ການພົວພັນຄູ່ຮ່ວມມືຍຸດທະສາດຈີນອາຊຽນມີໂອກາດພັດທະນາທີ່ໃຫຍ່ຫລວງກວ່າເກົ່າ
(GMT+08:00) 2010-10-26 15:01:04 cri
ວັນທີ 25 ຕຸລານີ້,ໃນເວລາໃຫ້ສຳພາດຕໍ່ນັກຂ່າວ, ນາງຖົງສ້ຽວຫລິງ,ເອກອັກຄະລັດຖະທູດຈີນປະຈຳອາຊຽນຜູ່ທີສອງກ່າວວ່າ, ເມື່ອໄດ້ຮັບແຕ່ງຕັ້ງເປັນເອກອັກຄະລັດຖະທູດຈີນປະຈຳອາຊຽນ,ນາງຮູ້ສຶກທັງດີໃຈທັງມີກຽດ ຫລາຍ,ແລະຮູ້ວ່າຕົນເອງມີຫນ້າທີ່ອັນຫນັກຫນາ.ການພົວພັນເປັນປະເທດຄູ່ເຈລະຈາລະຫວ່າງຈີນກັບອາຊຽນຈະເຂົ້າສູ່ປີທີ 20 ແລ້ວ,ການພົວພັນຄູ່ຮ່ວມມືຍຸດທະສາດລະ ຫວ່າງສອງຝ່າຍພວມຢືນຢູ່ຈຸດເລີ່ມຕົ້ນອັນໃຫມ່,ແລະຈະປະເຊີນກັບໂອກາດພັດທະນາທີ່ດີກວ່າເກົ່າ.
ນາງຖົງສ້ຽວຫລິງເຄີຍເປັນເອກອັກຄະລັດຖະທູດຈີນປະຈຳບຼູໄນ,ແລະໄດ້ເຮັດວຽກການຕ່າງປະເທດ ກັບອາຊີອາຄະເນເປັນເວລາດົນນານ.ນາງກ່າວວ່າ,ໃນໄລຍະດຳລົງຕຳແຫນ່ງ,ນາງຈະອອກແຮງຊຸກຍູ້ວຽກງານຕ່າງໆເຊັ່ນ:ຄວາມໄວ້ເນື້ອເຊື່ອໃຈກັນດ້ານການເມືອງລະຫວ່າງຈີນກັບອາຊຽນ, ການພັດທະນາແບບຍືນຍົງ,ການແລກປ່ຽນດ້ານວັດທະນະທຳສັງຄົມມະນຸດແລະການສ້າງສາເຂດການຄ້າເສລີ,ເພື່ອເຮັດໃຫ້ການພົວພັນຄູ່ຮ່ວມມືຍຸດທະສາດລະຫວ່າງຈີນກັບອາຊຽນໃຫ້ກ້າວຂຶ້ນສູ່ລະດັບສູງກວ່າເກົ່າ.
ນາງຖົງສ້ຽວຫລິງກ່າວວ່າ, ປີ 2011 ແມ່ນປີທີ່ຈີນກັບອາຊຽນສ້າງການພົວພັນຄູ່ເຈລະຈາຄົບຮອບ 20 ປີ.ພາຍໃນເວລາບໍ່ຮອດ 20 ປີທີ່ຜ່ານມາ, ສອງຝ່າຍໄດ້ຈາກຄູ່ເຈລະຈາກາຍເປັນຄູ່ຍຸດທະສາດ,ມູນຄ່າການຄ້າກໍ່ເຕີບໂຕຫລາຍກວ່າ 20% ຕໍ່ປີ,ເຂດການຄ້າເສລີຈີນອາຊຽນກໍ່ສ້າງສຳເລັດຢ່າງຮອບດ້ານ, ຈີນກາຍເປັນຄູ່ການຄ້າໃຫຍ່ອັນດັບຫນຶ່ງຂອງອາຊຽນ, ການຮ່ວມມືລະຫວ່າງຈີນກັບອາຊຽນໄດ້ເຂົ້າສູ່ທົ່ວທຸກຂະແຫນງການແລ້ວ.
ນາງຖົງສ້ຽວຫລິງກ່າວວ່າ, ການສ້າງພື້ນຖານໂຄງລ່າງໃຫ້ເຊື່ອມໂຍງເຂົ້າກັນແມ່ນການຮັບປະກັນອັນສຳຄັນຕໍ່ການສ້າງສາເຂດການຄ້າເສລີຈີນອາຊຽນ.ການເລັ່ງລັດຊຸກຍູ້ການສ້າງພື້ນຖານໂຄງລ່າງຈີນກັບອາຊຽນໃຫ້ເຊື່ອມໂຍງເຂົ້າກັນແມ່ນທິດທີ່ຕ້ອງເຮັດກ່ອນຫມູ່ໃນການຮ່ວມມືລະຫວ່າງສອງຝ່າຍ.ຈີນກັບອາຊຽນໄດ້ວາງແຜນການຍຸດທະສາດດ້ານຄົມມະນາຄົມຈີນອາຊຽນແລ້ວ, ແລະພວມຕົກລົງເອົາໂຄງການຕາຫນ່າງຄົມມະນາຄົມທາງບົກ,ທາງທະເລແລະທາງອາກາດເປັນໂຄງການທີ່ຈະສ້າງກ່ອນຫມູ່.
