ງານວາງສະແດງໂລກຊຽງໄຮຈີນ 2010 ໄດ້ໄຂມາເປັນເວລາ 13 ມື້ແລ້ວ, ຝ່າຍຕ່າງໆທີ່ກ່ຽວຂ້ອງໄດ້ສະຫລຸບບົດຮຽນຢ່າງທັນການ, ແລະ ປັບປຸງແຜນການບໍລິການຢ່າງຮອບດ້ານແກ່ນັກທ່ອງທ່ຽວທີ່ໄປຊົມງານວາງສະແດງ.ໃນໄລຍະຈັດງານວາງສະແດງໂລກຊຽງໄຮ, ອາກາດຈະອ່າວຮ້ອນ, ຝົນຕົກເລື້ອຍໆແລະອາກາດບໍ່ຄ່ອຍດີ, ເຊິ່ງລ້ວນແຕ່ຈະກະທົບເຖິງນັກທ່ອງທ່ຽວທີ່ໄປທ່ຽວແລະການດຳເນີນງານຂອງງານວາງສະແດງໂລກ.ສະນັ້ນ, ທ່ານເຈິ້ງໂກກວງ,ຫົວຫນ້າກົມອຸຕຸນິຍົມຈີນກ່າວວ່າ, ເພື່ອບໍລິການນັກທ່ອງທ່ຽວທີ່ໄປທ່ຽວງານໃຫ້ດີກວ່າເກົ່າ, ພາກສ່ວນອຸຕຸນິຍົມຈີນຈະໃຫ້ການພະຍາກອນອາກາດທີ່ຊັດເຈນທີ່ສຸດໃຫ້ແກ່ນັກທ່ອງທ່ຽວດ້ວຍຫລາຍໆວິທີ.
ທ່ານເວົ້າວ່າ:ພວກເຮົາໄດ້ສ້າງຕາຫນ່າງຕິດຕາມວັດແທກອາກາດດ້ວຍສາມມິຕິຕໍ່ເຂດຈັດງານແລະເຂດອ້ອມແອ້ມ,ທຸກໆ 15 ນາທີກໍ່ປ່ຽນຮູບກ້ອນເມກທີ່ຖ່າຍຈາກດາວທຽມອຸຕຸນິຍົມໃຫມ່,ທຸກໆ 5 ນາທີກໍ່ປ່ຽນຂໍ້ມູນສັງເກດຂອງສະຖານີອຸຕຸນິຍົມອັດຕະໂນມັດ 2200 ແຫ່ງທີ່ຕັ້ງຢູ່ເຂດສາມຫລ່ຽມປາກແມ່ນ້ຳຢາງຊີກຽງ,ແລະທຸກໆ 6 ນາທີ ປ່ຽນຂໍ້ມູນ ອາກາດດ້ວຍລາດາ 14 ຫນ່ວຍທີ່ຕິດຕັ້ງຢູ່ນະຄອນຊຽງໄຮແລະເຂດອ້ອມແອ້ມ.ແຕ່ລະມື້ກໍ່ພະຍາກອນອາກາດໃຫ້ງານວາງສະແດງທຸກໆຊົ່ວໂມງ, ຈະສົ່ງຄຳເຕືອນແລະໃຫ້ການບໍລິການແນະນຳແກ່ນັກທ່ອງທ່ຽວໃນງານດ້ວຍ 6 ວິທີພາຍໃນ 15 ນາທີ.
ນອກຈາກພາກສ່ວນອຸຕິນິຍົມແລ້ວ,ພາກສ່ວນຄົມມະນາຄົມຂອງນະຄອນຊຽງໄຮກໍ່ໄດ້ວາງແຜນການຮັບມືກັບສະພາບຄົມມະ ນາຄົມແລະການຂົນສົ່ງຢ່າງຮອບຄອບ, ນັກທ່ອງທ່ຽວສາມາດເດີນທາງໄປ ງານວາງສະແດງດ້ວຍຊ່ອງທາງຕ່າງໆເຊັ່ນ: ລົດໄຟໃຕ້ດິນຫຼືລົດໄຟໃນຕົວເມືອງ ,ລົດເມ,ລົດແທັກຊີທາງເຮືອນແລະອື່ນໆ. ຕາມການຕິດຕາມຂອງຄະນະຈັດຕັ້ງງານ,ນັບແຕ່ມື້ເປີດງານວາງສະແດງມາຮອດຄືນວັນທີ 11 ພຶດສະພານີ້, ຈຳນວນຄົນທີ່ເຂົ້າຊົມທັງຫມົດມີຫຼາຍກວ່າ 1 ລ້ານ 7 ແສນ 4 ຫມື່ນຄົນ. ທ່ານຊູ່ນຈ້ຽນຜິງ, ຫົວຫນ້າຫ້ອງການທ່າເຮືອໂດຍສານຂອງນະຄອນຊຽງໄຮບອກວ່າ,ພາກສ່ວນຄົມມະນາຄົມຈະຄຳນຶງຖິງການທ້າທາຍຕ່າງໆທີ່ອາດຈະເກີດຂຶ້ນຢ່າງຮອບດ້ານ, ສືບຕໍ່ປັບປຸງແຜນການ ຄົມມະນາຄົມແລະຂົນສົ່ງໃຫ້ດີຂຶ້ນ.
