ນາຍົກສິງກະໂປເຊື່ອວ່າການພົວພັນສິງກະໂປກັບຈີນຈະໄດ້ຮັບການເພີ່ມທະວີຂຶ້ນຕື່ມ
(GMT+08:00) 2010-09-06 15:46:13 cri
ຕາມຂ່າວ cri:ເນື່ອງໃນໂອກາດຄົບຮອບ 20 ປີແຫ່ງການສ້າງການພົວພັນທາງການທູດລະຫວ່າງສິງກະໂປກັບຈີນ, ເລີ່ມແຕ່ວັນທີ 6 ກັນຍານີ້ເປັນຕົ້ນໄປ,ທ່ານຫລີຊຽນລົງ,ນາຍົກລັດຖະມົນຕີສິງກະໂປໄດ້ໄປຢ້ຽມຢາມ 5 ຕົວເມືອງຂອງຈີນຄື:ນະຄອນຈຸ່ງກິ່ງ, ຊຽງໄຮ້, ຊາງຊາ, ອູຮ້ານແລະ ຊູ່ໂຈ່ວ.ກ່ອນການຢ້ຽມຢາມ, ທ່ານຫລີຊຽນລົງໄດ້ໃຫ້ສຳພາດຕໍ່ນັກຂ່າວຈີນ,ໂດຍກ່າວວ່າ, ສິງກະໂປກັບຈີນມີການພົວພັນເປັນຢ່າງດີ.
ທ່ານກ່າວວ່າ:"ຂ້າພະເຈົ້າເຊື່ອຫມັ້ນວ່າ, ການພົວພັນລະຫວ່າງພວກເຮົາແມ່ນສ້າງຂຶ້ນບົນພື້ນຖານທີ່ຫມັ້ນແກ່ນ,ແລະຈະສືບຕໍ່ໄດ້ຮັບການເພີ່ມທະວີຂຶ້ນ."ທ່ານຫລີຊຽນລົງກ່າວວ່າ:"ການພົວພັນລະຫວ່າງຜູ່ນຳສອງປະເທດສິງກະໂປກັບຈີນຖືກຕ້ອງປອງດອງກັນຫລາຍ,ແລະໄດ້ຮັກສາການຢ້ຽມຢາມກັນໃນລະດັບສູງຢ່າງປົກກະຕິ.ປີ 2009, ທ່ານປະທານຫູຈີນທາວໄດ້ຢ້ຽມຢາມສິງກະໂປທາງລັດຖະກິດຢ່າງສຳເລັດ,ຫວ່າງກ່ອນນີ້ບໍ່ດົນ, ທ່ານນາທານປະທານາທິບໍດີກໍ່ໄດ້ຢ້ຽມຢາມນະຄອນຫລວງປັກກິ່ງແລະນະຄອນຊຽງໄຮ້.ພວກຂ້າພະເຈົ້າຍິນດີຕ້ອນຮັບຜູ່ນຳຈີນຫລາຍກວ່າເກົ່າໄປຢ້ຽມຢາມສິງກະໂປ."
ໃນເວລາກ່າວເຖິງຈຸດປະສົງຂອງການຢ້ຽມຢາມເທື່ອນີ້,ທ່ານຫລີຊຽນລົງກ່າວວ່າ, ທ່ານຢ້ຽມຢາມຈີນເທື່ອນີ້ມີຈຸດປະສົງຢ່າງຄື:ກ່ອນອື່ນແມ່ນຈະເບິ່ງການພັດທະນາຂອງຕົວເມືອງພາກກາງຂອງຈີນ, ຊອກຮູ້ບົດບາດຂອງຕົວເມືອງເຫລົ່ານີ້ໃນດ້ານຍຸດທະສາດພັດທະນາຈາກເຂດແຄມທະເລໄປຫາເຂດໃນຂອງຈີນ;ອັນທີສອງແມ່ນຊອກຮູ້ສະພາບຂະຫຍາຍຕົວຫລ້າສຸດຂອງສວນອຸດສາຫະກຳຊູ່ໂຈ່ວ,ແລະອັນສຸດທ້າຍແມ່ນເຂົ້າຊົມງານວາງສະແດງໂລກຊຽງໄຮທີ່ໄດ້ຮັບການຕີລາຄາສູງ.
ໃນເວລາກ່າວເຖິງສັນຍາການຄ້າເສລີສິງກະໂປ-ຈີນ,ທ່ານຫຼີຊຽນລຸງກ່າວວ່າ, ສັນຍາສະບັບນີ້ແມ່ນສັນຍາການຄ້າເສລີຮອບດ້ານລະຫວ່າງສອງຝ່າຍສະບັບທຳອິດທີ່ຈີນລົງນາມກັບປະເທດໃນອາຊີ.ໂດຍອີງຕາມສັນຍາ,ສິງກະໂປແລະຈີນບໍ່ພຽງແຕ່ໄດ້ປະຕິບັດຕາມຄຳຫມັ້ນສັນຍາຂອງອົງການການຄ້າໂລກຫຼື WTOເທົ່ານັ້ນ,ຍັງໄດ້ເປີດປະຕູໃນຫຼາຍຂົງເຂດນອກຄຳຫມັ້ນສັນຍາຂອງWTO, ຕົວຢ່າງຄື:ຂົງເຂດປິ່ນປົວແລະຮັກສາສຸຂະພາບ,ການບໍລິການດ້ານການສຶກສາແລະອື່ນໆ. ສັນຍານີ້ໄດ້ສ້າງໂອກາດໃຫມ່ໃຫ້ແກ່ນັກທຸລະກິດຂອງສອງປະເທດ,ທັງເປັນຂີດຫມາຍສະແດງໃຫ້ເຫັນວ່າສິງກະໂປແລະຈີນໃຫ້ຄວາມສຳຄັນຕໍ່ການຄ້າເສລີ.
