ວັນທີ 19 ມິຖຸນານີ້, ໂຄສົກທະນາຄານປະຊາຊົນຈີນເຊິ່ງເປັນທະນາຄານກາງຈີນປະກາດວ່າ, ຕາມສະຖານະການເສດຖະກິດການເງິນຈີນແລະຕ່າງປະເທດແລະສະພາບລາຍຮັບລາຍຈ່າຍຂອງຈີນແລະສາກົນ, ທະນາຄານກາງຈີນຕົກລົງຊຸກຍູ້ການປະຕິຮູບກົນໄກອັດຕາແລກປ່ຽນເງິນຢວນຕື່ມອີກ, ເພີ່ມຄວາມອ່ອນໂນ້ມຂອງເງິນຢວນ.
ຜູ້ຊ່ຽວຊານເສດຖະກິດເຫັນວ່າ, ຈີນຊຸກຍູ້ການປະຕິຮູບກົນໄກອັດຕາແລກປ່ຽນແມ່ນການເລືອກຢ່າງເປັນເຈົ້າການຍ້ອນຄວາມຕ້ອງການຂອງຕົນ, ການປະຕິຮູບກົນໄກອັດຕາແລກປ່ຽນມີຜົນດີຫຼາຍກວ່າຜົນຮ້າຍຕໍ່ການພັດທະນາຂອງເສດຖະກິດ. ຕໍ່ໄປເຊິ່ງຟັງການລາຍງານລະອຽດ:ພາຍໃຕ້ສະພາບການທີ່ຜົນສະທ້ອນຂອງວິກິດການການເງິນສາກົນຄ່ອຍໆຫຼຸດລົງ, ທະນາຄານກາງຈີນປະກາດຊຸກຍູ້ການປະຕິຮູບກົນໄກອັດຕາແລກປ່ຽນເງິນຢວນໄດ້ຢູ່ໃນຄວາມສົນໃຈຂອງຄົນທັງຫຼາຍ. ໃນເວລາໃຫ້ສຳພາດຕໍ່ນັກຂ່າວCRIແລະວິເຄາະເລື່ອງນີ້, ທ່ານລູເຈີ້ງເວ, ນັກເສດຖະສາດທີໜຶ່ງຂອງທະນາຄານຊິງເຢ້ຍກ່າວວ່າ, ຈີນຊຸກຍູ້ການປະຕິຮູບອັດຕາແລກປ່ຽນ, ແມ່ນເພື່ອຄວາມຕ້ອງການພັດທະນາເສດຖະກິດຂອງຕົນເອງ, ບໍ່ກ່ຽວພັນກັບແຮງກົດດັນຂອງພາຍນອກ.
ບັນຫາກ່ຽວກັບອັດຕາແລກປ່ຽນເງິນຕາແມ່ນບັນຫາອະທິປະໄຕຂອງຈີນ,ໃນຂະບວນການປະຕິບັດນະໂຍບາຍເງິນຕາ,ຈີນໄດ້ຖືການຕອບສະຫນອງຄວາມຕ້ອງການຂອງເສດຖະກິດພາຍໃນປະເທດເປັນເບົ້າແບບສຳຄັນ.ເທື່ອນີ້, ທະນາຄານກາງກໍ່ໄດ້ພິຈາລະນາເຖິງການປ່ຽນແປງຂອງເສດຖະກິດພາຍໃນປະເທດແລ້ວຈິ່ງທຳການປັບປຸງຄືແນວນີ້.ສາເຫດສຳຄັນແມ່ນຍ້ອນວ່າ: ອັນທີຫນຶ່ງເສດຖະກິດຈີນມີທ່າອຽງພື້ນຕົວຄືນນັບມື້ນັບແຂງແຮງຂຶ້ນ,ອັນທີສອງແມ່ນອົງກອນເສດຖະກິດທີ່ພວມພັດທະນາທີ່ມີຈີນເປັນຕົວແທນນັ້ນຟື້ນຕົວໄວກວ່າອົງກອນເສດຖະກິດທີ່ພັດທະນາແລ້ວທີ່ມີອາເມລິກາເປັນຕົວແທນ,ນີ້ຫມາຍຄວາມວ່າຖ້າອັດຕາແລກປ່ຽນເງິນຢວນ ຂອງຈີນຂາດຄວາມອ່ອນໂນ້ມແລ້ວ,ກໍ່ຈະຈຳກັດລັກສະນະເປັນອິສະຫລະແລະເສລີພາບຂອງນະໂຍບາຍເງິນຕາຂອງຈີນ, ຈະບໍ່ມີຜົນດີຕໍ່ການຄວບຄຸມແລະ ປັບປຸງເສດຖະກິດພາຍໃນປະເທດຈີນ.ອັນທີສາມ, ວິກິດການການເງິນເທື່ອນີ້ທີ່ຈິງແລ້ວໄດ້ກະທົບເຖິງຮູບການພັດທະນາເສດຖະກິດຂອງຈີນ, ສະນັ້ນ, ຄວນເລັ່ງລັດບາດກ້າວປັບປຸງໂຄງປະກອບເສດຖະກິດ, ສ່ວນການປັບປຸງອັດຕາແລກປ່ຽນເງິນຕາທີ່ເປັນເຄື່ອງມືປັບປຸງລາຄາທີ່ບັງເກີດຜົນກໍ່ແມ່ນເລື່ອງທຳມະດາທີ່ສຸດ.
