ຕາມຂ່າວCRI: ການເຈລະຈາຍຸດທະສາດແລະເສດຖະກິດຮອບທີສອງຂອງຈີນອາເມລິກາຈະຈັດຂຶ້ນຢູ່ປັກກິ່ງແຕ່ວັນທີ24ຫາວັນທີ25ພຶດສະພານີ້.ການເຈລະຈາທີ່ຈັດຂຶ້ນຕາມການຕົກລົງຮ່ວມກັນຂອງທ່ານຫູຈິນທ່າວ,ປະທານປະເທດຈີນແລະທ່ານບາຣັກ ໂອບາມາ,ປະທານາທິບໍດີອາເມລິການັ້ນແມ່ນກົນໄກປຶກສາຫາລືແລະແລກປ່ຽນຄວາມເຫັນປະ ຈຳທີ່ສຳຄັນທີ່ສຸດລະຫວ່າງຈີນອາເມລິກາ.ເຈົ້າໜ້າທີ່ລະດັບສູງຂອງສອງປະເທດສາມາດຜ່ານກົນໄກນີ້ແລກປ່ຽນຄວາມເຫັນຢ່າງກວ້າງຂວາງແລະເລິກເຊິ່ງກ່ຽວກັບບັນຫາລັກສະນະຍຸດທະສາດ,ຍາວນານແລະກວມລວມໃນການຂະຫຍາຍການພົວພັນສອງປະເທດ.ໃນໂອກາດທີ່ການເຈລະຈາຮອບໃໝ່ຈະເປີດສາກ,ເຈົ້າໜ້າທີ່ອາເມລິກາຈຳນວນໜຶ່ງກ່າວວ່າ, ຫວັງວ່າການເຈລະຈາຮອບນີ້ຈະໄດ້ຮັບໝາກຜົນທີ່ດີ,ສ້າງເວທີແລກປ່ຽນຄວາມເຫັນແລະໄວ້ເນື້ອເຊື່ອໃຈກັນໃຫ້ສອງປະເທດ.
ການເຈລະຈາຍຸດທະສາດແລະເສດຖະກິດຈີນອາເມລິກາແມ່ນກົນໄກປຶກສາຫາລືແລະ ແລກປ່ຽນຄວາມເຫັນປະຈຳທີ່ສຳຄັນທີ່ສຸດລະຫວ່າງສອງປະເທດຍ້ອນມັນມີຜູ່ເຂົ້າຮ່ວມລະດັບສູງແລະມີຫົວຂໍ້ເຈລະຈາທີ່ຮອບດ້ານແລະກວ້າງຂວາງ.ກ່ອນໜ້ານີ້,ໃນເວລາກ່າວປາຖະກະຖາຢູ່ໃນງານລະດົມສະໝອງ,ທ່ານເຈັມສ໌ ສເຕັນເບີກ,ລັດຖະມົນຕີຊ່ວຍວ່າ ການປະຈຳກະຊວງການຕ່າງປະເທດອາເມລິກາກ່າວວ່າ,ການເຈລະຈາຮອບນີ້ຍັງຈະດຳເນີນຕາມສອງວົງໂຄຈອນຄື ຍຸດທະສາດແລະເສດຖະກິດ,ແລະຈະກ່ຽວພັນເຖິງຫຼາຍບັນ ຫາຈຸດສຸມ.
"ການເຈລະຈາເສດຖະກິດຈະສຸມໃສ່ການເຕີບໂຕຂອງເສດຖະກິດ, ແມ່ນນອນແລ້ວສິ່ງສຳຄັນຫຼາຍໃນທັດສະນະຂອງພວກເຮົາຍັງຈະມີບັນຫາທີ່ຮັກສາໃຫ້ອັດຕາປະກອບອາຊີບເພີ່ມຂຶ້ນ, ເພີ່ມການສົ່ງອອກແລະໂອກາດການລົງທຶນຕໍ່ຕ່າງປະເທດຂອງບໍລິສັດອາເມລິກາ, ພວກເຮົາກໍຈະຊຸກຍູ້ຈີນປະກອບສ່ວນເຂົ້າໃນການພັດທະນາເສດຖະກິດສາກົນໃຫ້ສົມດຸນຕື່ມອີກ. ໃນດ້ານການເຈລະຈາຍຸດທະສາດ, ພວກເຮົາຈະມີ 3 ເສົາຄ້ຳຄື: ອັນທີໜຶ່ງແມ່ນການຕໍ່ຕ້ານລັດທິກໍ່ການຮ້າຍ, ຄວາມປອດໄພດ້ານພະລັງງານແລະການແລກປ່ຽນດ້ານການທະຫານ, ອັນທີສອງແມ່ນວຽກງານຄວາມປອດໄພພາກພື້ນແລະສາກົນ, ອັນທີສາມ, ພວກເຮົາຈະປຶກສາຫາລືວຽກງານຫຼາຍຝ່າຍເຊັ່ນການປ່ຽນແປງຂອງດິນຟ້າອາກາດ, ສຸຂະພາບແລະພະຍາດຕິດແປດ, ຄວາມປອດໄພດ້ານອາຫານເປັນຕົ້ນ."
