ເງິນສະຫນັບສະຫນູນໄດ້ສ້າງບັນຫາໃຫ້ພັກປະຊາທິປັດ, ລັດຖະບານອະພິສິດປະສົບກັບວິກິດການອີກ
(GMT+08:00) 2010-07-14 15:50:18 cri
ຕາມຂ່າວ cri:ລັດຖະບານໄທທີ່ນຳໂດຍທ່ານອະພິສິດ ເວດຊາຊີວະທີ່ຫາກໍ່ຫລຸດພົ້ນອອກຈາກການປະທ້ວງຕ້ານລັດຖະບານຂອງກຸ່ມເສື້ອແດງນັ້ນໄດ້ປະສົບກັບວິກິດການໃນດ້ານການປົກຄອງອີກເທື່ອຫນຶ່ງ.ວັນທີ 13 ກໍລະກົດນີ້,ຫນ່ວຍງານອະທິໄອຍະການຂອງໄທໄດ້ຮ້ອງຂໍຕໍ່ສານລັດຖະທຳມະນູນ,ຮຽກຮ້ອງໃຫ້ຍຸບພັກປະຊາທິປັດທີ່ກຳອຳນາດ,ແລະຫ້າມບໍ່ໃຫ້ຫົວຫນ້າແລະກຳມະ ຂອງພັກນີ້ເຂົ້າຮ່ວມການເມືອງພາຍໃນ 5 ປີ.ຂໍ້ກ່າວຫາກ່ຽວກັບເງິນສະຫນັບສະຫນູນການເມືອງທີ່ຜິດຕໍ່ກົດຫມາຍການເລືອກຕັ້ງເທື່ອນີ້ໄດ້ເຮັດໃຫ້ສະຖານະການການເມືອງໄທມີຄວາມບໍ່ແນ່ນອນອີກ, ລັດຖະບານອະທິສິດຈະຜ່ານຜ່າຄວາມຫຍຸ້ງຍາກເທື່ອນີ້ໄດ້ຫລືບໍ່ແມ່ນເລື່ອງທີ່ຢູ່ໃນຄວາມສົນໃຈຂອງຝ່າຍຕ່າງໆ.
ວັນທີ 13 ກໍລະກົດນີ້, ອະທິໄອຍະການຂອງໄທໄດ້ເຊັນຄຳສັ່ງສະບັບຫນຶ່ງ,ແລ້ວຍື່ນຕໍ່ສານລັດຖະທຳມະນູນດ້ວຍຂໍ້ຫາທີ່ວ່າພັກປະຊາທິປັດຮັບເອົາເງິນສະຫນັບສະຫນູນຈາກວິສາຫະກິດຢ່າງຜິດກົດຫມາຍ, ເຊິ່ງແມ່ນເຈົ້າຫນ້າທີ່ໄອຍະການອາວຸໂສ 5 ທ່ານພ້ອມກັນນຳສະເຫນີ.ອີງຕາມຂໍ້ກ່າວຫາ, ປີ 2005, ພັກປະຊາທິປັດທີ່ເປັນພັກຝ່າຍຄ້ານໃນເວລານັ້ນຖືກສົງໃສວ່າຮັບເອົາເງິນສະຫນັບສະຫນູນທີ່ມີມູນຄ່າ 258 ລ້ານບາດ,ເຊິ່ງເທົ່າກັບ 7 ລ້ານ 9 ແສນ 7 ຫມື່ນໂດລາຈາກບໍລິສັດທີ່ຂາຍຫຸ້ນໃນຕະຫລາດຫຸ້ນແຫ່ງຫນຶ່ງ.ແຕ່ອີງຕາມກົດຫມາຍຂອງໄທ, ພັກການເມືອງທີ່ຮັບເອົາເງິນສະຫນັບສະຫນູນໃນແຕ່ລະປີ,ເທື່ອຫນຶ່ງບໍ່ໃຫ້ກາຍ 10 ລ້ານບາດ.