ທ່ານຫຼີຊຽງລຸງກ່າວວ່າ,"ພວກເຮົາຄວນພິຈາລະຈາການປະຕິບັດສັນຍາສະບັບນີ້ຕາມເວລາກຳນົດ,ເພື່ອຕອບສະຫນອງຄວາມຕ້ອງການທີ່ກ້າວໄປຫນ້າຢ່າງບໍ່ຢຸດຢັ້ງ. ການເຮັດໃຫ້ອະນຸຍາດຜະລິດຕະພັນເຂົ້າສູ່ຕະຫຼາດແລະການຫັນການຄ້າເປັນແບບເສລີຫຼາຍກວ່າເກົ່າຈະເພີ່ມການໄປມາຫາສູ່ກັນດ້ານການຄ້າແລະຫມູນວຽນດ້ານການລົງທຶນລະຫວ່າງສອງປະເທດໃຫ້ຫຼາຍຂຶ້ນ,ເມື່ອສອງປະເທດໄດ້ທຳຄວາມພະຍາຍາມຮ່ວມກັນແລ້ວ,ພວກເຮົາກໍ່ຈະໄດ້ຮັບຜົນປະໂຫຍດຮ່ວມກັນ. ໃນເວລາກ່າວເຖິງການພົວພັນຈີນ-ອາຊຽນ, ທ່ານຫຼີຊຽນລົງກ່າວວ່າ,ປີ 2011 ຈະແມ່ນປີທີ່ຈີນກັບອາຊຽນໄດ້ສ້າງການພົວພັນເປັນປະເທດຄູ່ເຈລະຈາຄົບຮອບ 20 ປີ. ການພົວພັນລະຫວ່າງອາຊຽນກັບຈີນແມ່ນຫນຶ່ງໃນການພົວພັນທີ່ຟົດຟື້ນແລະຕົວຈິງທີ່ສຸດ.ຈີນແມ່ນປະເທດຄູ່ການຄ້າທີ່ສຳຄັນຂອງແຕ່ລະປະເທດອາຊີອາຄະເນ.ສິງກະໂປຍິນດີຕ້ອນຮັບຈີນເພີ່ມການຕິດ ຕໍ່ພົວພັນແລະລົງທຶນກັບອາຊຽນໃຫ້ຫຼາຍຂຶ້ນ,ຫວັງວ່າຈີນຄົງຈະສືບຕໍ່ເສີມຂະຫຍາຍບົດ ບາດທີ່ມີລັກສະນະສ້າງສັນແລະຄວາມຫມັ້ນທ່ຽງໃນພາກພື້ນນີ້,ສິງກະໂປສະແດງຄວາມຍ້ອງຍໍຊົມເຊີຍຕໍ່ຈີນທີ່ສືບຕໍ່ສະຫນັບໃຫ້ອາຊຽນເສີມຂະຫຍາຍບົດບາດໃຈກາງໃນການຮ່ວມມືໃນພາກພື້ນ.
ທ່ານລີຊຽນລົງກ່າວວ່າ, ສີງກະໂປແມ່ນປະເທດອາຊີອາຄະເນທີ່ມີການພົວພັນວັດທະນະທສະໜິດແໜ້ນກັບຈີນ, ຫວັງວ່າຈະສາມາດເສີມຂະຫຍາຍບົດບາດເປັນຂົວຕໍ່ລະຫວ່າງຈີນກັບອາຊຽນ. ທ່ານກ່າວວ່າ, ຈີນໄດ້ພັດທະນາດ້ວຍຄວາມໄວພິລຶກຕະຫຼອດມາ, ໄດ້ປັບປຸງຊີວິດການເປັນຂອງປະຊາຊົນໃຫ້ດີຂຶ້ນ. "ພວກຂ້າພະເຈົ້າເຊື່ອວ່າ, ປະເທດຈີນທີ່ເຂັ້ມແຂງແລະໄດ້ຮັບຜົນສຳເລັດແມ່ນມີຜົນດີຕໍ່ທົ່ວໂລກແລະອາຊີ. ສີງກະໂປຫວັງວ່າການເຂົ້າຮ່ວມການພັດທະນາຂອງຈີນ, ບໍ່ພຽງແຕ່ມີຜົນດີຕໍ່ການພັດທະນາຂອງຈີນ, ແລະກໍ່ມີຜົນດີຕໍ່ການພັດທະນາຂອງສີງກະໂປເຊັ່ນກັນ."ໃນຕອນທ້າຍທ່ານລີຊຽນລົງກ່າວວ່າ, ລັດຖະບານແລະປະຊາຊົນທັງສອງປະເທດສີງກະໂປກັບຈີນໄດ້ສ້າງມິດຕະພາບທີ່ເຂັ້ມແຂງແລະຍາວນານ, ມີການຮ່ວມມືຢ່າງໃກ້ຊິດໃນຫຼາຍຂົງເຂດ."ພວກເຮົາຄວນລົງເລິກການພົວພັນຄູ່ຮ່ວມມືຕື່ມອີກໃນຂົງເຂດທີ່ມີຢູ່ແລ້ວ, ສືບຕໍ່ຊອກຫາຂົງເຂດຮ່ວມມືໃໝ່, ສົ່ງເສີມໃຫ້ຊາວໜຸ່ມຂອງພວກເຮົາສ້າງມິດຕະພາບອັນຍາວນານ."
