ຕອນກາງຄືນວັນທີ23ສິງຫານີ້,ເຫດການຈີ້ນັກທ່ອງທ່ຽວຮົງກົງຢູ່ນະຄອນຫຼວງມານີລາຂອງຟິລິບປິນໄດ້ສິ້ນສຸດລົງດ້ວຍຜົນທີ່ຜູ້ຈີ້ຖືກຕຳຫຼວດຍິງຕາຍ, ຕົວປະກັນຢູ່ເທິງລົດໂດຍສານມີ8ຄົນເສຍຊີວິດ, 2ຄົນບາດເຈັບສາຫັດ.
ເວລາ9ໂມງຂອງວັນທີ23ສິງຫານີ້, ລົດນຳທ່ຽວຂອງບໍລິສັດທ່ອງທ່ຽວຄ່າງໄທ້ຮົງກົງຖືກຈີ້ຢູ່ນະຄອນຫຼວງມານີລາຂອງຟິລິບປິນ, ຢູ່ເທິງລົດມີຜູ້ໂດຍສານ25ຄົນ, ໃນນັ້ນ21ຄົນແມ່ນນັກທ່ອງທ່ຽວຈາກຮົງກົງຈີນ. ຜູ້ຈີ້ເຄີຍເປັນຕຳຫຼວດຂອງຟິລິບປິນ, ໃນເດືອນມັງກອນປີນີ້ໄດ້ຖືກປົດອອກຈາກຕຳແໜ່ງຍ້ອນຂໍ້ຫາຂົ່ມຂູ່ເອົາເງິນ. ເຂົາຈີ້ລົດນຳທ່ຽວເທື່ອນີ້ແມ່ນເພື່ອຕໍ່ລອງກັບລັດຖະບານຟິລິບປິນ. ຕອນບ່າຍມື້ດຽວັນ, ຜູ້ຈີ້ໄດ້ປ່ອຍຕົວປະກັນ9ຄົນ. ຈາກນັ້ນຜູ້ຂັບລົດກໍ່ໄດ້ລັກໜີໄປ, ຢູ່ເທິງລົດເຫຼືອແຕ່ຕົວປະກັນ15ຄົນ.
ຫຼັງຈາກເຫດການດັ່ງກ່າວເກີດຂຶ້ນແລ້ວ, ທ່ານເບນິກໂນ ອາຄີໂນທີສາມ, ປະທານາທິບໍດີຟິລິບປິນຮຽກຮ້ອງໃຫ້ຜູ້ຈີ້ເຄົາລົບຊີວິດຂອງຕົວປະກັນ.
ວັນທີ23ສິງຫານີ້, ນາງຈ່ຽງອີ, ໂຄສົກກະຊວງການຕ່າງປະເທດຈີນກ່າວວ່າ, ລັດຖະບານຈີນໃຫ້ຄວາມສຳຄັນໃນລະດັບສູງຕໍ່ເຫດການທີ່ນັກທ່ອງທ່ຽວຮົງກົງຖືກຈີ້ຢູ່ຟິລິບປິນ, ໄດ້ຮຽກຮ້ອງໃຫ້ຟິລິບປິນກອບກູ້ຊ່ວຍເຫຼືອຢ່າງຕັ້ງໜ້າບົນພື້ນຖານທີ່ຮັບປະກັນຄວາມປອດໄພຂອງຕົວປະກັນ. ນາງຈ່ຽງອີກ່າວວ່າ, ເມື່ອເບິ່ງຈາກຂໍ້ມູນໃນປະຈຸບັນແລ້ວເຫັນວ່າ, ນີ້ແມ່ນເຫດການຈີ້ແບບບັງເອີນ, ບໍ່ແມ່ນຕັ້ງແນໃສ່ທຳຮ້າຍຄົນຈີນ. ນາງຈ່ຽງອີກ່າວວ່າ, ກະຊວງການຕ່າງປະເທດຈີນແລະສະຖານທູດຈີນປະຈຳຟິລິບປິນຕ່າງກໍ່ໄດ້ຕໍ່ວ່າທັກທ້ວງຢ່າງຮີບດ່ວນຕໍ່ສະຖານທູດຟິລິບປິນປະຈຳຈີນແລະພາກສ່ວນທີ່ກ່ຽວຂ້ອງຂອງຟິລິບປິນ, ພະຍາຍາມກອບກູ້ຊ່ວຍເຫຼືອນັກທ່ອງທ່ຽວຮົງກົງທີ່ຖືກຈີ້ນັ້ນໃຫ້ປອດໄພ. ສະຖານທູດຟິລິບປິນແລະພາກສ່ວນທີ່ກ່ຽວຂ້ອງຂອງເຂດບໍລິຫານພິເສດຮົງກົງກໍ່ໄດ້ຕິດຕໍ່ປະສານງານຢ່າງໃກ້ຊິດແລະໄດ້ສົ່ງໜ່ວຍງານໄປສະຖານທີ່ເກີດເຫດເພື່ອປະສານງານ. ໃນເວລາລົມໂທລະສັບ, ທ່ານເຈີ່ງຢິ່ນຊວນ, ຜູ້ວ່າການເຂດບໍລິຫານພິເສດຮົງກົງໄດ້ຕາງໜ້າອົງການປົກຄອງເຂດຮົງກົງສະແດງຄວາມຂອບໃຈຕໍ່ຄວາມພະຍາຍາມຂອງສະຖານທູດຈີນປະຈຳຟິລິບປິນ, ຫວັງວ່າເຫດການຈະໄດ້ຮັບການແກ້ໄຂຢ່າງເໝາະສົມ.
