ວັນທີ 16 ມິຖຸນານີ້,ຢູ່ທີ່ນະຄອນຫຼວງວຽງຈັນ, ທ່ານສິຈິ້ນຜິງ ,ຮອງປະທານປະເທດຈີນທີ່ມາຢ້ຽມຢາມສ.ປ.ປລາວໄດ້ພົບປະເຈລະຈາກັບທ່ານບຸນຍັງ ວໍລະຈິດ, ຮອງປະທານປະເທດລາວ. ສອງຝ່າຍໄດ້ກ້າວເຖິງຂັ້ນມີຄວາມເຫັນທີ່ເປັນເອກະສັນກັນໂດຍທົ່ວໄປກ່ຽວກັບການລົງເລິກການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດຕື່ມອີກ.ຕໍ່ໄປເຊີນຟັງລາຍລະອຽດກ່ຽວກັບເລື່ອງນີ້:
ຢູ່ທຳນຽບປະທານປະເທດແຄມແມ່ນ້ຳຂອງ,ຜູ່ນຳສອງປະເທດຄື:ທ່ານສີຈິ້ນຜິງ,ຮອງປະທານປະເທດຈີນແລະທ່ານບຸນຍັງ ວໍລະຈິດ,ຮອງປະທານປະເທດລາວໄດ້ເລີ່ມພົບປະໂອ້ລົມກັນຢ່າງສະຫນິດສະຫນົມ. ທ່ານສີຈິ້ນຜິງກ່າວວ່າ,ທ່ານດີໃຈທີ່ສຸດທີ່ໄດ້ມາຢ້ຽມຢາມສ.ປ.ປລາວຕາມຄຳເຊື້ອເຊີນຂອງທ່ານບຸນຍັງ ວໍລະຈິດ, ,ແລະຍັງຫວນຄືນຢ່າງອົບອຸ່ນຕໍ່ສະພາບທີ່ທ່ານມາຢ້ຽມຢາມລາວໃນ 5 ປີກ່ອນ. "ປີ 2005,ຂ້າພະເຈົ້າເຄີຍມາຢ້ຽມຢາມລາວເທື່ອທຳອິດ, ການຢ້ຽມຢາມເທື່ອນັ້ນໄດ້ສ້າງຄວາມປະທັບໃຈອັນດີງາມທີ່ສຸດໃຫ້ແກ່ຄວາມຊົງຈຳຂ້າພະເຈົ້າ, ເທື່ອນີ້ມາຢ້ຽມຢາມລາວອີກເທື່ອຫນຶ່ງ,ຂ້າພະເຈົ້າກໍ່ຮູ້ສຶກວ່າ,ປະຈຸບັນ, ຢູ່ນີ້ສັງຄົມມີຄວາມສະຫງົບ,ການປົກຄອງສອດຄ່ອງກັມກຽວກັນ. ປະຊາຊົນສາມັກຄີປອງດອງກັນ. ການພັດທະນາເສດຖະກິດກໍ່ໄດ້ຮັບຜົນສຳເລັດໃຫມ່,ຂ້າພະເຈົ້າຮູ້ສຶກດີໃຈທີ່ສຸດແລະສະແດງຄວາມຊົມເຊີຍດ້ວຍຄວາມຈິງໃຈຕໍ່ຜົນສຳເລັດໃຫມ່ທີ່ສະຫາຍລາວໄດ້ຮັບ."
ທ່ານສີຈິ້ນຜິງກ່າວວ່າ,ນັບແຕ່ຈີນກັບລາວສ້າງສາຍພົວພັນທາງການທູດເກືອບເຄິ່ງສະຕະວັດເປັນຕົ້ນມາ,ການພົວພັນລະຫວ່າງສອງປະເທດກໍ່ໄດ້ຂະຫຍາຍຕົວຢ່າງຫມັ້ນຫນຽວບໍ່ປ່ຽນແປງ. ປະຈຸບັນ,ການພົວພັນລະຫວ່າງ ຈີນລາວໄດ້ມີຈຸດພິເສດຈຳນວນຫນຶ່ງທີ່ພົ້ນເດັ່ນ,ຄື: ຜູ່ນຳສອງປະເທດແລກປ່ຽນການໄປມາຫາສູ່ກັນເລື້ອຍໆຄືກັບບາດພີ່ນ້ອງຢື້ຢາມຖາມຂ່າວກັນ. ເພື່ອເພີ່ມພະລັງແຮງໃຫມ່ເຂົ້າໃນການຂະຫຍາຍການພົວພັນລະຫວ່າງສອງປະເທດ;ການຮ່ວມມືດ້ານເສດຖະກິດການຄ້າລະຫວ່າງສອງປະເທດໄດ້ຮັກສາການເຕີບໂຕຢ່າງວ່ອງໄວ, ແລະໄດ້ຮັບຜົນສຳເລັດສູງ; ການໄປມາຫາສູ່ກັນລະຫວ່າງສອງພັກໄດ້ມີເລື້ອຍໆ, ບົດຮຽນທີ່ດີດ້ານການປົກຄອງປະເທດແລະຄຸ້ມຄອງການເມືອງໄດ້ແລກປ່ຽນກັນຢ່າງເລິກເຊິ່ງ; ສອງຝ່າຍຮັກສາການຕິດຕໍ່ປະສານງານກັນຢ່າງໃກ້ຊິດໃນບັນຫາພາກພື້ນແລະສາກົນທີ່ສົນໃຈຮ່ວມກັນ,ແລະສະຫນັບສະຫນູນເຊິ່ງກັນແລະກັນໃນການຮ່ວມມືພາກພື້ນ.
