ວັນທີ25 ສິງຫານີ້,ກອງປະຊຸມລັດຖະມົນຕີເສຖະກິດຂອງອາຊຽໜຄັ້ງທີ42ໄດ້ຈັດຂຶ້ນຢູ່ນະຄອນດານັງ ເມືອງແຄມທະເລພາກກາງຂອງຫວຽດນາມ,ລັດຖະມົນຕີວ່າການກະຊວງເສດຖະກິດທີ່ມາຈາກ10ປະເທດອາຊຽນຈະເປິກສາຫາລືກ່ຽວກັບການຊຸກຍູ້ການສ້າງປະຊາຄົມເສດຖະກິດອາຊຽນໄວຂຶ້ນຕື່ມອີກ,ເປີດກວ້າງແລະລົງເລິກການພົວພັນລະຫວ່າງອາຊຽນກັບປະເທດຄູ່ເຈລະຈາ.
ຫົວຂໍ້ຫຼັກຂອງກອງປະຊຸມຄັ້ງນີ້ແມ່ນ"ປະຊາຄົມເສດຖະກິດອາຊຽນ ທີ່ເຕັມໄປດ້ວຍກຳລັງແຮງແລະການເຕີບໂຕແບບຍຶນຍົງ".ໃນພິທີໄຂ,ທ່ານຫງຽນເຕິນຢຸງ ນາຍົກລັດຖະມົນຕີຫວຽດນາມ ປະເທດປະທານໝູນວຽນຂອງອາຊຽນກ່າວຄຳປາໄສວ່າ,"ປີ2010ແມ່ນປີສຳຄັນຂອງຂະບວນການສ້າງປະຊາຄົມຄວາມໝັ້ນຄົງ, ເສດຖະກິດແລະວັດທະນະທຳສັງຄົມຂອງອາຊຽນ,ໃນນັ້ນ,ການສ້າງປະຊາຄົມເສດຖະກິດອາຊຽນໄດ້ຮັບຄວາມຄືບໜ້າອັນສຳຄັນ".ປັດຈຸບັນ,ຄຳໝັ້ນສັນຍາແລະແຜນການຮ່ວມມືເສດຖະກິດກ່ຽວຂ້ອງກັບປະຊາຄົມເສດຖະກິດອາຊຽນພວມຈັດຕັ້ງປະຕິບັດຢ່າງຄືບໜ້າ,ຫຼັກການການຄ້າພາຍໃນປະເທດສະມາຊິກແລະນະໂຍບາຍດັດສົມມະຫາພາກພາຍໃນອາຊຽນພວມເຊື່ອມໂຍງເຂົ້າກັນເປັນລຳດັບ,ຕະຫຼາດຮ່ວມແລະຊ່ອງທາງຮ່ວມມືເສດຖະກິດພວມເກີດຂຶ້ນ.
ວັນທີ23 ສິງຫານີ້,ເຈົ້າໜ້າທີ່ລະດັບສູງຂອງປະເທດອາຊຽນທີ່ຮັບຜິດຊອບວຽກງານເສດຖະກິດຍັງເປິກສາຫາລືແລະຢືນຢັນເນື້ອໃນຕົ້ນຕໍຂອງການສ້າງປະຊາຄົມອາຊຽນໄລຍະ2010ຫາ2011,ແລະຄົ້ນຄວ້າກ່ຽວກັບ12ຂົງເຂດການຮ່ວມມືຄືບັນລຸການເຊື່ອມຕໍ່ເຄືອຂ່າຍຂົນສົ່ງຄົມມະນາຄົມພາຍໃນອາຊຽນ.ອາຊຽນກ່າວວ່າ,ຈະນຳໃຊ້ມາດຕະການທີ່ຕິດແທດກັບຕົວຈິງແລະແບບປະດິດສ້າງ,ຊຸກຍູ້ການປະຕິບັດແຜນການປະຊາຄົມອາຊຽນຢ່າງຕັ້ງໜ້າແລະມີປະສິດທິພາບ,ສ້າງພື້ນຖານເພື່ອສຳເລັດການສ້າງປະຊາຄົມອາຊຽນຢ່າງເປັນທາງການໃນປີ2015.
