ຈັດພິທີທາງການວັນຂອງຫໍວາງສະແດງແຫ່ງຊາດຈີນ
(GMT+08:00) 2010-10-01 16:16:15 cri
ມື້ນີ້ຄືວັນທີ 1 ຕຸລາແມ່ນວັນຂອງຫໍວາງສະແດງແຫ່ງຊາດຈີນຂອງງານວາງສະແດງໂລກຊຽງໄຮ້ 2010.ທ່ານອູປາງໂກ, ປະທານຄະນະປະຈຳສະພາປະຊາຊົນແຫ່ງຊາດຈີນ, ແລະທ່ານວິເຊັນເທ ໂລເຊີທາເລັສ,ເລຂາທິ ການກົມການວາງສະແດງສາກົນພ້ອມກັບແຂກຜູ່ມີກຽດຂອງຈີນແລະຕ່າງປະເທດປະມານ 700 ທ່ານໄດ້ເຂົ້າຮ່ວມພິທີທາງການດັ່ງກ່າວ.
ເນື່ອງໃນໂອກາດວັນຊາດຈີນຄົບຮອບ 61 ປີ, ເຂດຈັດງານວາງສະແດງໂລກຊຽງໄຮ້ທີ່ຢູ່ແຄມແມ່ນ້ຳຫວງພູກໍ່ໄດ້ຕ້ອນຮັບວັນຂອງຫໍວາງສະແດງແຫ່ງຊາດຈີນ.ຕອນເຊົ້າວັນທີ 1 ຕຸລາ, ທ່ານອູປາງໂກ, ປະທານຄະນະປະຈຳສະພາປະຊາຊົນແຫ່ງຊາດຈີນໄດ້ເຂົ້າຮ່ວມພິທີທາງການຂອງວັນດັ່ງກ່າວ.ທ່ານກ່າວວ່າ:
ວັນຂອງຫໍວາງສະແດງແຫ່ງຊາດຈີນຂອງງານວາງສະແດງໂລກຊຽງໄຮ້ບໍ່ພຽງແຕ່ໄດ້ເພີ່ມບັນຍາກາດອັນມ່ວນຊື່ນໃຫ້ແກ່ວັນຊາດຈີນທໍ່ນັ້ນ,ຍັງໄດ້ຊຸກຍູ້ງານວາງສະແດງໂລກຊຽງໄຮ້ເຂົ້າສູ່ລະດັບໃຫມ່.ກ່ອນອື່ນ ,ຂ້າພະເຈົ້າຂໍຕາງຫນ້າລັດຖະບານແລະປະຊາຊົນຈີນ,ສະແດງຄວາມຍິນດີຕ້ອນຮັບອັນອົບອຸ່ນແລະຄວາມຂອບອົກຂອບໃຈຢ່າງຈິງໃຈຕໍ່ບັນດາແຂກຜູ່ມີກຽດທີ່ໄດ້ມາເຂົ້າຮ່ວມກິດຈະກຳສະຫລອງວັນຂອງຫໍວາງສະແດງແຫ່ງຊາດຈີນ.
ຫໍວາງສະແດງແຫ່ງຊາດຈີນໄດ້ຕັ້ງຊື່ເປັນ:ມົງກຸດແຫ່ງຝ່າຍບົວລະພາແມ່ນຫໍວາງສະແດງທີ່ມີເນື້ອທີ່ວາງສະແດງກວ້າງທີ່ສຸດຂອງງານວາງສະແດງໂລກຊຽງໄຮ້,ແລະຖືກເອີ້ນເປັນນາມບັດແຫ່ງຊາດຈີນ,ແມ່ນປ່ອງຢ້ຽມທີ່ສາມາດຊອກຮູ້ໃນໄລຍະໃກ້ຕໍ່ວັດທະນະທຳຈີນ, ຊອກຮູ້ແນວຄິດຂອງປະຊາຊົນຈີນແລະທັດສະນະຄຸນຄ່າຂອງຈີນໃນຍຸກປະຈຸບັນ.ທ່ານອູປາງໂກໄດ້ຕີລາຄາຕໍ່ຫໍວາງສະແດງແຫ່ງຊາດຈີນທີ່ມີຮູບຊົງພິເສດດັ່ງກ່າວນີ້ວ່າ:
ມົງກຸດບົວລະພາຫລື ຫໍວາງສະແດງແຫ່ງຊາດຈີນທີ່ຕັ້ງສະຫງ່າຢູ່ໃນສວນງານວາງສະແດງໂລກຊຽງໄຮ້,ມີສີສັນປະຈັກຕາ,ທັງສະຫງ່າຜ່າເຜີຍ,ເຊິ່ງໄດ້ຖືສະຕິປັນຍາຂອງປະຊາຊາດຈີນໃນການພັດທະນາຂອງຕົວເມືອງເປັນຫົວຂໍ້ຫລັກ,ໄດ້ເຮັດໃຫ້ຄົນສາມາດສຳຜັດກັບຜຶດຕິກຳຕົວຈິງຂອງປະຊາຊົນຈີນໃນການສ້າງຊີວິດອັນດີງາມ,ແລະຊອກຮູ້ທັດສະນະກ່ຽວກັບຄວາມກົມກຽວກັນທີ່ສືບທອດກັນມາໃນວັດທະນະທຳຈີນ,ແລະຫລິງເຫັນອະນາຄົດອັນດີງາມຂອງການພັດທະນາດ້ານວິທະຍາສາດຂອງຈີນ.