ໃນເວລານັກທ່ອງທ່ຽວຈະເຂົ້າຊົມງານກໍ່ສາມາດ ຮູ້ຜ່ານຂໍ້ມູນຂ່າວສານດ້ວຍສື່ມວນຊົນຕ່າງໆເຊັ່ນ: ລະບົບເຄືອຂ່າຍຄົມມະນາຄົມຂອງງານ, ວິທະຍຸກະຈາຍສຽງ ໂທລະພາບ,ໂທລະສັບສາຍດ່ວນທີ່ໃຫ້ຄຳປຶກສາແນະນຳ,ມືຖືແລະແຜ່ນທີ່ເສັ້ນທາງລະບົບGPSແລະອື່ນໆ,ເພື່ອປ່ຽນເສັ້ນທາງເດີນທາງໄດ້ຢ່າງທັນການ.
ນັກທ່ອງທ່ຽວທີ່ເຂົ້າຊົມງານວາງສະແດງໂລກ, ສ່ວນຫຼາຍຢາກຊິມອາຫານແຊບໆທີ່ມາຈາກທົ່ວໂລກໃນສວນນີ້. ຕາມຂໍ້ມູນຂອງພາກສ່ວນການບໍລິການແລະຄຸ້ມຄອງດ້ານການຄ້າຂອງຄະນະກຳມະການຈັດງານວາງສະແດງໂລກຊຽງໄຮບອກວ່າ, ມາຮອດວັນທີ 8 ພຶດສະພານີ້, ງານວາງສະແດງໂລກ ໄດ້ຕ້ອນຮັບນັກທ່ອງທ່ຽວທີ່ມາກິນອາຫານຕ່າງໆ 1 ລ້ານ 7 ແສນເທື່ອຄົນ, ມີນັກທ່ອງທ່ຽວປະມານ 70% ເລືອກມາກິນເຂົ້າຢູ່ໃນງານນີ້.
ທ່ານຫຼິນເຊີງຢົງ, ຫົວໜ້າພະແນກຄຸ້ມຄອງບໍລິການການຄ້າຂອງງານວາງສະແດງໂລກຊຽງໄຮກ່າວວ່າ, ງານວາງສະແດງໂລກທັງໝົດມີຮ້ານກິນດື່ມ 100 ແຫ່ງ, ໄດ້ຕັ້ງຮ້ານອາຫານ 130 ຮ້ານ, ສາມາດສະໜອງອາຫານ 3 ແສນຫາ 4 ແສນຊຸດຕໍ່ມື້. ເຖິງຢ່າງໃດກໍຕາມ, ການສະໜອງອາຫານໃນງານວາງສະແດງກໍຍັງບໍ່ພຽງພໍ, ຮ້ານອາຫານກໍ່ແຈກຢາຍກັນຢູ່ບໍ່ທົ່ວເຖິງ, ອາຫານກໍ່ບໍ່ພຽງພໍແລະລາຄາກໍອ່າວແພງແດ່. ທ່ານຫຼິນເຊີງຢົງກ່າວວ່າ, ມໍ່ໆມານີ້ງານວາງສະແດງໂລກໄດ້ໃຊ້ມາດຕະການຫຼາຍຢ່າງເພື່ອຍົກສູງຄຸນນະພາບການບໍລິຫານດ້ານການກິນດື່ມ, ແລະໄດ້ເພີ່ມບ່ອນຂາຍອາຫານຊົ່ວຄາວ, ຄ່າໃຊ້ຈ່າຍສະເລ່ຍຕໍ່ຫົວຄົນກໍ່ຫຼຸດລົງຮອດ 40 ຢວນ.
"ພວກເຮົາຮຽກຮ້ອງໃຫ້ວິຮ້ານອາຫານດ່ວນເພີ່ມຄວາມສາມາດດ້ານການສະໜອງ, ເພີ່ມບ່ອນນັ່ງແລະຈຳນວນການນຳໃຊ້ບ່ອນນັ່ງ, ເພື່ອຕອບສະໜອງຄວາມຕ້ອງການດ້ານກິນດື່ມໃຫ້ນັກທ່ອງທ່ຽວ."
