ງານມະຫະກຳກິລາອາຊີຫລືເອຊຽນເກມຄັ້ງທີ 16 ຈະໄຂຂຶ້ນຢູ່ນະຄອນກວງໂຈວ,ພາກໃຕ້ຂອງຈີນແຕ່ວັນທີ 12 ຫາວັນທີ 27 ພະຈິກນີ້. ເອຊຽນເກມເທື່ອນີ້ໄດ້ຈັດໃຫ້ມີການແຂ່ງຂັນກິລາຫລາຍປະເພດກວ່າທຸກຄັ້ງທີ່ຜ່ານມາ, ນອກຈາກ 28 ລາຍການແຂ່ງຂັນໃນງານກິລາໂອລິມປິກປັກກິ່ງແລ້ວ, ຍັງຈະມີ 14 ປະເພດທີ່ມີຈຸດພິເສດຂອງພາກພື້ນອາຊີແລະມີປະຊາຊົນມັກຫລິ້ນທີ່ສຸດ,ເຮັດໃຫ້ນັກກິລາຂອງປະເທດແລະເຂດແຄວ້ນຕ່າງໆຂອງອາຊີສາມາດເຂົ້າຮ່ວມແລະຊົມໃຊ້ງານມະຫະກຳເທື່ອນີ້ຢ່າງກວ້າງຂວາງ.ທ່ານໂລຈິ່ງຈຸ່ນ, ຫົວຫນ້າຫ້ອງການໂຄສະນາຂອງຄະນະກຳມະການຈັດງານມະຫະກຳກິລາອາຊີຫລືເອຊຽນເກມກວາງໂຈວໄດ້ຍົກເອົາບາງປະເພດກິລາມາເວົ້າສູ່ຟັງວ່າ:ການເຕະກະຕໍ້ແມ່ນລາຍການແຂ່ງຂັນອັນຫນຶ່ງທີ່ບໍ່ມີໃນງານກິລາໂອລິມປິກປັກກິ່ງ,ແລະກໍ່ແມ່ນຫນຶ່ງໃນ 14 ລາຍການແຂ່ງຂັນທີ່ມີຈຸດພິເສດຂອງອາຊີ.ກ່ອນຫນ້ານີ້, ຄະນະກຳມະການຈັດງານພວກເຮົາໄດ້ເຮັດວຽກຢ່າງຫລວງຫລາຍໃນດ້ານເຜີຍແຜ່ການເຕະກະຕໍ້.ເຊັ່ນວ່າ: ໂຮງຮຽນມັດຖະຍົມເລກ 3 ຂອງນະຄອນກວາງໂຈວໄດ້ສ້າງສູນເຝິກເຕະກະຕໍ້ແຫ່ງຫນຶ່ງຂຶ້ນ, ເຮັດໃຫ້ປະຊາຊົນກວາງໂຈວເຂົ້າໃຈກະຕໍ້ແລະເຂົ້າໃຈອາຊີຕາເວັນອອກສຽງໃຕ້.
ເພື່ອສະແດງໃຫ້ເຫັນເຖິງເອກະລັກອາຊີຂອງເອຊຽນເກມຢ່າງເຕັມທີ່, ຄະນະກຳມະການຈັດງານໄດ້ຖືກິລາເປັນໂອກາດ, ວັດທະນະທຳເປັນສາຍພົວພັນ, ໄດ້ຈັດການວາງສະແດງວັດທະນະທຳອາຊີແລະກິດຈະກຳໂຄສະນາຕ່າງໆ. ຄະນະກຳມະການຈັດງານອຊຽນເກມກວາງໂຈ່ຍັງໄດ້ຮ່ວມມືກັບຄະນະກຳມະການບໍລິຫານງານໂອລິມປິກອາຊີ, ຈັດກິດຈະກຳໂຄສະນາວັດທະນະທຳ "ເສັ້ນທາງສາຍໃໝ່ອາຊີ" ຮ່ວມກັນ, ໃຫ້ກ່ຳປັ່ນເກົ່າແບບຈຳລອງແລະຂະບວນຄາຣາວານລົດຂອງບໍລິສັດທີ່ສະຫນັບສະຫນູນ ໄປຢ້ຽມຢາມ 37 ປະເທດແລະເຂດແຄ້ວນໃນອາຊີບົນ "ເສັ້ນທາງສາຍໃໝ" ທາງທະເລແລະທາງບົກ.