ກອງປະຊຸມລັດຖະມົນຕີເສດຖະກິດອາຊຽນເທື່ອນີ້ໄດ້ຊີ້ໃຫ້ເຫັນຢ່າງຈະແຈ້ງກ່ຽວກັບຮູບການພັດທະນາຂອງເສດຖະກິດອາຊຽນຕື່ມອີກ, ຄືຍຶດໝັ້ນພັດທະນາຢ່າງສະໝ່ຳສະເໝີກັນແລະຍືນຍົງ. ກ່າວເນັ້ນວ່າເປົ້າໝາຍເຕີບໂຕເສດຖະກິດຂອງອາຊຽນຄວນປະສານກັນກັບເຮັດໃຫ້ພື້ນຖານເສດຖະກິດມະຫາພາກໝັ້ນທ່ຽງ. ນອກຈາກກ່າວຢ້ຳຄວນຮັບມືກັບການທ້າທາຍທົ່ວໂລກເຊັ່ນການປ່ຽນແປງຂອງດິນຟ້າອາກາດ, ໄພທຳມະຊາດແລະພະຍາດໂລຄາແລ້ວ, ກອງປະຊຸມຄັ້ງນີ້ຍັງກ່າວເນັ້ນວ່າຕ້ອງປ້ອງກັນການທ້າທາຍໃໝ່ ຍ້ອນການປັ່ນປ່ວນທາງເສດຖະກິດ.
ຍ້ອນວ່າປະເທດສະມາຊິກຕ່າງໆຂອງອາຊຽນມີລະດັບພັດທະນາຕ່າງກັນ, ສະນັ້ນໃນເວລາປະຕິບັດແຜນການກໍ່ສ້າງປະຊາຄົມເສດຖະກິດອາຊຽນບໍ່ສາມາດໃຊ້ມາດຕະຖານດຽວກັນ, ຄວນຊຸກຍູ້ເປັນຂັ້ນຕອນ. ຖືການປະຕິບັດນະໂຍບາຍບໍ່ເກັບພາສີເປັນຕົວຢ່າງ, ໃນປະເທດສະມາຊິກອາຊຽນເຊັ່ນ, ໄທ, ມະເລເຊຍ, ບຼູໄນ, ສີງກະໂປ, ອິນໂດເນເຊຍແລະຟີລິບປີນໄດ້ສຳເລັດການປະຕິບັດນະໂຍບາຍດັ່ງກ່າວໃນປີ 2010, ສ່ວນຫວຽດນາມ, ລາວ, ກຳປູເຈຍແລະມຽນມາອາດຈະຕ້ອງເລື່ອນໄປຮອດປີ 2015 ຈິ່ງຈະປະຕິບັດນະໂຍບາຍນີ້ໄດ້. ກອງປະຊຸມເທື່ອນີ້ກ່າວເນັ້ນວ່າການກໍ່ສ້າງປະຊາຄົມເສດຖະກິດອາຊຽນຄວນຍຶດໝັ້ນການພັດທະນາຢ່າງສົມດຸນແລະຍືນຍົງ, ໃຊ້ມາດຕະການລະອຽດ, ເພື່ອຫຼຸດຄວາມຫຼຸດລື່ນກັນດ້ານການພັດທະນາລະຫວ່າງປະເທດສະມາຊິກຕ່າງໆ.
ໃນໄລຍະໄຂກອງປະຊຸມເທື່ອນີ້, ອາຊຽນຍັງຈະເຈລະຈາກັບປະເທດຄູ່ເຈລະຈາເຊັ່ນຈີນເປັນຕົ້ນ, ປັບປຸງແລະເຮັດໃຫ້ກົນໄກຮ່ວມມືເສດຖະກິດທີ່ມີຢູ່ໃນປະຈຸບັນກັບປະເທດຄູ່ເຈລະຈາໃຫ້ສົມບູນຕື່ມອີກ. ພ້ອມກັນນັ້ນ, ອາຊຽນກໍກ່າວເນັ້ນວ່າໃນໂຄງຮ່າງພາກພື້ນທີ່ຈະເກີດຂຶ້ນນັ້ນ, ຄວນຖືອາຊຊຽນເປັນໃຈກາງ, ເສີມຂະຫຍາຍບົດບາດນຳພາຂອງອາຊຽນໃນການຮ່ວມມືຂອງພາກພື້ນ.
