ກອງທັບເຮືອອິສຣາແອນໂຈມຕີກຳປັ່ນກູ້ໄພສາກົນເຮັດໃຫ້ສະຖານະການຕາເວັນອອກກາງເຄັ່ງຕຶງຂຶ້ນ
(GMT+08:00) 2010-06-01 15:30:23 cri
ທີ່ນີ້ວິທະຍຸສາກົນແຫ່ງປະເທດຈີນ! ທ່ານຜູ້ຟັງທີ່ເຄົາລົບ, ວັນທີ 31 ພຶດສະພາແລ້ວນີ້, ກອງທັບເຮືອອິນຣາແອນໄດ້ໂຈມຕີກອງກຳປັ່ນຂົນສົ່ງເຄື່ອງຊ່ອຍເຫຼືອມະນຸດສະທຳສາກົນ, ຢ່າງໜ້ອຍເຮັດໃຫ້ມີ 19 ຄົນເສຍຊີວິດແລະ 36 ຄົນບາດເຈັບ, ເມື່ອເກີດເຫດການດັ່ງກ່າວເຮັດໃຫ້ຄົນທົ່ວໄປຮູ້ສຶກຕື່ນຕົກໃຈ, ທັງຮູ້ສຶກວ່າສະຖານະການຢູ່ຕາເວັນອອກກາງຈະເພີ່ມຄວາມເຄັ່ງຕຶງຂຶ້ນ.
ຫຼາຍຄົນອາດຈະຮູ້ສຶກຕົກໃຈຕໍ່ການກະທຳດັ່ງກ່າວຂອງກອງທັບເຮືອອິສຣາແອນ, ທີ່ຈິງແລ້ວ, ນີ້ບໍ່ແມ່ນເຫດການແບບອຸປະຕິເຫດ. ເພາະວ່າໃນວັນທີ 22 ພຶດສະພາແລ້ວນີ້, ກອງກຳປັ່ນຂົນສົ່ງເຄື່ອງຊ່ອຍເຫຼືອສາກົນທີ່ອອກເດີນທາງຈາກທ່າເຮືອອິສຕັນບູນຂອງຕວກກີ, ກອງທັບອິສຣາແອນກໍເຄີຍເຕືອນແລ້ວວ່າຈະສະກັດກັ້ນ. ແຕ່ບໍ່ສາມາດຂັດຂວາງການເດີນທາງຂອງກຳປັ່ນກອງນີ້ທີ່ປະກອບດ້ວຍອົງການພົນລະເຮືອນຂອງ 50 ກວ່າປະເທດເພື່ອໄປທະເລກາຊາ. ຜູ້ຕາງໜ້າຂອງອົງການເອີລົບກ່າວວ່າ, "ຖ້າວ່າອິສຣາແອນໃຊ້ຄວາມຮຸນແຮງແລະສັງຫານແບບນີ້, ໜ້າທີ່ຂອງພວກເຮົາກໍຄືເປີດເຜີຍຄວາມຊົ່ວຮ້າຍໃຫ້ທົ່ວໂລກຮູ້". ອົງການພົນລະເຮືອນດັ່ງກ່າວບໍ່ສົນໃຈຕໍ່ການຂົ່ມຂູ່ເຖິງຄວາມປອດໄພຂອງຕົນ, ກໍຍ້ອນວ່າເຂົາເຈົ້າໄດ້ເຫັນວ່າການປາບປາມແລະປິດລ້ອມຂອງອິສຣາແອນຕໍ່ເຂດຖາຊາມາເປັນເວລາ 4 ປີ, ໄດ້ເຮັດໃຫ້ເຂດກາຊາກາຍເປັນຄຸກໃຫຍ່ແຫ່ງໜຶ່ງ, ຊີວິດຂອງປະຊາຊົນກາຊາ 1 ລ້ານ 5 ແສນຄົນທຸກຍາກລຳບາກທີ່ສຸດ.ນີ້ເຮັດໃຫ້ຄົນທີ່ມີຈິດໃຈມະນຸດສະທຳອົດທົນເບິ່ງຊິ່ງບໍ່ໄດ້, ປະຊາຄົມໂລກກໍ່ຈະບໍ່ປ່ອຍໃຫ້ສະຖານະການດ້ານມະນຸດສະທຳຢູ່ເຂດກາຊາຮ້າຍໂຮງລົງຕື່ມອີກ.
