ງານວາງ ສະແດງສິນຄ້າຈີນ-ອາຊຽນຄັ້ງທີ 7 ແລະກອງປະຊຸມສຸດຍອດທຸລະກິດແລະການລົງທຶນຂອງຈີນ-ອາຊຽນຄັ້ງທີ 7 ໄດ້ໄຂຂຶ້ນຢູ່ເທດສະບານນານນິງ ຂອງເຂດປົກຄອງຕົນເອງເຜົ່າຈວ້ງກວາງຊີຂອງຈີນໃນວັນທີ 19 ຕຸລານີ້. ງານວາງສະແດງສິນຄ້າແລະກອງປະຊຸມສຸດຍອດເທື່ອນີ້ໄດ້ມີບຸກຄົນສຳຄັນຈາກວົງການການເມືອງ, ອຸດສາຫະກຳການຄ້າແລະເສດຖະກິດພ້ອມດ້ວຍຜູ່ຊ່ຽວຊານແລະນັກວິຊາການຂອງຈີນແລະ 10 ປະເທດໃນອາຊຽນເຂົ້າຮ່ວມ. ຈີນກ່າວວ່າ ຈະເພີ່ມທະວີການຮ່ວມມືກັບປະເທດຕ່າງໆໃນອາຊຽນຕື່ມອີກ,ເພື່ອເຮັດໃຫ້ງານເທື່ອນີ້ພົ້ນເດັ່ນກວ່າເກົ່າແລະມີປະສິດທິພາບກວ່າເກົ່າ.
ງານວາງສະແດງສິນຄ້າເທື່ອນີ້ຈະດຳເນີນໄປເປັນເວລາ 5 ວັນ,ເຊິ່ງມີຫົວຂໍ້ວ່າ:"ເຂດການຄ້າເສລີແລະໂອກາດໃຫມ່ ". ງານເທື່ອນີ້ມີຫ້ອງວາງສະແດງທັງຫມົດ 4000 ຫ້ອງ,ເນື້ອໃນທີ່ວາງສະແດງນັ້ນລວມມີ5ຫົວຂໍ້ໃຫຍ່ຄື: ການຄ້າສິນຄ້າ,ການຮ່ວມມືດ້ານການລົງທຶນ,ການຄ້າດ້ານການບໍລິການ,ເຕັກນິກທີ່ທັນສະໄຫມແລະຕົວເມືອງທີ່ມີສະເຫນ່.
ໃນພິທີໄຂງານ,ທ່ານຫມ້າປ່ຽວ,ປະທານເຂດປົກຄອງຕົນເອງເຜົ່າຈ້ວງກວາງຊີ ກ່າວວ່າ, ງານວາງສະແດງສິນຄ້າຈີນ-ອາຊຽນໄດ້ເປັນສິ່ງທີ່ຊຸກຍຸໃນການສ້າງເຂດການຄ້າເສລີ ,ແລະເປັນສັນຍາລັກແຫ່ງການຮ່ວມມືດ້ວຍໄມຕີຈິດມິດຕະພາບລະ ຫວ່າງຈີນກັບອາຊຽນ. ທ່ານກ່າວວ່າ:
"ການສ້າງເຂດການຄ້າເສລີຈີນອາຊຽນໃຫ້ສຳເລັດແມ່ນໂອກາດໃຫມ່ຂອງຈີນກັບອາຊຽນ, ແລະກໍ່ແມ່ນໂອກາດໃຫມ່ຂອງອາຊີກໍຄືທົ່ວໂລກ. ໃນຖານະທີ່ເປັນຝ່າຍເຈົ້າພາບຂອງງານວາງສະແດງສິນຄ້າເທື່ອນີ້ ດ່ານຫນ້າແລະປ່ອງຢ້ຽມຂອງຈີນທີ່ອ່ວາຍຫນ້າໄປສູ່ອາຊຽນ, ເຂດກວາງຊີພວກເຮົາຍິນດີຮ່ວມກັບຝ່າຍຕ່າງໆພັດທະນາບົດບາດຂອງເວທີງານວາງສະແດງຕື່ມອີກ, ເປີດກວ້າງບົດບາດແລະປັບປຸງກົນໄກໃຫ້ສົມບູນຂຶ້ນຢ່າງບໍ່ຢຸດຢັ້ງ, ເມື່ອໄດ້ຜ່ານການສ້າງເວທີຂໍ້ມູນລະຫວ່າງ ຈີນກັບອາຊຽນ,ແລ້ວເຮັດໃຫ້ງານວາງສະແດງສິນຄ້າ ກາຍເປັນສູນແລກປ່ຽນຂໍ້ມູນ ໃນຫຼາຍຂົງເຂດ ເຊັ່ນ:ການຄ້າ,ການລົງທຶນ,ວັດທະນະທຳ,ການສຶກສາແລະອື່ນໆແລະເປັນງານວາງສະແດງສິນຄ້າທີ່ຈັດເປັນປົກກະຕິ, ເພື່ອຮັບໃຊ້ຕໍ່ການພັດທະນາເຂດການຄ້າເສລີແລະສ້າງຄວາມສະດວກໃຫ້ແກ່ວິສາຫະກິດແລະປະຊາຊົນຂອງປະເທດຕ່າງໆໄດ້ດີກວ່າເກົ່າ."
ວັນທີ 1 ມັງກອນ ປີນີ້, ເຂດການຄ້າເສລີຈີນ-ອາຊຽນໄດ້ສ້າງສຳເລັດຢ່າງເປັນທາງການ, ຜະລິດຕະພັນຂອງຈີນທີ່ຊື້ຈາກອາຊຽນ ຈະບໍ່ເກັບພາສີ 7000 ກວ່າຊະນິດ , ເຊິ່ງກວມຜະລິດຕະພັນທັງຫມົດ 93%. ພ້ອມກັນນັ້ນ, ປະເທດອາຊຽນ ກໍ່ຈະປັບປຸງອັດຕາພາສີເຊັ່ນດຽວກັນ. ຄຽງຄູ່ກັບພາສີອາກອນຂອງສອງຝ່າຍໄດ້ຫຼຸດຕ່ຳລົງຕື່ມອີກ,ຊ່ອງທາງເຂົ້າສູ່ຕະຫຼາດຂອງຜະລິດຕະພັນທີ່ສາມາດຊ່ອຍຊູຍູ້ຫນູນກັນ ຈະເປີດກວ້າງຢ່າງແຂງແຮງ. ນັບແຕ່ເດືອນມັງກອນຮອດເດືອນສິງຫາປີນີ້, ມູນຄ້າການຄ້າ ລະຫວ່າງຈີນກັບອາຊຽນໄດ້ມີເຖິງ 185 ຕື້ 400 ລ້ານໂດລາ. ໃນຖານະທີ່ເປັນປະເທດກະຕິມະສັກຂອງງານວາງສະແດງສິນຄ້າເທື່ອນີ້, ອິນໂດເນເຊຍ ຈະຈັດກິດຈະກຳທີ່ມີຫຼາກຫຼາຍສີສັນໃນໄລຍະງານວາງສະແດງທີ່ຈະດຳເນີນໄປເປັນເວລາ 5 ວັນ, ເພື່ອຊຸກຍູ້ການຮ່ວມມືດ້ານເສດຖະກິດການຄ້າລະຫວ່າງປະເທດຕົນກັບປະເທດຕ່າງໆ. ທ່ານບົວດີໂອເນ,ຮອງປະທານາທິບໍດີອິນໂດເນເຊຍທີ່ພາຄະນະຜູ່ແທນເຂົ້າຮ່ວມງານວາງສະແດງສິນຄ້າກ່າວວ່າ:
