ຕອນກາງ ຄືນວັນທີ 13 ພຶດສະພານີ້,ທະຫານໄທກັບຜູ່ປະທ້ວງຂອງກຸ່ມແນວໂຮມປະຊາທິປະໄຕຕໍ່ຕ້ານຜະເດັດການແຫ່ງຊາດໄທຫຼື＂ກຸ່ມເສື້ອແດງ＂ ໄດ້ເກີດການປະທະກັນອີກ. ພົນຕີຂັດຕິຍະ ສະຫວັດດີຜົນ,ຜູ່ນຳຫົວຮຸນແຮງຂອງ＂ກຸ່ມເສື້ອແດງ＂ຖືກຍິງເຂົ້າຫົວໄດ້ຮັບບາດເຈັດສາຫັດ. ໃນຄືນມື້ດຽວກັນ, ທ່ານອະພິສິດ ເວຊາຊີວະ,ນາຍົກ ລັດຖະມົນຕີໄທໄດ້ອອກຄຳສັ່ງຂະຫຍາຍເຂດປະຕິບັດພະລາຊະບັນຍັດການບໍລິຫານລາຊະການໃນສະຖານະການສຸກເສີນ ກວມເອົາ 17 ຈັງຫວັດ. ສະຖານະການຂອງໄທໄດ້ເຄັ່ງຕຶງຂຶ້ນຢ່າງກະທັນຫັນ.
ວັນທີ 13 ພຶດສະພານີ້,ທ່ານອະພິສິດໄດ້ປະກາດວ່າ, ຍ້ອນ＂ກຸ່ມເສື້ອແດງ＂ຍັງປະຕິເສດບໍ່ຢຸດຕິການໂຮມຊຸມນຸມປະທ້ວງ, ແລ້ວໄດ້ສ້າງຄວາມສັບສົນວຸ້ນວາຍຢ່າງຕໍ່ເນຶ່ອງໃຫ້ແກ່ປະເທດຊາດແລະສັງຄົມ,ສະນັ້ນ,ທ່ານຈຶ່ງໄດ້ຍົກເລີກແຜນ ການເລືອກຕັ້ງສະພາຜູ່ແທນລາດຊະດອນທີ່ຕົກລົງຈະຈັດຂຶ້ນໃນວັນທີ 14 ພະຈິກປີນີ້. ວັນທີ 13 ພຶດສະພານີ້,ສູນອຳນວຍການແກ້ໄຂສະຖານະການສຸກເສີນຂອງໄທໄດ້ເຜີຍແຜ່ວ່າ, ນັບແຕ່ເວລາ 18 ໂມງຂອງມື້ດຽວກັນເປັນຕົ້ນໄປ,ຈະເລີ່ມຢຸດຕິການບໍລິການຕ່າງໆຢູ່ສະຖານທີ່ໂຮມຊຸມນຸມປະທ້ວງຂອງ＂ກຸ່ມເສື້ອແດງ＂ ເຊັ່ນ: ຕັດນ້ຳແລະໄຟຟ້າ,ລະບົບຄົມມະນາຄົມສາທາລະນະ ເຮືອຂ້າມຟາກແລະອື່ນໆ, ພ້ອມກັນນັ້ນ,ຍັງຕັດສັນຍານມືຖືໃນບໍລິເວນຂອງສະຖານທີ່ໂຮມຊຸມນຸມປະທ້ວງ,ເພື່ອກົດດັນຕໍ່ຜູ່ປະທ້ວງຂອງ＂ກຸ່ມເສື້ອແດງ＂, ຮຽກຮ້ອງໃຫ້ເຂົາເຈົ້າຫນີອອກຈາກສະຖານທີ່ໂຮມຊຸມນຸມປະທ້ວງ,ແລະຢຸດຕິການໂຮມຊຸມນຸມປະທ້ວງໂດຍໄວ. ＂ກຸ່ມເສື້ອແດງ＂ກ່າວວ່າ, ＂ກຸ່ມເສື້ອແດງ＂ຈະໂຮມຊຸມນຸມປະທ້ວງຕໍ່ໄປ,ຈົນກວ່າທ່ານນາຍົກລັດຖະ ມົນຕີອະພິສິດຈະລາອອກຈາກຕຳແຫນ່ງ.
ຕອນຄ່ຳວັນທີ 13 ພຶດສະພານີ້, ລັດຖະບານໄທໄດ້ເລີ່ມປິດລ້ອມສະຖານທີ່ໂຮມຊຸມນຸມປະທ້ວງຂອງ＂ກຸ່ມເສື້ອແດງ＂, ເພື່ອບັງຄັບໃຫ້ຢຸດຕິການໂຮມຊຸມນຸມປະທ້ວງ. ເວລາ19 ໂມງ 10 ນາທີຂອງມື້ດຽວກັນ, ຢູ່ສວນລຸ່ມພິນີຂອງທາງແຍກສາລາແດງທີ່ເປັນຫນ້າດ່ານໃນການໂຮມຊຸມນຸມຂອງ＂ກຸ່ມເສື້ອແດງ＂, ຕາມຜູ່ເຫັນເຫດການກ່າວວ່າ, ໄດ້ຍິນສຽງລະເບີດແຕກເປັນຢ່າງຫນ້ອຍ 4 ເທື່ອ, ແລະຍັງມີສຽງຍິງປືນຫຼາຍສິບເທຶ່ອ. ຜູ່ປະທ້ວງ 20 ກວ່າຄົນ.ໃນນັ້ນ, ລວມທັງພົນຕີຂັດຕິຍະ ສະຫວັດດີຜົນ,ຜູ່ນຳທີ່ເປັນຫົວຮຸນແຮງຂອງ＂ກຸ່ມເສື້ອແດງ＂ທັງເປັນຜູ່ຊົງຄຸນວຸດທິຂອງກອງທັບບົກໄທ ໄດ້ຖືກຍິງຫົວ,ແລ້ວຖືກສົ່ງໄປໂຮງຫມໍຫົວສຽວ, ປະຈຸບັນ, ທ່ານຍັງບໍ່ຮູ້ສຶກຕົວ,ແລະອາການຍັງອັນຕະລາຍຫຼາຍຢູ່. ທ່ານຫມໍກ່າວວ່າ, ພົນຕີຂັດຕິຍະ ມີອາການສາຫັດທີ່ສຸດ, ສະຫມອງໄດ້ຖືກທຳລາຍແລ້ວ,ມີໂອກາດລອດຊີວິດ ພຽງແຕ່ 10% ເທົ່ານັ້ນ. ສື່ມວນຊົນຂອງໄທລາຍງານຂ່າວວ່າ, ພົນຕີຂັດຕິຍະໄດ້ຖືກມືປືນຍິງເຂົ້າຫົວ.
