ວັນທີ 23 ກໍລະກົດນີ້,ໃນກອງປະຊຸມລັດຖະມົນຕີການຕ່າງປະເທດຂອງເວທີປຶກສາຫາລືດ້ານການເມືອງແລະຄວາມຫມັ້ນຄົງໃນພາກພື້ນອາຊຽນຫລື ARF ທີ່ຈັດຂຶ້ນຢູ່ນະຄອນຫລວງຮາໂນຍຂອງຫວຽດນາມ,ນາງຮີວຣາລີ ຄຼິນຕັນ,ລັດຖະມົນຕີວ່າການກະຊວງການຕ່າງປະເທດອາເມລິກາໄດ້ແຊກແຊງການແກ້ໄຂຄວາມຂັດແຍ່ງກັນໃນທະເລຈີນໃຕ້ຢ່າງບັງອາດ.ວັນທີ 25 ກໍລະກົດນີ້,ແວັບໄຊກະຊວງການຕ່າງປະເທດຈີນໄດ້ລົງພິມບົດຄວາມໃນຫົວຂໍ້ວ່າ: ທ່ານຢາງເຈຊື,ລັດຖະມົນຕີວ່າການກະຊວງການຕ່າງປະເທດຈີນກ່າວຕີໂຕ້ທັດສະນະທີ່ໄຮ້ເຫດຜົນໃນບັນຫາທະເລຈີນໃຕ້,ໄດ້ບັນຍາຍຫລັກຫມັ້ນແລະຄວາມເຫັນຂອງຈີນໃນບັນຫາທະເລຈີນໃຕ້.ທັດສະນະທີ່ລະຫວ່າງຈີນກັບອາເມລິກາໃນບັນຫາທະເລຈີນໃຕ້ເຮັດໃຫ້ທົ່ວໂລກສົນໃຈນຳ.ນັກວິຊາການທີ່ກ່ຽວຂ້ອງກ່າວວ່າ, ອາເມລິກາແຊກແຊງບັນຫາທະເລຈີນໃຕ້,ມີແຕ່ຈະເຮັດໃຫ້ບັນຫານີ້ສັບສົນຂຶ້ນ,ບໍ່ມີຜົນດີຕໍ່ການແກ້ໄຂບັນຫາ.
ວັນທີ 23 ກໍລະກົດນີ້,ນາງຮີວລາຣີ ຄຼິນຕັນ, ລັດຖະມົນຕີວ່າການກະຊວງການຕ່າງປະເທດອາເມລິກາກ່າວໃນເວທີປຶກສາຫາລືຫລື ARF ວ່າ, ອາເມລິກາສົນໃຈນຳຄວາມຂັດແຍ່ງໃນຫມູ່ເກາະນານຊາແລະຫມູ່ເກາະຊີຊາ,ການແກ້ໄຂຂໍ້ຂັດແຍ່ງດັ່ງກ່າວກຽວພັນກັບຜົນປະໂຫຍດແຫ່ງຊາດຂອງອາເມລິກາ, ອາເມລິກາສະຫນັບສະຫນູນໃຫ້ປະເທດຕ່າງໆທີ່ມີຄວາມຮຽກຮ້ອງຕ້ອງການໃນດ້ານອະທິປະໄຕນັ້ນຮ່ວມມືກັນແລະປຶກສາຫາລືກັນ,ຄັດຄ້ານປະເທດໃດກໍ່ຕາມນຳໃຊ້ຫລືຂົ່ມຂູ່ດ້ວຍກຳລັງອາວຸດ.ນາງຮີວລະຣີສະເຫນີໃຫ້ສ້າງກົນໄກສາກົນກ່ຽວກັບການແກ້ໄຂບັນ ຫາທະເລຈີນໃຕ້.