ກ່ອນຈະຈັດການເຈລະຈາຮອບນີ້, ຈີນອາເມລິກາໄດ້ເກີດຄວາມຂັດແຍ່ງໃນບາງບັນຫາ. ໃນດ້ານເສດຖະກິດ, ບັນຫາອັດຕາແລກປ່ຽນຂອງເງິນຢວນຈີນ, ບັນຫາການຄ້າແລະໜີ້ສິນກາຍເປັນຈຸດສຸມທີ່ຜູ້ຊ່ຽວຊານຫຼາຍຄົນສົນໃຈ. ໃນເວລາເຂົ້າຮ່ວມກອງປະຊຸມຂ່າວທີ່ຈັດຂຶ້ນໃນວັນທີ 19 ພຶດສະພານີ້, ທ່ານເດວິດ ໂລວິນເຈີ, ເລຂາທິການບໍລິຫານທັງເປັນຜູ້ປະສານງານລະດັບສູງທີ່ຮັບຜິດຊອບວຽກງານຈີນແລະການເຈລະຈາຍຸດທະສາດແລະເສດຖະກິດລະຫວ່າງຈີນກັບອາເມລິກາຂອງກະຊວງການເງິນອາເມລິກາກ່າວວ່າ, ເຖິງວ່າສອງຝ່າຍມີຂໍ້ຂັດແຍ່ງໃນຂົງເຂດເສດຖະກິດຈຳນວນໜຶ່ງກໍຕາມ, ແຕ່ສອງປະເທດກໍ່ມີຊ່ອງທາງຮ່ວມມືກັນຢ່າງກວ້າງຂວາງ.
ສັງເກດຈາກດ້ານການຂະຫຍາຍການພົວພັນຂອງສອງຝ່າຍແລ້ວ, ອາເມລິກາກັບຈິນກໍ່ອາດຈະເຈລະຈາກັນກ່ຽວກັບບັນຫາໄຕ້ຫວັນ, ບັນຫານິວເຄຼຍອີຣານ, ບັນຫານິວເຄຼຍແຫລມເກົາຫລີແລະບັນຫາອື່ນໆທີ່ກ່ຽວພັນເຖິງຜົນປະໂຫຍດໃຈກາງຂອງທັງສອງຝ່າຍ. ທ່ານເຈມສ໊ ສະເຕນເບີກ,ລັດຖະມົນຕີຊ່ວຍວ່າການປະຈຳກະຊວງການຕ່າງປະເທດອາເມລິກາເຫັນວ່າ, ການເຈລະຈາລັກສະນະນີ້ຈະມີຜົນດີຕໍ່ການເຮັດໃຫ້ສອງຝ່າຍມີຄວາມເຫັນຂັດແຍ່ງກັນຫນ້ອຍລົງ, ແລະມີຄວາມເຫັນທີ່ຄືກັນເພີ່ມຂຶ້ນ.
ການພົວພັນຈີນອາເມລິກາແມ່ນການພົວພັນສອງຝ່າຍທີ່ສຳຄັນທີ່ສຸດໃນໂລກປັດຈຸບັນ, ວຽກງານສາກົນຢ່າງຫລວງຫລາຍລ້ວນແຕ່ຕ້ອງການໃຫ້ຈີນແລະອາເມລິກາເຂົ້າຮ່ວມນຳກັນ, ສະນັ້ນ,ການປະສານງານກັນລະຫວ່າງຈີນກັບອາເມລິກາແມ່ນຂາດບໍ່ໄດ້.ຍ້ອນເຫດນີ້, ເຈົ້າຫນ້າທີ່ອາເມລິກາຫວັງຢ່າງຍິ່ງໃຫ້ການເຈລະຈາຍຸດທະສາດແລະເສດຖະກິດຈີນອາເມລິກາເທື່ອນີ້ຈະໄດ້ຮັບຜົນດີອີກເທື່ອຫນຶ່ງ, ເພື່ອສ້າງພື້ນຖານອັນຫນັກແຫນ້ນກວ່າເກົ່າໃຫ້ແກ່ການຂະຫຍາຍການພົວພັນລະຫວ່າງສອງຝ່າຍ,ຊຸກຍູ້ໃຫ້ຕ່າງຝ່າຍຕ່າງມີຜົນປະໂຫຍດ.ທ່ານເດວິດ ໂລວິນເກີກ່າວວ່າ:
ຈີນແມ່ນອົງກອນເສດຖະກິດສຳຄັນທີ່ເຕີບໂຕໄວທີ່ສຸດໃນໂລກ,ນີ້ແມ່ນໂອກາດທີ່ດີຫລາຍສຳລັບບໍລິສັດແລະແຮງງານອາເມລິກາ,ແຕ່ພ້ອມກັນນັ້ນກໍ່ແມ່ນການທ້າທາຍດ້ານເສດຖະກິດອັນສຳຄັນທີ່ພວກເຮົາຕ້ອງປະເຊີນ.ການເຈລະຈດ້ານຍຸດທະສາດແລະເສດຖະກິດລະຫວ່າງເຈົ້າຫນ້າທີ່ຈີນກັບອາເມລິກາສາມາດເຮັດໃຫ້ພວກເຮົາປະເຊີນກັບການທ້າທາຍເຫລົ່ານີ້ຈາກລະດັບສູງ,ເພື່ອຫາລືກັນຢ່າງກວ້າງຂວາງແລະເປັນເຈົ້າການ.