ຕັ້ງແຕ່ງານວາງສະແດງໂລກຊຽງໄຮ້ໄຂຂຶ້ນເປັນຕົ້ນມາ, ຫໍວາງສະແດງຈີນໄດ້ກາຍເປັນຈຸດສຸມທີ່ຜູ່ຊົມຈີນແລະຕ່າງປະເທດພາກັນໄປຊົມ.ຂ່າວຈາກຝ່າຍທາງການຂອງງານວາງສະແດງໂລກແຈ້ງວ່າ, ມາຮອດວັນທີ 29 ກັນຍານີ້, ຫໍວາງສະແດງຈີນໄດ້ຕ້ອນຮັບຜູ່ຊົມຫລາຍກວ່າ 7 ລ້ານ 4 ແສນ 8 ຫມື່ນເທື່ອຄົນ, ບວກກັບຫໍວາງສະແດງປະສົມຂອງເຂດແຂວງຕ່າງໆ, ຫໍວາງສະແດງຈີນໄດ້ຕ້ອນຮັບຜູ່ຊົມເກືອບ 21 ລ້ານ 1 ແສນ 5 ຫມື່ນຄົນແລ້ວ.ຢູ່ແຫ່ງນີ້ໄດ້ສະແດງໃຫ້ເຫັນທັງປະຫວັດສາດຈີນ, ແລະກໍ່ມີສະພາບປັດຈຸບັນແລະອະນາຄົດຂອງຈີນ.ຜູ່ຊົມຈະໄດ້ຮູ້ຈັກກັບຈີນຫລາຍກວ່ເກົ່າໂດຍຜ່ານຫໍວາງສະແດງຈີນ.
ໃນພິທີຈັດກິດຈະກຳວັນຂອງຫໍວາງສະແດງແຫ່ງຊາດຈີນ, ທ່ານອຸປາງໂກໄດ້ກ່າວເຖິງຄວາມຫມັ້ນໃຈແລະຄວາມຕັດສິນໃຈຂອງລັດຖະບານຈີນໃນການຍຶດຫມັ້ນພັດທະນາຕໍ່ບັນດາແຂກຈີນແລະຕ່າງປະເທດ:
ພວກຂ້າພະເຈົ້າເຊື່ອວ່າ: ຢູ່ບົນເສັ້ນທາງທີ່ກ້າວໄປຫນ້າຈະພົບກັບຄວາມຂັດແຍ່ງແລະຄວາມຫຍຸ້ງຍາກຕ່າງໆນາໆ, ແຕ່ພວກຂ້າພະເຈົ້າກໍ່ມີຄວາມຫມັ້ນໃຈອັນເຕັມປ່ຽມຕໍ່ອະນາຄົດ.ເພາະວ່າພວກຂ້າພະເຈົ້າໄດ້ເປີດເສັ້ນທາງພັດທະນາສັງຄົມນິຍົມທີ່ມີສີສັນພິເສດຂອງຈີນແລ້ວ, ທະແນມແຕ່ພວກເຮົາຍຶດຫມັ້ນເດີນຕາມເສັ້ນທາງນີ້ຢ່າງເດັດດ່ຽວຫນຽວແຫນ້ນ,ກໍ່ຈະສ້າງສາປະເທດຈີນໃຫ້ເປັນປະເທດສັງຄົມນິຍົມທັນສະໄຫມທີ່ມັ່ງຄັ່ງເຂັ້ມແຂງ,ມີປະຊາທິປະໄຕ,ສີວິໄລແລະກົມກຽວກັນ.
ທ່ານວິເຊັນເທ ໂລເຊີທາເລັສ ເລຂາທິການກົມການວາງສະແດງສາກົນທີ່ເຂົ້າຮ່ວມພິທີດັ່ງກ່າວເຫັນວ່າ, ທັດສະນະການພັດທະນາຂອງຈີນສາມາດໃຫ້ຜູ່ອື່ນຮ່ຳຮຽນນຳໄດ້.ທ່ານກ່າວວ່າ:
ຜ່ານຈາກງານວາງສະແດງໂລກຊຽງໄຮ້,ຈີນພວມມີການປ່ຽນແປງຢູ່,ການປ່ຽນແປງແນວນີ້ສອດຄ່ອງກັບຈຸດພິເສດຂອງຈີນ,ທັງເປັນອຸທາຫອນສອນໃຈແກ່ພວກເຮົາໄດ້.ທີ່ຈິງແລ້ວ,ຈີນພວມບັນລະຍາຍທັງປະຕິບັດຕົວຈິງຕໍ່ຄຸນຄ່າໃຈກາງເຊິ່ງກໍ່ຄືການສຶກສາ, ການປະດິດສ້າງແລະຮ່ວມມືກັນ, ຄຸນຄ່າເຫລົ່ານີ້ກໍ່ແມ່ນພື້ນຖານງານວາງສະແດງໂລກໄດ້ຮັບການສືບທອດກັນມາ.
