ທ່ານຫູຈິນທ່າວສະເໜີໃຫ້ສ້າງຕັ້ງລະບົບການເງິນສາກົນທີ່ມີຜົນດີຕໍ່ການພັດທະນາເສດຖະກິດຮູບປະທຳໃນກອງປະຊຸມສຸດຍອດG20
(GMT+08:00) 2010-06-29 14:58:42 cri
ຕາມຂ່າວCRI:ວັນທີ27ມິຖຸນານີ້,ກອງປະຊຸມສຸດຍອດຄັ້ງທີ4ຂອງຜູ່ນຳກຸ່ມ20ປະເທດຫຼື G20ຈັດຂຶ້ນຢູ່ໂຕຣອນໂຕຂອງການາດາ.ໃນກອງປະຊຸມ,ທ່ານຫູຈິນທ່າວ,ປະທານປະເທດຈີນໄດ້ກ່າວຄຳປາໄສສຳຄັນໃນຫົວຂໍ້ "ຮ່ວມແຮງຮ່ວມໃຈ,ພ້ອມກັນສ້າງອະນາຄົດ".ໃນຄຳປາໄສ,ທ່ານຫູຈິນທ່າວໄດ້ສະເໜີຄວາມເຫັນຂອງຈີນທີ່ມີຕໍ່ສະພາບການເສດຖະກິດໂລກປະຈຸບັນ,ແລະຄວາມຫວັງທີ່ມີຕໍ່ການຂະຫຍາຍກົນໄກG20.
ທ່ານຫູຈິນທ່າວໄດ້ສະເໜີ3ຂໍ້ເພື່ອຊຸກຍູ້ເສດຖະກິດໂລກໃຫ້ເຂົ້າສູ່ການເຕີບໂຕຢ່າງແຂງແຮງ,ຕໍ່ເນື່ອງແລະສະໝ່ຳສະເໝີໂດຍໄວເທົ່າທີ່ຈະໄວໄດ້,ລິເລີ່ມໃຫ້ສ້າງຕັ້ງລະບົບການເງິນສາກົນທີ່ມີຜົນດີຕໍ່ການພັດທະນາເສດຖະກິດຮູບປະທຳ.ພ້ອມກັນນັ້ນ,ທ່ານຫູຈິນທ່າວຍັງໄດ້ກ່າວເນັ້ນບັນຫາການພັດທະນາ.ກອງປະຊຸມສຸດຍອດໂຕຣອນໂຕແມ່ນຈັດຂຶ້ນໃນສະພາບທີ່ເສດຖະກິດໂລກຟື້ນຕົວຢ່າງອ່ອນແອ.ຜູ່ນຳປະເທດຕ່າງໆໄດ້ບັນລະຍາຍຫຼັກໝັ້ນແລະຈຸດປະສົງຂອງໃຜລາວກ່ຽວກັບຫົວຂໍ້ຂອງກອງປະຊຸມສຸດຍອດເທື່ອນີ້ທີ່ວ່າ"ການຟື້ນຕົວແລະການເລີ່ມຕົ້ນໃໝ່",ແລະຫາລືກ່ຽວກັບຫຼາຍບັນຫາ,ເປັນຕົ້ນວ່າ:ສະພາບເສດຖະກິດໂລກ,ວິກິດການໜີ້ສິນພາກລັດຂອງເອີລົບ,"ການເຕີບໂຕຢ່າງແຂງແຮງ,ຕໍ່ເນື່ອງແລະສະໝ່ຳສະເໝີ",ການປະຕິຮູບອົງການການເງິນສາກົນ,ການຄ້າສາກົນແລະການຕິດຕາມຄຸ້ມຄອງການເງິນ.ໃນໄລຍະທີໜຶ່ງຂອງກອງປະຊຸມສຸດຍອດທີ່ຈັດຂຶ້ນໃນຕອນເຊົ້າວັນທີ 27 ມິຖຸນານີ້, ເພື່ອຊຸກຍູ້ໃຫ້ເສດຖະກິດໂລກເຕີບໂຕຢ່າງແຂງແຮງ, ຕໍ່ເນື່ອງແລະສະໝ່ຳສະເໝີໂດຍໄວ, ທ່ານຫູຈີນທ່າວໄດ້ສະເໜີ 3 ຂໍ້ຄື: ຊຸກຍູ້ໃຫ້G20ຈາກກົນໄກຮັບມືກັບວິກິດການການເງິນສາກົນຢ່າງບັງເກີດຜົນຫັນເປັນເວທີຕົ້ນຕໍ່ທີ່ຊຸກຍູ້ການຮ່ວມມືເສດຖະກິດສາກົນ; ເລັ່ງລັດສ້າງລະບຽບການເງິນສາກົນໃໝ່ທີ່ຍຸດຕິທຳ ກວມລວມແລະມີລະບຽບການ, ຊຸກຍູ້ສ້າງລະບົບການເງິນສາກົນທີ່ເປີດປະຕູແລະເສລີ.
