ການຜະລິດໄຟຟ້າດ້ວຍພະລັງງານນິວເຄຼຍຂອງຈີນເຂົ້າສູ່ໄລຍະພັດທະນາຢ່າງວ່ອງໄວ
(GMT+08:00) 2010-05-04 16:49:31 cri
ໄຟຟ້ານິວເຄຼຍແມ່ນທິດຂະຫຍາຍຕົວທີ່ສຳຄັນຂອງການພັດທະນາຂະແຫນງການພະລັງງານໃນອະນາຄົດຍ້ອນຈຸດດີຕ່າງໆເຊັ່ນ:ສະອາດ, ປະຢັດເງິນແລະປອດໄພ. ມາຮອດທ້າຍປີ 2009, ໂຄງການຜະລິດໄຟຟ້າດ້ວຍນິວເຄຼຍຂອງຈີນທີ່ກຳລັງກໍ່ສ້າງຢູ່ນັ້ນກໍ່ມີເຄື່ອງຈັກ 20 ຫນ່ວຍທີ່ສາມາດຜະລິດໄຟຟ້າ 21 ລ້ານ 9 ແສນ 2 ຫມື່ນກິໂລວັດ,ຈີນໄດ້ກາຍເປັນປະເທດທີ່ມີຂະຫນາດການຜະລິດໄຟຟ້າດ້ວຍພະລັງງານນິວເຄຼຍໃຫຍ່ທີ່ສຸດໃນໂລກ.
ປີນີ້, ຈີນຈະຄົ້ນຄວ້າແລະປັບປຸງແຜນການພັດທະນາໄລຍະກາງແລະໄລຍະຍາວຂອງການຜະລິດໄຟຟ້ານິວເຄຼຍ,ເລັ່ງລັດການພັດທະນາຜະລິດໄຟຟ້ານິວເຄຼຍຢູ່ແຄມທະເລ,ແລະຕັ້ງຫນ້າຊຸກຍູ້ການສ້າງໂຄງການໄຟຟ້ານິວເຄຼຍຢູ່ເຂດໃນຂອງຈີນ.ໂຮງໄຟຟ້ານິວເຄຼຍຕ້າຢ້າວານທີ່ເລີ່ມຜະລິດມາແຕ່ປີ 1994 ແມ່ນໂຮງໄຟຟ້ານິວເຄຼຍຂະຫນາດໃຫຍ່ແຫ່ງທຳອິດຂອງຈີນ,ຕັ້ງຢູ່ໃກ້ກັບນະຄອນເຊິ່ນເຈິ້ນທາງພາກຕາເວັນອອກສຽງໃຕ້ຂອງຈີນ,ໄຟຟ້າທີ່ຜະລິດຢູ່ໂຮງໄຟຟ້າແຫ່ງນີ້ມີ 70% ແມ່ນສົ່ງໄປໃຫ້ຮົງກົງ, ກວມປະມານ 1\4 ຂອງປະລິມານໄຟຟ້າທີ່ຮົງກົງໃຊ້.ປີ 2002,ໂຄງການໄລຍະທີຫນຶ່ງຂອງໂຮງໄຟຟ້ານິວເຄຼຍຫລິ້ງອ້າວທີ່ໃກ້ກັບໂຮງໄຟຟ້ານິວເຄຼຍຕ້າຢ້າວານໄດ້ເລີ່ມ ຜະລິດ,ໄຟຟ້າທີ່ໂຮງໄຟຟ້າແຫ່ງນີ້ຜະລິດນັ້ນໄດ້ສົ່ງໄປໃຫ້ຕາຫນ່າງໄຟຟ້າພາກໃຕ້ທີ່ປົກຄຸມ 5 ແຂວງພາກໃຕ້ຈີນ.
