍັງຈະຕິດຕັ້ງຄັນຫົ່ມກັນແດດຈຳນວນຫຼວງຫຼາຍ,ໂດຍສະເພາະຢູ່ເຂດນັກທ່ອງທ່ຽວລຽນແຖວລໍຖ້າເຂົ້າເຂດງານວາງສະແດງຈຳນວນໜຶ່ງ,ພວກເຮົາຍັງໄດ້ກະກຽມເຄື່ອງດື່ມຫຼາຍກວ່າເກົ່າ,ເພື່ອຕອບສະໜອງຄວາມຕ້ອງການດື່ມນ້ຳແລະເຄື່ອງດື່ມຂອງນັກທ່ອງທ່ຽວໃນເວລາອຸນຫະພູມສູງ.ນອກນີ້,ພວກເຮົາຍັງໄດ້ເພີ່ມຈຳນວນພະນັກງານການແພດ,ເພື່ອຮັບປະກັນການບໍລິການຢ່າງທັນການໃນເວລານັກທ່ອງທ່ຽວເກີດສະພາບສຸກເສີນໃນການທ່ຽວຊົມ."
ທ່ານຫົງຮ້າວແນະນຳວ່າ,ເລີ່ມແຕ່ວັນທີ3ພຶດສະພານີ້ເປັນຕົ້ນໄປ,ເຂດງານວາງສະແດງໂຊກໄດ້ໃຊ້ມາດຕະການຕ່າງໆເພື່ອສ້າງຄວາມສະດວກໃຫ້ປະຊາຊົນເຊັ່ນຈັດວາງພະນັກງານຢາຍບັດຈອງປີ້ເຂົ້າຊົມຫໍຈີນຢູ່ທຸກໆບ່ອນຈອງປີ້,ແລະເປີດທາງຜ່ານບໍ່ມີອຸປະສັກຂອງປະຕູເຂົ້າອອກເຂດງານວາງສະແດງໃຫ້ຜູ່ເຖົ້າອາຍຸສູງກວ່າ70ປີແລະອື່ນໆ.ນອກນີ້,ເພື່ອດຶງດູດນັກທ່ອງທ່ຽວໄປທ່ຽວໃນຍາມກາງຄືນ,ຫຼັງ19ໂມງ, ເຂດງານວາງສະແດງໂລກຊຽງໄຮຈະຈັດການສະແດງແສງໄຟຟ້າ,ນ້ຳພຸແລະດົນຕີເທື່ອໜຶ່ງໃນທຸກໆຊົ່ວໂມງ.