ເນື້ອໃນລະອຽດຄື: ຄວນກຳໂອກາດ, ຈັງຫວະແລະຄວາມແຮງທີ່ຈະເຊົາໃຊ້ນະໂຍບາຍກະຕຸ້ນເສດຖະກິດຢ່າງລະມັດລະວັງແລະໝັ້ນທ່ຽງ, ປັບປຸງໃຫ້ເສດຖະກິດໂລກຟື້ນຕົວ; ຄວນສ້າງລະບົບການເງິນສາກົນທີ່ມີຜົນດີຕໍ່ການພັດທະນາເສດຖະກິດຮູບປະທຳ; ຕ້ອງໃຊ້ການກະທຳຕົວຈິງເພື່ອຄັດຄ້ານລັດທິປົກປ້ອງຮູບການຕ່າງໆ, ລິເລີ່ມແລະສະໜັບສະໜູນການຄ້າເສລີຢ່າງເດັດດ່ຽວ; ປະເທດທີ່ພັດທະນາແລ້ວຄວນຖືທ່າທີທີ່ເປີດກວ້າງກວ່າເກົ່າເພື່ອຊຸກຍູ້ການພັດທະນາການຄ້າສາກົນ, ຢືນຢູ່ໃນຫຼັກການທີ່ຕ່າງຝ່າຍຕ່າງມີຜົນປະໂຫຍດແລະພັດທະນາຮ່ວມກັນ, ຍຶດໝັ້ນແກ້ໄຂຂໍ້ຂັດແຍ່ງການຄ້າຢ່າງເໝາະສົມໂດຍຜ່ານການເຈລະຈາກັນ.ໃນເວລາເວົ້າເຖິງການສືບຕໍ່ຊຸກຍູ້ການປະຕິຮູບອົງການການເງິນສາກົນ, ທ່ານຫູຈີນທ່າວກ່າວວ່າ, ຄວນເລັ່ງລັດສຳເລັດການປັບປຸງອັດຕາສ່ວນຂອງກອງທຶນເງິນຕາສາກົນ, ຊຸກຍູ້ໃຫ້ຜູ້ຊ່ຽວຊານຂອງປະເທດຕະຫຼາດໃໝ່ແລະປະເທດພວມພັດທະນາຫຼາຍກວ່າເກົ່າໄດ້ຂຶ້ນຮັບຕຳແໜ່ງເປັນຜູ້ຄຸມຄອງລະດັບສູງຂອງອົງການການເງິນສາກົນ, ຍົກສູງລັກສະນະຕົວແທນແລະສິດປະກອບຄຳເຫັນຂອງປະເທດພວມພັດທະນາ, ຄວນເພີ່ມທະວີຄວາມສາມາດການກໍ່ສ້າງແລະການປະຕິຮູບການຕິດຕາມຂອງກອງທຶນການເງິນສາກົນ, , ເພີ່ມທະວີການຕິດຕາມຕໍ່ນະໂຍບາຍເສດຖະກິດມະຫາພາກຂອງຝ່າຍຕ່າງໆໂດຍສະເພາະແມ່ນອົງກອນເສດຖະກິດຈຳໜ່າຍເງິນຕາສຳຮອງຕົ້ນຕໍ.