"ເສົາຄ້ຳທີ່ສຳຄັນທີ່ສຸດໃນການຂະຫຍາຍການພົວພັນລະຫວ່າງສອງຝ່າຍພວກເຮົາ ກໍ່ແມ່ນເຂດການຄ້າເສລີຈີນ-ອາຊຽນ. ເຂດການຄ້າເສລີໃຫຍ່ອັນດັບທີ 3ຂອງທົ່ວໂລກ ໄດ້ສ້າງສຳເລັດຕາມເວລາກຳນົດໃນປີນີ້, ນີ້ເປັນຂີດຫມາຍສະແດງໃຫ້ເຫັນວ່າ ການພົວພັນຄູ່ຮ່ວມມືຍຸດທະສາດຂອງສອງຝ່າຍໄດ້ກ້າວໄປສູ່ສັງກາດໃຫມ່ແລ້ວ. ຂະບວນ ການເຊື່ອມໂຍງເສດຖະກິດຂອງພາກພື້ນເຂົ້າເປັນອັນດຽວກັນກໍ່ໄດ້ເປັນຂີດຫມາຍປະຫວັດສາດໃຫມ່." ຫຼັງຈາກນັ້ນ,ທ່ານເຈຍຊີ້ງລິນ, ປະທານສະພາປຶກສາການເມືອງປະຊາຊົນແຫ່ງຊາດຈີນກໍ່ໄດ້ເຂົ້າຮ່ວມພິທີໄຂກອງປະຊຸມສຸດຍອດທຸລະກິດແລະການລົງທຶນຂອງຈີນ-ອາຊຽນຄັ້ງທີ 7, ທ່ານໄດ້ກ່າວເນັ້ນວ່າ, ການປັບປຸງແລະເພີ່ມທະວີການພົວພັນຄູ່ຮ່ວມມືຍຸດທະສາດຈີນ-ອາຊຽນນັ້ນແມ່ນສອດຄ່ອງກັບຜົນປະໂຫຍດຮ່ວມກັນຂອງຈີນແລະອາຊຽນ.
ທ່ານປະທານເຈຍຊິ້ງລິນຍັງກ່າວວ່າ,ຈີນຫວັງວ່າກອງປະຊຸມສຸດຍອດເທື່ອນີ້ຈະລົງເລິກຫົວຂໍ້,ເສີມຂະຫຍາຍບົດບາດຂອງເຂດການຄ້າເສລີຈີນ-ອາຊຽນຕື່ມອີກ,ເປີດກວ້າງການຮ່ວມມືດ້ານເສດຖະກິດການຄ້າລະຫວ່າງສອງຝ່າຍແລະການລົງທຶນຕໍ່ກັນ,ເພີ່ມທະວີການກໍ່ສ້າງພື້ນຖານໂຄງລ່າງແລະຕິດຕໍ່ພົວພັນກັນ, ດຳເນີນການຮ່ວມມືກັນໃນໂຄງການສຳຄັນດ້ານຊີວິດການເປັນຢູ່ຂອງປະຊາຊົນ,ຊຸກຍູ້ໃຫ້ວິສາຫະກິດຂະຫນາດກາງແລະນ້ອຍຂອງຈີນກັບອາຊຽນແລກປ່ຽນການຮ່ວມມື,ເຕົ້າໂຮມສະຕິປັນຍາທີ່ດີເລີດເພື່ອມານຳໃຊ້,ປະກອບຄວາມຄິດຄວາມເຫັນ,ເພື່ອຊຸກຍູ້ໃຫ້ການຮ່ວມມືແບບຕ່າງຝ່າຍຕ່າງມີຜົນປະໂຫຍດລະຫວ່າງຈີນກັບອາຊຽນ ກ້າວໄປຫນ້າຢ່າງກວ້າງຂວາງແລະເລິກເຊິ່ງກວ່າເກົ່າ.
