ນາຍົກຈີນເດີນທາງໄປຫວຽດນາມເຂົ້າຮ່ວມກອງປະຊຸມສຸດຍອດຕ່າງໆ
(GMT+08:00) 2010-10-28 15:15:42 cri
ຕາມຂ່າວ cri:ວັນທີ 28 ຕຸລານີ້, ທ່ານເວີ່ນເຈ່ຍປາວ, ນາຍົກລັດຖະມົນຕີຈີນໄດ້ເດີນທາງໄປນະຄອນຫລວງຮ່າໂນຍຂອງຫວຽດນາມເພື່ອເຂົ້າຮ່ວມກອງປະຊຸມສຸດຍອດຕ່າງໆຂອງອາຊຽນແລະກອງປະຊຸມສຸດຍອດອາຊີຕາເວັນອອກ.ນີ້ແມ່ນການເຄື່ອນໄຫວທາງການຕ່າງປະເທດຕໍ່ປະເທດອ້ອມຂ້າງຂອງຜູ່ນຳຈີນແຕ່ຕົ້ນປີນີ້ມາ.
ແຕ່ປີນີ້ມາ, ສະຖານະການຂອງເຂດອາຊີຕາເວັນອອກເກີດມີການປ່ຽນແປງໃຫມ່ບາງຢ່າງ,ໂດຍສະເພາະແມ່ນອາເມລິກາໄດ້ເພີ່ມການມີຫນ້າເຂົ້າມາເຂດອາຊີຕາເວັນອອກ,ແລະປະກາດຈະກັບຄືນສູ່ອາຊີຢ່າງເປີດເຜີຍ,ການປ່ຽນແປງດັ່ງກ່າວຈະໄດ້ຖືກສະແດງອອກໃນກອງປະຊຸມສຸດຍອດຕ່າງໆເທື່ອນີ້.ເຊັ່ນວ່າ: ກອງປະຊຸມສຸດຍອດອາຊີຕາເວັນອອກຈະຮັບເອົາອາເມລິກາແລະຣັດເຊຍເປັນສະມາຊິກທາງການ.ພ້ອມກັນນັ້ນ, ບັນຫາທະເລຈີນໃຕ້, ການພົວພັນຈີນຍີ່ປຸ່ນແລະບັນຫາຈຸດສຸມໃນປັດຈຸບັນກໍ່ຈະຖືກນຳມາກ່າວໃນກອງປະຊຸມຕ່າງໆເທື່ອນີ້.
ໃນເວລາກ່າວເຖິງເບື້ອງຫລັງແລະຄວາມຫມາຍຂອງການຢ້ຽມຢາມຂອງທ່ານເວີ່ນເຈ່ຍປາວເທື່ອນີ້,ທ່ານຫູເຈິ້ງຢ້ວຍ,ຜູ່ຊ່ວຍລັດຖະມົນຕີກະຊວງການຕ່າງປະເທດຈີນກ່າວວ່າ, ພາຍໃນສະພາບທີ່ສະຖານະການອາຊີຕາເວັນອອກແລະປະເທດຕ່າງໆເກີດມີການປ່ຽນແປງໃຫມ່,ປະເທດອາຊີຕາເວັນອອກມີຄວາມຈຳເປັນຕ້ອງທຳຄວາມເຂົ້າໃຈກັນໂດຍຜ່ານການເຈລະຈາ,ເພື່ອເພີ່ມຄວາມເຂົ້າໃຈແລະຮັບຣູ້ຕໍ່ນະໂຍບາຍພັດທະນາຂອງກັນແລະກັນ, ສ້າງບັນຍາກາດແລະເງື່ອນໄຂອັນດີງາມໃຫ້ແກ່ການຂະຫຍາຍຕົວຢ່າງປອດໃສແລະຫມັ້ນຄົງຂອງການພົວພັນລະຫວ່າງສອງຝ່າຍແລະການຮ່ວມມືໃນພາກພື້ນ.
ເທື່ອນີ້,ທ່ານເວີ່ນເຈ່ຍປາວຈະເຂົ້າຮ່ວມ 4 ກອງປະຊຸມສຳຄັນຄື:ກອງປະຊຸມສຸດຍອດອາຊຽນ +1,ກອງປະຊຸມສຸດຍອດອາຊຽນ +3 ຄືຈີນຍີ່ປຸນແລະສ.ເກົາຫລີ,ກອງປະຊຸມສຸດຍອດອາຊີຕາເວັນອອກແລະກອງປະຊຸມສຸດຍອດຈີນຍີ່ປຸ່ນແລະສ.ເກົາຫລີ. 4 ກອງປະຊຸມນີ້ແມ່ນກົນໄກ 4 ຢ່າງ, ເຊິ່ງລ້ວນແຕ່ແມ່ນພາກສ່ວນຂອງກົນໄກຮ່ວມມືຢູ່ພາກພື້ນອາຊີຕາເວັນອອກ,ແຕ່ເນັ້ນໃສ່ບ່ອນທີ່ຕ່າງກັນ.