ເວລາ 23 ໂມງຕາມເວລາທ້ອງຖີ່ນ,ຜູ່ປະທ້ວງຂອງກຸ່ມເສື້ອແດງກຸ່ມຫນຶ່ງໄດ້ປະທະກັບທະຫານເວນຍານຢູ່ໃກ້ກັບປະຕູໃຫຍ່ຂອງສວນສາທາລະນະລຸມພິນີ,ຜູ່ປະທ້ວງໄດ້ແກວ່ງແກ້ວນ້ຳພຼັສຕິກແລະກ້ອນຫີນໃສ່ທະຫານ, ສ່ວນທະຫານກໍ່ຍິງລູກແກັສນ້ຳຕາແລະລູກປືນຢາງໃສ່ຜູ່ປະທ້ວງ, ເຮັດໃຫ້ຜູ່ຊາຍອາຍຸ 25 ປີຜູ່ຫນຶ່ງທີ່ເຂົ້າຮ່ວມການປະທ້ວງຖືກຍິງຕາຍ,ແລະ 10 ກວ່າຄົນບາດເຈັບ. ຈົນຮອດຕອນຮຸ່ງເຊົ້າວັນທີ 14 ພຶດສະພານີ້, ຍັງໄດ້ຍິນສຽງປືນແລະສຽງລະເບີດແຕກຢູ່ເລື້ອຍໆ.
ເວລາ 21 ໂມງຂອງວັນທີ 13 ພຶດສະພານີ້, ລັດຖະບານໄທໄດ້ປະກາດຂະຫຍາຍການປະຕິບັດລາດຊະບັນຍັດການບໍລິຫານລາຊະການໃນສະຖາ ນະການສຸກເສີນກວມເອົາ 15 ຈັງຫວັດ,ເພາະວ່າຜູ່ປະທ້ວງຂອງກຸ່ມເສື້ອແດງທີ່ສະຫນັບສະຫນູນທ່ານທັກສິນຊິນນະວັດ,ອະດີດນາຍົກລັດຖະມົນຕີໄທນັ້ນສ່ວນຫລາຍແມ່ນມາຈາກ 15 ຈັງຫວັດດັ່ງກ່າວ.ເວລາ 23 ໂມງ,ສູນອຳນວຍການແກ້ໄຂສະຖານະການສຸກເສີນປະກາດອີກວ່າຈະຂະຫຍາຍຂອບເຂດປະຕິບັດລາຊະບັນຍັດດັ່ງກ່າວໄປເຖິງ 17 ຈັງຫວັດເຊິ່ງລວມທັງບາງກອກ.ພ້ອມກັນນັ້ນຍັງສັ່ງໃຫ້ກອງທະຫານແລະຜູ່ວ່າລາຊະການຈັງຫວັດຕ່າງໆຕ້ອງຕິດຕໍ່ປະສານງານກັນຢ່າງໃກ້ຊິດ, ຫາກຜູ່ປະທ້ວງຂອງກຸ່ມເສື້ອແດງຢູ່ແຫ່ງນັ້ນມີສ້າງຄວາມຮຸນແຮງເກີນໄປແລ້ວ,ທະຫານກໍ່ມີສິດໃຊ້ມາດຕະການທີ່ເຂັ້ມງວດຕໍ່ເຂົາເຈົ້າ,ເພື່ອຫລີກເວັ້ນບໍ່ໃຫ້ສ້າງຄວາມເສຍຫາຍຫລາຍກວ່າເກົ່າ.
ພາຍຫລັງພົນຕີຂັດຕິຍະ ສະຫວັດດີຜົນຖືກຍິງແລ້ວ, ຜູ່ນຳສຳຄັນຂອງກຸ່ມເສື້ອແດງໄດ້ປະຊຸມກັນດ່ວນ,ເພື່ອຫາມາດຕະການທີ່ເຫມາະສົມ. ການເຄື່ອນໄຫວໂຮມຊຸມນຸມປະທ້ວງຂອງກຸ່ມເສື້ອແດງຈະສິ້ນສຸດລົງຫລືຍັງຈະສືບຕໍ່ໄປ, ຫລືວ່າຈະຮຸນແຮງຂຶ້ນກວ່າເກົ່າຫລືບໍ່, ຍັງຕ້ອງຕິດຕາມຕໍ່ໄປ.
