ຜູ່ຊ່ຽວຊານເຫັນວ່າ ການຢ້ຽມຢາມຫວຽດນາມຂອງນາຍົກຈີນແມ່ນເພື່ອຊຸກຍູ້ໃຫ້ການຮ່ວມມືລະຫວ່າງຈີນກັບອາຊຽນມີການພັດທະນາຢ່າງແທ້ຈິງ
(GMT+08:00) 2010-10-27 15:11:47 cri
ຕາມຂ່າວCRI:ວັນທີ28ຕຸລານີ້,ທ່ານເວີ່ນເຈ່ຍປາວ,ນາຍົກລັດຖະມົນຕີຈີນຈະເດີນທາງໄປຮ່າໂນ້ຍ,ນະຄອນຫຼວງຂອງຫວຽດນາມເພື່ອເຂົ້າຮ່ວມກອງປະຊຸມສຸດຍອດຕ່າງໆຂອງອາ ຊຽນ,ນີ້ແມ່ນການເຄື່ອນໄຫວທາງການຕ່າງປະເທດອັນສຳຄັນອີກເທື່ອໜຶ່ງຂອງຜູ່ນຳຈີນ,ໃນກໍລະນີທີ່ສະພາບແວດລ້ອມປະເທດອ້ອມຂ້າງຂອງຈີນແລະສະຖານະການຂອງອາຊີຕາເວັນອອກເກີດສະພາບການໃໝ່ແຕ່ຕົ້ນປີນີ້ມາ.ຜູ່ຊ່ຽວຊານທີ່ຄົ້ນຄວ້າການຕ່າງປະເທດຂອງຈີນເຫັນວ່າ,ສັນຕິພາບ,ການຮ່ວມມືແລະການພັດທະນາຈະແມ່ນເນື້ອໃນສຳຄັນຂອງການຢ້ຽມຢາມຫວຽດນາມຂອງ ທ່ານເວີ່ນເຈ່ຍປາວເທື່ອນີ້,ການຮ່ວມມືລະຫວ່າງຈີນກັບອາຊຽນຈະເລິກເຊິ່ງຕື່ມອີກ.
ສາດສະດາຈານຊິນຢາຊິ່ງ,ຜູ່ຊ່ຽວຊານທີ່ຄົ້ນຄວ້າການຕ່າງປະເທດຂອງຈີນ,ຮອງຫົວໜ້າປະຈຳຂອງສະຖາບັນການຕ່າງປະເທດກ່າວວ່າ,ການຮ່ວມມືລະຫວ່າງຈີນກັບອາຊຽນໄດ້ສົ່ງສັນຕິພາບ,ໂອກາດແລະການພັດທະນາມາໃຫ້ແກ່ອາຊີຕາເວັນອອກ.
"ຈີນຮ່ວມມືກັບອາຊຽນ,ກ່ອນອື່ນແມ່ນໄດ້ນຳເອົາສັນຕິພາບແລະສະຖຽນລະພາບມາໃຫ້ເຂດນີ້,ນີ້ບໍ່ມີຜູ່ໃດຈະປະຕິເສດໄດ້.ສັງເກດຈາກທ່າທີຕົ້ນຕໍ,ປະເທດອາຊຽນເຫັນໂດຍທົ່ວໄປວ່າ ໂອກາດທີ່ຈີນນຳມາໃຫ້ແມ່ນຫຼາຍກວ່າສິ່ງທ້າທາຍ."
ສາດສະດາຈານຊິນກ່າວວ່າ,ດຽວນີ້,ຂົງເຂດເສດຖະກິດຂອງອາຊີຕາເວັນອອກໄດ້ເລີ່ມເປັນຮູບເປັນຮ່າງຂຶ້ນເປັນຕ່ອງໂສ້ຜະລິດອັນໜຶ່ງ,ເຊິ່ງລວມທັງຈີນແລະອາຊຽນ.ສາດສະດາຈານຈີນຊິນເຫັນວ່າ,ໃນສະພາບແບບນີ້,ທ່ານເວີ່ນເຈ່ຍປາວເຂົ້າຮ່ວມກອງປະຊຸມເທື່ອນີ້ຈະເຮັດໃຫ້ການຮ່ວມມືລະຫວ່າງຈີນກັບປະເທດອາຊຽນເລິກເຊິ່ງຕື່ມອີກ.
"ການຢ້ຽມຢາມຂອງທ່ານນາຍົກເວີ່ນເຈ່ຍປາວສະແດງໃຫ້ເຫັນວ່າ,ການຮ່ວມມືລະຫວ່າງ ຈີນກັບອາຊຽນແມ່ນໄດ້ຮັບການຊຸກຍູ້ໃຫ້ກ້າວໄປໜ້າ,ຕາມຄາດກັນວ່າ,ໃນໄລຍະຢ້ຽມຢາມເທື່ອນີ້,ຈະມີການເຊັນແຜນປະຕິບັດງານ5ປີຄັ້ງທີສອງລະຫວ່າງຈີນກັບອາຊຽນ,ໃນນັ້ນມີເນື້ອໃນກ່ຽວກັບການຮ່ວມມືໃນຂົງເຂດທີ່ເລິກເຊິ່ງແລະສຳຄັນຈຳນວນໜຶ່ງ."