ຖ້າສານລັດຖະທຳມະນູນຕັດສິນໃຫ້ຍຸບພັກປະຊາທິປັດ,ກໍ່ຫມາຍເຖິງວ່າລັດຖະບານປະສົມທີ່ມີ 6 ພັກການເມືອງໃນປັດຈຸບັນນັ້ນຕ້ອງຫມົດອຳນາດ. ພ້ອມກັນນັ້ນ, ອີງຕາມກົດຫມາຍວ່າດ້ວຍພັກການເມືອງທີ່ປະຕິບັດຢູ່ໄທປັດຈຸບັນ, ຖ້າຫາກວ່າພັກປະຊາທິປັດຖືກຕັດສິນຍຸບພັກ, ຫົວຫນ້າພັກ ແລະກຳມະການຂອງພັກຈະບໍ່ໄດ້ເຂົ້າຮ່ວມການເລືອກຕັ້ງໃດໆພາຍໃນ 5 ປີຂ້າງຫນ້ານີ້,ແລະບໍ່ໃຫ້ສ້າງພັກການເມືອງໃຫມ່ຫລືດຳລົງຕຳແຫນ່ງໃນພັກການເມືອງອື່ນໆ.ຍ້ອນທ່ານອະພິສິດ ເວດຊາຊີວະ,ນາຍົກລັດ ຖະມົນຕີໄທໄດ້ດຳລົງຕຳແຫນ່ງຮອງຫົວຫນ້າພັກປະຊາທິປັດໃນປີ 2004,ແລະເປັນຫົວຫນ້າພັກໃນເດືອນມີນາປີ 2005,ທ່ານກໍ່ແມ່ນນັກການເມືອງຜູ່ຫນຶ່ງທີ່ອາດຈະຖືກລົງໂທດຫ້າມບໍ່ໃຫ້ດຳເນີນວຽກງານການເມືອງໃນ 5 ປີຕໍ່ຫນ້າ.
ພັກກຳອຳນາດທີ່ຖືກສານລັດຖະທຳມະນູນຕັດສິນຍຸບພັກຈົນເຮັດໃຫ້ລັດຖະບານຫລົ້ມນັ້ນຢູ່ໄທກໍ່ບໍ່ແມ່ນເລື່ອງແປກຫຍັງ.ເພາະວ່າໃນເດືອນທັນວາປີ 2008, ສານລັດຖະທຳມະນູນເຄີຍຖືການສໍ້ໂກງໃນການເລືອກຕັ້ງເປັນຂໍ້ອ້າງແລ້ວຕັດສິນໃຫ້ຍຸບສາມພັກການເມືອງຄື ພັກພະລັງປະຊາຊົນທີ່ກຳອຳນາດໃນເວລານັ້ນແລະພັກອື່ນອີກສອງພັກ, ອັນໄດ້ປູທາງໃຫ້ແກ່ລັດຖະບານປະສົມທີ່ນຳພາໂດຍພັກປະຊາທິປັດ,ພ້ອມກັນນັ້ນ, ນັກການເມືອງຫລາຍຄົນກໍ່ຈຳເປັນຕ້ອງຖອນຕົວອອກຈາກເວທີການເມືອງ.
ນອກນີ້, ພັກປະຊາທິປັດຍັງຖືກສົງໃສວ່າໄດ້ໃຊ້ກອງທຶນພັດທະນາພັກກາເນມືອງທີ່ມີມູນຄ່າ 29 ລ້ານບາດຫລືເທົ່າກັບ 9 ແສນໂດລາໃນປີ 2005,ອັນໄດ້ລະເມີດຂໍ້ກຳນົດທີ່ກ່ຽວກັບພັກການເມືອງໃນລັດຖະທຳມະນູນ.ຄະດີນີ້ກໍ່ຈະເຮັດໃຫ້ພັກປະຊາທິປັດປະເຊີນກັບການຖືກຍຸບພັກແລະກຳມະການພັກຈະຖືກຫ້າມເຂົ້າຮ່ວມການເມືອງເປັນເວລາ 5 ປີ.