ທ່ານນິວຊິ່ນຊຸນ,ຮອງຫົວຫນ້າສະຖາບັນອາເມລິກາຂອງສະພາບັນດິດຄົ້ນຄວ້າການພົວພັນລະຫວ່າງຊາດສະໄຫມໃຫມ່ຂອງຈີນເຫັນວ່າ, ແຕ່ຕົ້ນປີນີ້ມາ,ການພົວພັນທາງການທະຫານແລະຄວາມຫມັ້ນຄົງລະຫວ່າງຈີນອາເມລິກາແມ່ນໄດ້ຂະຫຍາຍໄປສູ່ທາງທີ່ບໍ່ດີເລື້ອຍໆ, ສ່ວນການສະແດງທ່າທີຂອງນາງຄຼິນຕັນກ່ຽວກັບບັນຫາທະເລຈີນໃຕ້ເທື່ອນີ້ກໍ່ເຮັດໃຫ້ການພົວພັນດ້ານນີ້ລົງສູ່ລະດັບຕ່ຳສຸດ.ທ່ານກ່າວວ່າ:
ການສະເຫນີບັນຫາທະເລຈີນໃຕ້ອອກມາ,ອາເມລິກາແມ່ນຖືເອົາການຂົ່ມຂູ່ໃນອະນາຄົດໃນຄວາມຄາດຄິດຂອງຕົນເອງນັ້ນເປັນການຂົ່ມຂູ່ໃນສະພາບຕົວຈິງ,ນາງຮີວລາຣີກ່າວວ່າ,ອາເມລິກາຈະປົກປັກຮັກສາເສລີພາບຂອງການເດີນທະເລຢູ່ທະເລຈີນໃຕ້,ຄັດຄ້ານປະເທດໃດກໍ່ຕາມໃຊ້ຫລືຂົ່ມຂູ່ດ້ວຍກຳລັງອາວຸດມາແກ້ໄຂບັນຫາທະເລຈີນໃຕ້,ທີ່ຈິງແລ້ວບັນຫາເຫລົ່ານີ້ບໍ່ມີເລີຍ,ດຽວນີ້,ເສລີພາບຂອງທະເລຈີນໃຕ້ບໍ່ໄດ້ຖືກຂົ່ມຂູ່ຫຍັງ,ແລະກໍ່ບໍ່ມີປະເທດໃດກ່າວວ່າຈະແກ້ໄຂບັນຫາດ້ວຍກຳລັງອາວຸດ,ອາເມລິກາພຽງແຕ່ເປັນຫ່ວງວ່າຈີນນັບມື້ນັບເຂັ້ມແຂງຂຶ້ນ, ການພັດທະນາການທະຫານໄປສູ່ທັນສະໄຫມຂອງຈີນນັບມື້ນັບໄວຂຶ້ນ, ອາເມລິກາເປັນຫ່ວງວ່າຈະເກີດບັນຫາເຫລົ່ານີ້ໃນຕໍ່ຫນ້າ.
ທີ່ຈິງແລ້ວ,ຫຼັກການຕະຫຼອດມາຂອງລັດຖະບານຈີນທີ່"ແກ້ໄຂຄວາມຂັດແຍ່ງສາກົນດ້ວຍການເຈລະຈາແບບສັນຕິ"ແມ່ນສອດຄ່ອງກັບໝູ່ເກາະນານຊ່າເຊັ່ນດຽວກັນ.ກ່ຽວກັບບັນ ຫາທະເລຈີນໃຕ້,ລັດຖະບານຈີນມີຈຸດຢືນທີ່ວ່າ"ວາງຄວາມຂັດແຍ່ງກ່ອນເພື່ອຮ່ວມກັນພັດທະນາ".ຫຼາຍປີມານີ້,ຈີນກັບປະເທດທີ່ກ່ຽວຂ້ອງໄດ້ປຶກສາຫາລືກັນຫຼາຍເທື່ອ,ແລະແລກປ່ຽນຄວາມເຫັນກ່ຽວກັບບັນຫາທະເລຈີນໃຕ້,ເຊິ່ງໄດ້ບັນລຸຄວາມເຫັນທີ່ເປັນເອກະສັນກັນຢ່າງກວ້າງຂວາງ.ກົນໄກປຶກສາຫາລືກັນລະຫວ່າງຈີນ-ຟິລິບປິນ,ຈີນ-ຫວຽດນາມແລະຈີນ-ມະເລເຊຍພວມໝູນເດີນຢ່າງບັງເກີດຜົນ,ການເຈລະຈາເຫຼົ່ານີ້ໄດ້ຮັບຄວາມຄືບໜ້າໃນລະດັບຕ່າງກັນ.ໃນການປຶກສາຫາລືລະຫວ່າງເຈົ້າໜ້າທີ່ຂັ້ນສູງຂອງຈີນ-ອາຊຽນແລະການເຈລະຈາຈີນ-ອາຊຽນ,ສອງຝ່າຍໄດ້ແລກປ່ຽນຄວາມເຫັນຢ່າງຈິງໃຈກ່ຽວກັບບັນຫາທະເລຈີນໃຕ້,ເປັນເອກະສັນກັນເຫັນດີສະແຫວງຫາວິທີແກ້ໄຂອັນເໝາະສົມດ້ວຍສັນຕິວິທີແລະການປຶກສາຫາລືແບບໄມຕີຈິດມິດຕະພາບ.