ນອກຈາກສະແດງໃຫ້ເຫັນວັດທະນະທຳອາຊີຢ່າງເຕັມທີ່ແລ້ວ, ຍັງເອົາໃຈໃສ່ນຳການພັດທະນາແບບຍືນຍົງຂອງນະຄອນຫຼັງເອຊຽນເກມແມ່ນຈຸດພິເສດສຳຄັນອີກຈຸດໜຶ່ງຂອງເອຊຽນເກມກວາງໂຈ່. ການວາງແຜນ, ອອກແບບ, ແລະການສ້າງສະໜາມກິລາແຂ່ງຂັນ, ສະຫນາມທີ່ຈະຈັດພິທີໄຂແລະພິທີອັດແລະສິ່ງກໍ່ສ້າງອະເນກປະສົງຕ່າງໆ, ລ້ວນແຕ່ໄດ້ພິຈາລະນາເຖິງຄວາມຕ້ອງການຂອງການພັດທະນາໄລຍະຍາວໄກຂອງນະຄອນກວາງໂຈ່. ທ່ານໂລຈີ່ງຈຸ່ນບອກວ່າ:
"ພວກເຮົາໄດ້ພິຈາລະນາເຖິງຄວາມຮຽກຮ້ອງຕ້ອງການຂອງການພັດທະນາຢ່າງສະໝ່ຳສະເໝີກັນຂອງໜ່ວຍງານຂອງເຂດແລະເມືອງຕ່າງໆຢ່າງເຕັມທີ່, ສະໜາມກິລາກາງແຈ້ງແລະໃນຮົ່ມຕ່າງໆແມ່ນແຈກຢາຍຢູ່ 10 ເຂດແລະ 2 ເມືອງ. ແລະພິຈາລະນາເຖິງຄວາມຮຽກຮ້ອງຕ້ອງການຂອງແຜນການພັດທະນາຂອງນະຄອນ, ໄດ້ສ້າງເຂດເອຊຽນເກມແຫ່ງໜຶ່ງຢູ່ເຂດໃໝ່, ລວມທັງສູນນັກກິລາ, ສູນເຕັກນິກ, ບ້ານສື່ມວນຊົນ, ສູນກະຈາຍສຽງສາກົນ, ສູນຂ່າວແລະຕຶກອາຄານຕ່າງໆທີ່ບໍ່ແມ່ນໃຊ້ໃນການແຂ່ງຂັນກິລາ, ຫຼັງຈາກເອຊຽນເກມແລ້ວ, ຈະກາຍເປັນຄຸ້ມຊຸມຊົນູທີ່ມີສິ່ງແວດລ້ອມທີ່ສວຍງາມແລະມີສິ່ງກໍ່ສ້າງທີ່ຄົບຖ້ວນ."
ການກໍ່ສ້າງສະຫນາມກິລາເອຊຽນເກມ,ນອກຈາກໄດ້ພິຈາລະນາການພັດທະນາຂອງຕົວເມືອງກວາງໂຈ່ວໃນອະນາຄົດແລ້ວ,ຍັງຖືສຳຄັນຕໍ່ການອະນຸລັກສິ່ງແວດລ້ອມອີກດ້ວຍ.ເນື້ອທີ່ສະຫນາມກິລາມີເຖິງ 314.82ຕາແມັດ,ຫລັງຄາສະຫນາມເປັນຮູບວົງມົນ,ບໍ່ມີລ່ຽມ,ສາມາດເກັບນ້ຳຝົນໄວ້ແລ້ວໄຫລລົງສູ່ລະບົບເຄື່ອງຈັກກັ່ນນ້ຳຢູ່ກ້ອງເດີ່ນຈອດລົດ,ຫລັງຈາກນັ້ນແລ້ວກໍເອົາໄປຫົດໃສ່ຕົ້ນໄມ້ໃບຫຍ້າ.ນອກນີ້,ສະຫນາມກິລາເອຊຽນຍັງໃຊ້ນ້ຳມັນສີກັນຄວາມຮ້ອນແບບໃຫມ່,ເຕັກນິກ ປະຢັດພະລັງງານທີ່ໃຊ້ໃນຫລັງຄາ,ຝາດ້ານນອກ,ປ່ອງຢ້ຽມ,ເຕັກນິກຮັກສາອຸນຫະພູມແລະຄວາມຊຸມແລະເຕັກນິກອື່ນໆ9ເຕັກນິກ,ເຮັດໃຫ້ສະຫນາມກິລາເອຊຽນເກມກວາງໂຈ່ວກາຍເປັນສະຫນາມກິລາສີ ຂຽວ,ອັດຕາປະຢັດພະລັງງານສູງເຖິງ60%.ຄາດວ່າຈະມີນັກກິລາ,ນັກຂ່າວທີ່ມາຈາກ45ປະເທດແລະເຂດແຄວ້ນຂອງອາຊີແລະສະມາຊິກຄະນະກຳມະການເອຊຽນເກມເຂົ້າຮ່ວມງານ.ພວກເຮົານັດພົບກັນຢູ່ກວາງໂຈ່ວເນາະ.