ກົນໄກອາຊຽນ +1 ຖືວ່າແມ່ນພື້ນຖານແລະໃຈກາງຂອງການຮ່ວມມືລະຫວ່າງຈີນກັບອາຊຽນ.ຂະບວນວິວັດເຈລະຈາລະຫວ່າງຈີນກັບອາຊຽນແມ່ນເລີ່ມແຕ່ປີ 1991 ເປັນຕົ້ນມາ, ເມື່ອໄດ້ທຳຄວາມພະຍາຍາມເປັນເວລາ 19 ປີແລ້ວ, ການພົວພັນຈີນອາຊຽນໄດ້ກາຍເປັນການພົວພັນທີ່ມີຊີວິດຊີວາກວ່າຫມູ່ແລະໄດ້ຮັບຫມາກຜົນຫລາຍກວ່າຫມູ່ລະຫວ່າງອາຊຽນກັບປະເທດ ຄູ່ເຈລະຈາອື່ນໆ,ເຂດການຄ້າເສລີຈີນອາຊຽນທີ່ເປັນຫມາກຜົນສຳຄັນອັນຫນຶ່ງໃນການຮ່ວມມືລະຫວ່າງສອງຝ່າຍໄດ້ສ້າງຕັ້ງຂຶ້ນຢ່າງຮອບດ້ານໃນເດືອນມັງກອນປີນີ້.ປີຫນ້າສອງຝ່າຍຍັງຈະສະຫລອງຄົບຮອບ 20 ປີຂອງການສ້າງການພົວພັນເປັນປະເທດຄູ່ເຈລະຈາ,ການຮ່ວມມືລະຫວ່າງຈີນກັບອາຊຽນຈະກ້າວເຂົ້າສູ່ຍຸກໃຫມ່.
ສ່ວນອາຊຽນ +3 ແມ່ນຂອບແລະເສົາຄ້ຳທີ່ສຳຄັນສຳລັບຈີນເຂົ້າຮ່ວມການຮ່ວມມືຢູ່ເຂດອາຊີຕາເວັນອອກ.ນັບແຕ່ປີ 1997 ເປັນຕົ້ນມາ,ໄດ້ຈັດກອງປະຊຸມສຸດຍອດອາຊຽນ +3 12 ເທື່ອແລ້ວ, ຜູ່ນຳຈີນໄດ້ເຂົ້າຮ່ວມຫມົດ.
ກອງປະຊຸມສຸດຍອດອາຊີຕາເວັນອອກສຳຄັນແມ່ນສົນໃຈນຳການຮ່ວມມືໃນຂົງເຂດພະລັງງານ,ການເງິນ,ການສຶກສາ,ໄຂ້ຫວັດສັດປີກແລະການຫລຸດຜ່ອນໄພທຳມະຊາດ,ແລະໄດ້ກໍ່ຮ່າງສ້າງຕົວເປັນກົນໄກພົບປະປະຈຳລະຫວ່າງລັດຖະມົນຕີດ້ານເສດຖະກິດການຄ້າ,ພະລັງງານແລະສິ່ງແວດລ້ອມໃນເບື້ອງຕົ້ນແລ້ວ.
ກອງປະຊຸມສຸດຍອດຈີນຍີ່ປຸ່ນສ.ເກົາຫລີແມ່ນກົນໄກພົບປະກັນເປັນປະຈຳລະຫວ່າງຜູ່ນຳສາມປະເທດພາຍໃຕ້ຂອບອາຊຽນ +3.
ນາງທົງສ້ຽວລິງ, ເອກອັກຄະລັດຖະທູດຈີນປະຈຳອາຊຽນໃຫ້ສຳພາດຕໍ່ນັກຂ່າວວ່າ, ທ່ານເວີ່ນເຈ່ຍປາວຈະບັນລະຍາຍທັດສະນະຂອງຈີນກ່ຽວກັບການຮ່ວມມືລະຫວ່າງຈີນອາຊຽນ,ການຮ່ວມມືໃນພາກພື້ນແລະການພັດທະ ນາແບບຍືນຍົງຂອງອາຊີຕໍ່ກອງປະຊຸມ,ແລະສະເຫນີຊ່ອງທາງຮ່ວມມືຕົວຈິງຫລາຍຢ່າງ.ເວົ້າສຳລັບການຮ່ວມມືລະຫວ່າງຈີນກັບອາຊຽນແລ້ວ, ຈີນຄອງຄອຍກອງປະຊຸມຈະໄດ້ຜ່ານ"ແຜນປະຕິບັດງານກ່ຽວກັບການຜັນຂະຫຍາຍຖະແຫບລງການຮ່ວມລະຫວ່າງຈີນອາຊຽນທີ່ສ້າງການພົວພັນຄູ່ຮ່ວມມືຍຸດທະສາດທີ່ມຸ້ງຫນ້າສູ່ສັນຕິພາບແລະຄວາມຈະເລີນຮຸ່ງເຮືອງແຕ່ປີ 2011- 2015."ສະບັບທີສອງນອກນີ,ແວັບໄຊຈີນອາຊຽນກໍ່ຈະເປີດຢ່າງເປັນທາງການໃນໄລຍະກອງປະຊຸມດັ່ງກ່າວ.