ທ່ານນິວຊິ່ນຊຸ່ນກ່າວວ່າ,ບັນຫາທະເລຈີນໃຕ້ແມ່ນບັນຫາລະຫວ່າງຈີນກັບປະເທດທີ່ກ່ຽວ ຂ້ອງ.ການແຊກແຊງຈາກກຳລັງພາຍນອກແມ່ນຮັບເອົາບໍ່ໄດ້,ມີແຕ່ຈະເຮັດໃຫ້ສະພາບການແຮ່ງສັບສົນຂຶ້ນຕື່ມເທົ່ານັ້ນ.
"ອາເມລິກາຢາກເຮັດໃຫ້ບັນຫາເລຈີນໃຕ້ຫັນເປັນບັນຫາສາກົນ, ຄືພະຍາຍາມເຮັດໃຫ້ຂໍ້ຂັດແຍ່ງລະຫວ່າງຈີນກັບບາງປະເທດອາຊຽນກາຍເປັນຂໍ້ຂັດແຍ່ງລະຫວ່າງຈີນກັບອາຊຽນ, ແລ້ວຫັນເປັນຂໍ້ຂັດແຍ່ງລະຫວ່າງຈີນກັບອາເມລິກາ. ຖ້າເຮັດແບບນີ້ບໍ່ມີຜົນດີຕໍ່ການແກ້ໄຂບັນຫາເລີຍ. ເທື່ອນີ້ໄດ້ສະແດງໃຫ້ເຫັນຄວາມອວດອົ່ງທະນົງຕົວແລະທ່າທີທີ່ເປັນປະເທດຈັກກະພັດຂອງອາເມລິກາ, ອາເມລິກາເຫັນວ່າມີແຕ່ອາເມລິກາເຂົ້າຮ່ວມແລະວາງມາດຕະຖານຕໍ່ບັນຫາເຫຼົ່ານີ້ຈິ່ງຈະບໍ່ຢູ່ນອກການຄວບຄຸມ. ແຕ່ວ່າປະຈຸບັນອາເມລິກາໄດ້ເຂົ້າຮ່ວມຫຼາຍບັນຫາແລ້ວ, ແຕ່ບັນຫາເຫຼົ່ານີ້ກໍ່ບໍ່ໄດ້ຮັບການແກ້ໄຂຄືເກົ່າ".
ຫວ່າງມໍ່ໆມານີ້, ນອກຈາກເຂົ້າແຊກບັນຫາທະເລຈີນໃຕ້ໂດຍກົງຢູ່ອາຊີແລ້ວ, ອາເມລິກາຍັງຈັດການຊ້ອມຮົບປະສົມກັບສ.ເກົາຫຼີຢູ່ທະເລຍີ່ປຸ່ນ, ໃນອະນາຄົດຍັງຈະຈັດການຊ້ອມຮົມຢູ່ທະເລຫວງໄຫທີ່ຢູ່ໃກ້ນ່ານທະເລຂອງຈີນ. ນັກວິເຄາະເຫັນວ່າ, ອາເມລິກາໄດ້ສະແດງທ່າທີທີ່ສະກັດກັ້ນຈີນໂດຍຜ່ານການຊ້ອມຮົບແລະນະໂຍບາຍໃໝ່ຕໍ່ບັນຫາທະເລຈີນໃຕ້ນີ້, ສະແດງໃຫ້ເຫັນວ່າໃຈກາງ ຍຸດທະສາດຂອງອາເມລິກາພວມຍ້າຍໄປສູ່ມະຫາສະໝຸດປາຊີຟິກ.
