ສອງຝັ່ງລົງນາມໃນສັນຍາຂອບການຮ່ວມມືດ້ານເສດຖະກິດ
(GMT+08:00) 2010-06-30 17:03:54 cri
ວັນທີ 29 ມິຖຸນານີ້,ການເຈລະຈາລະຫວ່າງຜູ່ນຳຂອງສະມາຄົມການພົວພັນສອງຝັ່ງຊ່ອງບແຄບຂອງແຜ່ນດິນໃຫຍ່ກັບສະມາຄົມມູນນິທິແລກປ່ຽນສອງຝັ່ງຊ່ອງແຄບໄຕ້ຫວັນເທື່ອທີ 5 ໄດ້ຈັດຂຶ້ນຢູ່ທີ່ນະຄອນຈຸ່ງກິ່ງ. ສອງຝ່າຍໄດ້ລົງນາມໃນ"ສັນຍາຂອບການຮ່ວມມືດ້ານເສດຖະກິດລະຫວ່າງສອງຝັ່ງຊ່ອງແຄບ"ຫຼືECFA ແລະ"ສັນຍາຮ່ວມມືການປົກປ້ອງສິດຊັບສິນທາງປັນຍາລະຫວ່າງສອງຝັ່ງຊອບແຄບ". ສອງຝ່າຍເປັນເອກະສັນກັນເຫັນວ່າ,ການລົງນາມໃນສັນຍາສອງສະບັບນີ້ຈະສ້າງຜົນສະທ້ອນອັນເລິກເຊິ່ງໃຫ້ແກ່ເສດຖະກິດການຄ້າລະຫວ່າງສອງຝັ່ງ,ແລະເປັນຂີດຫມາຍສະແດງໃຫ້ເຫັນວ່າ ການປຶກສາຫາລືກັນທີ່ລົງເລິກດ້ານເສດຖະກິດລະຫວ່າງສອງສະມາຄົມດັ່ງກ່າວໄດ້ກ້າວເຂົ້າສູ່ໄລຍະໃຫມ່.
"ສັນຍາຂອບການຮ່ວມມືດ້ານເສດຖະກິດລະຫວ່າງສອງຝັ່ງຊ່ອງແຄບ"ມີເນື້ອໃນ ວ່າ,ເພື່ອສົ່ງເສີມແລະເປີດກວ້າງປະສິດທິຜົນຂອງສັນຍາ,ສອງຝ່າຍຈະເພີ່ມທະວີການຮ່ວມມືດ້ານເສດຖະກິດ, ສະມາຄົມການພົວພັນສອງຝັ່ງຊ່ອງແຄບຂອງແຜ່ນດິນໃຫຍ່ແລະສະມາຄົມມູນນິທິແລກປ່ຽນສອງຝັ່ງຊ່ອງແຄບຈະປຶກສາຫາລືກັນກ່ຽວກັບແຜນການແລະເນື້ອໃນລະອຽດທີ່ກ່ຽວຂ້ອງໂດຍໄວ. ຂົງເຂດທີ່ຮ່ວມມືມີທັງການປົກປ້ອງແລະຮ່ວມມືດ້ານສິດຊັບສິນທາງປັນຍາແລະການຮ່ວມມືດ້ານການທະນາຄານ, ຊຸກຍູ້ການຄ້າແລະສ້າງຄວາມສະດວກໃຫ້ແກ່ການຄ້າ,ຮ່ວມມືດ່ານພາສີ,ການຄ້າດ້ານເອເລັກໂຕຼນິກແລະອື່ນໆ.ໂດຍອີງຕາມແຜນການຜົນເບື້ອງຕົ້ນຂອງສັນຍາ,ພາຍໃນ 6 ເດືອນຫຼັງຈາກສັນຍາສະບັບນີ້ໄດ້ມີຜົນບັງຄັບໃຊ້ແລ້ວ,ແຜ່ນດິນໃຫຍ່ຈະຫຼຸດພາສີຜະລິດຕະພັນຂອງໄຕ້ຫວັນ 539 ປະເພດ, ໄຕ້ຫວັນກໍ່ຈະຫຼຸດພາສີຕໍ່ຜະລິດຕະພັນຂອງແຜ່ນດິນໃຫຍ່ 267 ປະເພດ. ນອກນີ້,ຫຼັງຈາກສັນຍາມີຜົນບັງຄັບໃຊ້ແລ້ວ ແຜ່ນດິນໃຫຍ່ຍັງຈະເປີດປະຕູຕໍ່ 11 ຂະແຫນງການບໍລິການຂອງໄຕ້ຫວັນໃຫ້ກວ້າງກວ່າເກົ່າ,ສ່ວນໄຕ້ຫວັນຈະເປີດປະຕູຕໍ່ 9 ຂະແຫນງການບໍລິການຂອງແຜ່ນດິນໃຫຍ່ຕື່ມອີກ.