ໃນກໍລະນີທີ່ສະຖານະການພາກພື້ນອາຊີຕາເວັນອອກ ມີສະຖຽນລະພາບໂດຍລວມ,ສາສະດາຈານຊິນຊີ້ອອກວ່າ,ນັບແຕ່ຕົ້ນປີນີ້ມາ, ຈີນໄດ້ປະເຊີນກັບປັດໄຈທີ່ສັບສົນຢູ່ອາຊີຕາເວັນອອກນັ້ນເພີ່ມຂຶ້ນຢ່າງຈະແຈ້ງ,ປະເທດໃຫຍ່ນອກພາກພື້ນເຂົ້າແຊກແຊງພາກພື້ນອາຊີຕາເວັນອອກ ນັບມື້ນັບແຂງແຮງຂຶ້ນ, ຄວາມຂັດແຍ່ງຍ້ອນບັນຫາຜືນແຜ່ນດິນນັ້ນກໍໜັກຂຶ້ນ,ທັງໝົດເຫຼົ່ານີ້ລ້ວນແຕ່ນຳເອົາຄວາມສ່ຽງໃໝ່ແລະຄວາມບໍ່ແນ່ນອນ ມາໃຫ້ສະພາບແວດລ້ອມປະເທດອ້ອມຂ້າງຂອງຈີນ. ໂດຍປະເຊີນກັບສະພາບດັ່ງກ່າວ, ໃນການໄປຢ້ຽມຢາມຫວຽດນາມເທື່ອນີ້, ທ່ານນາຍົກລັດຖະມົນຕີເວີ່ນເຈຍປາວ ຈະແລກປ່ຽນຄວາມເຫັນກັບຜູ້ນຳຂອງປະເທດທີ່ກ່ຽວຂ້ອງກ່ຽວກັບບັນຫາຈຸດຮ້ອນຂອງພາກພື້ນ ເຊິ່ງມີຜົນດີຕໍ່ການເພີ່ມຄວາມເຂົ້າໃຈກັນ,ປົກປັກຮັກສາສັນຕິພາບແລະການພັດທະນາ.
ກ່ຽວກັບອາເມລິກາແລະຣັດເຊຍ ອາດຈະຖືກຮັບເຂົ້າເປັນສະມາຊິກຂອງກອງປະຊຸມສຸດຍອດອາຊີຕາເວັນອອກຢ່າງເປັນທາງການນັ້ນ, ທ່ານສາສະດາຈານຊິນກ່າວວ່າ, ນະໂຍບາຍການຕ່າງປະເທດຂອງຈີນ ໃນພາກພື້ນອາຊີຕາເວັນອອກ ແມ່ນເລີ່ມຈາກແນວຄິດພາກພື້ນທີ່ເປີດປະຕູ,ຈີນສະໜັບສະໜູນຂະບວນການເຊື່ອມໂຍງເຂົ້າເປັນປະຊາຄົມດຽວກັນຂອງອາຊຽນ,ສະໜັບສະໜູນອາຊຽນເສີມຂະຫຍາຍບົດບາດນຳພາໃນຂະບວນການຮ່ວມມືອາຊີຕາເວັນອອກ.
ໃນການຢ້ຽມຢາມຫວຽດນາມເທື່ອນີ້ ທ່ານນາຍົກລັດຖະມົນຕີເວີ່ນເຈຍປາວຍັງຈະເຂົ້າຮ່ວມກອງປະຊຸມສຸດຍອດຈີນ,ຍີ່ປຸ່ນແລະສາທາລະນະລັດເກົາຫຼີ.ພາຍໃຕ້ສະພາບ ທີ່ການພົວພັນສອງປະເທດຈີນຍີ່ປຸ່ນເກີດມີຄວາມຂັດແຍ່ງໃນບັນຫາເກາະຕ້ຽວຢູໃນປັດຈຸບັນ,ຜູ້ນຳສອງປະເທດນີ້ຈະໄດ້ພົບປະກັນໃນກອງປະຊຸມເທື່ອນີ້ໄດ້ຫຼືບໍ່, ນີ້ແມ່ນບັນຫາທີ່ວົງການທົ່ວໄປສົນໃຈນຳ.ທ່ານສາສະດາຈານຊິນກ່າວວ່າ, ນັບແຕ່ຈີນດຳເນີນການປະຕິຮູບແລະໄຂປະຕູສູ່ພາຍນອກເປັນເວລາ 30ກວ່າປີມານີ້ ໄດ້ຍຶດໝັ້ນແນວທາງການຕ່າງປະເທດທີ່ສັນຕິພາບ, ຮ່ວມມື, ມີຜົນປະໂຫຍດຮ່ວມກັນແລະພັດທະນາ, ບໍ່ເຄີຍປ່ຽນແປງຈັກເທື່ອ. ພ້ອມກັນນັ້ນ ໃນບັນຫາດ້ານຫຼັກການເຊັ່ນບັນຫາກ່ຽວພັນເຖິງຜືນແຜ່ນດິນນັ້ນ, ຈີນກໍຈະຍຶດໝັ້ນຫຼັກໝັ້ນ ຢ່າງເດັດດ່ຽວ,ທ່ານກ່າວວ່າ: "ຈີນສະເໜີໃຫ້ໂຈະຄວາມຂັດແຍ່ງໄວ້ແລະພັດທະນາຮ່ວມກັນຕໍ່ຜືນແຜ່ນດິນທີ່ມີຄວາມຂັດແຍ່ງກັນ, ທັງນີ້ກໍແມ່ນນະໂຍບາຍແລະຫຼັກການທີ່ມີຄວາມປາຖະໜາ ດີຕໍ່ສັນຕິພາບແລະການຮ່ວມມືກັນ, ແຕ່ຖ້າຢາກທ້າທາຍຕໍ່ຫຼັກການນີ້ພຽງໜ້ອຍດຽວ, ຂ້າພະເຈົ້າຮູ້ສຶກວ່າ, ຈີນຈະຍອມບໍ່ໄດ້ຢ່າງເດັດຂາດ."
