ຫລັງຈາກທະນານຄານກາງຍີ່ປຸ່ນໄດ້ແຊກແຊງອັດຕາແລກປ່ຽນເງິນຕາຂອງປະເທດຕົນໂດຍກົງໃນເດືອນກັນຍາມານີ້,ສາທາລະນະລັດເກົາຫລີ, ເບຼຊິນ,ໄທແລະສິງກະໂປກໍ່ຄິດຢາກເຮັດຕາມຫລືໄດ້ແຊກແຊງອັດຕາແລກປ່ຽນເງິນຕາຂອງປະເທດຕົນໂດຍຜ່ານການຄ້ມຸຄອງຕະຫລາດຢ່າງເປີດເຜີຍ.ຄຳເວົ້າທີ່ວ່າ"ສົງຄາມອັດຕາແລກປ່ຽນເງິນຕາ"ຂະຫຍາຍກວ້າງອອກໄປ.ຕໍ່ເລື່ອງນີ້, ຜູ່ຊ່ຽວຊານຈີນໄດ້ໃຫ້ສຳພາດຕໍ່ນັກຂ່າວ cri ວ່າ:ປັດ ຈຸບັນ, ປະເທດຕ່າງໆໃນໂລກຄວນຮ່ວມມືກັນ,ແກ້ໄຂຄວາມຂັດແຍ່ງແລະບັນຫາທີ່ເລິກເຊິ່ງຢ່າງຖືກກັບຕົວຈິງ, "ສົງຄາມອັດຕາແລກປ່ຽນເງິນຕາ"ບໍ່ມີຜົນດີຕໍ່ເສດຖະກິດທົ່ວໂລກຟື້ນຕົວຄືນ,ຍິ່ງອາດຈະເຮັດໃຫ້ເກີດຜົນຮ້າຍຢ້ອນຫລັງທີ່ຫນັກຫນ່ວງກວ່າເກົ່າ.
ໃນເວລາອະທິບາຍສາເຫດທີ່ປະເທດຕ່າງໆນຳໃຊ້ນະໂຍບາຍເງິນຕາເພື່ອສະກັດກັ້ນບໍ່ໃຫ້ເງິນຕາຂອງຕົນແຂງຄ່າຂຶ້ນນັ້ນ, ທ່ານຢວນກ່າງມິງ, ສາສະດາຈານຂອງສູນຄົ້ນຄວ້າເສດຖະກິດຈີນກັບໂລກຂອງມະຫາວິທະຍາໄລຊິ່ງຮວາເຫັນວ່າ, ນີ້ແມ່ນຍ້ອນປະເທດຕ່າງໆມີການຄາດຄິດໄປໃນແງ່ລົບຕໍ່ອະນາຄົດຂອງການຟື້ນຕົວຂອງເສດຖະກິດ.ທ່ານກ່າວວ່າ:
ສາເຫດສຳຄັນທີ່ປະເທດຕ່າງໆແຊກແຊງອັດຕາແລກປ່ຽນເງິນຕາແມ່ນຍ້ອນເສດຖະກິດທີ່ພວມຟື້ນຕົວນັ້ນເກີດມີບັນຫາອີກ, ອາດຈະຊຸດໂຊມລົງເຖິງຂັ້ນຕ່ຳສຸດເທື່ອທີສອງ.ໂດຍສະເພາະແມ່ນເສດຖະກິດອາເມລິກາເກີດບັນຫາແລ້ວ, ວິກິດການຫນີ້ສິນຂອງສະຫະພາບເອີລົບກໍ່ຫນັກຫນ່ວງຂຶ້ນ, ລະຫວ່າງປະເທດໃຫຍ່ຕ່າງໆກໍ່ມີຄວາມຂັດແຍ່ງກັນດ້ານການຄ້າຮຸນແຮງຂຶ້ນ.ສະພາບການແນວນີ້ກໍ່ໄດ້ແຜ່ລາມໄປຮອດຂົງເຂດການເງິນ.ໃນກໍລະນີແແບບນີ້, ປະເທດຕ່າງໆເພື່ອປ້ອງກັນບໍ່ໃຫ້ເກີດສະພາບທີ່ຮ້າຍແຮງກວ່ານັ້ນຂຶ້ນ, ສະກັດກັ້ນບໍ່ໃຫ້ການປັ່ນປ່ວນດ້ານອັດຕາແລກປ່ຽນເງິນຕາຂອງປະເທດອື່ນກະທົບເຖິງປະເທດຕົນ, ຈິ່ງເລິ່ມໃຊ້ນະໂຍບາຍໃຫ້ເງິນຕາຕົນຫລຸດຄ່າລົງ.
ແຕ່ໃນເວລາຄົ້ນຄວ້າສາເຫດທີ່ພາໃຫ້ປະເທດຕ່າງໆໃນໂລກເຂົ້າແຊກອັດຕາແລກປ່ຽນ, ຜູ້ຊ່ຽວຊານທີ່ໄດ້ໃຫ້ສຳພາດລ້ວນແຕ່ກ່າວວ່າ, ການປ່ຽນແປງຂອງອັດຕາແລກປ່ຽນເງິນຕາຮອບນີ້ແມ່ນກ່ຽວກັນກັບເງິນໂດລາສືບຕໍ່ຫຼຸດລາຄາລົງໂດຍກົງ. ສາດສະດາຈານຈ້າວຊີ່ຈຸ່ນ, ຮອງຫົວໜ້າສະຖາບັນຄົ້ນຄວ້າການເງິນແລະຫຼັກຊັບຂອງມະຫາວິທະຍາໄລປະຊາຊົນຈີນກ່າວວ່າ, ໃນດ້ານໜຶ່ງ, ອາເມລິກາຮັກສາໃຫ້ຄ່າເງິນໂດລາອ່ອນແມ່ນເພື່ອກະຕຸ້ນໃຫ້ເສດຖະກິດເຕີບໂຕ, ອີກດ້ານໜຶ່ງການກະທຳທີ່ຖືບັນຫາອັດຕາແລກປ່ຽນຫັນເປັນການເມືອງ, ເຮັດໃຫ້ຫຼາຍປະເທດຈຳເປັນຕ້ອງເຂົ້າແຊກອັດຕາແລກປ່ຽນ. ນີ້ແມ່ນການກະທຳທີ່ບໍ່ມີຄວາມຮັບຜິດຊອບຕໍ່ເສດຖະກິດໂລກ.