ທ່ານຊີຈິ້ນຜິງຍັງໄດ້ມີຂໍ້ສະເຫນີ 5 ຂໍ້ກ່ຽວກັບການຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດຕື່ມອີກຄື:ອັນທີຫນຶ່ງ:ຮັກສາການໄປມາຫາສູ່ກັນຂອງເຈົ້າຫນ້າທີ່ລະດັບສູງ,ປັບປຸງຄວາມໄວ້ເນື້ອເຊື່ອໃຈກັນດ້ານຍຸດທະສາດ,ຊຸກຍູ້ການພົວພັນລະຫວ່າງສອງປະເທດຂະ ຫຍາຍກ້າວສູ່ລວງເລິກ;ອັນທີສອງ:ເປີດກວ້າງຂົງເຂດແລະຮູບການຂອງການຮ່ວມມືອັນໃຫມ່,ຊຸກຍູ້ການຮ່ວມມືດ້ານເສດຖະກິດການຄ້າໃຫ້ມີຄວາມຄືບຫນ້າໃຫມ່;ອັນທີສາມ,ຖືໂອກາດທີ່ຈີນແລະລາວສ້າງສາຍພົວພັນທາງການທູດຄົບຮອບ 50 ປີໃນປີຫນ້າເປັນໂອກາດ,ເປີດກວ້າງຂົງເຂດການຮ່ວມມືລະຫວ່າງສອງຝ່າຍຕື່ມອີກ,ເພີ່ມການໄປມາຫາສູ່ກັນຂອງປະຊາຊົນ,ເພີ່ມທະວີການແລກປ່ຽນດ້ານວັດທະນະທຳ, ວາງແຜນຈັດກິດຈະກຳສະຫລອງການສ້າງການພົວພັນທາງການທູດລະຫວ່າງສອງປະເທດຄົບຮອບ 50 ປີຮ່ວມກັນ;ອັນທີສີ່:ປົກປັກຮັກສາຜົນປະໂຫຍດຮ່ວມກັນ, ປະສານງານກັນຢ່າງແຫນ້ນແຟ້ນໃນວຽກງານພາກພື້ນແລະສາກົນ, ເພີ່ມທະວີການສະຫນັບ ສະຫນູນແລະປະສານສົມທົບກັນ;ອັນທີຫ້າ ລົງເລິກການແລກປ່ຽນບົດຮຽນກັນທັງວຽກພັກແລະວຽກລັດ.
ທ່ານບຸນຍັງວໍລະຈິດກ່າວວ່າ, ທ່ານຮອງປະທານຊິຈິ້ນຜິງມາຢ້ຽມຢາມລາວມີຄວາມຫມາຍສຳຄັນຕໍ່ການສົ່ງເສີມມິດຕະພາບອັນເປັນມູນເຊື້ອລະຫວ່າງສອງຊາດ, ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໂດຍສະເພາະແມ່ນຜັນຂະຫຍາຍຄວາມຮັບຮູ້ທີ່ເປັນເອກະສັນຂອງຜູ່ນຳສູງສຸດຂອງສອງປະເທດກ່ຽວກັບການະຂຫຍາຍການພົວພັນສອງຝ່າຍ.ໃນສະຖານະການສາກົນໃນປັດຈຸບັນ, ລາວຍິນດີ ທຳຄວາມພະຍາຍາມຮ່ວມກັບຈີນ, ກຳແຫນ້ນໂອກາດ, ເພີ່ມທະວີການຮ່ວມມືກັນ, ຂະຫຍາຍການຮ່ວມມືໃນຂົງເຂດເສດຖະກິດການຄ້າແລະອື່ນໆ, ຊຸກຍູ້ການພົວພັນລະຫວ່າງສອງປະເທດຂະຫຍາຍໄປສູ່ລະດັບສູງກວ່າເກົ່າ.
ພາຍຫລັງການພົບປະເຈລະຈາແລ້ວ,ສອງຝ່າຍໄດ້ຮ່ວມກັນເຂົ້າຮ່ວມເປັນສັກຂີພິຍານໃນພິທີລົງນາມໃນສັນຍາຮ່ວມມືເສດຖະກິດແລະວິທະຍາ ສາດເຕັກນິກ,ແລະເອກະສານຮ່ວມມືໃນຂົງເຂດເສດຖະກິດການຄ້າ, ການເງິນ,ແລະພະລັງງານໄຟຟ້າ.ເຈົ້າຫນ້າທີ່ຂອງລາວທີ່ເຂົ້າຮ່ວມພິທີລົງນາມນັ້ນກ່າວວ່າ, ໂຄງການເຫລົ່ານີ້ຈະມີສ່ວນປະກອບອັນສຳຄັນໃນການພັດທະ ນາເສດຖະກິດສັງຄົມຂອງປະເທດລາວ.ທ່ານກ່າວວ່າ:
ທັງສອງຝ່າຍໄດ້ມີໂຄງການຈຳນວນຫນຶ່ງທີ່ຈະຮ່ວມມືກັນ,ເພື່ອພັດທະ ນາໃນຕໍ່ຫນ້າໂດຍແມ່ນສປຈີນເປັນຜູ່ຊ່ວຍເຫລືອ,ອັນເປັນການປະກອບສ່ວນທີ່ສຳຄັນຍິ່ງຕໍ່ການພັດທະນາເສດຖະກິດສັງຄົມຂອງສປປລາວ.