ທ່ານຊູ້ກົວກ່າງ, ຜູ່ອຳນວຍການໃຫຍ່ຂອງບໍລິສັດໂຄງການນິວເຄຼຍຈົ່ງກວາງຈຳກັດກ່າວວ່າ:ໂຮງໄຟຟ້ານິວເຄຼຍຕ້າຢ້າວານແລະໂຮງໄຟຟ້ານິວເຄຼຍຫລິ້ງອ້າວມີເຄື່ອງຈັກຜະລິດໄຟຟ້າ 4 ຫນ່ວຍທີ່ສາມາດຜະລິດໄຟຟ້າໄດ້ 1 ລ້ານກິໂລວັດ,ເມື່ອທຽບກັບໂຮງໄຟຟ້າຖ່ານຫີນຂະຫນາດ ດຽວກັນແລ້ວ, ການສິ້ນເປືອງຖ່ານຫີນໄດ້ຫລຸດຫນ້ອຍລົງປະມານ 12 ລ້ານໂຕນຕໍ່ປີ, ລະບາຍກາກບອນດີອອກຊິດຫນ້ອຍລົງ 27 ລ້ານໂຕນຕໍ່ປີ.ຕົວເລກນີ້ແມ່ນຫນ້າເຊື່ອຖືທີ່ສຸດ.ທ່ານຊູ້ກົວກ່າງກ່າວວ່າ, ເມື່ອທຽບກັບໂຮງໄຟຟ້າຖ່ານຫີນທີ່ມີຂະຫນາດເຊັ່ນດຽວກັນແລ້ວ, ຕັ້ງແຕ່ເລີ່ມຕົ້ນຜະລິດໄຟຟ້າເປັນຕົ້ນມາ, ລວມແລ້ວ,ໂຮງໄຟຟ້ານິວເຄຼຍສອງແຫ່ງດັ່ງກ່າວໄດ້ຫລຸດການລະບາຍກາກບອນດີອອກຊິດປະມານ 320 ລ້ານກວ່າໂຕນ.
ໃນຖານະທີ່ເປັນບໍລິສັດກໍ່ສ້າງແລະຄຸ້ມຄອງໂຄງການຜະລິດໄຟຟ້ານິວເຄຼຍແຫ່ງທຳອິດຂອງຈີນ, ບໍລິສັດໂຄງການນິວເຄຼຍຈົ່ງກວງຈຳກັດມີອຸປະກອນຜະລິດໄຟຟ້າດ້ວຍນິວເຄຼຍທີ່ຜະລິດໂດຍຕົນເອງນັ້ນນັບມື້ນັບຫລາຍຂຶ້ນ.ປັດຈຸບັນ, ເຂົາເຈົ້າໄດ້ມີເຕັກນິກຜະລິດໄຟຟ້ານິເຄຼຍທີ່ມີສິດຊັບສິນທາງປັນຍາຂອງຕົນເອງ, ຈຳນວນຫນ່ວຍຈັກແລະປະລິມານຜະລິດໄຟຟ້າທີ່ພວມກໍ່ສ້າງນັ້ນກໍ່ເພີ່ມຂຶ້ນເລື້ອຍໆ.ປັດຈຸບັນ, ບໍລິສັດດ່ງກ່າວໄດ້ມີຫນ່ວຍຈັກຜະລິດໄຟຟ້ານິວເຄຼຍທີ່ພວມກໍ່ສ້າງຢູ່ນັ້ນ 13 ຫນ່ວຍ, ກວມຫລາຍກວ່າເຄິ່ງຫນຶ່ງ ຂອງຫນ່ວຍຈັກຜະລິດໄຟຟ້ານິວເຄຼຍທັງຫມົດທີ່ພວມກໍ່ສ້າງຢູ່ໃນປະເທດຈີນ,ເຊິ່ງມີຂະຫນາດເຖິງ 15 ລ້ານ 5 ແສນກິໂລວັດ,ເປັນທີຫນຶ່ງໃນໂລກທາງດ້ານຈຳນວນເຄື່ອງໄຟຟ້າແລະປະລິມານການຜະລິດ.ທ່ານຊູ້ກົວກ່າງກ່າວວ່າ, ເຕັກນິກຜະລິດໄຟຟ້ານິວເຄຼຍແບບດັດແປງ ຂອງຈີນມີຕົ້ນທຶນປະມານ 1500 ຫາ 1800 ໂດລາຕໍ່ກິໂລວັດ,ຕ່ຳກວ່າໂຄງການລະດັບດຽວກັນໃນສາກົນ, ສະນັ້ນ, ຈິ່ງມີກຳລັງການແຂ່ງຂັນທີ່ເຂັ້ມແຂງຫລາຍໃນສາກົນ.