ຕໍ່ການກະທຳຂອງປະເທດຕ່າງໆທີ່ສືບຕໍ່ໃຊ້ມາດຕະການເພື່ອເຂົ້າແຊກອັດຕາແລກປ່ຽນຂອງຕົນ, ຜູ້ຊ່ຽວຊານໄດ້ສະແດງຄວາມເປັນຫ່ວງ. ໂດຍເຫັນວ່າ, ການໃຊ້ວິທີຫຼຸດຄ່າເງິນຂອງປະເທດຕົນນັ້ນ, ພຽງແຕ່ຈະສາມາດເຮັດໃຫ້ເສດຖະກິດຂອງຕົນໄດ້ຮັບຄວາມສາມາດໃນການແຂ່ງຂັນໃນໄລຍະສັ້ນເທົ່ານັ້ນ, ແຕ່ນີ້ພຽງແຕ່ແມ່ນປະກົດການພາຍນອກ, ບໍ່ສາມາດແກ້ໄຂບັນຫາໃນດ້ານກົກຮາກ. ແຕ່ຖ້າວ່າການກະທຳທີ່ເຂົ້າແຊກອັດຕາແລກປ່ຽນຖືກປະເທດຕ່າງໆຮຽນແບບເອົາໄປປະຕິບັດ, ກໍ່ຈະພາໃຫ້ເກີດຂໍ້ຂັດແຍ່ງດ້ານການຄ້າຫຼາຍກວ່າເກົ່າໃນທົ່ວໂລກ, ເຮັດໃຫ້ອະນາຄົດການຟື້ນຕົວຂອງເສດຖະກິດໂລກຍິ່ງຈະບໍ່ດີ.
ທ່ານສາສະດາຈານຢວນກ່າງມິງເຫັນວ່າ, ປັດຈຸບັນ, ປະເທດຕ່າງໆຄວນພິຈາລະນາເຖິງບັນຫາໃນດ້ານເລິກ,ໃຊ້ມາດຕະການທີ່ສາມາດແກ້ໄຂບັນຫາຂອງປະເທດຕົນ, ເພື່ອປະກອບສ່ວນເຂົ້າໃນການເຮັດໃຫ້ເສດຖະກິດທົ່ວໂລກຟື້ນຕົວຄືນ.ທ່ານກ່າວວ່າ:
ປະເທດຕ່າງໆຄວນຄົ້ນຄິດຊອກຫາວິທີແກ້ໄຂບັນຫາທີ່ເສດຖະກິດຂອງປະເທດຕົນອາດຈະຊຸດໂຊມລົງ,ນະໂຍບາຍການເງິນແລະເງິນຕາຂອງປະເທດຕົນຕ້ອງຮັກສາຄວາມປອດໃສ.ປັດຈຸບັນ, ເສດຖະກິດໂລກເກີດມີການຊຸດໂຊມລົງເທື່ອທີສອງ.ສາເຫດສຳຄັນແມ່ນຍ້ອນສະຫະພາບເອີລົບເກີດບັນຫາ,ແລ້ວກະທົບເຖິງອາເມລິກາແລະທົ່ວໂລກ.ໃນສະພາບການແນວນີ້, ປະເທດຕ່າງໆຄວນໃຊ້ນະໂຍບາຍແລະມາດຕະການເພື່ອແກ້ໄຂບັນຫາຕົວຈິງຂອງປະເທດໃຜລາວ,ນີ້ແມ່ນໂຄງປະກອບເສດຖະກິດເອງເກີດມີບັນຫາແລ້ວ,ເຊິ່ງຕ້ອງການແກ້ໄຂດ້ວຍນະໂຍບາຍຍາວນານແລະເລິກເຊິ່ງ.
ຜູ່ຊ່ຽວຊານເຫັນວ່າ, ປັດຈຸບັນ, ປະເທດຕ່າງໆຄວນປະຖິ້ມຜົນປະ ໂຫຍດແບບຄັບແຄບ,ຫລີກລຽງບໍ່ໃຫ້ນະໂຍບາຍຫລຸດຄ່າເງິນຕາຂອງຕົນແລະສ້າງບັນຫາໃຫ້ປະເທດອື່ນໆ,ເພີ່ມການປະສານງານນະໂຍບາຍເສດຖະກິດ,ເພີ່ມທະວີການຮ່ວມມືໃນສາກົນ, ຮ່ວມກັນຊຸກຍູ້ການປະຕິຮູບລະບົບທະນາຄານສາກົນ, ສ້າງຕະຫລາດການເງິນແລະເງິນຕາໃຫ້ຫມັ້ນຄົງ,ຜ່ອນຄາຍຜົນກະທົບຍ້ອນວິກິດການ,ເພື່ອເຮັດໃຫ້ເສດຖະກິດທົ່ວໂລກຟື້ນຕົວຄືນຢ່າງຫມັ້ນທ່ຽງ.