ທ່ານຕິ່ງຈື້ເຈຍະ,ຫົວຫນ້າສະຖາບັນການເງິນຂອງມະຫາວິທະຍາໄລເສດຖະກິດການຄ້າກັບຕ່າງປະເທດຂອງຈີນກໍ່ເຫັນດີນຳເລື່ອງນີ້ຄືກັນ.ທ່ານຊີ້ອອກຕື່ອີກວ່າ, ເນື້ອໃນຂອງການປັບປຸງເທື່ອນີ້ຕົ້ນຕໍແມ່ນເຊົາປະຕິບັດນະໂຍບາຍອັດຕາແລກປ່ຽນເງິນຕາທີ່ປະຕິບັດຊົ່ວຄາວໃນໄລຍະຮັບມືກັບວິກິດການການເງິນ,ການກັບຄືນມາຖືຄວາມຕ້ອງການແລະການສະຫນອງຂອງຕະຫລາດເປັນພື້ນຖານ,ແລະປັບປຸງອັດຕາແລກປ່ຽນເງິນຢວນຕາມເງິນຕາສະກູນສຳຄັນຕ່າງໆນັ້ນຈະບໍ່ເຮັດໃຫ້ອັດຕາແລກປ່ຽນເງິນຢວນຈີນປັ່ນປ່ວນແຮງ.ທ່ານກ່າວວ່າ:
"ການປະຕິຮູບອັດຕາແລກປ່ຽນເງິນຕາບໍ່ຫມາຍຄວາມວ່າອັດຕາແລກປ່ຽນເງິນຕາຈະສູງຂຶ້ນຢ່າງແນ່ນອນ, ອັດຕາແລກປ່ຽນເງິນຕາໃນອະນາຄົດຈະເຫນັງຕີງໄປທັງສອງທິດ. ລັດຖະບານຈີນກໍ່ພິຈາລະນາເຖິງເງິນຢວນທີ່ແຂງຄ່າຂື້ນຈະເກີດ ຜົນສະທ້ອນຕໍ່ຂະແຫນງການຜະລິດທີ່ໃຊ້ແຮງງານຫຼາຍ, ຈະຄວບຄຸມຈັງຫວະປັບປຸງອັດຕາແລກປ່ຽນເງິນຕາເປັນຢ່າງດີ, ສະນັ້ນ,ຜົນສະທ້ອນທີ່ເກີດຂຶ້ນນັ້ນກໍ່ສາມາດ ແມ່ນຮັບເອົາໄດ້ແນ່ນອນ."
ແຕ່ທ່ານຕີ່ງຈີ້ເຈຍະຍັງກ່າວວ່າ, ພາຍໃຕ້ສະພາບທີ່ເສດຖະກິດໂລກາວິວັດມັບມື້ນັບລົງເລິກນັ້ນ, ການທີ່ຈີນສືບຕໍ່ຊຸກຍູ້ການປະຕິຮູບອັດຕາແລກປ່ຽນເງິນຕາຈະມີຜົນດີຕໍ່ການເຮັດໃຫ້ຕ່າງຝ່າຍຕ່າງໄດ້ຜົນປະໂຫຍດນຳກັນ,ແລະມີຜົນດີຕໍ່ການຮັກສາສະ ພາບແວດລ້ອມດ້ານເສດຖະກິດການຄ້າທາງສາກົນຂອງຈີນ.
"ປະຈຸບັນ,ໃນຂະບວນການທີ່ເສດຖະກິດໂລກຟື້ນຕົວຄືນ, ອັດຕາແລກປ່ຽນເງິນຕາຂອງຈີນມີຄວາມອ່ອນໂນ້ມຄືນອີກນັ້ນມີຜົນດີຕໍ່ການເພີ່ມທະວີການປະສານງານດ້ານນະໂຍບາຍໃນວຽກງານເສດຖະກິດສາກົນ,ແລະຍັງສະແດງໃຫ້ເຫັນວ່າຈີນແມ່ນປະເທດໃຫຍ່ທີ່ມີຄວາມຮັບຜິດຊອບ, ມີບົດບາດທີ່ດີຕໍ່ການປັບປຸງສະພາບແວດລ້ອມໃນການພັດທະ ນາເສດຖະກິດພາຍນອກຂອງຈີນໃຫ້ດີຂຶ້ນ.