ທ່ານເສີນຢຸນຫຼິນ, ປະທານສະມາຄົມການພົວພັນສອງຝັ່ງຊ່ອງແຄບໄຕ້ຫວັນແຜ່ນດິນໃຫຍ່ໄດ້ຕີລາຄາຢ່າງຕັ້ງໜ້າຕໍ່ສັນຍາດັ່ງກ່າວວ່າ: "ການເຊັນສັນຍາດັ່ງກ່າວຈະຫຼຸດແລະກຳຈັດສິ່ງກີດຂວາງດ້ານການຄ້າແລະການລົງທຶນລະຫວ່າງສອງຝັ່ງເທື່ອລະກ້າວ, ສ້າງສະພາບແວດລ້ອມການຄ້າແລະການລົງທຶນທີ່ຍຸຕິທຳ; ເພີ່ມທະວີການພົວພັນດ້ານການຄ້າແລະການລົງທຶນລະຫວ່າງສອງຝ່າຍຕື່ມອີກ, ແລະສ້າງກົນໄກຮ່ວມມືທີ່ມີຜົນດີຕໍ່ຄວາມຈະເລີນແລະການພັດທະນາເສດຖະກິດຂອງສອງຝັ່ງ; ປະຕິບັດພາສີບູລິມະສິດຕໍ່ສິນຄ້າຈຳນວນໜຶ່ງຂອງສອງຝ່າຍ, ເປີດຕະຫຼາດບໍລິການຈຳນວນໜຶ່ງ, ເຮັດໃຫ້ພີ່ນ້ອງຮ່ວມຊາດຂອງສອງຝັ່ງໄດ້ຮັບຜົນປະໂຫຍດຈາກການຮ່ວມມືເສດຖະກິດລະຫວ່າງສອງຝັ່ງໂດຍໄວ. ນີ້ຈະຊຸກຍູ້ໃຫ້ເສດຖະກິດລະຫວ່າງສອງຝ່າຍພັດທະນາແລະຈະເລີນຮ່ວມກັນ, ແລະສາມາດສ້າງຜົນປະໂຫຍດຢ່າງແທ້ຈິງໃຫ້ແກ່ພີ່ນ້ອງຮ່ວມຊາດທັງສອງຝັ່ງ."ທ່ານຈ່ຽງປີງຄຸນ, ປະທານມູນນິທິແລກປ່ຽນສອງຝັ່ງຊ່ອງແຄບໄຕ້ຫວັນເຫັນວ່າ, ຄຽງຄູ່ກັບການເຊັນສັນຍາດັ່ງກ່າວແລະມີຜົນບັງຄັບໃຊ້, ການເຄື່ອນໄຫວເສດຖະກິດການຄ້າຂອງສອງຝັ່ງຈະມີສະພາບແວດລ້ອມທີ່ດີກວ່າເກົ່າແລະມີລະບຽບການ, ເຮັດໃຫ້ສອງຝັ່ງສາມາດໃຊ້ທ່າແຮງຂອງຕົນ, ເພື່ອຍົກສູງກຳລັງເສດຖະກິດແລະວາງແຜນໃນຕະຫຼາດສາກົນ.
