ງານວາງສະແດງປຶ້ມສາກົນປັກກິ່ງຄັ້ງທີ 17 ທີ່ຈະດຳເນີນມາເປັນເວລາ 5 ວັນໄດ້ຈັດຂຶ້ນໃນວັນທີ 30 ສິງຫານີ້, ພ້ອມກັນນັ້ນ ງານນວາງສະແດງຜົນສຳເລັດຂອງປື້ມຂອງຈີນທີ່ພັດທະນາຢູ່ຕ່າງປະເທດກໍ່ຈັດຂຶ້ນໃນເວລາດຽວກັນ. ເຂດວາງສະແດງແຫ່ງນີ້ມີຫົວຂໍ້ວ່າ,ການຈຳຫນ່າຍຂອງຈີນທີ່ພັດທະນາຢູ່ຕ່າງປະເທດ, ຜ່ານການນຳໃຊ້ ລິກຂະສິດ,ວັດຖຸຕົວຈິງ,ການພິມດີຈີຕອນ,ການຜະລິດການພິມ, ການຈັດກອງປະ ຊຸມແລະວາງສະແດງເປັນຕົ້ນ, ເພື່ອສະແດງໃຫ້ເຫັນເຖິງຫມາກຜົນດ້ານການພິມຈຳຫນ່າຍຢູ່ຕ່າງປະເທດທີ່ຂະແຫນງການພິມຈຳຫນ່າຍຂອງຈີນໄດ້ຮັບໃນຫຼາຍປີມໍ່ໆມານີ້ ດ້ວຍຮູບການວາງສະແດງຢ່າງໂຮມສູນ,ເພື່ອໃຫ້ນັກພິມຈຳຫນ່າຍໃນທົ່ວໂລກຮູ້ເຖິງການເປີດປະຕູ,ຄວາມຟົດຟຶ້ນແລະ ຫມາກຜົນຂອງຕະຫຼາດພິມຈຳຫນ່າຍຈີນ.
ເມື່ອກ່າວເຖິງເນື້ອໃນສຳຄັນຂອງຂະແຫນງການພິມຈຳຫນ່າຍຂອງຈີນໃນການພິມຈຳຫນ່າຍແລະໂຄສະນາເຜີຍແຜ່ປື້ມຈີນຢູ່ຕ່າງປະເທດໃນຫຼາຍປິມໍ່ໆມານີ້, ທ່ານເນ້ຍເຈິ້ນນິງ,ປະທານຄະນະຜູ່ອຳນວຍການຂອງກຸ່ມບໍລິສັດພິມຈຳຫນ່າຍຈີນກ່າວວ່າ:
"ປະຈຸບັນ, ພວກເຮົາຕ້ອງລົງເລິກໂຄສະນາເຜີຍແຜ່ເນື້ອໃນທັງສອງດ້ານຄື:ອັນທີຫນຶ່ງແມ່ນວັດທະນະທຳເກົ່າແກ່ຂອງປະຊາຊາດຈີນ, ວັດທະນະທຳເກົ່າແກ່ຂອງປະຊາຊາດຈີນນັບມື້ນັບໄດ້ຮັບຄວາມສົນໃຈຢູ່ໃນໂລກ,ສາມາດເວົ້າໄດ້ວ່າ ກ່ຽວກັບການປ່ຽນແປງທີ່ເກີດຂຶ້ນຢູ່ຈີນໃນຍຸກປະຈຸບັນ,ຜູ່ອ່ານຈຳນວນຫນຶ່ງຢູ່ເອີລົບແລະອາເມລິກາກໍ່ຈະຊອກຫາຄຳຕອບຈາກສິ່ງຍອດຍິ່ງຂອງວັດທະນະທຳເກົ່າແກ່ຂອງຈີນ.ອີກອັນຫນຶ່ງກໍ່ແມ່ນເພື່ອສ່ອງແສງການປ່ຽນແປງຂອງຈີນໃນຍຸກປະຈຸບັນ,ພວກເຮົາຄວນມີຫນ້າທີ່ຮັບຜິດຊອບສະເຫນີບົດປະພັນວັນນະຄະດີດ້ານຊີວິດການເປັນຢູ່ຂອງຄົນຈີນໃນຍຸກປະຈຸບັນຕໍ່ປະເທດຕາເວັນຕົກໃຫ້ດີກວ່າເກົ່າ,ຈາກດ້ານນີ້ກໍ່ເຫັນໄດ້ວ່າ ພວກເຮົາໄດ້ຮັບຫມາກຜົນໃນເບື້ອງຕົ້ນ."
