ງານໂອລິມປິກຊາວໜຸ່ມລະດູຮ້ອນຄັ້ງທຳອິດຈັດຂຶ້ນຢູ່ສິງກະໂປ
(GMT+08:00) 2010-08-15 17:16:47 cri
ຕາມຂ່າວCRI: ວັນທີ14ສິງຫານີ້, ງານໂອລິມປິກຊາວໜຸ່ມລະດູຮ້ອນຄັ້ງທຳອິດໄດ້ຈັດຂຶ້ນຢ່າງຄຶກຄື້ນຢູ່ອ່າວມາລີນາຂອງສິງກະໂປ.
ໃນພິທີເປີດສາກ, ທ່ານຈັກກີ ຣົກເກີປະທານຄະນະກຳມະການໂອລິມປິກສາກົນກ່າວວ່າ, ງານໂອລິມປິກຊາວໜຸ່ມໄດ້ເປີດໜ້າໃໝ່ດ້ານປະຫວັດສາດຂອງກິລາໂອລິມປິກ. ທ່ານກ່າວວ່າ, "ນັບແຕ່ຂະນະນີ້ເປັນຕົ້ນໄປ, ຊາວໜຸ່ມທົ່ວໂລກຈະມີໂອກາດເຂົ້າຮ່ວມງານມະຫະກຳທົ່ວໂລກທີ່ໂຮມສູນການກິລາ, ການສຶກສາແລະວັດທະນະທຳເຂົ້າເປັນອັນໜຶ່ງອັນດຽວກັນ".
ທ່ານສ.ຣ.ນາດານປະທານາທິບໍດີສິງກະໂປໄດ້ເຂົ້າຮ່ວມພິທີໄຂງານໃນມື້ດຽວກັນ, ແລະປະກາດວ່າງານໂອລິມປິກຊາວໜຸ່ມເທື່ອນີ້ໄຂຂຶ້ນ.
ງານໂອລິມປິກຊາວໜຸ່ມລະດູຮ້ອນເທື່ອນີ້ຈະດຳເນີນເປັນເວລາ13ມື້, ຈະອັດລົງໃນວັນທີ26ສິງຫານີ້. ງານມະຫະກຳຄັ້ງນີ້ມີລາຍການແຂ່ງຂັນໃຫຍ່26ລາຍການ, ມີນັກກິລາ3000ກວ່າຄົນທີ່ມາຈາກ205ປະເທດແລະເຂດແຄ້ວນມາເຂົ້າຮ່ວມ. ຈີນໄດ້ສົ່ງນັກກິລາ68ຄົນໄປເຂົ້າຮ່ວມ19ລາຍການແຂ່ງຂັນແລະກິດຈະກຳວັດທະນະທໍາການສຶກສາທີ່ຄະນະກຳມະການອົງການຈັດຕັ້ງໄດ້ຈັດວາງ.
ງານໂອລິມປິກຊາວໜຸ່ມແມ່ນສ້າງຕັ້ງຂຶ້ນໂດຍຄະນະກຳມະການໂອລິມ ປິກສາກົນໃນປີ2007, ເປັນງານກິລາແບບສັງລວມທີ່ມີຈຸດປະສົງເພື່ອໃຫ້ການສຶກສາດ້ານຄຸນຄ່າໂອລິມປິກແກ່ຊາວໜຸ່ມ, ອາຍຸຂອງນັກກິລາທີ່ສາມາດເຂົ້າຮ່ວມການແຂ່ງຂັນແມ່ນ14ປີຫາ18ປີ.
ຖ້າທຽບກັບງານໂອລິມປິກແບບມູນເຊື້ອ, ງານໂອລິມປິກຊາວໜຸ່ມເອົາໃຈໃສ່ສົ່ງເສີມບົດບາດຂອງກິລາໃນດ້ານວັດທະນະທຳການສຶກສາແກ່ຊາວໜຸ່ມ. ໃນໄລຍະການແຂ່ງຂັນ, ອົງການຈັດຕັ້ງໄດ້ຈັດວາງກິດຈະກຳດ້ານວັດທະນະທຳການສຶກສາທີ່ມີຫຫຼາຍສີຫຫຼາຍສັນຢ່າງຫຼວງຫຼາຍແກ່ນັກກິລາຊາວໜຸ່ມທີ່ມາເຂົ້າຮ່ວມການແຂ່ງຂັນ, ນີ້ກໍ່ຈະກາຍເປັນສິ່ງທີ່ໜ້າສົນໃຈຂອງງານກິລາໃໝ່ລາຍນີ້.