ໃນມື້ດຽວກັນ,ສອງສະມາຄົມຍັງໄດ້ເຊັນ"ສັນຍາຮ່ວມມືປົກປ້ອງສິດຊັບສິນທາງປັນຍາສອງຝັ່ງຊ່ອງແຄບ".ນັບແຕ່ສອງສະມາຄົມຟື້ນຟູການປຶກສາຫາລືທີ່ເປັນປົກກະຕິເປັນ ຕົ້ນມາ,ສອງຝ່າຍໄດ້ເຊັນສັນຍາ12ສະບັບ,ບັນລຸຄວາມເຫັນທີ່ເປັນເອກະສັນກັນທີ່ສຳຄັນ 2ຂໍ້.ທ່ານເຊິນຢຸນລີນ,ປະທານສະມາຄົມການພົວພັນສອງຝັ່ງຊ່ອງແຄບຂອງແຜ່ນດິນ ໃຫຍ່ກ່າວວ່າ,ຫົວຂໍ້ທີ່ສອງສະມາຄົມປຶກສາຫາລືນັ້ນຈາກຕື້ນຮອດເລິກ,ຂົງເຂດຈາກແຄບຮອດກວ້າງ,ເນື້ອໃນຈາກງ່າຍຮອດສັບສົນ,ໄດ້ສ້າງຜົນປະໂຫຍດນັບມື້ນັບຫຼາຍໃຫ້ແກ່ພີ່ນ້ອງຮ່ວມ ຊາດສອງຝັ່ງ,ເສດຖະກິດແລະຊີວິດການເປັນຢູ່ຂອງປະຊາຊົນໄດ້ຮັບຜົນປະໂຫຍດນັບມື້ນັບກວ້າງຂວາງກວ່າເກົ່າ.
ທ່ານຈ່ຽງປີງຄຸ່ນ,ປະທານຂອງສະມາຄົມມູນນິທິແລກປ່ຽນສອງຝັ່ງຊ່ອງແຄບໄຕ້ຫວັນກ່າວວ່າ,ສອງຝັ່ງໃຊ້ການປຶກສາຫາລືທີ່ເປັນລະບຽບການເຮັດໃຫ້ການຂະຫຍາຍຕົວຂອງການພົວພັນສອງຝັ່ງໝັ້ນຄົງກວ່າເກົ່າ,ສະພາບການທີ່ມີສັນຕິພາບແລະສະຖຽນລະພາບລະຫວ່າງສອງຝັ່ງຊ່ອງແຄບໄຕ້ຫວັນນັ້ນແມ່ນດີແບບບໍ່ເຄີຍມີມາກ່ອນ.
"ດຽວນີ້ແມ່ນໂອກາດທີ່ເປັນຂໍກະແຈໃນການຂະຫຍາຍຕົວຍາວໄກຂອງການພົວພັນສອງຝັ່ງ,ພວກເຮົາຕ້ອງກຳໂອກາດໃຫ້ດີ,ປະຕິບັດການຮ່ວມມື,ພ້ອມກັນທຳຄວາມ ພະຍາຍາມຮ່ວມກັນ,ສະສົມຄວາມໄວ້ເນື້ອເຊື່ອໃນກັນ,ສ້າງພື້ນຖານອັນໝັ້ນໜຽວກວ່າເກົ່າເພື່ອເຮັດໃຫ້ສອງຝັ່ງຕ່າງຝ່າຍຕ່າງມີຜົນປະໂຫຍດ,ແລະມີສັນຕິພາບສະຖຽນລະພາບ,ເຮັດໃຫ້ຊ່ອງແຄບໄຕ້ຫວັນສາມາດຮັກສາສັນຕິພາບໄດ້ຢ່າງຖາວອນ."