ປັດຈຸບັນ,ກຸ່ມພິມຈຳຫນ່າຍຂອງຈີນໄດ້ສ້າງຕັ້ງບໍລິສັດຂາສາທີ່ມີຂະຫນາດແລະຮູບການຕ່າງກັນຢູ່ 8 ຕົວເມືອງຄື:ປາຣີ,ຊິດນີ, ລອນດອນ, ແຟຣັງເຟິດ,ນິວຢອກ,ແວັງຄູເວີ,ເຊອູນແລະໂຕກຽວ,ເພື່ອໂຄສະນາແລະດຳເນີນທຸລະກິດກ່ຽວກັບການພິມຈຳຫນ່າຍປື້ມຂອງຈີນຢູ່ຕະຫລາດເຫລົ່ານີ້.ປີ 2009, ກຸ່ມພິມຈຳຫນ່າຍຈີນສາຂາຊິດນີໄດ້ພິມຈຳຫນ່າຍປຶ້ມກ່ຽວກັບປະ ຫວັດສາດ, ພູມສາດ,ວັດທະນະທຳແລະອື່ນໆຂອງຈີນທັງຫມົດ 17 ຊະນິດ,ໄດ້ຮັບຫມາກຜົນທີ່ດີທີ່ສຸດຢູ່ອົສຕຼາລີ,ແລະໄດ້ຮັບການຈັດເປັນສຳນັກງານພິມລະດັບຫນຶ່ງຈາກຂະແຫນງການພິມຈຳຫນ່າຍຂອງອົສຕຼາລີ.
ການເປີດປະຕູສູ່ພາຍນອກຂອງປຶ້ມຈີນ,ບໍ່ພຽງແຕ່ແມ່ນການສົ່ງອອກ ປື້ມແລະການຄ້າລິຂະສິດປຶ້ມທໍ່ນັ້ນ,ທ່ານເນ້ຍເຈິ້ນນິງເຫັນວ່າ, ການຄ້າຂາຍປື້ມຂອງຈີນເປີດປະຕູສູ່ພາຍນອກຈະແມ່ນເສັ້ນທາງທີສາມຂອງຂະແຫນງການພິມຈຳຫນ່າຍຈີນທີ່ເດີນໄປສູ່ໂລກ.
ເສັ້ນທາງທີສາມກໍ່ແມ່ນໃຫ້ສຳນັກພິມອອກໄປຕ່າງປະເທດ.ພວກເຮົາຈະໄປລົງທຶນຢູ່ຕ່າງປະເທດ,ສ້າງອົງການພິມຈຳຫນ່າຍດ້ວຍທຶນຕົນເອງຫລືຮ່ວມທຶນກັນ,ຫລືຊື້ສິດຖືຫຸ້ນຂອງອົງການພິມຈຳຫນ່າຍທີ່ມີຊື່ສຽງຢູ່ຕ່າງປະເທດ.ກຳສິດເປັນເຈົ້າການໃນການດຳເນີນທຸລະກິດໂດຍຜ່ານຍຸດທະສາດຫັນເປັນຂອງທ້ອງຖີ່ນ,ຈະສາມາດພິມຈຳຫນ່າຍປຶ້ມທີ່ມີເນື້ອໃນກ່ຽວກັບຈີນເປັນຢ່າງດີ.
ວັນທີ 31 ສິງຫານີ້, ກຸ່ມບໍລິສັດພິມຈຳໜ່າຍຈີນແລະກຸ່ມບໍລິສັດໂຕຮັງເຊິ່ງເປັນບໍລິສັດພິມຈຳໜ່າຍຂາເຂົ້າຂາອອກປຶ້ມໃຫຍ່ກວ່າໝູ່ຂອງຍີ່ປຸ່ນໄດ້ເຊັນສັນຍາສ້າງບໍລິສັດພິມຈຳໜ່າຍຕົງຮັງຈີນຈຳກັດ. ໃນຖານະທີ່ເປັນບໍລິສັດຮ່ວມທຶນທີ່ກຸ່ມບໍລິສັດພິມຈຳໜ່າຍຈີນຖືຫຸ້ນຫຼາຍກວ່າໝູ່, ບໍລິສັດພິມຈຳໜ່າຍໂຕຮັງຈີນຈຳກັດຈະດຳເນີນງານແບບພື້ນເມືອງ, ຊຸກຍູ້ໃຫ້ປຶ້ມຈີນໄປພິມຈຳໜ່າຍຢູ່ຍີ່ປຸ່ນ.
ຄຽງຄູ່ກັບການປະຕິຮູບລະບົບຂະແໜງການວັດທະນະທຳຈີນລົງເລິກຕື່ມອີກ, ຂະແໜງການພິມຈຳໜ່າຍຂອງຈີນໄດ້ນຳໜ້າບາດກ້າວປະຕິຮູບລະບົບຈຳໜ່າຍແລະໄດ້ມີບາດກ້າວໃໝ່ທີ່"ກ້າວອອກໄປອີກ". ການພິມຈຳໜ່າຍຢູ່ຕ່າງປະເທດຂອງຈີນບໍ່ພຽງແຕ່ຄ່ອຍໆກາຍເປັນກຳລັງແຮງໃໝ່ຂອງຂະແໜງການພິມຈຳໜ່າຍຂອງຈີນ, ຍັງໄດ້ຊຸກຍູ້ໃຫ້ວັດທະນະທຳຈີນກ້າວໄປສູ່ໂລກ, ໄດ້ເສີມຂະຫຍາຍບົດບາດນັບມື້ນັບສຳຄັນກວ່າເກົ່າທີ່ເຮັດໃຫ້ໂລກຮູ້ເຖິງຍຸດທະສາດພັດທະນາວັດທະນະທຳຂອງຈີນ.