ພ້ອມກັນນັ້ນພວກເຮົາກໍ່ໄດ້ເຫັນວ່າ, ເຫດການດັ່ງກ່າວກໍ່ບໍ່ແມ່ນເຫດການທີ່ໂດດດ່ຽວ.ໃນກອງກຳປັ່ນຊ່ວຍເຫລືອສາກົນກອງນີ້,ຕວກກີແມ່ນກຳລັງທີ່ສຳຄັນ,ຜູ່ເສຍຊີວິດຈາກການໂຈມຕີຂອງທະຫານອິສລາແອນກໍ່ມີຄົນຕວກກີຫລາຍກວ່າຫມູ່.ນີ້ເຮັດໃຫ້ພວກເຮົາຕ້ອງເອົາເລື່ອງນີ້ໄປພົວພັນກັບການຂະຫຍາຍຕົວຂອງການພົວພັນລະຫວ່າງຕວກກີກັບອິສລາແອນໃນປະຈຸບັນນີ້.ນັບແຕ່ອິສລາແອນໃຊ້ການເຄື່ອນໄຫວທາງການທະຫານຊື່ວ່າ Cast Lead ຢູ່ເຂດກາຊາໃນທ້າຍປີ 2008 ເປັນຕົ້ນມາ, ການພົວພັນລະຫວ່າງຕວກກີກັບອິສລາແອນກໍ່ເລີ່ມຊຸດຮ້າຍລົງ.ໃນບັນຫາກາຊາ,ຕວກກີມີທ່າທີແຂງແຮງກວ່າປະເທດອາຣັບຕ່າງໆເຊັ່ນເອຢິບ,ຊັອກດານີແລະອາຣັບບີຊາອຸດິດ.ນີ້ເຖິງວ່າແມ່ນຍ້ອນປະຊາຊົນຕວກກີສະຫນັບສະຫນູນອົງການຮາມາສຍ້ອນສາເຫດທາງສາສະຫນາ, ອີກດ້ານຫນຶ່ງ,ປະຊາຊົນຕວກກີບໍ່ພໍໃຈນຳອິສລາແອນຮຸກຮານກາຊາກໍ່ສ່ອງແສງເຖິງນະໂຍບາຍຕໍ່ຕ່າງປະເທດຂອງຕວກກີ.ເທິງເວທີປາໄສດາໂວສທີ່ຈັດຂຶ້ນໃນຕົ້ນປີ 2009,ທ່ານເອໂດອັນ,ນາຍົກລັດຖະມົນຕີຕວກກີກໍ່ຍ້ອນໄດ້ໂຕ້ຖຽງກັບທ່ານໄຊມອນ ເປເລັສ,ປະທານາທິບໍດີອິສລາແອນໃນບັນຫາກາຊາ,ທ່ານຈິ່ງອອກຈາກທີ່ປະຊຸມຢ່າງຄຽດແຄ້ນ.ເລື່ອງບໍ່ດີທີ່ເກີດຂຶ້ນລະຫວ່າງສອງຝ່າຍລ້ວນແຕ່ມີສ່ວນກ່ຽວຂ້ອງກັບນະໂຍບາຍອຽງເຂົ້າຕາເວັນອອກທີ່ທ່ານເອໂດອັນຖະແຫລງພາຍຫລັງຂຶ້ນດຳລົງຕຳແຫນ່ງ.ລັດຖະ ບານເອໂດອັນໄດ້ປ່ຽນນະໂຍບາຍທີ່ນິຍົມອິສລາແອນໃນເມື່ອກ່ອນນັ້ນຫັນໄປໃກ້ຊິດກັບໂລກອິສລາມ,ແລະໃກ້ຊິດກັບອິຣານກວ່າເກົ່າ,ນີ້ກໍ່ບໍ່ຍາກທີ່ຈະເຂົ້າໃຈວ່າເປັນຫຍັງອີຣານກັບປະເທດຕາເວັນຕົກຈິ່ງຕົກຢູ່ໃນສະພາບບໍ່ໄປບໍ່ມາໃນບັນຫານິວເຄຼຍ,ແຕ່ຊ້ຳພັດໄດ້ເຊັນສັນຍາແລກປ່ຽນວັດຖຸເຊື້ອໄຟນິວເຄຼຍກັບຕວກກີແລະເບຼຊິນ.ຕວກກີທີ່ມີພູມສັນຖານຍຸດທະສາດທີ່ສຳຄັນຢູ່ເຂດຕາເວັນອອກກາງນັ້ນໄດ້ສະແດງໃຫ້ເຫັນຄວາມປາຖະຫນາອັນແຮງກ້າທີ່ຢາກສ້າງບົດບາດສຳຄັນກວ່າເກົ່າຢູ່ພາກຕາເວັນອອກກາງ,ແລ້ວສ້າງຜົນປະໂຫຍດຫລາຍກວ່າເກົ່າແກ່ຕົນເອງໃນການສູ້ກັບປະເທດໃຫຍ່.ເມື່ອເຮັດແນວນີ້ແລ້ວ, ກໍ່ຈະເຮັດໃຫ້ສະຖານະການຕາເວັນອອກກາງສັບສົນກວ່າເກົ່າ.