"ປະຈຸບັນ,ບໍລິສັດໂຄງການໄຟຟ້ານິວເຄຼຍກວາງຕຸ້ງຈີນຈຳກັດ ໄດ້ຕັ້ງຫນ້າປະຕິບັດຍຸດທະສາດພັດທະນາຢູ່ຕ່າງປະເທດ, ພະຍາຍາມເຊັນັນຍາກໍ່ສ້າງໂຄງ ການໄຟຟ້າພະລັງນິວເຄຼຍຂອງຕ່າງປະເທດ,ແລະສ້າງຕັ້ງການພົວພັນກັບປະເທດຕ່າງໆ ເຊັ່ນ:ອາຟຼິກາໃຕ້ແລະປະເທດອື່ນໆ, ປະເທດຕ່າງໆໄດ້ສະແດງຄວາມສົນໃຈຫຼາຍຕໍ່ຄວາມສາມາດດ້ານການຈັດຕັ້ງແລະຄຸ້ມຄອງຂອງກຸ່ມບໍລິສັດໄຟຟ້ານິວເຄຼຍກວາງຕຸ້ງຂອງຈີນພ້ອມດ້ວຍຄວາມປອດໄພ,ເສດຖະກິດ,ຄວາມກ້າວຫນ້າ,ໄລຍະເວລາສຳເລັດການກໍ່ສ້າງແລະທ່າແຮງກໍ່ສ້າງຂະຫນາດໃຫຍ່ຂອງເຕັກນິກໂຄງການ CPR 1000, ປະຈຸບັນ, ການຮ່ວມມືໄດ້ຮັບຄວາມຄືບຫນ້າເປັນກ້າວໆ.
"ມາຮອດປີກາຍນີ້, ໂຮງໄຟຟ້ານິວເຄຼຍທີ່ໄດ້ສ້າງຕັ້ງຂຶ້ນຢູ່ເຂດແຄມທະເລຂອງຈີນມີ 6 ແຫ່ງແລ້ວ,ນອກນີ້ຍັງມີອີກ10 ແຫ່ງພວມກໍ່ສ້າງຢູ່. ຄຽງຄູ່ກັບຄວາມຕ້ອງການພະລັງງານຂອງຕົວເມືອງເຂດໃນທີ່ມີຕໍ່ໄດ້ເພີ່ມຂຶ້ນຢ່າງວ່ອງໄວແລະການ ປະຢັດພະລັງງານແລະຫຼຸດການລະບາຍມົນລະພິດເພີ່ມແຮງກົດດັນຂຶ້ນຢ່າງບໍ່ຢຸດຢັ້ງ,ໂຄງການໄຟຟ້ານິວເຄຼຍທີ່ຢູ່ເຂດໃນຂອງຈີນ ກໍ່ຈະມີບາດກ້າວໃຫມ່.
ໂດຍອີງຕາມແຜນການທີ່ລັດຖະບານຈີນວາງອອກ, ເມື່ອຮອດປີ 2020, ຍອດປະລິມານມາດຜະລິດໄຟຟ້ານິວເຄຼຍ ຈະເພີ່ມຈາກບໍ່ຮອດ10 ລ້ານກິໂລວັດໃນປະຈຸບັນ ຂຶ້ນເປັນ 75 ລ້ານກິໂລວັດ. ເມື່ອຮອດເວລານັ້ນ,ອັດຕາສ່ວນຂອງໄຟຟ້ານິວເຄຼຍ ທີ່ກວມຍອດປະລິມານຜະລິດພະລັງງານໄຟຟ້າທັງຫມົດ ຈະເພີ່ມຈາກ2%ໃນປະຈຸບັນ ຂຶ້ນເປັນປະມານ 5%.
