ກອງປະຊຸມສຸດຍອດອາຊຽນຄັ້ງທີ 17 ອັດລົງ
(GMT+08:00) 2010-10-29 16:07:37 cri
ຕອນແລງວັນທີ 28 ຕຸລານີ້, ກອງປະຊຸມສຸດຍອດອາຊຽນຄັ້ງທີ 17ໄດ້ອັດລົງຢູ່ສູນປະຊຸມແຫ່ງຊາດ ນະຄອນຫຼວງຮ່າໂນ້ຍຂອງຫວຽດນາມ, ກອງປະຊຸມຮັບຮອງ＂ແຜນແມ່ບົດກ່ຽວກັບການເຊື່ອມຕໍ່ໃນອາຊຽນ＂ແລະເອກະສານອື່ນໆ,ແລະເຜີຍແຜ່＂ຖະແຫຼງ ການຮ່າໂນ້ຍ ＂,ເພື່ອໃຫ້ມີບາດກ້າວໃຫມ່ໃນການສ້າງສາປະຊາຄົມອາຊຽນ.
ໃນກອງປະຊຸມສຸດຍອດອາຊຽນຄັ້ງທີ 17 ທີ່ຈັດຂຶ້ນໃນຕອນບ່າຍມື້ດຽວກັນ, ຜູ່ນຳອາຊຽນ ໄດ້ຢືນຢັນຢ່າງເຕັມທີ່ຕໍ່ຫມາກຜົນແລະຄວາມສຳຄັນຂອງກອງປະຊຸມສຸດຍອດອາຊຽນຄັ້ງທີ 16,ຫຼັງຈາກກອງປະຊຸມ,ຍັງໄດ້ຜ່ານຖະແຫຼງການກ່ຽວກັບການເພີ່ມທະວີການສັບຊ້ອນຈັດວາງຊັບພະຍາກອນມະນຸດໃນພາກພື້ນອາຊຽນ,ຍົກລະດັບສີມືແຮງງານໃຫ້ສູງຂຶ້ນ,ເພື່ອຊຸກຍູ້ໃຫ້ເສດຖະກິດຟື້ນຕົວຄືນແລະເຕີບໂຕແບບຍືນຍົງ,ແລະ＂ຖະແຫຼງການຮ່າໂນ້ຍ＂ທີ່ມີຈຸດປະສົງເພື່ອ ເພີ່ມທະວີສິດຜົນປະໂຫຍດແລະສະຫວັດດີການຂອງແມ່ຍິງແລະເດັກນ້ອຍໃນອາຊຽນ ໃນກອງປະຊຸມ,ຜູ່ນຳຂອງ 10 ປະເທດອາຊຽນໄດ້ຮ່ວມກັນລົງເລິກຄົ້ນຄວ້າຫາລື ກ່ຽວກັບການເພີ່ມທະວີການຕິດຕໍ່ປະສານງານກັນພາຍໃນອາຊຽນພ້ອມດ້ວຍການຂະ ຫຍາຍການພົວພັນລະລະຫວ່າງອາຊຽນກັບປະເທດຄູ່ເຈລະຈາໃຫ້ລົງເລິກກວ່າເກົ່າ. ຜູ່ນຳຂອງປະເທດຕ່າງໆທີ່ຮ່ວມປະຊຸມ ເປັນເອກະສັນກັນເຫັນດີໃຫ້ສືບຕໍ່ຊຸກຍູ້ການສ້າງປະຊາຄົມອາຊຽນແລະເລັ່ງລັດປະຕິບັດກົດບັດອາຊຽນໃຫ້ໄວຂຶ້ນບົນພື້ນຖານທີ່ມີຢູ່ແລ້ວໃນປະຈຸບັນ, ເພີ່ມທະວີການຕິດຕໍ່ພົວພັນກັນພາຍໃນອາຊຽນ,ພັດທະ ນາແລະ ລົງເລິກການພົວພັນຕໍ່ຕ່າງປະເທດຂອງອາຊຽນຕື່ມອີກ, ພ້ອມກັນນັ້ນ, ກໍ່ຮັບປະກັນຖານະບົດບາດໃຈກາງຂອງອາຊຽນໃນຂອບພາກພື້ນ, ເພີ່ມທະວີການຮ່ວມມືກັນລະຫວ່າງປະເທດຕ່າງໆຂອງອາຊຽນໃນດ້ານຕ່າງໆ ເຊັ່ນ: ເຮັດໃຫ້ເສດຖະກິດຟື້ນຕົວຄືນພາຍຫຼັງວິກິດການການເງິນ,ການພັດທະນາແບບຍືນຍົງ, ການຮັບມືກັບການປ່ຽນແປງຂອງດິນຟ້າອາກາດ,ປ້ອງກັນພະຍາດລະບາດ, ຫຼຸດຜ່ອນໄພທຳມະຊາດແລະອື່ນໆ.