ວັນທີ 23 ສິງຫານີ້, ອົງການປົກຄອງເຂດພິເສດຮົງກົງໄດ້ຍົກສູງລະດັບເຕືອນໄປທ່ອງທ່ຽວຟີລິບປີນຂຶ້ນເປັນສີດຳ, ໂຄສົກອົງການປົກຄອງເຂດພິເສດຮົງກົງເຕືອນປະຊາຊົນຮົງກົງບໍ່ຄວນໄປທ່ຽວຟີລິບປີນ, ແລະນັກທ່ອງທ່ຽວຮົງກົງທີ່ພວມຢູ່ຟີລິບປີນກໍຄວນມີສະຕິລະວັງຕົວ. ໂຄສົກຜູ້ນີ້ກ່າວວ່າ, ອົງການປົກຄອງເຂດພິເສດຮົງກົງໄດ້ຜ່ານ ຂະແໜງການທ່ອງທ່ຽວຮຽກຮ້ອງໃຫ້ຄະນະທ່ອງທ່ຽວທີ່ພວມທ່ຽວຟີລິບປີນກັບຄືນຮົງກົງໂດຍໄວ, ສ່ວນຄະນະທ່ອງທ່ຽວທີ່ຍັງບໍ່ໄດ້ເດີນທາງໄປນັ້ນກໍຄວນຍົກເລີກແຜນການທ່ອງທ່ຽວ.
"ຄະນະທ່ອງທ່ຽວທີ່ທ່ຽວມານີລາ 4 ວັນ"ຂອງບໍລິສັດທ່ອງທ່ຽວຄັ່ງໄທ້ແມ່ນບິນໄປມະນີລາໃນວັນທີ 20 ສິງຫານີ້, ແລະຈະຂີ່ຍົນກັບຮົງກົງໃນຕອນການຄືນວັນທີ 23 ສິງຫານີ້. ແຕ່ມາໃນຕອນເຊົ້າວັນທີ 23, ຄະນະທ່ອງທ່ຽວດັ່ງກ່າວກໍ່ຖືກຈີ້ຢູ່ມະນີລາ. ຕອນຄ່ຳວັນທີ 23 ສິງຫານີ້, ບໍລິສັດທ່ອງທ່ຽວຄັ່ງໄທ້ໄດ້ຖະແຫຼງຂ່າວດ່ວນເພື່ອແຈ້ງສະພາບຫຼ້າສຸດ. ນາງຫຼິວເໝ້ຊື່, ຜູ້ຈັດການໃຫຍ່ກ່າວວ່າ, ບໍລິສັດທ່ອງທ່ຽວຄັ່ງໄທ້ຈະຈັດສົ່ງນັກທ່ອງທ່ຽວ 53 ຄົນຂອງ 3 ຄະນະທ່ອງທ່ຽວທີ່ຍັງຢູ່ຟີລິບປີນນັ້ນກັບຄືນຮົງກົງໂດຍໄວ, ພ້ອມກັນນັ້ນກໍຍົກເລີກ 3 ຄະນະທ່ອງທ່ຽວທີ່ຈະໄປຟີລິບປີນໃນວັນທີ 24 ຫາວັນທີ 28 ເດືອນນີ້, ແລະຕິດຕໍ່ນັກທ່ອງທ່ຽວອີກ 68 ຄົນໂດຍໄວ. ທ່ານຕົງຢ້າວຈົ່ງ, ຫົວໜ້າພະແນກທ່ອງທ່ຽວຮົງກົງກ່າວວ່າ, ຄະນະທ່ອງທ່ຽວ 9 ຄະນະທີ່ຈະໄປທ່ຽວຟີລິບປີນແຕ່ວັນທີ 24 ສິງຫາເຖິງວັນທີ 8 ກັນຍາຈະຖືກຍົກເລີກໝົດ.
ຍົນພິເສດທີ່ອົງການປົກຄອງຮົງກົງຈັດວາງນັ້ນໄດ້ເດີນທາງອອກຈາກສະໜາບບິນສາກົນຮົງກົງໃນຕອນຂ້ອນແຈ້ງວັນທີ 24 ສິງຫານີ້, ເພື່ອພາພີ່ນ້ອງຄອບຄົວຂອງຜູ້ຖືກຈີ້, ແພດແລະພະນັກງານຂອງອົງການປົກຄອງເຂດພິເສດຮົງກົງໄປນະຄອນຫຼວງມະນີລາຂອງຟີລິບປີນ.