ທ່ານຫູຈີນທາວຍັງລົງເລິກສະເຫນີບັນຫາການພັດທະນາ.ທ່ານເຫັນວ່າ,ກຸ່ມ20ປະເທດຫຼືG20 ມີໜ້າທີ່ຮັບຜິດຊອບສະໜອງພະລັງແຮງດ້ານການເມືອງທີ່ແຂງແຮງກວ່າເກົ່າ,ຊັບພະຍາກອນດ້ານເສດຖະດິດຫຼາຍກວ່າເກົ່າແລະການຮັບປະກັນດ້ານລະບຽບ ການດີກວ່າເກົ່າເພື່ອແກ້ໄຂບັນຫາການພັດທະນາ.ຊັບພະຍາກອນຂອງອົງການການເງິນສາກົນ,ເຊັ່ນ:ທະນາຄານໂລກ,ອົງການກອງທຶນເງິນຕາສາກົນຫຼືIMFແລະອື່ນໆຄວນໃຊ້ເຂົ້າໃນການຊ່ວຍເຫຼືອປະເທດທີ່ພວມພັດທະນາ ໂດຍສະເພາະແມ່ນປະເທດດ້ອຍພັດທະນາທີ່ສຸດກ່ອນ. ປະເທດທີ່ພັດທະນາແລ້ວ ຄວນປະຕິບັດຕໍ່ຄຳໝັ້ນສັນຍາທີ່ຈະໃຫ້ການຊ່ວຍເຫຼືອແກ່ການພັດທະນານັ້ນຢ່າງແທ້ຈິງ,ເປີດຕະຫຼາດ,ຫຼຸດຫຼືຍົກເວັ້ນໜີ້ສິນ,ເພີ່ມການສະໜັບສະໜູນດ້ານທຶນຮອນແລະເຕັກນິກໃຫ້ແກ່ປະເທດທີ່ພວມພັດທະນາໃຫ້ຫຼາຍຂຶ້ນ,ຍົກສູງຄວາມສາມາດພັດທະນາໂດຍຕົນເອງຂອງປະເທດທີ່ພວມພັດທະນາ.
ນັບແຕ່ເກີດວິກິດການການເງິນສາກົນເປັນຕົ້ນມາ, ຈີນໄດ້ໃຫ້ການຊ່ອຍເຫຼືອແກ່ປະເທດທີ່ພວມພັດທະນາດ້ວຍວິ ທີແລະຊ່ອງທາງຕ່າງໆ,ເຊິ່ງມີທັງການເພີ່ມງົບປະມານ ຊ່ອຍເຫຼືອອີກ 50 ຕື້ໂດລາຕໍ່IMF, ແລະຮຽກຮ້ອງຢ່າງຈະແຈ້ງໃຫ້ຄວນໃຊ້ເງິນທຶນເຂົ້າໃນການຊ່ອຍເຫຼືອປະເທດດ້ອຍພັດທະນາທີ່ສຸດກ່ອນ; ໃຫ້ການສະຫນັບສະຫນູນດ້ານເງິນກູ້ສິນເຊື່ອ 15 ຕື້ໂດລາແກ່ປະເທດອາຊຽນ; ສະຫນອງເງິນກູ້ໃຫ້ຂໍ້ສະດວກພິເສດ 10 ຕື້ໂດລາໃຫ້ແກ່ປະເທດອາຟຼິກາແລະອື່ນໆ. ທ່ານຫູຈິນທ່າວຍັງໄດ້ຕາງໜ້າລັດຖະບານຈີນໃຫ້ຄຳໝັ້ນສັນຍາວ່າ,ຈີນຈະສືບຕໍ່ສະໜອງການຊ່ວຍເຫຼືອໃຫ້ແກ່ປະເທດທີ່ພວມພັດທະນາຕາມຄວາມສາມາດຂອງຕົນໃນຂອບການຮ່ວມມືໃຕ້-ໃຕ້,ເພື່ອພະຍາຍາມຊ່ວຍເຫຼືອປະເທດພວມພັດທະນາໃຫ້ບັນລຸການພັດທະນາ.