ນາງກ່າວວ່າ, ຈີນເອົາໃຈໃສ່ທີ່ສຸດນຳແຜນການລວມກ່ຽວກັບການສ້າງພື້ນຖານໂຄງລ່າງຂອງອາຊຽນໃຫ້ເຊື່ອມໂຍງເຂົ້າກັນທີ່ຈະໃຫ້ອາຊຽນຄົ້ນ ຄວ້າພິຈາລະນາເພື່ອຮັບຮອງ,ແລະຍິນດີພົວພັນກັບການສ້າງສາພື້ນຖານໂຄງລ່າງຂອງຈີນແລະອາຊຽນໃຫ້ເຊື່ອມໂຍງເຂົ້າກັນ,ແລ້ວໃຫ້ການສະຫນັບສະຫນູແກ່ໂຄງການທີ່ຈະເຮັດກ່ອນຫມູ່ໃນແຜນການດັ່ງກ່າວ, ເພື່ອພະຍາຍາມເຮັດໃຫ້ປະເທດຕ່າງໆມີການເຊື່ອມໂຍງເຂົ້າກັນທາງດ້ານຄົມມະນາຄົມຂົນສົ່ງ, ໂທລະຄົມແລະພະລັງງານ.ນາງເວົ້າວ່າ:"ເປົ້າຫມາຍສຸດທ້າຍທີ່ຈີນກັບອາຊຽນເຊື່ອມໂຍງກັນແມ່ນເພື່ອໃຫ້ທຶນ,ວັດຖຸແລະຜູ່ຄົນໄປມາຢ່າງສະດວກສະບາຍໃນພາກພື້ນນີ້,ເຊິ່ງຈະມີບົດບາດຊຸກຍູ້ຢ່າງແຂງແຮງທີ່ສຸດແກ່ການສ້າງເຂດການຄ້າເສລີຈີນອາຊຽນ."
ນາງຖົງສ້ຽວຫລິງກ່າວວ່າ, ຈີນສະຫນັບສະຫນູນແລະໄດ້ຕັ້ງຫນ້າເຂົ້າຮ່ວມການກໍ່ສ້າງປະຊາຄົມ ອາຊຽນເປັນອັນຫນຶ່ງອັນດຽວກັນຕະຫລອດມາ.ໃນເວລາທີ່ເກີດວິກິດການການເງິນສາກົນຢ່າງຮ້າຍແຮງ, ຈີນໄດ້ໃຫ້ການຊ່ວຍເຫລືອພິເສດທີ່ມີມູນຄ່າ 270 ລ້ານຢວນແກ່ສາມປະເທດສະມາຊິກໃຫມ່ຂອງອາຊຽນຄືລາວ,ກຳປູເຈຍແລະມຽນມາ.ຈີນຍັງໄດ້ອອກແຮງຊຸກຍູ້ການຮ່ວມມືຢູ່ອະນຸພາກພື້ນແມ່ນນ້ຳຂອງແລະເຂດເຕີບໂຕທາງເສດຖະກິດຢູ່ພາກຕາເວັນອອກຂອງອາຊຽນ,ເພື່ອຊ່ວຍອາຊຽນຫລຸດຄວາມຜິດໂຕນກັນໃນການພັດທະນາ."ໃນຕໍ່ຫນ້າ,ຈີນຍັງຈະສືບຕໍ່ຜ່ານຊ່ອງທາງຕ່າງໆເຊັ່ນ:ໃຫ້ການຊ່ວຍເຫລືອລ້າ,ໃຫ້ເງິນກູ້ພິເສດຫລືເງິນກູ້ການຄ້າ,ການອົບຮົມບຸກຄະລາກອນແລະອື່ນໆເພື່ອຊ່ວຍປະເທດອາຊຽນຍົກຄວາມສາມາດສ້າງສາໃຫ້ສູງຂຶ້ນ."
ໃນເວລາຕອບຄຳຖາມກ່ຽວກັບບັນຫາທະເລຈີນໃຕ້,ນາງຖົງສ້ຽວຫລິງກ່າວວ່າ, ຈີນກັບປະເທດອາຊຽນບາງປະເທດມີຄວາມຂັດແຍ່ງກັນໃນດ້ານອະທິປະໄຕຂອງຜືນແຜ່ນດິນແລະສິດທະເລ,ນັ້ນແມ່ນບັນຫາຕົກທອດມາແຕ່ປະຫວັດສາດ.ຈີນມີຄວາມເຫັນຕະຫລອດມາວ່າໃຫ້ແກ້ໄຂບັນຫາດ້ວຍສັນຕິວິທີບົນພື້ນຖານທີ່ສົນທະນາແລະປຶກສາຫາລືກັນ,ບໍ່ຄວນໃຊ້ກຳລັງອາວຸດ, ຄັດຄ້ານການຫັນບັນຫາເຫລົ່ານີ້ໃຫ້ເປັນບັນຫາສາກົນ.ນາງເວົ້າວ່າ,ຈີນເຫັນວ່າປະເທດແລະຂົງເຂດທີ່ບໍ່ກ່ຽວພັນກັບຄວາມຂັດແຍ່ງດັ່ງກ່າວບໍ່ຄວນເຂົ້າແຊກບັນຫາເຫລົ່ານີ້,ຖ້າບໍ່ດັ່ງນັ້ນບັນຫາຈະສັບສົນຂຶ້ນຕື່ມ,ບໍ່ມີຜົນດີຕໍ່ການແກ້ໄຂບັນຫາແລະຈະທຳລາຍບັນຍາກາດສັນຕິພາບໃນພາກພື້ນນີ້.