ນອກນີ້, ຜູ່ນຳຂອງປະເທດອາຊຽນໄດ້ຕົກລົງໃຫ້ສ້າງຕັ້ງສະພາປະສານງານຂອງອາຊຽນ,ເພື່ອປະສານງານແລະຕິດຕາມຄຸ້ມຄອງຂະບວນການຈັດຕັ້ງປະຕິບັດ＂ແຜນແມ່ບົດກ່ຽວກັບການເຊື່ອມຕໍ່ອາຊຽນ＂, ຍິນດີຕ້ອນຮັບຄວາມພະຍາຍາມຂອງລັດຖະມົນຕີກະຊວງການເງິນຂອງປະເທດອາຊຽນເພື່ອສ້າງຕັ້ງກອງທຶນພື້ນຖານໂຄງລ່າງຂອງອາຊຽນ. ກອງປະຊຸມເຫັນວ່າ,ການຕັດສິນໃຈດັ່ງກ່າວຂອງຜູ່ນຳຂອງປະເທດອາຊຽນ ມີຜົນດີຕໍ່ການຊຸກຍູ້ການຕິດຕໍ່ພົວພັນກັນໃນພາກພື້ນອາຊຽນຢ່າງຮອບດ້ານ,ແລະເປີດຊ່ອງທາງໃຫ້ແກ່ການຕິດຕໍ່ພົວປະສານງານກັນໃນພາກພື້ນອາຊີຕາເວັນອອກ. ທ່ານສຸລິນ ພິດສຸວັນ, ເລຂາທິການໃຫຍ່ອາຊຽນຍັງເປີດເຜີຍວ່າ,ແຜນແມ່ບົດດັ່ງກ່າວ ມີ 700 ກວ່າໂຄງການແລະແຜນງານຍ,ມູນຄ່າປະມານ 38 ລ້ານໂດລາ. ທ່ານຫວັງໃຫ້ອາຊຽນແລະປະເທດຄູ່ເຈລະຈານຳໃຊ້ການລົງທຶນຫຼາຍຝ່າຍເພື່ອຕັ້ງຫນ້າເຂົ້າຮ່ວມແຜນແມ່ບົດ,ແລະຊຸກຍູ້ການຕິດຕໍ່ປະສານງານກັນລະຫວ່າງພາຍໃນອາຊຽນກັບອາຊຽນແລະປະເທດຄູ່ເຈລະ ຈາຢ່າງແທ້ຈິງ.
ໃນດ້ານການພົວພັນກັບຕ່າງປະເທດເພື່ອພັດທະນາອາຊຽນ,ຜູ່ນຳຂອງອາຊຽນໄດ້ເປັນເອກະສັນກັນເຫັນວ່າ ອາຊຽນຄວນສືບຕໍ່ລົງເລິກແລະຂະຫຍາຍການພົວພັນຮ່ວມມືກັບປະເທດຄູ່ເຈລະຈາຕື່ມອີກ, ເພື່ອຂໍການສະຫນັບສະ ຫນູນຈາກປະເທດຄູ່ເຈລະຈາເພື່ອສ້າງສາປະຊາຄົມອາຊຽນແລະສົ່ງເສີມໃຫ້ບັນດາ ປະເທດຄູ່ເຈລະຈາຕັ້ງຫນ້າເຂົ້າຮ່ວມແກ້ໄຂແລະຮັບມືກັບບັນຫາແລະສິ່ງທ້າທາຍທີ່ມີລັກສະນະພາກພື້ນ, ແລະວາງທິດທາງໃຫມ່ເພື່ອຮ່ວມມືຕື່ມອີກໃນຕໍ່ຫນ້າ. ນອກນີ້, ຜູ່ນຳຂອງອາຊຽນໍ່ກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ປະເທດຄູ່ເຈລະຈາທີ່ປະກອບສ່ວນທີ່ມີລັກສະນະສ້າງສັນເຂົ້າໃນການພັດທະນາພາກພື້ນນີ້, ພ້ອມກັນນັ້ນ,ໂດຍອີງຕາມການຕັດສິນໃຈຂອງກອງປະຊຸມສຸດຍອດອາຊີຕາເວັນອອກຄັ້ງທີ່ແລ້ວ, ເຫັນດີໃຫ້ເຊື້ອເຊີນອາເມລິກາແລະຣັດເຊຍເຂົ້າເປັນປະເທດສະມາຊິກຂອງ ກອງປະຊຸມສຸດຍອດອາຊີຕາເວັນອອກຢ່າງເປັນທາງການນັບແຕ່ປີ 2011 ເປັນຕົ້ນໄປ.
ຜູ່ນຳຂອງປະເທດຕ່າງໆໃນອາຊຽນຍັງປຶກສາຫາລືກ່ຽວກັບການສະແດງບົດບາດຂອງອາຊຽນໃນກອງປະຊຸມສຸດຍອດຂອງກຸ່ມ20ປະເທດຫຼືG20 ທີ່ຈະຈັດຂຶ້ນຢູ່ສາທາລະນະລັດເກົາຫຼີ, ໃນຖານະທີ່ເປັນປະເທດປະທານຫມູນວຽນຂອງອາຊຽນປີ 2010, ຫວຽດນາມກໍ່ຈະສົ່ງຂ່າວຂອງອາຊຽນໃຫ້ກອງປະຊຸມສຸດຍອດຂອງG20,ເພື່ອຕ້ອງການໃຫ້ເພີ່ມຄວາມພະຍາຍາມອີກຫນຶ່ງເທົ່າເພື່ອຮັບປະກັນໃຫ້ພັດທະນາຢ່າງຕໍ່ເນື່ອງແລະສະຫມ່ຳສະເຫມີກັນ,ເພີ່ມທະວີບົດບາດຂອງອົງກອນເສດຖະກິດທີ່ພວມພັດທະນາແລະປະຕິຮູບລະບົບການເງິນສາກົນ.