ພັກປະຊາທິປັດທີ່ສ້າງຕັ້ງຂຶ້ນນັບແຕ່ປີ 1946 ແມ່ນພັກການເມືອງທີ່ເກົ່າແກ່ຂອງໄທ,ເຖິງວ່າແຕ່ກ່ອນກໍ່ເຄີຍປະສົບກັບວິກິດການທີ່ຈະຖືກຍຸບພັກກໍ່ຕາມ, ແຕ່ລ້ວນແຕ່ຜ່ານຜ່າມາໄດ້. ພັກປະຊາທິປັດຈະຕັ້ງທະນາຍ ຄວາມຂອງພັກໃຫ້ເຂັ້ມແຂງກວ່າເກົ່າອີກ, ເພື່ອຮັບມືແກ້ໄຂຄະດີການເມືອງທີ່ກະທົບເຖິງຄວາມຢູ່ລອດຂອງພັກ.ຫວ່າງມໍ່ໆມານີ້,ທ່ານຊວນຫລີກໄພ,ອະດີດນາຍົກລັດຖະມົນຕີ, ທີປຶກສາຂອງພັກປະຊາທິປັດໄດ້ກ່າວຢ່າງເປີດເຜີຍວ່າ,ຈະເຊື່ອຫມັ້ນນຳຄວາມເປັນກາງຂອງສານ,ພັກປະຊາທິປັດຈະຍອມຮັບເອົາການຕັດສິນຂອງສານ.
ແຕ່ວ່າ, ຍ້ອນສານລັດຖະທຳມະນູນໄທສືບສວນຄະດີການເມືອງບໍ່ມີເວລາກຳນົດ,ສອງຄະດີດັ່ງກ່າວທີ່ແນໃສ່ພັກປະຊາທິປັດນັ້ນ,ບໍ່ວ່າແມ່ນຄະດີເງິນສະຫນັບສະຫນູນການເມືອງຢ່າງຜິດກົດມຫາຍຫລືຄະດີໃຊ້ກອງທຶນພັດທະນາພັກການເມືອງ,ຈະຕັດສິນສຸດທ້າຍໃນຍາມໃດນັ້ນຍັງບໍ່ຮູ້ເທື່ອ.ນັກວິເຄາະເຫັນວ່າ,ຖ້າຂະບວນການສືບສວນແກ່ຍາວໄປ,ກໍ່ຈະບໍ່ກະທົບເຖິງລັດຖະບານອະພິສິດສືບຕໍ່ກຳອຳນາດໄປຈົນຫມົດວາລະຂອງລັດຖະບານຊຸດນີ້ໃນທ້າຍປີຫນ້າ.ຖ້າຄະດີດັ່ງກ່າວຈະຖືກຕັດສິນພາຍໃນຫລາຍເດືອນ,ແຕ່ຜົນການຕັດສິນພຽງແຕ່ແມ່ນຍຸບພັກປະຊາທິປັດ, ແຕ່ບໍ່ລົງໂທດຫົວຫນ້າພັກແລະກຳມະການ ພັກແລ້ວ, ລັດຖະບານອະພິສິດກໍ່ອາດຈະຜ່ານຜ່າຄວາມຫຍຸ້ງຍາກໄປໄດ້.ແຕ່ຜົນກະທົບທີ່ຮ້າຍແຮງທີ່ສຸດແມ່ນ:ສະມາຊິກພັກປະຊາທິປັດຜູ່ສຳຄັນເຊັ່ນທ່ານອະພິສິດແລະທ່ານອື່ນໆຈະຖຶກຕັດສິນຫ້າມບໍ່ໃຫ້ເຂົ້າຮ່ວມການເມືອງ 5 ປີ, ເມື່ອເປັນແນວນັ້ນ, ກໍ່ອາດຈະຈັດການເລືອກຕັ້ງກ່ອນເວລາກຳນົດຫລືພັກຝ່າຍຄ້ານຂຶ້ນກຳອຳນາດກໍ່ອາດມີຄວາມເປັນໄປໄດ້ເຊັ່ນກັນ.
